गणेशस्तोत्रम् भक्तमनोरथसिद्धिप्रदम् Bhaktamanorathasiddhipradam Ganeshastotram

श्रीगणेशाय नमः ॥स्कन्द उवाच ।नमस्ते योगरूपाय सम्प्रज्ञातशरीरिणे ।असम्प्रज्ञातमूर्ध्ने ते तयोर्योगमयाय च ॥ १॥

śrīgaṇeśāya namaḥ ||skanda uvāca |namaste yogarūpāya samprajñātaśarīriṇe |asamprajñātamūrdhne te tayoryogamayāya ca || 1||

वामाङ्गभ्रान्तिरूपा ते सिद्धिः सर्वप्रदा प्रभो ।भ्रान्तिधारकरूपा वै बुद्धिस्ते दक्षिणाङ्गके ॥ २॥

vāmāṅgabhrāntirūpā te siddhiḥ sarvapradā prabho |bhrāntidhārakarūpā vai buddhiste dakṣiṇāṅgake || 2||

मायासिद्धिस्तथा देवो मायिको बुद्धिसंज्ञितः ।तयोर्योगे गणेशान त्वं स्थितोऽसि नमोऽस्तु ते ॥ ३॥

māyāsiddhistathā devo māyiko buddhisaṃjñitaḥ |tayoryoge gaṇeśāna tvaṃ sthito'si namo'stu te || 3||

जगद्रूपो गकारश्च णकारो ब्रह्मवाचकः ।तयोर्योगे हि गणपो नाम तुभ्यं नमो नमः ॥ ४॥

jagadrūpo gakāraśca ṇakāro brahmavācakaḥ |tayoryoge hi gaṇapo nāma tubhyaṃ namo namaḥ || 4||

चतुर्विधं जगत्सर्वं ब्रह्म तत्र तदात्मकम् ।हस्ताश्चत्वार एवं ते चतुर्भुज नमोऽस्तु ते ॥ ५॥

caturvidhaṃ jagatsarvaṃ brahma tatra tadātmakam |hastāścatvāra evaṃ te caturbhuja namo'stu te || 5||

स्वसंवेद्यं च यद्ब्रह्म तत्र खेलकरो भवान् ।तेन स्वानन्दवासी त्वं स्वानन्दपतये नमः ॥ ६॥

svasaṃvedyaṃ ca yadbrahma tatra khelakaro bhavān |tena svānandavāsī tvaṃ svānandapataye namaḥ || 6||

द्वंद्वं चरसि भक्तानां तेषां हृदि समास्थितः ।चौरवत्तेन तेऽभूद्वै मूषको वाहनं प्रभो ॥ ७॥

dvaṃdvaṃ carasi bhaktānāṃ teṣāṃ hṛdi samāsthitaḥ |cauravattena te'bhūdvai mūṣako vāhanaṃ prabho || 7||

जगति ब्रह्मणि स्थित्वा भोगान्भुंक्षि स्वयोगगः ।जगद्भिर्ब्रह्मभिस्तेन चेष्टितं ज्ञायते न च ॥ ८॥

jagati brahmaṇi sthitvā bhogānbhuṃkṣi svayogagaḥ |jagadbhirbrahmabhistena ceṣṭitaṃ jñāyate na ca || 8||

चौरवद्भोगकर्ता त्वं तेन ते वाहनं परम् ।मूषको मूषकारूढो हेरम्बाय नमो नमः ॥ ९॥

cauravadbhogakartā tvaṃ tena te vāhanaṃ param |mūṣako mūṣakārūḍho herambāya namo namaḥ || 9||

किं स्तौमि त्वां गणाधीश योगशान्तिधरं परम् ।वेदादयो ययुः शान्तिमतो देवं नमाम्यहम् ॥ १०॥

kiṃ staumi tvāṃ gaṇādhīśa yogaśāntidharaṃ param |vedādayo yayuḥ śāntimato devaṃ namāmyaham || 10||

इति स्तोत्रं समाकर्ण्य गणेशस्तमुवाच ह ।वरं वृणु महाभाग दास्यामि दुर्लभं ह्यपि ॥ ११॥

iti stotraṃ samākarṇya gaṇeśastamuvāca ha |varaṃ vṛṇu mahābhāga dāsyāmi durlabhaṃ hyapi || 11||

त्वया कृतमिदं स्तोत्रं योगशान्तिप्रदं भवेत् ।मयि भक्तिकरं स्कंद सर्वसिद्धिप्रदं तथा ॥ १२॥

tvayā kṛtamidaṃ stotraṃ yogaśāntipradaṃ bhavet |mayi bhaktikaraṃ skaṃda sarvasiddhipradaṃ tathā || 12||

यं यमिच्छसि तं तं वै दास्यामि स्तोत्रयंत्रितः ।पठते शृण्वते नित्यं कार्तिकेय विशेषतः ॥ १३॥

yaṃ yamicchasi taṃ taṃ vai dāsyāmi stotrayaṃtritaḥ |paṭhate śṛṇvate nityaṃ kārtikeya viśeṣataḥ || 13||

इति श्रीमुद्गलपुराणन्तर्वर्ति स्कन्दकृतं गणेशस्तोत्रं समाप्तम् ।॥ मुद्गलपुराणं तृतीयः खण्डः । अध्यायः ५ । ३\।५। ३५४७॥– ॥ मुद्गलपुराणं तृतीयः खण्डः । अध्यायः ५ । ३।५। ३५-४७॥

iti śrīmudgalapurāṇantarvarti skandakṛtaṃ gaṇeśastotraṃ samāptam ||| mudgalapurāṇaṃ tṛtīyaḥ khaṇḍaḥ | adhyāyaḥ 5 | 3\|5| 3547||– || mudgalapurāṇaṃ tṛtīyaḥ khaṇḍaḥ | adhyāyaḥ 5 | 3|5| 35-47||