जगन्मातास्तुतिः विश्वकर्मकृता Vishvakarmakrita Jaganmata Stuti

विश्वकर्मोवाच ।नमामि विश्वेश्वरि ! विश्वरूपे ! ब्रह्मेन्द्ररुद्रार्यमविष्णुरूपे ! ।त्वया ततं विश्वमनन्तशक्ते ब्रह्मादिदेवैरभिनन्द्यरूपे ! ॥ ५॥

viśvakarmovāca |namāmi viśveśvari ! viśvarūpe ! brahmendrarudrāryamaviṣṇurūpe ! |tvayā tataṃ viśvamanantaśakte brahmādidevairabhinandyarūpe ! || 5||

त्वमेव विश्वं रजसा विधत्से सत्त्वेन मातः परिपासि तच्च ।त्वमेव सर्वं तमसाऽथ हंसि त्रैगुण्यमेतत् तव नित्यरूपम् ॥ ६॥

tvameva viśvaṃ rajasā vidhatse sattvena mātaḥ paripāsi tacca |tvameva sarvaṃ tamasā'tha haṃsi traiguṇyametat tava nityarūpam || 6||

त्वया हता दैत्यगणा विमुक्तिं ब्रह्मर्षयो ज्ञानबलात् प्रपन्नाः ।त्वमेव विष्णोरतुलाऽसि शक्तिः सर्वस्य हेतुः परमाऽसि माया ॥ ७॥

tvayā hatā daityagaṇā vimuktiṃ brahmarṣayo jñānabalāt prapannāḥ |tvameva viṣṇoratulā'si śaktiḥ sarvasya hetuḥ paramā'si māyā || 7||

सतोऽसतो याऽपि परासि शक्तिश्चराचरं त्वं विदधासि विश्वम् ।सम्मोह्य लोकान् सकलान् सुरेशान् काष्ठाकलाभिश्च ददासि भोगम् ॥ ८॥

sato'sato yā'pi parāsi śaktiścarācaraṃ tvaṃ vidadhāsi viśvam |sammohya lokān sakalān sureśān kāṣṭhākalābhiśca dadāsi bhogam || 8||

ये त्वां प्रपन्ना न भयन्तु तेषां मृत्योस्तस्था दैत्यकृतं कदाचित् ॥ ९॥

ye tvāṃ prapannā na bhayantu teṣāṃ mṛtyostasthā daityakṛtaṃ kadācit || 9||

त्वमेव लक्ष्मीः सुकृतामलक्ष्मीर्दुष्टात्मनां त्वं प्रमदास्वरूपा ।विद्यास्वरूपासि जगत्त्रये त्वं प्रभास्वरूपा शशिसूर्ययोत्स्वम् ॥ १०॥

tvameva lakṣmīḥ sukṛtāmalakṣmīrduṣṭātmanāṃ tvaṃ pramadāsvarūpā |vidyāsvarūpāsi jagattraye tvaṃ prabhāsvarūpā śaśisūryayotsvam || 10||

य आश्रितास्ते जगदाश्रयास्ते विपत्तिलेशो न च तेषु मातः ! ।त्वमेव विश्वेश्वरि ! विश्वमेतद्धरस्यथाप्यायसि वारिरूपा ॥ ११॥

ya āśritāste jagadāśrayāste vipattileśo na ca teṣu mātaḥ ! |tvameva viśveśvari ! viśvametaddharasyathāpyāyasi vārirūpā || 11||

अनादिमध्याऽनिधनाप्यगम्या हरीशलोकेशसुरेश्वराणाम् ।तेऽनुग्रहात् त्वां प्रभजन्ति भक्ता आनन्दरूपा निवसन्ति नाके ॥ १२॥

anādimadhyā'nidhanāpyagamyā harīśalokeśasureśvarāṇām |te'nugrahāt tvāṃ prabhajanti bhaktā ānandarūpā nivasanti nāke || 12||

अभक्तिकामान् विनिहंसि रुष्टा त्वामेव मातः ! शरणं प्रपन्नः ।धन्ये ममैते नयनेऽथ विद्या जनुश्च माता पितृवंश एव ॥ १३॥

abhaktikāmān vinihaṃsi ruṣṭā tvāmeva mātaḥ ! śaraṇaṃ prapannaḥ |dhanye mamaite nayane'tha vidyā januśca mātā pitṛvaṃśa eva || 13||

कुलं चधन्यं चरणौ त्वदीयौ दृष्टौ यतस्ते जगदम्बिके ! मया ।फलश्रुतिःक उवाच ।एवं स्तुता जगन्माता वरमस्मै न्यवेदयत् ॥ १४॥

kulaṃ cadhanyaṃ caraṇau tvadīyau dṛṣṭau yataste jagadambike ! mayā |phalaśrutiḥka uvāca |evaṃ stutā jaganmātā varamasmai nyavedayat || 14||

स वव्रे परमां भक्तिं सात तथेति तमब्रवीत् ।इदं स्तोत्रं पठेद् यस्तु सर्वान् कामाँल्लभेच्च सः ॥ १५॥

sa vavre paramāṃ bhaktiṃ sāta tatheti tamabravīt |idaṃ stotraṃ paṭhed yastu sarvān kāmām̐llabhecca saḥ || 15||

सर्वत्र विजयं पुष्टिं विद्यामायुः सुखं शिवम् ।इति विश्वकर्मकृता जगन्मातास्तुतिः सम्पूर्णा ॥॥ श्रीगणेशपुराणं क्रीडा (उत्तर)खण्डः । अध्यायः ९५ । २\।९५ ५१५॥– ॥ श्रीगणेशपुराणं क्रीडा (उत्तर)खण्डः । अध्यायः ९५ । २।९५ ५-१५॥

sarvatra vijayaṃ puṣṭiṃ vidyāmāyuḥ sukhaṃ śivam |iti viśvakarmakṛtā jaganmātāstutiḥ sampūrṇā |||| śrīgaṇeśapurāṇaṃ krīḍā (uttara)khaṇḍaḥ | adhyāyaḥ 95 | 2\|95 515||– || śrīgaṇeśapurāṇaṃ krīḍā (uttara)khaṇḍaḥ | adhyāyaḥ 95 | 2|95 5-15||