विशालाक्षीस्तोत्रम् व्यासकृतं Vishalakshi Stotram Vyasakritam

(सौरपुराणे अष्टमाध्यायान्तर्गतम्)व्यास उवाचविशालाक्षि नमस्तुभ्यं परब्रह्मात्मिके शिवे ।त्वमेव माता सर्वेषां ब्रह्मादीनां दिवौकसाम् ॥ १५॥

(saurapurāṇe aṣṭamādhyāyāntargatam)vyāsa uvācaviśālākṣi namastubhyaṃ parabrahmātmike śive |tvameva mātā sarveṣāṃ brahmādīnāṃ divaukasām || 15||

इच्छाशक्तिः क्रियाशक्तिर्ज्ञानशक्तिस्त्वमेव हि ।ऋज्वी कुण्डलिनी सुक्ष्मा योगसिद्धिप्रदायिनी ॥ १६॥

icchāśaktiḥ kriyāśaktirjñānaśaktistvameva hi |ṛjvī kuṇḍalinī sukṣmā yogasiddhipradāyinī || 16||

स्वाहा स्वधा महाविद्या मेधा लक्ष्मीः सरस्वती ।सती दाक्षायणी विद्या सर्वशक्तिमयी शिवा ॥ १७॥

svāhā svadhā mahāvidyā medhā lakṣmīḥ sarasvatī |satī dākṣāyaṇī vidyā sarvaśaktimayī śivā || 17||

अपर्णा चैकपर्णा च तथा चैकैकपाटला ।उमा हैमवती चापि कल्याणी चैव मातृका ॥ १८॥

aparṇā caikaparṇā ca tathā caikaikapāṭalā |umā haimavatī cāpi kalyāṇī caiva mātṛkā || 18||

ख्यातिः प्रज्ञा महाभागा लोके गौरीति विश्रुता ।गणाम्बिको महादेवी नन्दिनी जातवेदसी ॥ १९॥

khyātiḥ prajñā mahābhāgā loke gaurīti viśrutā |gaṇāmbiko mahādevī nandinī jātavedasī || 19||

सावित्री वरदा पुण्या पावनी लोकविश्रुता ।आयती नियती रौद्री दुर्गा भद्रा प्रमाथिनी ॥ २०॥

sāvitrī varadā puṇyā pāvanī lokaviśrutā |āyatī niyatī raudrī durgā bhadrā pramāthinī || 20||

कालरात्री महामाया रेवती भूतनायिका ।गौतमी कौशिकी चाऽऽर्था चण्डी कात्यायनी सती ॥ २१॥

kālarātrī mahāmāyā revatī bhūtanāyikā |gautamī kauśikī cā''rthā caṇḍī kātyāyanī satī || 21||

वृषध्वजा शूलधरा परमा ब्रह्मचारिणी ।महेन्द्रोपेन्द्रमाता च पार्वती सिंहवाहना ॥ २२॥

vṛṣadhvajā śūladharā paramā brahmacāriṇī |mahendropendramātā ca pārvatī siṃhavāhanā || 22||

एवं स्तुत्वा विशालाक्षी दिव्यैरेतैः सुनामभिः ।कृतकृत्योऽभवद्व्यासो वाराणस्यां द्विजोत्तमाः ॥ २३॥

evaṃ stutvā viśālākṣī divyairetaiḥ sunāmabhiḥ |kṛtakṛtyo'bhavadvyāso vārāṇasyāṃ dvijottamāḥ || 23||

वाराणस्यां विशालाक्षी गङ्गा विश्वेश्वरः शिवः ।भक्तिः पशुपतौ तत्र दुर्लभं हि चतुष्टयम् ॥ २४॥

vārāṇasyāṃ viśālākṣī gaṅgā viśveśvaraḥ śivaḥ |bhaktiḥ paśupatau tatra durlabhaṃ hi catuṣṭayam || 24||

यः पश्यति विशालाक्षीं स्नात्वा गङ्गाम्भसि द्विजाः ।अश्वमेधसहस्रस्य फलमाप्नोत्यनुत्तमम् ॥ २५॥

yaḥ paśyati viśālākṣīṃ snātvā gaṅgāmbhasi dvijāḥ |aśvamedhasahasrasya phalamāpnotyanuttamam || 25||

वाराणस्यारतु माहात्म्यमिति किञ्चिन्मयोदितम् ।यः पठेच्छृणुयाद्वाऽपि याति माहेश्वरं पदम् ॥ २६॥

vārāṇasyāratu māhātmyamiti kiñcinmayoditam |yaḥ paṭhecchṛṇuyādvā'pi yāti māheśvaraṃ padam || 26||

इति सौरपुराणे अष्टमाध्यायान्तर्गतं व्यासकृतंविशालाक्षीस्तोत्रं सम्पूर्णम् ।

iti saurapurāṇe aṣṭamādhyāyāntargataṃ vyāsakṛtaṃviśālākṣīstotraṃ sampūrṇam |