प्रज्ञापारमितास्तोत्रम् Prajnaparamita Stotram

ॐ नमः श्रीप्रज्ञापारमितायै ।निर्विकल्पे नमस्तुभ्यं प्रज्ञापारमितेऽमिते ।या त्वं सर्वानवद्याङ्गि निरवद्यैर्निरीक्ष्यसे ॥ १॥

oṃ namaḥ śrīprajñāpāramitāyai |nirvikalpe namastubhyaṃ prajñāpāramite'mite |yā tvaṃ sarvānavadyāṅgi niravadyairnirīkṣyase || 1||

आकाशमिव निर्लेपां निष्प्रपञ्चां निरक्षराम् ।यस्त्वां पश्यति भावेन स पश्यति तथागतम् ॥ २॥

ākāśamiva nirlepāṃ niṣprapañcāṃ nirakṣarām |yastvāṃ paśyati bhāvena sa paśyati tathāgatam || 2||

तव चार्ये गुणाढ्याया बुद्धस्य च जगद्गुरोः ।न पश्यन्त्यन्तरं सन्तश्चन्द्रचन्द्रिकयोरिव ॥ ३॥

tava cārye guṇāḍhyāyā buddhasya ca jagadguroḥ |na paśyantyantaraṃ santaścandracandrikayoriva || 3||

कृपात्मकां प्रपद्य त्वां बुद्धधर्मपुरस्सराम् ।सुखेनायान्ति माहात्म्यमतुलं भक्तवत्सले ॥ ४॥

kṛpātmakāṃ prapadya tvāṃ buddhadharmapurassarām |sukhenāyānti māhātmyamatulaṃ bhaktavatsale || 4||

सकृदप्याशये शुद्धे यस्त्वां विधिवदीक्ष्यते ।तेनापि नियतं सिद्धिः प्राप्यतेऽमोघदर्शने ॥ ५॥

sakṛdapyāśaye śuddhe yastvāṃ vidhivadīkṣyate |tenāpi niyataṃ siddhiḥ prāpyate'moghadarśane || 5||

सर्वेषामपि वीराणां परार्थे नियतात्मनाम् ।व्यापिका जगतीमेनां माता त्वमसि वत्सला ॥ ६॥

sarveṣāmapi vīrāṇāṃ parārthe niyatātmanām |vyāpikā jagatīmenāṃ mātā tvamasi vatsalā || 6||

ये बुद्धा लोकगुरवः पुत्रास्तव कृपालवः ।तेन त्वमसि कल्याणि सर्वसत्त्वपितामही ॥ ७॥

ye buddhā lokaguravaḥ putrāstava kṛpālavaḥ |tena tvamasi kalyāṇi sarvasattvapitāmahī || 7||

सर्वपारमिताभिस्त्वं निर्मलाभिरनिन्दिता ।चन्द्रलेखेव ताराभिरनुप्रोताऽसि सर्वतः ॥ ८॥

sarvapāramitābhistvaṃ nirmalābhiraninditā |candralekheva tārābhiranuprotā'si sarvataḥ || 8||

विनेयजनमासाद्य तत्र तत्र तथागतैः ।बहुरूपा त्वमेवैका नानानामभिरीक्ष्यसे ॥ ९॥

vineyajanamāsādya tatra tatra tathāgataiḥ |bahurūpā tvamevaikā nānānāmabhirīkṣyase || 9||

प्रभां प्राप्येव दीप्तांशोरवश्यायोदविन्दवः ।त्वां प्राप्य प्रलयं यान्ति दोषावादाश्च वादिनाम् ॥ १०॥

prabhāṃ prāpyeva dīptāṃśoravaśyāyodavindavaḥ |tvāṃ prāpya pralayaṃ yānti doṣāvādāśca vādinām || 10||

त्वमेव त्रासजननी बालानां भीमदर्शना ।आश्वासजननी चापि विदुषां सौम्यदर्शना ॥ ११॥

tvameva trāsajananī bālānāṃ bhīmadarśanā |āśvāsajananī cāpi viduṣāṃ saumyadarśanā || 11||

यस्य त्वय्यप्यभिष्वङ्गस्त्वन्नाथस्य न विद्यते ।तस्याम्ब! कथमन्यत्र रागद्वेषौ भविष्यतः ॥ १२॥

yasya tvayyapyabhiṣvaṅgastvannāthasya na vidyate |tasyāmba! kathamanyatra rāgadveṣau bhaviṣyataḥ || 12||

नागच्छसि कुतश्चित्त्वं कुत्रचिन्न च गच्छसि ।स्थानेष्वपि च सर्वेषु विद्वद्भिर्नोपलभ्यसे ॥ १३॥

nāgacchasi kutaścittvaṃ kutracinna ca gacchasi |sthāneṣvapi ca sarveṣu vidvadbhirnopalabhyase || 13||

ये त्वामेव न पश्यन्ति प्रपद्यन्ते च भावतः ।प्रपद्य च विमुच्यन्ते तदिदं महदद्भुतम् ॥ १४॥

ye tvāmeva na paśyanti prapadyante ca bhāvataḥ |prapadya ca vimucyante tadidaṃ mahadadbhutam || 14||

त्वामेव बध्यते पश्यन्नपश्यन्न विबध्यते ।त्वामेव मुच्यते पश्यन्नपश्यन्न विमुच्यते ॥ १५॥

tvāmeva badhyate paśyannapaśyanna vibadhyate |tvāmeva mucyate paśyannapaśyanna vimucyate || 15||

अहो विस्मयनीयासि गम्भीरासि यशस्विनी ।सुदुर्बोधासि मायेव दृश्यसे न च दृश्यसे ॥ १६॥

aho vismayanīyāsi gambhīrāsi yaśasvinī |sudurbodhāsi māyeva dṛśyase na ca dṛśyase || 16||

बुद्धैः प्रत्येकबुद्धैश्च श्रावकैश्च निषेविते ।मार्गस्त्वमेको मोक्षस्य नास्त्यन्य इति निश्चयः ॥ १७॥

buddhaiḥ pratyekabuddhaiśca śrāvakaiśca niṣevite |mārgastvameko mokṣasya nāstyanya iti niścayaḥ || 17||

व्यवहारं पुरस्कृत्य प्रज्ञप्त्यर्थ शरीरिणाम् ।कृपया लोकनाथैस्त्वमुच्यसे च न चोच्यसे ॥ १८॥

vyavahāraṃ puraskṛtya prajñaptyartha śarīriṇām |kṛpayā lokanāthaistvamucyase ca na cocyase || 18||

शक्तः कस्त्वामिह स्तोतुं निर्निमित्तां निरञ्जनाम् ।सर्वेषां विषयातीता या त्वं क्वचिदनिश्रिता ॥ १९॥

śaktaḥ kastvāmiha stotuṃ nirnimittāṃ nirañjanām |sarveṣāṃ viṣayātītā yā tvaṃ kvacidaniśritā || 19||

सत्येवमपि संवृत्या वाक्यार्थैर्वयमीदृशैः ।त्वामस्तुत्यामपि स्तुत्वा तुष्टुवन्तः सुनिर्वृताः ॥ २०॥

satyevamapi saṃvṛtyā vākyārthairvayamīdṛśaiḥ |tvāmastutyāmapi stutvā tuṣṭuvantaḥ sunirvṛtāḥ || 20||

प्रज्ञापारमितां स्तुत्वा यन्मयोपचितं शुभम् ।तेनास्त्वाशु जगत् कृत्स्नं प्रज्ञापारपरायणम् ॥ २१॥

prajñāpāramitāṃ stutvā yanmayopacitaṃ śubham |tenāstvāśu jagat kṛtsnaṃ prajñāpāraparāyaṇam || 21||

इति श्रीलक्षाभगवती कृतं प्रज्ञापारमितास्तोत्रं सम्पूर्णम् ॥

iti śrīlakṣābhagavatī kṛtaṃ prajñāpāramitāstotraṃ sampūrṇam ||