हाकिनीशक्तिकवचम् Hakinishakti Kavacham

अथ चतुरशीतितमः पटलःश्रीआनन्दभैरव उवाचअथादौ कथयानन्दभैरवि प्राणवल्लभे ।कवचं हाकिनीदेव्याः परमानन्दवर्धनम् ॥ ८४१॥

atha caturaśītitamaḥ paṭalaḥśrīānandabhairava uvācaathādau kathayānandabhairavi prāṇavallabhe |kavacaṃ hākinīdevyāḥ paramānandavardhanam || 841||

हेतुयुक्तं श्रद्धया मे करुणासागरस्थिते ।शीघ्रं विरचयानन्द कवचं सारमङ्गलम् ॥ ८४२॥

hetuyuktaṃ śraddhayā me karuṇāsāgarasthite |śīghraṃ viracayānanda kavacaṃ sāramaṅgalam || 842||

श्रीआनन्दभैरवी उवाचआदौ शृणु महावीर परमानन्दसागर ।कवचं हाकिनीदेव्याः संसारार्णवतारकम् ॥ ८४३॥

śrīānandabhairavī uvācaādau śṛṇu mahāvīra paramānandasāgara |kavacaṃ hākinīdevyāḥ saṃsārārṇavatārakam || 843||

यस्य स्मरणमात्रेण योगी योगस्थिरो भवेत् ।अन्तरिक्षे च भूलोके पाताले ये चराचराः ॥ ८४४॥

yasya smaraṇamātreṇa yogī yogasthiro bhavet |antarikṣe ca bhūloke pātāle ye carācarāḥ || 844||

स्तम्भिता वेपमानाः स्युर्विद्याज्ञानादिपाठतः ।कवचध्वनिमात्रेण भूतप्रेतपिशाचकाः ॥ ८४५॥

stambhitā vepamānāḥ syurvidyājñānādipāṭhataḥ |kavacadhvanimātreṇa bhūtapretapiśācakāḥ || 845||

विद्रवन्ति भयार्ता वै कालरुद्रप्रभावतः ।यथाऽऽलोको वह्निमध्ये स्थिरो भवति निश्चितम् ॥ ८४६॥

vidravanti bhayārtā vai kālarudraprabhāvataḥ |yathā''loko vahnimadhye sthiro bhavati niścitam || 846||

ॐ अस्याः श्रीहाकिनीदेव्याः सानन्दसारमङ्गलस्य महाकवचस्यसदाशिव ऋषिर्गायत्रीच्छन्दः श्रीहाकिनीपरदेवता क्लीं बीजंस्वाहा शक्तिः सिद्धलक्ष्मीमूलकीलकं देहान्तर्गतमहाकामसिद्।ह्ध्यर्थे जपे विनियोगः ।ॐ पातु शीर्षचक्रं मे क्लीं पातु भालमण्डलम् ।स्वमूलं पातु मे नित्यं लोचनत्रितयं मम ॥ ८४६॥

oṃ asyāḥ śrīhākinīdevyāḥ sānandasāramaṅgalasya mahākavacasyasadāśiva ṛṣirgāyatrīcchandaḥ śrīhākinīparadevatā klīṃ bījaṃsvāhā śaktiḥ siddhalakṣmīmūlakīlakaṃ dehāntargatamahākāmasid|hdhyarthe jape viniyogaḥ |oṃ pātu śīrṣacakraṃ me klīṃ pātu bhālamaṇḍalam |svamūlaṃ pātu me nityaṃ locanatritayaṃ mama || 846||

गण्डयुग्मं सदा पातु वाग्भवाद्या मनोरमा ।श्रीं ह्रीं पातु कर्णयुग्मं हाकिनी परदेवता ॥ ८४७॥

gaṇḍayugmaṃ sadā pātu vāgbhavādyā manoramā |śrīṃ hrīṃ pātu karṇayugmaṃ hākinī paradevatā || 847||

महाविद्या सदा पातु ममोष्ठाधरसम्पुटम् ।दन्तावलियुगं पातु ह्रीं श्रीं स्वाहा परेश्वरी ॥ ८४९॥

mahāvidyā sadā pātu mamoṣṭhādharasampuṭam |dantāvaliyugaṃ pātu hrīṃ śrīṃ svāhā pareśvarī || 849||

क्लीं ह्रीं श्रीं हाकिनीदेवी स्वाहा पातु रसप्रियाम् ।सृक्कनीं पातु सततं शक्तिः कामवरा मधुः ॥ ८४१०॥

klīṃ hrīṃ śrīṃ hākinīdevī svāhā pātu rasapriyām |sṛkkanīṃ pātu satataṃ śaktiḥ kāmavarā madhuḥ || 8410||

स्वाहा पातु शिखा शक्तिर्भ्रूमध्यं पातु सर्वदा ।हाकिनी मण्डलं पातु परानाथेश्वरी परा ॥ ८४११॥

svāhā pātu śikhā śaktirbhrūmadhyaṃ pātu sarvadā |hākinī maṇḍalaṃ pātu parānātheśvarī parā || 8411||

सुन्दरी सर्वदा पातु द्विदलं कामसुन्दरी ।अमृताख्या सदा पातु भ्रूप्रकाशस्थलं मम ॥ ८४१२॥

sundarī sarvadā pātu dvidalaṃ kāmasundarī |amṛtākhyā sadā pātu bhrūprakāśasthalaṃ mama || 8412||

वह्निज्वाला सदा पातु भ्रूश्मशानस्थलं मम ।सुरभी पातु मायास्त्रं स्वाहा मे भ्रूगतच्छदम् ॥ ८४१३॥

vahnijvālā sadā pātu bhrūśmaśānasthalaṃ mama |surabhī pātu māyāstraṃ svāhā me bhrūgatacchadam || 8413||

त्रिकोणं पातु कामाख्या हाकिनी परमेश्वरी ।त्रिपुरा सुन्दरी पातु द्विषट्कोणं सदा मम ॥ ८४१४॥

trikoṇaṃ pātu kāmākhyā hākinī parameśvarī |tripurā sundarī pātu dviṣaṭkoṇaṃ sadā mama || 8414||

हिङ्गुलादेश्वरी पातु षट्कोणबिन्दुमण्डलम् ।सप्तभूबिम्बमापातु भूतलान्तःप्रकाशिनी ॥ ८४१५॥

hiṅgulādeśvarī pātu ṣaṭkoṇabindumaṇḍalam |saptabhūbimbamāpātu bhūtalāntaḥprakāśinī || 8415||

महाशतदलं पातु शतकोटिमरुप्रिया ।गुरुविद्यामयी पातु वाणी मे मत्तगामिनी ॥ ८४१६॥

mahāśatadalaṃ pātu śatakoṭimarupriyā |guruvidyāmayī pātu vāṇī me mattagāminī || 8416||

चतुर्द्वारं सर्वचक्रं पातु मे परमेश्वरी ।अत्यन्तदुःखहन्त्री मे मनश्चक्रं सदाऽवतु ॥ ८४१७॥

caturdvāraṃ sarvacakraṃ pātu me parameśvarī |atyantaduḥkhahantrī me manaścakraṃ sadā'vatu || 8417||

शब्दब्रह्ममयी पातु चन्द्रमण्डलमेव मे ।अकालतारिणी दुर्गा सर्गस्थित्यन्तकारिणी ॥ ८४१८॥

śabdabrahmamayī pātu candramaṇḍalameva me |akālatāriṇī durgā sargasthityantakāriṇī || 8418||

महापुरुषसंस्थानं हाकिनी मण्डलं मम ।पातु वर्णमयी तारा चन्द्रार्धं मे सुरेश्वरी ॥ ८४१९॥

mahāpuruṣasaṃsthānaṃ hākinī maṇḍalaṃ mama |pātu varṇamayī tārā candrārdhaṃ me sureśvarī || 8419||

उन्मनीनगरं पातु वह्निकुण्डनिवासिनी ।मदिरा पातु सततं भालं विषहरा मम ॥ ८४२०॥

unmanīnagaraṃ pātu vahnikuṇḍanivāsinī |madirā pātu satataṃ bhālaṃ viṣaharā mama || 8420||

धर्मदा ज्ञानदा पातु धर्मज्ञानपदं मम ।तालपत्नीश्वरी पातु अमृतानन्दकारिणी ॥ ८४२१॥

dharmadā jñānadā pātu dharmajñānapadaṃ mama |tālapatnīśvarī pātu amṛtānandakāriṇī || 8421||

वैराग्यनिकरं पातु बिन्दुस्थानं महाबला ।त्रितारी कूटशक्तिर्मे सदा पातु विशुद्धकम् ॥ ८४२२॥

vairāgyanikaraṃ pātu bindusthānaṃ mahābalā |tritārī kūṭaśaktirme sadā pātu viśuddhakam || 8422||

शाकिनीशं सदा पातु शाकिनी कुलभैरवी ।सप्तद्वीपेश्वरी पातु मम षोडशपङ्कजम् ॥ ८४२३॥

śākinīśaṃ sadā pātu śākinī kulabhairavī |saptadvīpeśvarī pātu mama ṣoḍaśapaṅkajam || 8423||

शाकिनी भैरवी पातु चण्डदुर्गा सरस्वती ।कुमारी कुलजा लक्ष्मीः सिद्धार्थं मे सदाऽवतु ॥ ८४२४॥

śākinī bhairavī pātu caṇḍadurgā sarasvatī |kumārī kulajā lakṣmīḥ siddhārthaṃ me sadā'vatu || 8424||

हृदयं पातु सततं शाकिनी परमेश्वरी ।बीजरूपा सदा देवी महामहिषघातिनी ॥ ८४२५॥

hṛdayaṃ pātu satataṃ śākinī parameśvarī |bījarūpā sadā devī mahāmahiṣaghātinī || 8425||

उदरं पातु सततं योगिनीकोटिभिः सह ।उमा महेश्वरी पातु प्रचण्डा मम पृष्ठकम् ॥ ८४२६॥

udaraṃ pātu satataṃ yoginīkoṭibhiḥ saha |umā maheśvarī pātu pracaṇḍā mama pṛṣṭhakam || 8426||

चामुण्डा भैरवी बाला पार्श्वयुग्मं सदाऽवतु ।परमा चेश्वरी पातु देवमाता स्तनद्वयम् ॥ ८४२७॥

cāmuṇḍā bhairavī bālā pārśvayugmaṃ sadā'vatu |paramā ceśvarī pātu devamātā stanadvayam || 8427||

सौभाग्यहाकिनी देवी पायात्तु यक्षसः प्रियम् ।आद्या देवी शिखारूपा भुजयुग्मं सदाऽवतु ॥ ८४२८॥

saubhāgyahākinī devī pāyāttu yakṣasaḥ priyam |ādyā devī śikhārūpā bhujayugmaṃ sadā'vatu || 8428||

सर्वापराधहर्त्री मे कामविद्या दशच्छदम् ।मणिपूरं सदा पातु दशवर्णात्मिका शिवा ॥ ८४२९॥

sarvāparādhahartrī me kāmavidyā daśacchadam |maṇipūraṃ sadā pātu daśavarṇātmikā śivā || 8429||

नाभिचक्रं सदा पातु लाकिनी पद्मवासिनी ।नित्यदेशदलं पातु पार्वती वेदपालिनी ॥ ८४३०॥

nābhicakraṃ sadā pātu lākinī padmavāsinī |nityadeśadalaṃ pātu pārvatī vedapālinī || 8430||

महारुद्रेश्वरी पातु पीठरूपं मणिं मम ।तेजोमण्डलमापातु रुद्राणी शूलधारिणी ॥ ८४३१॥

mahārudreśvarī pātu pīṭharūpaṃ maṇiṃ mama |tejomaṇḍalamāpātu rudrāṇī śūladhāriṇī || 8431||

अभया सर्वदा पातु योगविद्या नितम्बकम् ।नितम्बाधारचक्रं मे पातु शैलं नितम्बिनीम् ॥ ८४३२॥

abhayā sarvadā pātu yogavidyā nitambakam |nitambādhāracakraṃ me pātu śailaṃ nitambinīm || 8432||

तरुणी मन्त्रजालस्था वैष्णवी लिङ्गमण्डलम् ।सदा पातु हाकिनीशा महाविष्णुस्थलं मम ॥ ८४३३॥

taruṇī mantrajālasthā vaiṣṇavī liṅgamaṇḍalam |sadā pātu hākinīśā mahāviṣṇusthalaṃ mama || 8433||

वैष्णवी ललिता माया रमादेवी कटिं मम ।स्वाधिष्ठानं सदा पातु गुह्यरूपा सरस्वती ॥ ८४३४॥

vaiṣṇavī lalitā māyā ramādevī kaṭiṃ mama |svādhiṣṭhānaṃ sadā pātu guhyarūpā sarasvatī || 8434||

भवानी भगवत्पत्नी श्मशानकालिका गुदम् ।पातु मे रणमातङ्गी राकिनी कुलमण्डलम् ॥ ८४३५॥

bhavānī bhagavatpatnī śmaśānakālikā gudam |pātu me raṇamātaṅgī rākinī kulamaṇḍalam || 8435||

व्यक्ताव्यक्तस्वरूपा मे मूलाधारं सदाऽवतु ।चतुर्दलं चतुर्वर्णं पातु मे ज्ञानकुण्डली ॥ ८४३६॥

vyaktāvyaktasvarūpā me mūlādhāraṃ sadā'vatu |caturdalaṃ caturvarṇaṃ pātu me jñānakuṇḍalī || 8436||

तपस्विनी सदा पातु पावनी मूलमावतु ।रतिका घटिका वेश्या धरिणी कामसुन्दरी ॥ ८४३७॥

tapasvinī sadā pātu pāvanī mūlamāvatu |ratikā ghaṭikā veśyā dhariṇī kāmasundarī || 8437||

वह्निकान्ता सदा पातु ममोरुयुगलं सदा ।उल्कामुखी क्षेत्रसिद्धा जङ्घायुग्मं सदाऽवतु ॥ ८४३८॥

vahnikāntā sadā pātu mamoruyugalaṃ sadā |ulkāmukhī kṣetrasiddhā jaṅghāyugmaṃ sadā'vatu || 8438||

बालामुखी पातु सम्पत्प्रदा श्रीकुलभैरवी ।पादाम्बुजद्वयं पातु सर्वाङ्गं परहाकिनी ॥ ८४३९॥

bālāmukhī pātu sampatpradā śrīkulabhairavī |pādāmbujadvayaṃ pātu sarvāṅgaṃ parahākinī || 8439||

मदना मेदिनी धन्या चामुण्डा मुण्डमालिनी ।रमा कामकला ज्येष्ठा तथाज्ञा रतिसुन्दरी ॥ ८४४०॥

madanā medinī dhanyā cāmuṇḍā muṇḍamālinī |ramā kāmakalā jyeṣṭhā tathājñā ratisundarī || 8440||

मनोयोगा सदा पातु निर्मला विमलामला ।काञ्चनी बगला रात्रिः पञ्चमी रतिसुन्दरी ॥ ८४४१॥

manoyogā sadā pātu nirmalā vimalāmalā |kāñcanī bagalā rātriḥ pañcamī ratisundarī || 8441||

सर्वत्र सर्वदा पातु योगाद्या प्रेमकातरा ।पर्वते विपिने शून्ये रणे घोरतरे भवे ॥ ८४४२॥

sarvatra sarvadā pātu yogādyā premakātarā |parvate vipine śūnye raṇe ghoratare bhave || 8442||

श्मशानवासिनी पातु सर्ववाहनवाहना ।सर्वास्त्रधारिणी पातु पञ्चमी पञ्चमप्रिया ॥ ८४४३॥

śmaśānavāsinī pātu sarvavāhanavāhanā |sarvāstradhāriṇī pātu pañcamī pañcamapriyā || 8443||

चतुर्भुजा सदा पातु हाकिनी देहदेवता ।सहस्रायुतकोटीन्दुवदना परमेश्वरी ॥ ८४४४॥

caturbhujā sadā pātu hākinī dehadevatā |sahasrāyutakoṭīnduvadanā parameśvarī || 8444||

योगिनीभिः सदा पातु सर्वदेशे तु सर्वदा ।अनन्ता सर्वदा पातु महाविघ्नविनाशिनी ॥ ८४४५॥

yoginībhiḥ sadā pātu sarvadeśe tu sarvadā |anantā sarvadā pātu mahāvighnavināśinī || 8445||

जले चानलगर्ते वा व्याधिभीतौ रिपोर्भये ।व्याघ्रभीतौ चौरभीतौ महोन्मादभयादिषु ॥ ८४४६॥

jale cānalagarte vā vyādhibhītau riporbhaye |vyāghrabhītau caurabhītau mahonmādabhayādiṣu || 8446||

ग्रहभीतौ देवभीतौ दानवाद्रिभयेषु च ।अभया निर्भया भीतिहारिणी भयनाशिनी ॥ ८४४७॥

grahabhītau devabhītau dānavādribhayeṣu ca |abhayā nirbhayā bhītihāriṇī bhayanāśinī || 8447||

महाभीमा भद्रकाली भैरवी मारकामला ।महाभूतेश्वरी माता जगद्धात्री सदाऽवतु ॥ ८४४८॥

mahābhīmā bhadrakālī bhairavī mārakāmalā |mahābhūteśvarī mātā jagaddhātrī sadā'vatu || 8448||

सर्वदेशे सर्वपीठे मातृका पातु नित्यशः ।इत्येतत् कवचं सर्वसिद्धिदं दुःखनाशनम् ॥ ८४४९॥

sarvadeśe sarvapīṭhe mātṛkā pātu nityaśaḥ |ityetat kavacaṃ sarvasiddhidaṃ duḥkhanāśanam || 8449||

कथितं तव यत्नेन महाकाल प्रभो ! हर ।यः पठेत् प्रातरुत्थाय कवचं देवदुर्लभम् ॥ ८४५०॥

kathitaṃ tava yatnena mahākāla prabho ! hara |yaḥ paṭhet prātarutthāya kavacaṃ devadurlabham || 8450||

स भवेत् कालजेताऽपि स देवो न तु मानुषः ।ध्यानात्मा साधकः श्रीमान् परमात्मा भवेत् स्वयम् ॥ ८४५१॥

sa bhavet kālajetā'pi sa devo na tu mānuṣaḥ |dhyānātmā sādhakaḥ śrīmān paramātmā bhavet svayam || 8451||

आज्ञापद्मे स्थिरो भूत्वा नित्यो भवति निश्चितम् ।अकालमृत्युहरणं संसारार्णवतारणम् ॥ ८४५२॥

ājñāpadme sthiro bhūtvā nityo bhavati niścitam |akālamṛtyuharaṇaṃ saṃsārārṇavatāraṇam || 8452||

कवचं देवदेवेश चानन्दसारमङ्गलम् ।यः पठेदतिभक्त्या च जीवन्मुक्तो भवेद् ध्रुवम् ॥ ८४५३॥

kavacaṃ devadeveśa cānandasāramaṅgalam |yaḥ paṭhedatibhaktyā ca jīvanmukto bhaved dhruvam || 8453||

चतुर्विधा मुक्तिमाला तद्गले संस्थिरा ध्रुवम् ।भवन्ति योगमुख्यानां गुरुर्वेदान्तपारगः ॥ ८४५४॥

caturvidhā muktimālā tadgale saṃsthirā dhruvam |bhavanti yogamukhyānāṃ gururvedāntapāragaḥ || 8454||

सर्वशास्त्रार्थवेत्ता स्याद् यामलार्थज्ञ ईश्वरः ।शान्तिं विद्यां प्रतिष्ठाञ्च निवृत्तिं प्राप्य निर्मलः ॥ ८४५५॥

sarvaśāstrārthavettā syād yāmalārthajña īśvaraḥ |śāntiṃ vidyāṃ pratiṣṭhāñca nivṛttiṃ prāpya nirmalaḥ || 8455||

योगात्मा चेश्वरत्वं हि प्राप्नोति नात्र संशयः ।कुजे वा शनिवारे वा सङ्क्रान्त्यां रविवासरे ॥ ८४५६॥

yogātmā ceśvaratvaṃ hi prāpnoti nātra saṃśayaḥ |kuje vā śanivāre vā saṅkrāntyāṃ ravivāsare || 8456||

अमावास्यासु रिक्तायां धारयेत् कवचं शुभम् ।पुरुषो दक्षिणे हस्ते वामा वामभुजे तथा ॥ ८४५७॥

amāvāsyāsu riktāyāṃ dhārayet kavacaṃ śubham |puruṣo dakṣiṇe haste vāmā vāmabhuje tathā || 8457||

सर्वसिद्धिमवाप्नोति यद्यन्मनसि वर्तते ।गोरोचनाकुङ्कुमेन चालक्तेन विलिख्य च ॥ ८४५८॥

sarvasiddhimavāpnoti yadyanmanasi vartate |gorocanākuṅkumena cālaktena vilikhya ca || 8458||

अवश्यं सिद्धिमाप्नोति हाकिनीयोगजापतः ॥ ८४५९॥

avaśyaṃ siddhimāpnoti hākinīyogajāpataḥ || 8459||

इति श्रीरुद्रयामले उत्तरतन्त्रे महातन्त्रोद्दीपने सिद्धमन्त्रप्रकरणेभैरवीभैरवसंवादे हाकिनीकवचं नाम चतुरशीतितमः पटलः ॥ ८४॥

iti śrīrudrayāmale uttaratantre mahātantroddīpane siddhamantraprakaraṇebhairavībhairavasaṃvāde hākinīkavacaṃ nāma caturaśītitamaḥ paṭalaḥ || 84||

ऱुद्रयमल उत्तरतन्त्र।

rudrayamala uttaratantra|