गोस्तवनम् Go Stavanam

अवतारो गवां श्रेष्ठः सर्वेषु भुवि जन्तुषु ।यतस्तासां विकारोऽपि ह्युपकाराय जायते ॥ १॥

avatāro gavāṃ śreṣṭhaḥ sarveṣu bhuvi jantuṣu |yatastāsāṃ vikāro'pi hyupakārāya jāyate || 1||

गच्छन्त्यः संस्थिताः सुप्ताः शकृन्मूत्रकृतोऽपि वा ।गावः पुनन्ति लोकांस्त्रीनतो देवत्वमागताः ॥ २॥

gacchantyaḥ saṃsthitāḥ suptāḥ śakṛnmūtrakṛto'pi vā |gāvaḥ punanti lokāṃstrīnato devatvamāgatāḥ || 2||

शुभ्राः पीतास्तथा श्यामाश्चित्रा वै लोहितास्तथा ।कुर्वते नृहृदि स्थानं गावः प्रकृतिशोभनाः ॥ ३॥

śubhrāḥ pītāstathā śyāmāścitrā vai lohitāstathā |kurvate nṛhṛdi sthānaṃ gāvaḥ prakṛtiśobhanāḥ || 3||

लोकेऽमृतं यथा क्षीरं गोमयं पावनं परम् ।आयुर्घृतं तथा चैव मूत्रं रोगविनाशनम् ॥ ४॥

loke'mṛtaṃ yathā kṣīraṃ gomayaṃ pāvanaṃ param |āyurghṛtaṃ tathā caiva mūtraṃ rogavināśanam || 4||

अपूर्वं पञ्चगव्यं च तीर्थं कल्मषनाशनम् ।एषा परम्परा भव्या दुर्लभा सुरभिं विना ॥ ५॥

apūrvaṃ pañcagavyaṃ ca tīrthaṃ kalmaṣanāśanam |eṣā paramparā bhavyā durlabhā surabhiṃ vinā || 5||

प्रत्यक्ष देवता गावो गावो वै लोकमातरः ।तस्मादर्च्यतमा एता रक्षणीयाः प्रयत्नतः ॥ ६॥

pratyakṣa devatā gāvo gāvo vai lokamātaraḥ |tasmādarcyatamā etā rakṣaṇīyāḥ prayatnataḥ || 6||

गोदानं च परं दानं गोधनं च परं धनम् ।गोभक्तिः परमा सिद्धिर्गोसेवा परमा गतिः ॥ ७॥

godānaṃ ca paraṃ dānaṃ godhanaṃ ca paraṃ dhanam |gobhaktiḥ paramā siddhirgosevā paramā gatiḥ || 7||

गावो यत्र हि पूज्यन्ते पाल्यन्ते चैव यत्नतः ।गोपालो भगवांस्तत्र मुदा वसति नित्यशः ॥ ८॥

gāvo yatra hi pūjyante pālyante caiva yatnataḥ |gopālo bhagavāṃstatra mudā vasati nityaśaḥ || 8||

गावो मे पुरतः सन्तु गावो मे सन्तु पृष्ठतः ।गावो मे सर्वतः सन्तु गवां मध्ये वसान्यहम् ॥ ९॥

gāvo me purataḥ santu gāvo me santu pṛṣṭhataḥ |gāvo me sarvataḥ santu gavāṃ madhye vasānyaham || 9||

गां विना न हि मे शान्तिर्भवेदिह परत्र च ।इति सञ्चिन्त्य भगवान् गोलोकमधितिष्ठति ॥ १०॥

gāṃ vinā na hi me śāntirbhavediha paratra ca |iti sañcintya bhagavān golokamadhitiṣṭhati || 10||

अस्ति गोसदृशं नैव त्रिषु लोकेषु किञ्चन ।यद्वशे भगवान् विष्णुः पश्चाद्धावति नित्यशः ॥ ११॥

asti gosadṛśaṃ naiva triṣu lokeṣu kiñcana |yadvaśe bhagavān viṣṇuḥ paścāddhāvati nityaśaḥ || 11||

गोमातस्त्वं हि धन्यासि धन्यं च तव जीवनम् ।धन्याश्च ते नरा लोके त्वत्सेवाव्रतिनश्च ये ॥ १२॥

gomātastvaṃ hi dhanyāsi dhanyaṃ ca tava jīvanam |dhanyāśca te narā loke tvatsevāvratinaśca ye || 12||

इति गोस्तवनं सम्पूर्णम् ।(रचयिता पं\। श्रीगौरीशङ्करजी द्विवेदी, साहित्यरत्न)

iti gostavanaṃ sampūrṇam |(racayitā paṃ\| śrīgaurīśaṅkarajī dvivedī, sāhityaratna)