दत्तात्रेयवर्मस्तोत्रम् अद्वैतम् Advaitam Dattatreyavarmastotram

ध्यात्वा भक्ताभयकरं समष्टिव्यष्टिचालकम् ।दत्तात्रेयं पठेद्वर्म सर्वरक्षाकरं परम् ॥ १॥

dhyātvā bhaktābhayakaraṃ samaṣṭivyaṣṭicālakam |dattātreyaṃ paṭhedvarma sarvarakṣākaraṃ param || 1||

स्वसत्तनुप्रणामे मे प्रणमय्य शिरोऽवतु ।व्यर्थात्तिरः पुरःकम्पाद् दुर्भराच्च द्युमूर्धकः ॥ २॥

svasattanupraṇāme me praṇamayya śiro'vatu |vyarthāttiraḥ puraḥkampād durbharācca dyumūrdhakaḥ || 2||

स्वपादतुलसीगन्धप्रीतिदानेन पातु मे ।नासत्यनासिको घ्राणमितरघ्राणतर्पणात् ॥ ३॥

svapādatulasīgandhaprītidānena pātu me |nāsatyanāsiko ghrāṇamitaraghrāṇatarpaṇāt || 3||

नेत्रे स्वसाधुमूर्तीर्मे भास्कराक्षः प्रदर्श्य च ।रूपलावण्यसौन्दर्यवीक्षणात्परिरक्षतु ॥ ४॥

netre svasādhumūrtīrme bhāskarākṣaḥ pradarśya ca |rūpalāvaṇyasaundaryavīkṣaṇātparirakṣatu || 4||

सुश्लोको दिक्ष्रुतिः श्रोत्रे श्रावयित्वा स्वकं यशः ।श्राव्यं च द्विविधं पातु शब्दात्कर्णकषायदात् ॥ ५॥

suśloko dikṣrutiḥ śrotre śrāvayitvā svakaṃ yaśaḥ |śrāvyaṃ ca dvividhaṃ pātu śabdātkarṇakaṣāyadāt || 5||

उच्चारयित्वा मधुरान्स्वगुणान्लोकशोकहान् ।जिह्वां पावकवाक्पातु रसास्वाददुरुक्तितः ॥ ६॥

uccārayitvā madhurānsvaguṇānlokaśokahān |jihvāṃ pāvakavākpātu rasāsvādaduruktitaḥ || 6||

स्वालयक्षेत्रतीर्थेषु गमयित्वा पदौ मम ।उरुक्रमपदः पातु व्यर्थपर्यटनादकात् ॥ ७॥

svālayakṣetratīrtheṣu gamayitvā padau mama |urukramapadaḥ pātu vyarthaparyaṭanādakāt || 7||

रजोहरः स्वसत्पादरजस्तीर्थाप्लुतानि मे ।कृत्वाङ्गानि हरिः पातु सुस्पर्शालेपनादितः ॥ ८॥

rajoharaḥ svasatpādarajastīrthāplutāni me |kṛtvāṅgāni hariḥ pātu susparśālepanāditaḥ || 8||

चन्द्रचेताः स्वमननाह्लाददानेन मे मनः ।दुःखदाद्यन्तवत्स्पर्शसङ्कल्पायासतोऽवतु ॥ ९॥

candracetāḥ svamananāhlādadānena me manaḥ |duḥkhadādyantavatsparśasaṅkalpāyāsato'vatu || 9||

चित्तं साक्ष्यनुसन्धानं कारयित्वा पुमीश्वरः ।मरीचिकोपमद्वैतानुसन्धानात्सदावतु ॥ १०॥

cittaṃ sākṣyanusandhānaṃ kārayitvā pumīśvaraḥ |marīcikopamadvaitānusandhānātsadāvatu || 10||

ग्राहयित्वातीन्द्रियकं बुद्धिं मे निश्चयात्मिकाम् ।दुस्तर्कात्पातु जीवात्मा धीव्याप्त्यस्ततमाः स्वभूः ॥ ११॥

grāhayitvātīndriyakaṃ buddhiṃ me niścayātmikām |dustarkātpātu jīvātmā dhīvyāptyastatamāḥ svabhūḥ || 11||

हरो देहेन्द्रियप्राणमनोधीभ्यो विलक्षणः ।सोऽहमित्यनुभाव्याहङ्कारात्पातु दुराग्रहात् ॥ १२॥

haro dehendriyaprāṇamanodhībhyo vilakṣaṇaḥ |so'hamityanubhāvyāhaṅkārātpātu durāgrahāt || 12||

सर्वाशाभ्यः सदा माव्याद्विष्णुः सर्वात्मकोऽपि च ।वर्जितं कवचेनाव्याद्रक्षाहीनं च यत्स्थलम् ॥ १३॥

sarvāśābhyaḥ sadā māvyādviṣṇuḥ sarvātmako'pi ca |varjitaṃ kavacenāvyādrakṣāhīnaṃ ca yatsthalam || 13||

यो नह्यादात्मनीदं सन्सनद्धः कवची भवेत् ।साम्राज्यसंस्थः कामाद्यरीन् जित्वा द्वैतसंविदि ॥ १४॥

yo nahyādātmanīdaṃ sansanaddhaḥ kavacī bhavet |sāmrājyasaṃsthaḥ kāmādyarīn jitvā dvaitasaṃvidi || 14||

संसारदुःस्वप्नहरं नष्टात्मधनदायकम् ।त्रिदोषोत्पातशमनं दुर्दृग्बाधादिवारणम् ॥ १५॥

saṃsāraduḥsvapnaharaṃ naṣṭātmadhanadāyakam |tridoṣotpātaśamanaṃ durdṛgbādhādivāraṇam || 15||

यस्याङ्गे वर्म कण्ठे च माला गीतायुधं करे ।जराप्रदर्शितपथं प्रचण्डामयसैनिकम् ॥ १६॥

yasyāṅge varma kaṇṭhe ca mālā gītāyudhaṃ kare |jarāpradarśitapathaṃ pracaṇḍāmayasainikam || 16||

प्राप्तं मृत्युरिपुं चाप्यविगणय्य स एव हि ।पदाक्रम्य सुखी यायात्प्रसिद्धं ब्रह्मलोककम् ॥ १७॥

prāptaṃ mṛtyuripuṃ cāpyavigaṇayya sa eva hi |padākramya sukhī yāyātprasiddhaṃ brahmalokakam || 17||

इति श्री परमपूजनीय श्रीवासुदेवानन्दसरस्वतीविरचितंश्रीदत्तात्रेयवर्माख्यकवचं सम्पूर्णम् ॥

iti śrī paramapūjanīya śrīvāsudevānandasarasvatīviracitaṃśrīdattātreyavarmākhyakavacaṃ sampūrṇam ||