कालीस्तुतिः ब्रह्मप्रोक्ता २ Brahmaprokta Kali Stuti (2)

ब्रह्मोवाचनमो नमस्ते जगतः प्रवृत्तिनिवृत्तिरूपे स्थितिसर्गरूपे ।चराचराणां भवती च शक्तिः सनातनी सर्वविमोहनीति ॥ ५४॥

brahmovācanamo namaste jagataḥ pravṛttinivṛttirūpe sthitisargarūpe |carācarāṇāṃ bhavatī ca śaktiḥ sanātanī sarvavimohanīti || 54||

या श्रीः सदा केशवमूर्तिमाया विश्वम्भरा या सकलं बिभर्ति ।ह्रीर्योगिनी या महिता मनोज्ञा सा त्वं नमस्ते परमात्मसारे ॥ ५५॥

yā śrīḥ sadā keśavamūrtimāyā viśvambharā yā sakalaṃ bibharti |hrīryoginī yā mahitā manojñā sā tvaṃ namaste paramātmasāre || 55||

यामादिपूर्वे हृदि योगिनो यां विभावयन्ति प्रमितिप्रतीताम् ।प्रकाशशुद्धादियुतां विराणां सा त्वं हि विद्या विविधावलम्बा ॥ ५६॥

yāmādipūrve hṛdi yogino yāṃ vibhāvayanti pramitipratītām |prakāśaśuddhādiyutāṃ virāṇāṃ sā tvaṃ hi vidyā vividhāvalambā || 56||

कूटस्थमव्यक्तमचिन्त्यरूपं त्वं बिभ्रती कालमयं जगन्ति ।विकारबीजं प्रकरोषि नित्यं प्रत्नानि न्यूत्नान्यथ मध्यमानि ॥ ५७॥

kūṭasthamavyaktamacintyarūpaṃ tvaṃ bibhratī kālamayaṃ jaganti |vikārabījaṃ prakaroṣi nityaṃ pratnāni nyūtnānyatha madhyamāni || 57||

सत्त्वं रजोऽथो तम इत्यमीषां विकारहीना समवस्थितिर्या ।सा त्वं गुणानां जगदेकहेतुर्बाह्यान्तरालं भवतीव याति ॥ ५८॥

sattvaṃ rajo'tho tama ityamīṣāṃ vikārahīnā samavasthitiryā |sā tvaṃ guṇānāṃ jagadekaheturbāhyāntarālaṃ bhavatīva yāti || 58||

अशेषजगतां बीजे ज्ञेयज्ञानस्वरूपिणि ।जगद्धिताय जगतां विष्णुमाये नमोऽस्तुते ॥ ५९॥

aśeṣajagatāṃ bīje jñeyajñānasvarūpiṇi |jagaddhitāya jagatāṃ viṣṇumāye namo'stute || 59||

इति कालिकापुराणे पञ्चमाध्यायान्तर्गता ब्रह्मप्रोक्ता कालीस्तुतिः समाप्ता ।

iti kālikāpurāṇe pañcamādhyāyāntargatā brahmaproktā kālīstutiḥ samāptā |