भुवनेश्वरीकवचम् १ अथवा त्रैलोक्यमङ्गलं भुवनेश्वरीकवचम् Bhuvaneshvari Kavacham (2)

श्रीगणेशाय नमः ।देव्युवाच ।देवेश भुवनेश्वर्या या या विद्याः प्रकाशिताः ।श्रुताश्चाधिगताः सर्वाः श्रोतुमिच्छामि साम्प्रतम् ॥ १॥

śrīgaṇeśāya namaḥ |devyuvāca |deveśa bhuvaneśvaryā yā yā vidyāḥ prakāśitāḥ |śrutāścādhigatāḥ sarvāḥ śrotumicchāmi sāmpratam || 1||

त्रैलोक्यमङ्गलं नाम कवचं यत्पुरोदितम् ।कथयस्व महादेव मम प्रीतिकरं परम् ॥ २॥

trailokyamaṅgalaṃ nāma kavacaṃ yatpuroditam |kathayasva mahādeva mama prītikaraṃ param || 2||

ईश्वर उवाच ।शृणु पार्वति वक्ष्यामि सावधानावधारय ।त्रैलोक्यमङ्गलं नाम कवचं मन्त्रविग्रहम् ॥ ३॥

īśvara uvāca |śṛṇu pārvati vakṣyāmi sāvadhānāvadhāraya |trailokyamaṅgalaṃ nāma kavacaṃ mantravigraham || 3||

सिद्धविद्यामयं देवि सर्वैश्वर्यसमन्वितम् ।पठनाद्धारणान्मर्त्यस्त्रैलोक्यैश्वर्यभाग्भवेत् ॥ ४॥

siddhavidyāmayaṃ devi sarvaiśvaryasamanvitam |paṭhanāddhāraṇānmartyastrailokyaiśvaryabhāgbhavet || 4||

ॐ अस्य श्रीभुवनेश्वरीत्रैलोक्यमङ्गलकवचस्य शिव ऋषिः \,विराट् छन्दः \, जगद्धात्री भुवनेश्वरी देवता \,धर्मार्थकाममोक्षार्थे जपे विनियोगः ।ह्रीं बीजं मे शिरः पातु भुवनेशी ललाटकम् ।ऐं पातु दक्षनेत्रं मे ह्रीं पातु वामलोचनम् ॥ १॥

oṃ asya śrībhuvaneśvarītrailokyamaṅgalakavacasya śiva ṛṣiḥ \,virāṭ chandaḥ \, jagaddhātrī bhuvaneśvarī devatā \,dharmārthakāmamokṣārthe jape viniyogaḥ |hrīṃ bījaṃ me śiraḥ pātu bhuvaneśī lalāṭakam |aiṃ pātu dakṣanetraṃ me hrīṃ pātu vāmalocanam || 1||

श्रीं पातु दक्षकर्णं मे त्रिवर्णात्मा महेश्वरी ।वामकर्णं सदा पातु ऐं घ्राणं पातु मे सदा ॥ २॥

śrīṃ pātu dakṣakarṇaṃ me trivarṇātmā maheśvarī |vāmakarṇaṃ sadā pātu aiṃ ghrāṇaṃ pātu me sadā || 2||

ह्रीं पातु वदनं देवि ऐं पातु रसनां मम ।वाक्पुटा च त्रिवर्णात्मा कण्ठं पातु परात्मिका ॥ ३॥

hrīṃ pātu vadanaṃ devi aiṃ pātu rasanāṃ mama |vākpuṭā ca trivarṇātmā kaṇṭhaṃ pātu parātmikā || 3||

श्रीं स्कन्धौ पातु नियतं ह्रीं भुजौ पातु सर्वदा ।क्लीं करौ त्रिपुटा पातु त्रिपुरैश्वर्यदायिनी ॥ ४॥

śrīṃ skandhau pātu niyataṃ hrīṃ bhujau pātu sarvadā |klīṃ karau tripuṭā pātu tripuraiśvaryadāyinī || 4||

ॐ पातु हृदयं ह्रीं मे मध्यदेशं सदावतु ।क्रौं पातु नाभिदेशं मे त्र्यक्षरी भुवनेश्वरी ॥ ५॥

oṃ pātu hṛdayaṃ hrīṃ me madhyadeśaṃ sadāvatu |krauṃ pātu nābhideśaṃ me tryakṣarī bhuvaneśvarī || 5||

सर्वबीजप्रदा पृष्ठं पातु सर्ववशङ्करी ।ह्रीं पातु गुह्यदेशं मे नमोभगवती कटिम् ॥ ६॥

sarvabījapradā pṛṣṭhaṃ pātu sarvavaśaṅkarī |hrīṃ pātu guhyadeśaṃ me namobhagavatī kaṭim || 6||

माहेश्वरी सदा पातु शङ्खिनी जानुयुग्मकम् ।अन्नपूर्णा सदा पातु स्वाहा पातु पदद्वयम् ॥ ७॥

māheśvarī sadā pātu śaṅkhinī jānuyugmakam |annapūrṇā sadā pātu svāhā pātu padadvayam || 7||

सप्तदशाक्षरा पायादन्नपूर्णाखिलं वपुः ।तारं माया रमाकामः षोडशार्णा ततः परम् ॥ ८॥

saptadaśākṣarā pāyādannapūrṇākhilaṃ vapuḥ |tāraṃ māyā ramākāmaḥ ṣoḍaśārṇā tataḥ param || 8||

शिरःस्था सर्वदा पातु विंशत्यर्णात्मिका परा ।तारं दुर्गे युगं रक्षिणी स्वाहेति दशाक्षरा ॥ ९॥

śiraḥsthā sarvadā pātu viṃśatyarṇātmikā parā |tāraṃ durge yugaṃ rakṣiṇī svāheti daśākṣarā || 9||

जयदुर्गा घनश्यामा पातु मां सर्वतो मुदा ।मायाबीजादिका चैषा दशार्णा च ततः परा ॥ १०॥

jayadurgā ghanaśyāmā pātu māṃ sarvato mudā |māyābījādikā caiṣā daśārṇā ca tataḥ parā || 10||

उत्तप्तकाञ्चनाभासा जयदुर्गाऽऽननेऽवतु ।तारं ह्रीं दुं च दुर्गायै नमोऽष्टार्णात्मिका परा ॥ ११॥

uttaptakāñcanābhāsā jayadurgā''nane'vatu |tāraṃ hrīṃ duṃ ca durgāyai namo'ṣṭārṇātmikā parā || 11||

शङ्खचक्रधनुर्बाणधरा मां दक्षिणेऽवतु ।महिषामर्द्दिनी स्वाहा वसुवर्णात्मिका परा ॥ १२॥

śaṅkhacakradhanurbāṇadharā māṃ dakṣiṇe'vatu |mahiṣāmarddinī svāhā vasuvarṇātmikā parā || 12||

नैरृत्यां सर्वदा पातु महिषासुरनाशिनी ।माया पद्मावती स्वाहा सप्तार्णा परिकीर्तिता ॥ १३॥

nairṛtyāṃ sarvadā pātu mahiṣāsuranāśinī |māyā padmāvatī svāhā saptārṇā parikīrtitā || 13||

पद्मावती पद्मसंस्था पश्चिमे मां सदाऽवतु ।पाशाङ्कुशपुटा मायो स्वाहा हि परमेश्वरि ॥ १४॥

padmāvatī padmasaṃsthā paścime māṃ sadā'vatu |pāśāṅkuśapuṭā māyo svāhā hi parameśvari || 14||

त्रयोदशार्णा ताराद्या अश्वारुढाऽनलेऽवतु ।सरस्वति पञ्चस्वरे नित्यक्लिन्ने मदद्रवे ॥ १५॥

trayodaśārṇā tārādyā aśvāruḍhā'nale'vatu |sarasvati pañcasvare nityaklinne madadrave || 15||

स्वाहा वस्वक्षरा विद्या उत्तरे मां सदाऽवतु ।तारं माया च कवचं खे रक्षेत्सततं वधूः ॥ १६॥

svāhā vasvakṣarā vidyā uttare māṃ sadā'vatu |tāraṃ māyā ca kavacaṃ khe rakṣetsatataṃ vadhūḥ || 16||

हूँ क्षें ह्रीं फट् महाविद्या द्वादशार्णाखिलप्रदा ।त्वरिताष्टाहिभिः पायाच्छिवकोणे सदा च माम् ॥ १७॥

hūm̐ kṣeṃ hrīṃ phaṭ mahāvidyā dvādaśārṇākhilapradā |tvaritāṣṭāhibhiḥ pāyācchivakoṇe sadā ca mām || 17||

ऐं क्लीं सौः सततं बाला मूर्द्धदेशे ततोऽवतु ।बिन्द्वन्ता भैरवी बाला हस्तौ मां च सदाऽवतु ॥ १८॥

aiṃ klīṃ sauḥ satataṃ bālā mūrddhadeśe tato'vatu |bindvantā bhairavī bālā hastau māṃ ca sadā'vatu || 18||

इति ते कथितं पुण्यं त्रैलोक्यमङ्गलं परम् ।सारात्सारतरं पुण्यं महाविद्यौघविग्रहम् ॥ १९॥

iti te kathitaṃ puṇyaṃ trailokyamaṅgalaṃ param |sārātsārataraṃ puṇyaṃ mahāvidyaughavigraham || 19||

अस्यापि पठनात्सद्यः कुबेरोऽपि धनेश्वरः ।इन्द्राद्याः सकला देवा धारणात्पठनाद्यतः ॥ २०॥

asyāpi paṭhanātsadyaḥ kubero'pi dhaneśvaraḥ |indrādyāḥ sakalā devā dhāraṇātpaṭhanādyataḥ || 20||

सर्वसिद्धिश्वराः सन्तः सर्वैश्वर्यमवाप्नुयुः ।पुष्पाञ्जल्यष्टकं दद्यान्मूलेनैव पृथक् पृथक् ॥ २१॥

sarvasiddhiśvarāḥ santaḥ sarvaiśvaryamavāpnuyuḥ |puṣpāñjalyaṣṭakaṃ dadyānmūlenaiva pṛthak pṛthak || 21||

संवत्सरकृतायास्तु पूजायाः फलमाप्नुयात् ।प्रीतिमन्योऽन्यतः कृत्वा कमला निश्चला गृहे ॥ २२॥

saṃvatsarakṛtāyāstu pūjāyāḥ phalamāpnuyāt |prītimanyo'nyataḥ kṛtvā kamalā niścalā gṛhe || 22||

वाणी च निवसेद्वक्त्रे सत्यं सत्यं न संशयः ।यो धारयति पुण्यात्मा त्रैलोक्यमङ्गलाभिधम् ॥ २३॥

vāṇī ca nivasedvaktre satyaṃ satyaṃ na saṃśayaḥ |yo dhārayati puṇyātmā trailokyamaṅgalābhidham || 23||

कवचं परमं पुण्यं सोऽपि पुण्यवतां वरः ।सर्वैश्वर्ययुतो भूत्वा त्रैलोक्यविजयी भवेत् ॥ २४॥

kavacaṃ paramaṃ puṇyaṃ so'pi puṇyavatāṃ varaḥ |sarvaiśvaryayuto bhūtvā trailokyavijayī bhavet || 24||

पुरुषो दक्षिणे बाहौ नारी वामभुजे तथा ।बहुपुत्रवती भूयाद्वन्ध्यापि लभते सुतम् ॥ २५॥

puruṣo dakṣiṇe bāhau nārī vāmabhuje tathā |bahuputravatī bhūyādvandhyāpi labhate sutam || 25||

ब्रह्मास्त्रादीनि शस्त्राणि नैव कृन्तन्ति तं जनम् ।एतत्कवचमज्ञात्वा यो भजेद्भुवनेश्वरीम् ।दारिद्र्यं परमं प्राप्य सोऽचिरान्मृत्युमाप्नुयात् ॥ २६॥

brahmāstrādīni śastrāṇi naiva kṛntanti taṃ janam |etatkavacamajñātvā yo bhajedbhuvaneśvarīm |dāridryaṃ paramaṃ prāpya so'cirānmṛtyumāpnuyāt || 26||

॥ इति श्रीरुद्रयामले तन्त्रे देवीश्वर संवादेत्रैलोक्यमङ्गलं नाम भुवनेश्वरीकवचं सम्पूर्णम् ॥

|| iti śrīrudrayāmale tantre devīśvara saṃvādetrailokyamaṅgalaṃ nāma bhuvaneśvarīkavacaṃ sampūrṇam ||