भैरवीकवचम् अथवा त्रैलोक्यविजय भैरवी कवच Bhairavikavacham

श्रीगणेशाय नमः ।श्रीदेव्युवाच ।भैरव्याः सकला विद्याः श्रुताश्चाधिगता मया ।साम्प्रतं श्रोतुमिच्छामि कवचं यत्पुरोदितम् ॥ १॥

śrīgaṇeśāya namaḥ |śrīdevyuvāca |bhairavyāḥ sakalā vidyāḥ śrutāścādhigatā mayā |sāmprataṃ śrotumicchāmi kavacaṃ yatpuroditam || 1||

त्रैलोक्यविजयं नाम शस्त्रास्त्रविनिवारणम् ।त्वत्तः परतरो नाथ कः कृपां कर्तुमर्हति ॥ २॥

trailokyavijayaṃ nāma śastrāstravinivāraṇam |tvattaḥ parataro nātha kaḥ kṛpāṃ kartumarhati || 2||

ईश्वर उवाच ।श्रुणु पार्वति वक्ष्यामि सुन्दरि प्राणवल्लभे ।त्रैलोक्यविजयं नाम शस्त्रास्त्रविनिवारकम् ॥ ३॥

īśvara uvāca |śruṇu pārvati vakṣyāmi sundari prāṇavallabhe |trailokyavijayaṃ nāma śastrāstravinivārakam || 3||

पठित्वा धारयित्वेदं त्रैलोक्यविजयी भवेत् ।जघान सकलान्दैत्यान् यधृत्वा मधुसूदनः ॥ ४॥

paṭhitvā dhārayitvedaṃ trailokyavijayī bhavet |jaghāna sakalāndaityān yadhṛtvā madhusūdanaḥ || 4||

ब्रह्मा सृष्टिं वितनुते यधृत्वाभीष्टदायकम् ।धनाधिपः कुबेरोऽपि वासवस्त्रिदशेश्वरः ॥ ५॥

brahmā sṛṣṭiṃ vitanute yadhṛtvābhīṣṭadāyakam |dhanādhipaḥ kubero'pi vāsavastridaśeśvaraḥ || 5||

यस्य प्रसादादीशोऽहं त्रैलोक्यविजयी विभुः ।न देयं परशिष्येभ्योऽसाधकेभ्यः कदाचन ॥ ६॥

yasya prasādādīśo'haṃ trailokyavijayī vibhuḥ |na deyaṃ paraśiṣyebhyo'sādhakebhyaḥ kadācana || 6||

पुत्रेभ्यः किमथान्येभ्यो दद्याच्चेन्मृत्युमाप्नुयात् ।ऋषिस्तु कवचस्यास्य दक्षिणामूर्तिरेव च ॥ ७॥

putrebhyaḥ kimathānyebhyo dadyāccenmṛtyumāpnuyāt |ṛṣistu kavacasyāsya dakṣiṇāmūrtireva ca || 7||

विराट् छन्दो जगद्धात्री देवता बालभैरवी ।धर्मार्थकाममोक्षेषु विनियोगः प्रकीर्तितः ॥ ८॥

virāṭ chando jagaddhātrī devatā bālabhairavī |dharmārthakāmamokṣeṣu viniyogaḥ prakīrtitaḥ || 8||

अधरो बिन्दुमानाद्यः कामः शक्तिशशीयुतः ।भृगुर्मनुस्वरयुतः सर्गो बीजत्रयात्मकः ॥ ९॥

adharo bindumānādyaḥ kāmaḥ śaktiśaśīyutaḥ |bhṛgurmanusvarayutaḥ sargo bījatrayātmakaḥ || 9||

बालैषा मे शिरः पातु बिन्दुनादयुतापि सा ।भालं पातु कुमारीशा सर्गहीना कुमारिका ॥ १०॥

bālaiṣā me śiraḥ pātu bindunādayutāpi sā |bhālaṃ pātu kumārīśā sargahīnā kumārikā || 10||

दृशौ पातु च वाग्बीजं कर्णयुग्मं सदावतु ।कामबीजं सदा पातु घ्राणयुग्मं परावतु ॥ ११॥

dṛśau pātu ca vāgbījaṃ karṇayugmaṃ sadāvatu |kāmabījaṃ sadā pātu ghrāṇayugmaṃ parāvatu || 11||

सरस्वतीप्रदा बाला जिह्वां पातु शुचिप्रभा ।हस्रैं कण्ठं हसकलरी स्कन्धौ पातु हस्रौ भुजौ ॥ १२॥

sarasvatīpradā bālā jihvāṃ pātu śuciprabhā |hasraiṃ kaṇṭhaṃ hasakalarī skandhau pātu hasrau bhujau || 12||

पञ्चमी भैरवी पातु करौ हसैं सदावतु ।हृदयं हसकलीं वक्षः पातु हसौ स्तनौ मम ॥ १३॥

pañcamī bhairavī pātu karau hasaiṃ sadāvatu |hṛdayaṃ hasakalīṃ vakṣaḥ pātu hasau stanau mama || 13||

पातु सा भैरवी देवी चैतन्यरूपिणी मम ।हस्रैं पातु सदा पार्श्वयुग्मं हसकलरीं सदा ॥ १४॥

pātu sā bhairavī devī caitanyarūpiṇī mama |hasraiṃ pātu sadā pārśvayugmaṃ hasakalarīṃ sadā || 14||

कुक्षिं पातु हसौर्मध्ये भैरवी भुवि दुर्लभा ।ऐंईंओंवं मध्यदेशं बीजविद्या सदावतु ॥ १५॥

kukṣiṃ pātu hasaurmadhye bhairavī bhuvi durlabhā |aiṃīṃoṃvaṃ madhyadeśaṃ bījavidyā sadāvatu || 15||

हस्रैं पृष्ठं सदा पातु नाभिं हसकलह्रीं सदा ।पातु हसौं करौ पातु षट्कूटा भैरवी मम ॥ १६॥

hasraiṃ pṛṣṭhaṃ sadā pātu nābhiṃ hasakalahrīṃ sadā |pātu hasauṃ karau pātu ṣaṭkūṭā bhairavī mama || 16||

सहस्रैं सक्थिनी पातु सहसकलरीं सदावतु ।गुह्यदेशं हस्रौ पातु जनुनी भैरवी मम ॥ १७॥

sahasraiṃ sakthinī pātu sahasakalarīṃ sadāvatu |guhyadeśaṃ hasrau pātu janunī bhairavī mama || 17||

सम्पत्प्रदा सदा पातु हैं जङ्घे हसक्लीं पदौ ।पातु हंसौः सर्वदेहं भैरवी सर्वदावतु ॥ १८॥

sampatpradā sadā pātu haiṃ jaṅghe hasaklīṃ padau |pātu haṃsauḥ sarvadehaṃ bhairavī sarvadāvatu || 18||

हसैं मामवतु प्राच्यां हरक्लीं पावकेऽवतु ।हसौं मे दक्षिणे पातु भैरवी चक्रसंस्थिता ॥ १९॥

hasaiṃ māmavatu prācyāṃ haraklīṃ pāvake'vatu |hasauṃ me dakṣiṇe pātu bhairavī cakrasaṃsthitā || 19||

ह्रीं क्लीं ल्वें मां सदा पातु निऋत्यां चक्रभैरवी ।क्रीं क्रीं क्रीं पातु वायव्ये हूँ हूँ पातु सदोत्तरे ॥ २०॥

hrīṃ klīṃ lveṃ māṃ sadā pātu niṛtyāṃ cakrabhairavī |krīṃ krīṃ krīṃ pātu vāyavye hūm̐ hūm̐ pātu sadottare || 20||

ह्रीं ह्रीं पातु सदैशान्ये दक्षिणे कालिकावतु ।ऊर्ध्वं प्रागुक्तबीजानि रक्षन्तु मामधःस्थले ॥ २१॥

hrīṃ hrīṃ pātu sadaiśānye dakṣiṇe kālikāvatu |ūrdhvaṃ prāguktabījāni rakṣantu māmadhaḥsthale || 21||

दिग्विदिक्षु स्वाहा पातु कालिका खड्गधारिणी ।ॐ ह्रीं स्त्रीं हूँ फट् सा तारा सर्वत्र मां सदावतु ॥ २२॥

digvidikṣu svāhā pātu kālikā khaḍgadhāriṇī |oṃ hrīṃ strīṃ hūm̐ phaṭ sā tārā sarvatra māṃ sadāvatu || 22||

सङ्ग्रामे कानने दुर्गे तोये तरङ्गदुस्तरे ।खड्गकर्त्रिधरा सोग्रा सदा मां परिरक्षतु ॥ २३॥

saṅgrāme kānane durge toye taraṅgadustare |khaḍgakartridharā sogrā sadā māṃ parirakṣatu || 23||

इति ते कथितं देवि सारात्सारतरं महत् ।त्रैलोक्यविजयं नाम कवचं परमाद्भुतम् ॥ २४॥

iti te kathitaṃ devi sārātsārataraṃ mahat |trailokyavijayaṃ nāma kavacaṃ paramādbhutam || 24||

यः पठेत्प्रयतो भूत्वा पूजायाः फलमाप्नुयात् ।स्पर्धामूद्धूय भवने लक्ष्मीर्वाणी वसेत्ततः ॥ २५॥

yaḥ paṭhetprayato bhūtvā pūjāyāḥ phalamāpnuyāt |spardhāmūddhūya bhavane lakṣmīrvāṇī vasettataḥ || 25||

यः शत्रुभीतो रणकातरो वा भीतो वने वा सलिलालये वा ।वादे सभायां प्रतिवादिनो वा रक्षःप्रकोपाद् ग्रहसकुलाद्वा ॥ २६॥

yaḥ śatrubhīto raṇakātaro vā bhīto vane vā salilālaye vā |vāde sabhāyāṃ prativādino vā rakṣaḥprakopād grahasakulādvā || 26||

प्रचण्डदण्डाक्षमनाच्च भीतो गुरोः प्रकोपादपि कृच्छ्रसाध्यात् ।अभ्यर्च्य देवीं प्रपठेत्रिसन्ध्यं स स्यान्महेशप्रतिमो जयी च ॥ २७॥

pracaṇḍadaṇḍākṣamanācca bhīto guroḥ prakopādapi kṛcchrasādhyāt |abhyarcya devīṃ prapaṭhetrisandhyaṃ sa syānmaheśapratimo jayī ca || 27||

त्रैलोक्यविजयं नाम कवचं मन्मुखोदितम् ।विलिख्य भूर्जगुटिकां स्वर्णस्थां धारयेद्यदि ॥ २८॥

trailokyavijayaṃ nāma kavacaṃ manmukhoditam |vilikhya bhūrjaguṭikāṃ svarṇasthāṃ dhārayedyadi || 28||

कण्ठे वा दक्षिणे बाहौ त्रैलोक्यविजयी भवेत् ।तद्गात्रं प्राप्य शस्त्राणि भवन्ति कुसुमानि च ॥ २९॥

kaṇṭhe vā dakṣiṇe bāhau trailokyavijayī bhavet |tadgātraṃ prāpya śastrāṇi bhavanti kusumāni ca || 29||

लक्ष्मीः सरस्वती तस्य निवसेद्भवने मुखे ।एतत्कवचमज्ञात्वा यो जपेद्भैरवीं पराम् ।बालां वा प्रजपेद्विद्वान्दरिद्रो मृत्युमाप्नुयात् ॥ ३०॥

lakṣmīḥ sarasvatī tasya nivasedbhavane mukhe |etatkavacamajñātvā yo japedbhairavīṃ parām |bālāṃ vā prajapedvidvāndaridro mṛtyumāpnuyāt || 30||

॥ इति श्रीरुद्रयामले देवीश्वरसंवादे त्रैलोक्यविजयं नामभैरवी कवचं समाप्तम् ॥

|| iti śrīrudrayāmale devīśvarasaṃvāde trailokyavijayaṃ nāmabhairavī kavacaṃ samāptam ||