नाममौक्तिकमाला Shri Namamauktikamala

यत्पदाम्भोरुहध्यानविश्वस्ताशेषकल्मषः ।वस्तुतागुपयातोऽहं यामुनेयं नमामि तम् ॥ १॥

yatpadāmbhoruhadhyānaviśvastāśeṣakalmaṣaḥ |vastutāgupayāto'haṃ yāmuneyaṃ namāmi tam || 1||

श्रीनाममौक्तिकैर्माला यामुनार्येण निर्मिता ।ऋषिसूक्ति (शुक्ति) समुद्भूतैर्निर्दोषैः श्रुतिसागरे ॥ २॥

śrīnāmamauktikairmālā yāmunāryeṇa nirmitā |ṛṣisūkti (śukti) samudbhūtairnirdoṣaiḥ śrutisāgare || 2||

आराधनाय हरये जगदानन्ददायिने ।श्रीनाथनायकपति (मणिः) नारायणगुणान्विता ॥ ३॥

ārādhanāya haraye jagadānandadāyine |śrīnāthanāyakapati (maṇiḥ) nārāyaṇaguṇānvitā || 3||

सर्वकल्याणजननी जगन्मङ्गलवैभवा ।मनीषिभिर्महाभागैर्वैष्णवैर्ध्रियतामियम् ॥ ४॥

sarvakalyāṇajananī jaganmaṅgalavaibhavā |manīṣibhirmahābhāgairvaiṣṇavairdhriyatāmiyam || 4||

श्रीमन्नारायणाद्रीश श्रीमन्नञ्जनशैलप ।श्रीमद्वृषभशैलेन्द्र श्रीमत्सिंहनगाधिप ॥ ५॥

śrīmannārāyaṇādrīśa śrīmannañjanaśailapa |śrīmadvṛṣabhaśailendra śrīmatsiṃhanagādhipa || 5||

श्रीशेषगोत्राभरण श्रीनिवासेति कीर्तये ।अच्युतानन्द गोविन्द मुकुन्द गरुडध्वज ॥ ६॥

śrīśeṣagotrābharaṇa śrīnivāseti kīrtaye |acyutānanda govinda mukunda garuḍadhvaja || 6||

जगदानन्दजनक जगज्जन्मादिकारण ।नारायण जगन्नाथ शरणागतवत्सल ॥ ७॥

jagadānandajanaka jagajjanmādikāraṇa |nārāyaṇa jagannātha śaraṇāgatavatsala || 7||

सत्यसङ्कल्प सर्वज्ञ सत्यकाम सनातन ।निस्समाभ्यधिक स्वस्थ स्वे महिम्नि प्रतिष्ठित ॥ ८॥

satyasaṅkalpa sarvajña satyakāma sanātana |nissamābhyadhika svastha sve mahimni pratiṣṭhita || 8||

त्रिविक्रम त्रिलोकेश शङ्खचक्रगदाधर ।रमानाथ रसानाथ नीलानाथ निरञ्जन ॥ ९॥

trivikrama trilokeśa śaṅkhacakragadādhara |ramānātha rasānātha nīlānātha nirañjana || 9||

नित्य निर्दोष निस्सीममहाविभव शाश्वत ।त्रिगुणातीत षाड्गुण्यपरिपूर्ण परात्पर ॥ १०॥

nitya nirdoṣa nissīmamahāvibhava śāśvata |triguṇātīta ṣāḍguṇyaparipūrṇa parātpara || 10||

पुरुषोत्तम रमानाथ पुण्यश्रवणकीर्तन ।निर्विकार निरातङ्क नित्यानन्द निरामय ॥ ११॥

puruṣottama ramānātha puṇyaśravaṇakīrtana |nirvikāra nirātaṅka nityānanda nirāmaya || 11||

यझेश यज्ञपुरुष पुण्डरीकाक्ष माधव ।वासुदेव विभो विष्वक्सेन वैकुण्ठ वामन ॥ १२॥

yajheśa yajñapuruṣa puṇḍarīkākṣa mādhava |vāsudeva vibho viṣvaksena vaikuṇṭha vāmana || 12||

नीलवर्णार्णवशय श्रीवल्लभ जगत्पते ।त्रय्यन्तगीतासङ्ख्येयसन्मङ्गलगुणाकर ॥ १३॥

nīlavarṇārṇavaśaya śrīvallabha jagatpate |trayyantagītāsaṅkhyeyasanmaṅgalaguṇākara || 13||

रमारमण राजीवदलचारुविलोचन ।नित्ययौवनसौन्दर्यशील दिव्यगुणार्णव ॥ १४॥

ramāramaṇa rājīvadalacāruvilocana |nityayauvanasaundaryaśīla divyaguṇārṇava || 14||

वेदवेद्य विशालाक्ष विश्वम्भर धरापते ।दाशार्ह देवदेवेश दामोदर दयानिधे ॥ १५॥

vedavedya viśālākṣa viśvambhara dharāpate |dāśārha devadeveśa dāmodara dayānidhe || 15||

धरणीधारकाधारनिलयाधोक्षजाव्यय ।योगिध्येय जगद्वन्द्य जगत्स्वामिन् जनार्दन ॥ १६॥

dharaṇīdhārakādhāranilayādhokṣajāvyaya |yogidhyeya jagadvandya jagatsvāmin janārdana || 16||

नारसिंह हयग्रीव हरे प्रह्लादवत्सल ।लोकाधार पराधार आत्माधार धराधर ॥ १७॥

nārasiṃha hayagrīva hare prahlādavatsala |lokādhāra parādhāra ātmādhāra dharādhara || 17||

रथाङ्गपाणे सर्वेश सर्वलोकसमाश्रय ।भूतभव्यभवन्नाथ वेङ्कटाचलनायक ॥ १८॥

rathāṅgapāṇe sarveśa sarvalokasamāśraya |bhūtabhavyabhavannātha veṅkaṭācalanāyaka || 18||

कृष्ण विष्णो विशालाक्ष वैजयन्तीविराजित ।क्षीरार्णवशयानन्त शरण्याश्रितवत्सल ॥ १९॥

kṛṣṇa viṣṇo viśālākṣa vaijayantīvirājita |kṣīrārṇavaśayānanta śaraṇyāśritavatsala || 19||

सर्वात्मन् सर्वलोकेश सर्व सर्वात्मनायक ।करुणाकर कालज्ञ सर्वलोकनियामक ॥ २०॥

sarvātman sarvalokeśa sarva sarvātmanāyaka |karuṇākara kālajña sarvalokaniyāmaka || 20||

मुञ्जीकेश हृषीकेश केशिमर्दन केशव ।नरकान्तक काकुत्स्थ कालात्मन् कालपाचक ॥ २१॥

muñjīkeśa hṛṣīkeśa keśimardana keśava |narakāntaka kākutstha kālātman kālapācaka || 21||

करीन्द्रवरदानन्द श्रीधर श्रीनिकेतन ।निरवद्य परब्रह्मन् सर्वलोकपदाश्रय ॥ २२॥

karīndravaradānanda śrīdhara śrīniketana |niravadya parabrahman sarvalokapadāśraya || 22||

नाथसेव्यपदाम्भोज वकुलाभरणाश्रय ।रामारामाभिरामाङ्ग रामकृष्णेति कीर्तये ॥ २३॥

nāthasevyapadāmbhoja vakulābharaṇāśraya |rāmārāmābhirāmāṅga rāmakṛṣṇeti kīrtaye || 23||

श्रीमद्वेङ्कटनाथमादिपुरुषं पूर्णं परं शाश्वतंश्रीनाथं शरणागतार्तिहरणं नारायणं संश्रये ।कृष्णं विष्णुमनन्तमच्युतमजं गोविन्दमिन्दीवरश्यामं नन्दकशङ्खचक्ररुचिरं ध्यायन् भजे कीर्तये ॥ २४॥

śrīmadveṅkaṭanāthamādipuruṣaṃ pūrṇaṃ paraṃ śāśvataṃśrīnāthaṃ śaraṇāgatārtiharaṇaṃ nārāyaṇaṃ saṃśraye |kṛṣṇaṃ viṣṇumanantamacyutamajaṃ govindamindīvaraśyāmaṃ nandakaśaṅkhacakraruciraṃ dhyāyan bhaje kīrtaye || 24||

येनैतत्पठ्यते नानाम्नाष्टाविंशोत्तरं शतम् ।अनिष्टपक्षक्षपणमिष्टावाप्तिरवाप्यते ॥ २५॥

yenaitatpaṭhyate nānāmnāṣṭāviṃśottaraṃ śatam |aniṣṭapakṣakṣapaṇamiṣṭāvāptiravāpyate || 25||

इति श्रीनाममौक्तिकमाला सम्पूर्णा ।

iti śrīnāmamauktikamālā sampūrṇā |