प्रपन्नामृतस्तोत्रम् Prapannamritastotram

कलयतु कल्याणगुणं कमलाकुचकुङ्कुमाङ्कितोरस्कम् ।यदुवंशमौक्तिकं तत्किमपि महस्सर्वदाऽपि मम हृदयम् ॥ १॥

kalayatu kalyāṇaguṇaṃ kamalākucakuṅkumāṅkitoraskam |yaduvaṃśamauktikaṃ tatkimapi mahassarvadā'pi mama hṛdayam || 1||

वन्दे तं देवसुतं वसुदेववधूस्तनन्धयं कमपि ।वरदं वरेण्यशीलं वल्लवभवनात्तलीलमिह बालम् ॥ २॥

vande taṃ devasutaṃ vasudevavadhūstanandhayaṃ kamapi |varadaṃ vareṇyaśīlaṃ vallavabhavanāttalīlamiha bālam || 2||

व्रजरचितकेळिसुदतीव्रजहृदयानन्दकन्दळं किमपि ।व्रज हृदय दिव्यतेजो वृजिनतमोमूलभेदनपटिष्ठम् ॥ ३॥

vrajaracitakeḷisudatīvrajahṛdayānandakandaḷaṃ kimapi |vraja hṛdaya divyatejo vṛjinatamomūlabhedanapaṭiṣṭham || 3||

लीलामुदितयशोदं ललितप्रस्निग्धमुग्धतरवादम् ।आकुञ्चितैकपादं भज तेजः किमपि विरचिताह्लादम् ॥ ४॥

līlāmuditayaśodaṃ lalitaprasnigdhamugdhataravādam |ākuñcitaikapādaṃ bhaja tejaḥ kimapi viracitāhlādam || 4||

हृदयनवनीतचोरं पारदतरलाङ्घ्रिकमलसञ्चारम् ।परिलुलितगोपदारं गृहाण यत्नेन कमपि सुकुमारम् ॥ ५॥

hṛdayanavanītacoraṃ pāradataralāṅghrikamalasañcāram |parilulitagopadāraṃ gṛhāṇa yatnena kamapi sukumāram || 5||

गोपवधूभोगार्हं शेखरितानर्घबर्हिवरबर्हम् ।घनविभवपारिबर्हं कलये हृदये चिराय दाशार्हम् ॥ ६॥

gopavadhūbhogārhaṃ śekharitānarghabarhivarabarham |ghanavibhavapāribarhaṃ kalaye hṛdaye cirāya dāśārham || 6||

गोखुरविदारितावनिधूळीधूसरितकुन्तलमुदारम् ।सञ्चिन्तयेऽन्तरङ्गे सकुमारं कमपि वल्लवकुमारम् ॥ ७॥

gokhuravidāritāvanidhūḷīdhūsaritakuntalamudāram |sañcintaye'ntaraṅge sakumāraṃ kamapi vallavakumāram || 7||

कमपि घनाघननीलं गोपवधूटीकुचग्रहविलोलम् ।कलयामि गोपबालं लोलालकजालमधुकरितभालम् ॥ ८॥

kamapi ghanāghananīlaṃ gopavadhūṭīkucagrahavilolam |kalayāmi gopabālaṃ lolālakajālamadhukaritabhālam || 8||

कुन्दविनिन्दनरदनान्मन्दितपूर्णेन्दुबिम्बरुचिवदनान् ।मुनिहृदयकेळिसदनान्व्रजविभवांस्तान्भजे विधुतमदनान् ॥ ९॥

kundavinindanaradanānmanditapūrṇendubimbarucivadanān |munihṛdayakeḷisadanānvrajavibhavāṃstānbhaje vidhutamadanān || 9||

नन्दानन्दनचन्दन मुचुकुन्दानन्दकन्द गोविन्द ।मम विन्द हृदरविन्दं मिळिन्दसुन्दर मुकुन्द ननु मन्दम् ॥ १०॥

nandānandanacandana mucukundānandakanda govinda |mama vinda hṛdaravindaṃ miḷindasundara mukunda nanu mandam || 10||

किमपि यशोदाभाग्यं व्रजललनापृथुलकुचयुगीभोग्यम् ।क्षामि नीलरत्नं रमणीयं हृदयसम्पुटे नूत्नम् ॥ ११॥

kimapi yaśodābhāgyaṃ vrajalalanāpṛthulakucayugībhogyam |kṣāmi nīlaratnaṃ ramaṇīyaṃ hṛdayasampuṭe nūtnam || 11||

मुरळीनिनादरसभरतरळीकृततर्णकव्रजो भजताम् ।कोऽपि घनाघनशावः कोमलरूपोऽद्य दहरगहनं मे ॥ १२॥

muraḷīninādarasabharataraḷīkṛtatarṇakavrajo bhajatām |ko'pi ghanāghanaśāvaḥ komalarūpo'dya daharagahanaṃ me || 12||

कालिन्दीपुळिनान्तरककलितविहारं मनोज्ञमणिहारम् ।तेजः किमपि विलीनं जागर्तु मदीयहृदि रुचिरलीलम् ॥ १३॥

kālindīpuḷināntarakakalitavihāraṃ manojñamaṇihāram |tejaḥ kimapi vilīnaṃ jāgartu madīyahṛdi ruciralīlam || 13||

कानपि भजे विलासान्कस्तिव्रजसुन्दरीरुचिररासान् ।राधाकटाक्षदासान् राकासितकिरणसखहासान् ॥ १४॥

kānapi bhaje vilāsānkastivrajasundarīrucirarāsān |rādhākaṭākṣadāsān rākāsitakiraṇasakhahāsān || 14||

अतिमुग्धं दधि लब्धुं सुस्निग्धं वस्तु किमपि मम सिद्धम् ।चारुमुखं तारसखस्मेरनखं तच्चिरादपारसुखम् ॥ १५॥

atimugdhaṃ dadhi labdhuṃ susnigdhaṃ vastu kimapi mama siddham |cārumukhaṃ tārasakhasmeranakhaṃ taccirādapārasukham || 15||

विकटातिदर्पदुर्मदशकटासुरधूतिधुर्यचरणतलम् ।प्रकटानुरागरुचिरं सुकटाक्षान्मयि तनोतु ततेजः ॥ १६॥

vikaṭātidarpadurmadaśakaṭāsuradhūtidhuryacaraṇatalam |prakaṭānurāgaruciraṃ sukaṭākṣānmayi tanotu tatejaḥ || 16||

यमुनाकूलविहारं यमिनामधुनाऽपि हन्त बहुदूरम् ।महदच्युतकैशोरं मम हृदि वितनोतु नित्यसञ्चारम् ॥ १७॥

yamunākūlavihāraṃ yamināmadhunā'pi hanta bahudūram |mahadacyutakaiśoraṃ mama hṛdi vitanotu nityasañcāram || 17||

बहुतरतरङ्गघद्दितयमुनाशुक्तयुदरगळितमिव नीलम् ।मुक्ताफलं प्रविचलत्तत्र विचित्रं विभावये हदये ॥ १८॥

bahutarataraṅgaghadditayamunāśuktayudaragaḷitamiva nīlam |muktāphalaṃ pravicalattatra vicitraṃ vibhāvaye hadaye || 18||

सोमाननगोपीजनकौमारहरं प्रवाळलसदधरम् ।तरुणं कमपि मनोहरचरणं शरणं भजे धृताभरणम् ॥ १९॥

somānanagopījanakaumāraharaṃ pravāḷalasadadharam |taruṇaṃ kamapi manoharacaraṇaṃ śaraṇaṃ bhaje dhṛtābharaṇam || 19||

खञ्जितगोपीहृदयं रञ्जितभुवनं श्रयामि गोपशिशोः ।सञ्जीवितगोसन्तति मञ्जुळमञ्जीरशिञ्जितं नृत्तम् ॥ २०॥

khañjitagopīhṛdayaṃ rañjitabhuvanaṃ śrayāmi gopaśiśoḥ |sañjīvitagosantati mañjuḷamañjīraśiñjitaṃ nṛttam || 20||

कालीयफणमणिमध्ये नीलतरं नूत्नजातमिवरत्नम् ।तन्मूर्धन्यस्तपदं चूडालङ्करणमस्तु धाम मम ॥ २१॥

kālīyaphaṇamaṇimadhye nīlataraṃ nūtnajātamivaratnam |tanmūrdhanyastapadaṃ cūḍālaṅkaraṇamastu dhāma mama || 21||

सितकरकिरणत्रस्यद्गोपीरतिकेळिरचिततिमिरभरम् ।तत्किमपि धाम हृदये नीलतरं नस्तमो निराकुरुताम् ॥ २२॥

sitakarakiraṇatrasyadgopīratikeḷiracitatimirabharam |tatkimapi dhāma hṛdaye nīlataraṃ nastamo nirākurutām || 22||

निर्मलतरमतिशिशिरं निरुपममवगाहतां मनोरुचिरम् ।नन्दकिशोरमनोहरशरीरतेजः कळिन्दजापूरम् ॥ २३॥

nirmalataramatiśiśiraṃ nirupamamavagāhatāṃ manoruciram |nandakiśoramanoharaśarīratejaḥ kaḷindajāpūram || 23||

मह इह मनसि विलग्नं मणिमयकाञ्चीमनोहरवलग्नम् ।गोपीकटाक्षमग्नं गोप्तुं क्षममेवमां भवविव्रिग्नम् ॥ २४॥

maha iha manasi vilagnaṃ maṇimayakāñcīmanoharavalagnam |gopīkaṭākṣamagnaṃ goptuṃ kṣamamevamāṃ bhavavivrignam || 24||

विन्दे पदारविन्दे मन्देतरविभवदे कृतानन्दे ।नन्दकुलामन्दकला वृन्दविलासस्य कस्यचिद्धाम्नः ॥ २५॥

vinde padāravinde mandetaravibhavade kṛtānande |nandakulāmandakalā vṛndavilāsasya kasyaciddhāmnaḥ || 25||

इतिमहिशूरपुरोत्तमनरपतिचामेन्द्रभूपकुलगुरुणा ।कलिता स्तुतिर्विजयतां श्रीकृष्णब्रह्मतन्त्रकलिरिपुणा ॥ २६॥

itimahiśūrapurottamanarapaticāmendrabhūpakulaguruṇā |kalitā stutirvijayatāṃ śrīkṛṣṇabrahmatantrakaliripuṇā || 26||

इति श्रीकृष्ण ब्रह्मतन्त्र परकाल महादेशिकानां कृतिषुप्रपन्नामृतस्तोत्रं सम्पूर्णम् ।

iti śrīkṛṣṇa brahmatantra parakāla mahādeśikānāṃ kṛtiṣuprapannāmṛtastotraṃ sampūrṇam |