पीठस्तोत्रम् Pitha Stotram

पीठस्तोत्रमहं वक्ष्ये श्रीशार्चाफलसिद्धये ।येनास्य परिवाराणां देवानां स्यात्समर्चनम् ॥ १॥

pīṭhastotramahaṃ vakṣye śrīśārcāphalasiddhaye |yenāsya parivārāṇāṃ devānāṃ syātsamarcanam || 1||

चिदानन्दमयभक्तिज्ञानसौरभसम्पदी ।कारुण्याम्बुधिसञ्जाते गुरुपादाम्बुजे नमः ॥ २॥

cidānandamayabhaktijñānasaurabhasampadī |kāruṇyāmbudhisañjāte gurupādāmbuje namaḥ || 2||

शब्दार्थचरणस्तर्कमध्यो योगहृदन्तरः ।वेदान्तवदनस्तस्मै हरये गुरवे नमः ॥ ३॥

śabdārthacaraṇastarkamadhyo yogahṛdantaraḥ |vedāntavadanastasmai haraye gurave namaḥ || 3||

षड्गुणैश्वर्यसम्पन्नं हरिलीलैकसाक्षिणम् ।प्रपन्नजनमन्दारमाचार्यं प्रणमाम्यहम् ॥ ४॥

ṣaḍguṇaiśvaryasampannaṃ harilīlaikasākṣiṇam |prapannajanamandāramācāryaṃ praṇamāmyaham || 4||

भजनानन्दलब्ध्यर्थं भक्तवृन्दैरुपासितम् ।श्रीनन्दनन्दनात्मानं वन्दे वन्दारुवत्सलम् ॥ ५॥

bhajanānandalabdhyarthaṃ bhaktavṛndairupāsitam |śrīnandanandanātmānaṃ vande vandāruvatsalam || 5||

अविघ्नं कुरु मे नाथ अर्चनाज्ञां प्रदेहि मे ।तव पादाम्बुजध्यानात्सफलं स्यात्स्वपूजनम् ॥ ६॥

avighnaṃ kuru me nātha arcanājñāṃ pradehi me |tava pādāmbujadhyānātsaphalaṃ syātsvapūjanam || 6||

तवैव पूजनं ह्येतत् श्रीमतो वानुशासनम् ।तवैवातः प्रसादोऽस्तु त्वदीयोऽहं सदा भवे ॥ ७॥

tavaiva pūjanaṃ hyetat śrīmato vānuśāsanam |tavaivātaḥ prasādo'stu tvadīyo'haṃ sadā bhave || 7||

मनो भगवतेऽनन्त महापुरुषरूपिणे ।समस्तु गुणसङ्ख्यानायां व्यक्ताय च विष्णवे ॥ ८॥

mano bhagavate'nanta mahāpuruṣarūpiṇe |samastu guṇasaṅkhyānāyāṃ vyaktāya ca viṣṇave || 8||

नमो धरायै जगतां सर्वरत्नमहेश्वरि ।सर्वंसहायै दिव्यायै विष्णुपत्न्यै नमोऽस्तु ते ॥ ९॥

namo dharāyai jagatāṃ sarvaratnamaheśvari |sarvaṃsahāyai divyāyai viṣṇupatnyai namo'stu te || 9||

नमः क्षीरसुधासिन्धो अग्निरुद्धाश्रयाय ते ।विशुद्धैश्चर्यविज्ञानशालिने हरये नमः ॥ १०॥

namaḥ kṣīrasudhāsindho agniruddhāśrayāya te |viśuddhaiścaryavijñānaśāline haraye namaḥ || 10||

वैकुण्ठाय नमो नित्यं विरजायै नमो नमः ।नन्दनाय नमो विष्णोः सुनन्दादिभ्य एव च ॥ ११॥

vaikuṇṭhāya namo nityaṃ virajāyai namo namaḥ |nandanāya namo viṣṇoḥ sunandādibhya eva ca || 11||

ब्रह्मणे विष्णवे चापि शिवाय रवये नमः ।मथुरामण्डलायाथो श्रीमतेऽस्तु नमो नमः ॥ १२॥

brahmaṇe viṣṇave cāpi śivāya ravaye namaḥ |mathurāmaṇḍalāyātho śrīmate'stu namo namaḥ || 12||

नमो वृन्दे च सङ्केते वने कात्यायनि परे ।मथुरे नववारे च चतुर्वारे महेश्वरि ॥ १३॥

namo vṛnde ca saṅkete vane kātyāyani pare |mathure navavāre ca caturvāre maheśvari || 13||

योगमाये नमस्तुभ्यं गोकुलाय नमो नमः ।नन्दाद्रये तथानन्दाद्रये कामाद्रये नमः ॥ १४॥

yogamāye namastubhyaṃ gokulāya namo namaḥ |nandādraye tathānandādraye kāmādraye namaḥ || 14||

गोवर्द्धनाय चरणाद्रये नित्यं नमो नमः ।अक्षरब्रह्मरूपायै स्वर्णभूम्यै नमो नमः ॥ १५॥

govarddhanāya caraṇādraye nityaṃ namo namaḥ |akṣarabrahmarūpāyai svarṇabhūmyai namo namaḥ || 15||

वेदाय ऋग्यजुःसामाथर्वज्ञानभुवे नमः ।भक्त्यै नमस्तदङ्गेभ्यः श्रवणेभ्यो नमो नमः ॥ १६॥

vedāya ṛgyajuḥsāmātharvajñānabhuve namaḥ |bhaktyai namastadaṅgebhyaḥ śravaṇebhyo namo namaḥ || 16||

नमः सर्वात्मभावाय प्रेम्णे नित्यं नमो नमः ।सर्वोपनिषदानन्दरसायै सरिते नमः ॥ १७॥

namaḥ sarvātmabhāvāya premṇe nityaṃ namo namaḥ |sarvopaniṣadānandarasāyai sarite namaḥ || 17||

ऐश्वर्येभ्यो नमस्तस्यानुग्रहाय नमो नमः ।महानुभावभावाय प्रभवाय नमो नमः ॥ १८॥

aiśvaryebhyo namastasyānugrahāya namo namaḥ |mahānubhāvabhāvāya prabhavāya namo namaḥ || 18||

योगसंशुद्धहृत्पद्मं नत्वा श्रीव्रजभृद्वधूः ।निचोलाय नमो नित्यं पीठाय हरये नमः ॥ १९॥

yogasaṃśuddhahṛtpadmaṃ natvā śrīvrajabhṛdvadhūḥ |nicolāya namo nityaṃ pīṭhāya haraye namaḥ || 19||

नमो मानसगङ्गायै पानमानरतीन्दुषु ।सरस्सु च नमश्चाथ नमः कुसुमपुष्करम् ॥ २०॥

namo mānasagaṅgāyai pānamānaratīnduṣu |sarassu ca namaścātha namaḥ kusumapuṣkaram || 20||

हरये भानवे जातपीतपुष्करयोर्नमः ।अथेशपुष्करं नत्वा कालिन्दिन्यै नमो नमः ॥ २१॥

haraye bhānave jātapītapuṣkarayornamaḥ |atheśapuṣkaraṃ natvā kālindinyai namo namaḥ || 21||

नमोऽस्तु दशकूपेभ्यस्तडागेभ्यो नमो नमः ।नमः षोडशघट्टेभ्यो नमेत्कुण्डोनषष्टिषु ॥ २२॥

namo'stu daśakūpebhyastaḍāgebhyo namo namaḥ |namaḥ ṣoḍaśaghaṭṭebhyo nametkuṇḍonaṣaṣṭiṣu || 22||

द्वादशेभ्यो वनेभ्यश्च तथोपवनकान्नमेत् ।नमो दशवटेभ्यश्च चतुस्तापिच्छिकान्नमेत् ॥ २३॥

dvādaśebhyo vanebhyaśca tathopavanakānnamet |namo daśavaṭebhyaśca catustāpicchikānnamet || 23||

वन्दिन्यैश्च नमश्चाथ आनन्दिन्यै नमो नमः ।प्रभुप्रियायै स्वामिन्यै वल्लभायै नमो नमः ॥ २४॥

vandinyaiśca namaścātha ānandinyai namo namaḥ |prabhupriyāyai svāminyai vallabhāyai namo namaḥ || 24||

खगेश्चराय मन्दाराद्यायुधेभ्यो नमो नमः ।दामभ्यो बहुलाश्वादिभ्यो यदुभ्यो नमः ॥ २५॥

khageścarāya mandārādyāyudhebhyo namo namaḥ |dāmabhyo bahulāśvādibhyo yadubhyo namaḥ || 25||

प्रभुप्रियायै स्वामिन्यै वल्लभायै नमो नमः ।पाथेभ्यश्चोद्धवादिभ्यो भक्तेभ्योऽपि नमो नमः ।कुशस्थलनिवासिभ्यो मन्त्रिभ्योऽपि नमो नमः ॥ २६॥

prabhupriyāyai svāminyai vallabhāyai namo namaḥ |pāthebhyaścoddhavādibhyo bhaktebhyo'pi namo namaḥ |kuśasthalanivāsibhyo mantribhyo'pi namo namaḥ || 26||

वसुदेवाय देवक्यै सहजाभ्यां नमो नमः ।पत्नीभ्यो महिषीभ्यश्च तत्प्रियाभ्यो नमो नमः ॥ २७॥

vasudevāya devakyai sahajābhyāṃ namo namaḥ |patnībhyo mahiṣībhyaśca tatpriyābhyo namo namaḥ || 27||

नमो यशोदानन्दाभ्यां नमो गोपालबालयोः ।यमुनायै सखिभ्यश्च गोभ्यो नित्यं नमो नमः ॥ २८॥

namo yaśodānandābhyāṃ namo gopālabālayoḥ |yamunāyai sakhibhyaśca gobhyo nityaṃ namo namaḥ || 28||

सिद्धाभ्यो दमनेभ्यश्च शक्तिभ्योऽपि नमो नमः ।स्वात्मगोपालकेभ्यश्च स्वप्रियाभ्यो नमो नमः ॥ २९॥

siddhābhyo damanebhyaśca śaktibhyo'pi namo namaḥ |svātmagopālakebhyaśca svapriyābhyo namo namaḥ || 29||

परमानन्दरूपाय श्रीनाथाय नमो नमः ।नमो निखिलगोविन्दपरिवारात्मने नमः ॥ ३०॥

paramānandarūpāya śrīnāthāya namo namaḥ |namo nikhilagovindaparivārātmane namaḥ || 30||

पीठस्तोत्रमिदं पुण्यं यः पठेद्वैष्णवो जनः ।ध्यायंस्तत्प्रातरुत्थाय तस्य स्यान्मनसेप्सितम् ॥ ३१॥

pīṭhastotramidaṃ puṇyaṃ yaḥ paṭhedvaiṣṇavo janaḥ |dhyāyaṃstatprātarutthāya tasya syānmanasepsitam || 31||

इति श्रीशाण्डिल्यसंहितायां पञ्चमे भक्तिखण्डे षोडशोऽध्यायेपीठस्तोत्रं सम्पूर्णम् ।

iti śrīśāṇḍilyasaṃhitāyāṃ pañcame bhaktikhaṇḍe ṣoḍaśo'dhyāyepīṭhastotraṃ sampūrṇam |