अमृतसञ्जीवनस्तोत्रम् अथवा अल्पमृत्युहरं स्तोत्रं Amritasanjivana Stotram

अथापरमहं वक्ष्येऽमृतसञ्जीवनं स्तवम् ।यस्यानुष्ठानमात्रेण मृत्युर्दूरात्पलायते ॥ १॥

athāparamahaṃ vakṣye'mṛtasañjīvanaṃ stavam |yasyānuṣṭhānamātreṇa mṛtyurdūrātpalāyate || 1||

असाध्याः कष्टसाध्याश्च महारोगा भयङ्कराः ।शीघ्रं नश्यन्ति पठनादस्यायुश्च प्रवर्धते ॥ २॥

asādhyāḥ kaṣṭasādhyāśca mahārogā bhayaṅkarāḥ |śīghraṃ naśyanti paṭhanādasyāyuśca pravardhate || 2||

शाकिनीडाकिनीदोषाः कुदृष्टिग्रहशत्रुजाः ।प्रेतवेतालयक्षोत्था बाधा नश्यन्ति चाखिलाः ॥ ३॥

śākinīḍākinīdoṣāḥ kudṛṣṭigrahaśatrujāḥ |pretavetālayakṣotthā bādhā naśyanti cākhilāḥ || 3||

दुरितानि समस्तानि नानाजन्मोद्भवानि च ।संसर्गजविकाराणि विलीयन्तेऽस्य पाठतः ॥ ४॥

duritāni samastāni nānājanmodbhavāni ca |saṃsargajavikārāṇi vilīyante'sya pāṭhataḥ || 4||

सर्वोपद्रवनाशाय सर्वबाधाप्रशान्तये ।आयुःप्रवृद्धये चैतत्स्तोत्रं परममद्भुतम् ॥ ५॥

sarvopadravanāśāya sarvabādhāpraśāntaye |āyuḥpravṛddhaye caitatstotraṃ paramamadbhutam || 5||

बालग्रहाभिभूतानां बालानां सुखदायकम् ।सर्वारिष्टहरं चैतद्बलपुष्टिकरं परम् ॥ ६॥

bālagrahābhibhūtānāṃ bālānāṃ sukhadāyakam |sarvāriṣṭaharaṃ caitadbalapuṣṭikaraṃ param || 6||

बालानां जीवनायैतत्स्तोत्रं दिव्यं सुधोपमम् ।मृतवत्सत्त्वहरणं चिरजीवित्वकारकम् ॥ ७॥

bālānāṃ jīvanāyaitatstotraṃ divyaṃ sudhopamam |mṛtavatsattvaharaṇaṃ cirajīvitvakārakam || 7||

महारोगाभिभूतानां भयव्याकुलितात्मनाम् ।सर्वाधिव्याधिहरणं भयघ्नममृतोपमम् ॥ ८॥

mahārogābhibhūtānāṃ bhayavyākulitātmanām |sarvādhivyādhiharaṇaṃ bhayaghnamamṛtopamam || 8||

अल्पमृत्युश्चापमृत्युः पाठादस्य प्रणश्यति ।जलाग्निविषशस्त्रारिनखिशृङ्गिभयं तथा ॥ ९॥

alpamṛtyuścāpamṛtyuḥ pāṭhādasya praṇaśyati |jalāgniviṣaśastrārinakhiśṛṅgibhayaṃ tathā || 9||

गर्भरक्षाकरं स्त्रीणां बालानां जीवनप्रदम् ।महारोगहरं नॄणामल्पमृत्युहरं परम् ॥ १०॥

garbharakṣākaraṃ strīṇāṃ bālānāṃ jīvanapradam |mahārogaharaṃ nṝṇāmalpamṛtyuharaṃ param || 10||

बाला वृद्धाश्च तरुणा नरा नार्यश्च दुःखिताः ।भवन्ति सुखिनः पाठादस्य लोके चिरायुषः ॥ ११॥

bālā vṛddhāśca taruṇā narā nāryaśca duḥkhitāḥ |bhavanti sukhinaḥ pāṭhādasya loke cirāyuṣaḥ || 11||

अस्मात्परतरं नास्ति जीवनोपाय ऐहिकः ।तस्मात्सर्वप्रयत्नेन पाठमस्य समाचरेत् ॥ १२॥

asmātparataraṃ nāsti jīvanopāya aihikaḥ |tasmātsarvaprayatnena pāṭhamasya samācaret || 12||

अयुतावृत्तिकं वाथ सहस्रावृत्तिकं तथा ।तदर्धं वा तदर्धं वा पठेदेतच्च भक्तितः ॥ १३॥

ayutāvṛttikaṃ vātha sahasrāvṛttikaṃ tathā |tadardhaṃ vā tadardhaṃ vā paṭhedetacca bhaktitaḥ || 13||

कलशे विष्णुमाराध्य दीपं प्रज्वाल्य यत्नतः ।सायं प्रातश्च विधिवत्स्तोत्रमेतत्पठेत्सुधीः ॥ १४॥

kalaśe viṣṇumārādhya dīpaṃ prajvālya yatnataḥ |sāyaṃ prātaśca vidhivatstotrametatpaṭhetsudhīḥ || 14||

सर्पिषा हविषा वाऽपि संयावेनाथ भक्तितः ।दशांशमानतो होमङ्कुर्यात्सर्वार्थसिद्धये ॥ १५॥

sarpiṣā haviṣā vā'pi saṃyāvenātha bhaktitaḥ |daśāṃśamānato homaṅkuryātsarvārthasiddhaye || 15||

अथ स्तोत्रम्नमो नमो विश्वविभावनाय नमो नमो लोकसुखप्रदाय ।नमो नमो विश्वसृजेश्वराय नमो नमो मुक्तिवरप्रदाय ॥ १६॥

atha stotramnamo namo viśvavibhāvanāya namo namo lokasukhapradāya |namo namo viśvasṛjeśvarāya namo namo muktivarapradāya || 16||

नमो नमस्तेऽखिललोकपाय नमो नमस्तेऽखिलकामदाय ।नमो नमस्तेऽखिलकारणाय नमो नमस्तेऽखिलरक्षकाय ॥ १७॥

namo namaste'khilalokapāya namo namaste'khilakāmadāya |namo namaste'khilakāraṇāya namo namaste'khilarakṣakāya || 17||

नमो नमस्ते सकलार्तिहर्त्रे नमो नमस्ते विरुजप्रकर्त्रे ।नमो नमस्तेऽखिलविश्वधर्त्रे नमो नमस्तेऽखिललोकभर्त्रे ॥ १८॥

namo namaste sakalārtihartre namo namaste virujaprakartre |namo namaste'khilaviśvadhartre namo namaste'khilalokabhartre || 18||

सृष्टं देव चराचरं जगदिदं ब्रह्मस्वरूपेण तेसर्वं तत्परिपाल्यते जगदिदं विष्णुस्वरूपेण ते ।विश्वं संह्रियते तदेव निखिलं रुद्रस्वरूपेण तेसंसिच्यामृतशीकरैर्हर महारिष्टं चिरं जीवय ॥ १९॥

sṛṣṭaṃ deva carācaraṃ jagadidaṃ brahmasvarūpeṇa tesarvaṃ tatparipālyate jagadidaṃ viṣṇusvarūpeṇa te |viśvaṃ saṃhriyate tadeva nikhilaṃ rudrasvarūpeṇa tesaṃsicyāmṛtaśīkarairhara mahāriṣṭaṃ ciraṃ jīvaya || 19||

यो धन्वन्तरिसंज्ञया निगदितः क्षीराब्धितो निःसृतोहस्ताभ्यां जनजीवनाय कलशं पीयूषपूर्णं दधत् ।आयुर्वेदमरीरचन्द्ररतरुजां नाशाय स त्वं मुदासंसिच्यामृतशीकरैर्हर महारिष्टं चिरं जीवय ॥ २०॥

yo dhanvantarisaṃjñayā nigaditaḥ kṣīrābdhito niḥsṛtohastābhyāṃ janajīvanāya kalaśaṃ pīyūṣapūrṇaṃ dadhat |āyurvedamarīracandraratarujāṃ nāśāya sa tvaṃ mudāsaṃsicyāmṛtaśīkarairhara mahāriṣṭaṃ ciraṃ jīvaya || 20||

स्त्रीरूपं वरभूषणाम्बरधरं त्रैलोक्यसम्मोहनंकृत्वा पाययति स्म यः सुरगणान्पीयूषमत्युत्तमम् ।चक्रे दैन्यगणान्सुधाविरहितान्सम्मोह्य स त्वं मुदासंसिच्यामृतशीकरैर्हर महारिष्टं चिरं जीवय ॥ २१॥

strīrūpaṃ varabhūṣaṇāmbaradharaṃ trailokyasammohanaṃkṛtvā pāyayati sma yaḥ suragaṇānpīyūṣamatyuttamam |cakre dainyagaṇānsudhāvirahitānsammohya sa tvaṃ mudāsaṃsicyāmṛtaśīkarairhara mahāriṣṭaṃ ciraṃ jīvaya || 21||

चाक्षुषोदधिसप्लावभूवेदप झषाकृते ।सिञ्च सिञ्चामृतकणैश्चिरं जीवय जीवय ॥ २२॥

cākṣuṣodadhisaplāvabhūvedapa jhaṣākṛte |siñca siñcāmṛtakaṇaiściraṃ jīvaya jīvaya || 22||

पृष्ठमन्दरनिर्घूर्णनिद्राक्ष कमठाकृते ।सिञ्च सिञ्चामृतकणैश्चिरं जीवय जीवय ॥ २३॥

pṛṣṭhamandaranirghūrṇanidrākṣa kamaṭhākṛte |siñca siñcāmṛtakaṇaiściraṃ jīvaya jīvaya || 23||

याच्ञाछलबलित्रासमुक्तनिर्जर वामन ।सिञ्च सिञ्चामृतकणैश्चिरं जीवय जीवय ॥ २४॥

yācñāchalabalitrāsamuktanirjara vāmana |siñca siñcāmṛtakaṇaiściraṃ jīvaya jīvaya || 24||

धरोद्धारहिरण्याक्षघातक्रोडाकृते प्रभो ।सिञ्च सिञ्चामृतकणैश्चिरं जीवय जीवय ॥ २५॥

dharoddhārahiraṇyākṣaghātakroḍākṛte prabho |siñca siñcāmṛtakaṇaiściraṃ jīvaya jīvaya || 25||

भक्तत्रासविनाशात्तचण्डत्व नृहरे विभो ।सिञ्च सिञ्चामृतकणैश्चिरं जीवय जीवय ॥ २६॥

bhaktatrāsavināśāttacaṇḍatva nṛhare vibho |siñca siñcāmṛtakaṇaiściraṃ jīvaya jīvaya || 26||

क्षत्रियारण्यसञ्छेदकुठारकर रैणुक ।सिञ्च सिञ्चामृतकणैश्चिरं जीवय जीवय ॥ २७॥

kṣatriyāraṇyasañchedakuṭhārakara raiṇuka |siñca siñcāmṛtakaṇaiściraṃ jīvaya jīvaya || 27||

रक्षोराजप्रतापाब्धिशोषणाशुग राघव ।सिञ्च सिञ्चामृतकणैश्चिरं जीवय जीवय ॥ २८॥

rakṣorājapratāpābdhiśoṣaṇāśuga rāghava |siñca siñcāmṛtakaṇaiściraṃ jīvaya jīvaya || 28||

भूभारासुरसन्दोहकालाग्ने रुक्मिणीपते ।सिञ्च सिञ्चामृतकणैश्चिरं जीवय जीवय ॥ २९॥

bhūbhārāsurasandohakālāgne rukmiṇīpate |siñca siñcāmṛtakaṇaiściraṃ jīvaya jīvaya || 29||

वेदमार्गरतानर्हविभ्रान्त्यै बुद्धरूपधृक् ।सिञ्च सिञ्चामृतकणैश्चिरं जीवय जीवय ॥ ३०॥

vedamārgaratānarhavibhrāntyai buddharūpadhṛk |siñca siñcāmṛtakaṇaiściraṃ jīvaya jīvaya || 30||

कलिवर्णाश्रमास्पष्टधर्मर्द्ध्यै कल्किरूपभाक् ।सिञ्च सिञ्चामृतकणैश्चिरं जीवय जीवय ॥ ३१॥

kalivarṇāśramāspaṣṭadharmarddhyai kalkirūpabhāk |siñca siñcāmṛtakaṇaiściraṃ jīvaya jīvaya || 31||

असाध्याः कष्टसाध्या ये महारोगा भयङ्कराः ।छिन्धि तानाशु चक्रेण चिरं जीवय जीवय ॥ ३२॥

asādhyāḥ kaṣṭasādhyā ye mahārogā bhayaṅkarāḥ |chindhi tānāśu cakreṇa ciraṃ jīvaya jīvaya || 32||

अल्पमृत्युं चापमृत्युं महोत्पातानुपद्रवान् ।भिन्धि भिन्धि गदाघातैश्चिरं जीवय जीवय ॥ ३३॥

alpamṛtyuṃ cāpamṛtyuṃ mahotpātānupadravān |bhindhi bhindhi gadāghātaiściraṃ jīvaya jīvaya || 33||

अहं न जाने किमपि त्वदन्यत्समाश्रये नाथ पदाम्बुजं ते ।कुरुष्व तद्यन्मनसीप्सितं ते सुकर्मणा केन समक्षमीयाम् ॥ ३४॥

ahaṃ na jāne kimapi tvadanyatsamāśraye nātha padāmbujaṃ te |kuruṣva tadyanmanasīpsitaṃ te sukarmaṇā kena samakṣamīyām || 34||

त्वमेव तातो जननी त्वमेव त्वमेव नाथश्च त्वमेव बन्धुः ।विद्याधनागारकुलं त्वमेव त्वमेव सर्वं मम देवदेव ॥ ३५॥

tvameva tāto jananī tvameva tvameva nāthaśca tvameva bandhuḥ |vidyādhanāgārakulaṃ tvameva tvameva sarvaṃ mama devadeva || 35||

न मेऽपराधं प्रविलोकय प्रभोऽपराधसिन्धोश्च दयानिधिस्त्वम् ।तातेन दुष्टोऽपि सुतः सुरक्ष्यते दयालुता तेऽवतु सर्वदाऽस्मान् ॥ ३६॥

na me'parādhaṃ pravilokaya prabho'parādhasindhośca dayānidhistvam |tātena duṣṭo'pi sutaḥ surakṣyate dayālutā te'vatu sarvadā'smān || 36||

अहह विस्मर नाथ च मां सदा करुणया निजया परिपूरितः ।भुवि भवान् यदि मे नहि रक्षकः कथमहो मम जीवनमत्र वै ॥ ३७॥

ahaha vismara nātha ca māṃ sadā karuṇayā nijayā paripūritaḥ |bhuvi bhavān yadi me nahi rakṣakaḥ kathamaho mama jīvanamatra vai || 37||

दह दह कृपया त्वं व्याधिजालं विशालंहर हर करवालं चाल्पमृत्योः करालम् ।निजजनपरिपालं त्वां भजे भावयालंकुरु कुरु बहुकालं जीवितं मे सदाऽलम् ॥ ३८॥

daha daha kṛpayā tvaṃ vyādhijālaṃ viśālaṃhara hara karavālaṃ cālpamṛtyoḥ karālam |nijajanaparipālaṃ tvāṃ bhaje bhāvayālaṃkuru kuru bahukālaṃ jīvitaṃ me sadā'lam || 38||

न यत्र धर्माचरणं च दानं व्रतं न यागो न च विष्णुचर्चा ।न पितृगोविप्रवरामरार्चा स्वल्पायुषस्तत्र जना भवन्ति ॥ ३९॥

na yatra dharmācaraṇaṃ ca dānaṃ vrataṃ na yāgo na ca viṣṇucarcā |na pitṛgovipravarāmarārcā svalpāyuṣastatra janā bhavanti || 39||

क्लीं श्रीं क्लीं श्रीं नमो भगवते जनार्दनाय सकलदुरितानि नाशयनाशय क्ष्रौं आमारोग्यं कुरु कुरु ह्रीं दीर्घमायुर्देहि देहि स्वाहा ।अस्य धारणतो जापादल्पमृत्युः प्रशाम्यति ।गर्भरक्षाकरं स्त्रीणां बालानां जीवनं परम् ॥ ४०॥

klīṃ śrīṃ klīṃ śrīṃ namo bhagavate janārdanāya sakaladuritāni nāśayanāśaya kṣrauṃ āmārogyaṃ kuru kuru hrīṃ dīrghamāyurdehi dehi svāhā |asya dhāraṇato jāpādalpamṛtyuḥ praśāmyati |garbharakṣākaraṃ strīṇāṃ bālānāṃ jīvanaṃ param || 40||

शतं पञ्चाशतं शक्त्याथवा पञ्चाधिविंशतिम् ।पुस्तकानां द्विजेभ्यस्तु दद्याद्दीर्घायुषाप्तये ॥ ४१॥

śataṃ pañcāśataṃ śaktyāthavā pañcādhiviṃśatim |pustakānāṃ dvijebhyastu dadyāddīrghāyuṣāptaye || 41||

भूर्जपत्रे विलिख्येदं कण्ठे वा बाहुमूलके ।सन्धारयेद्गर्भरक्षा बालरक्षा च जायते ॥ ४२॥

bhūrjapatre vilikhyedaṃ kaṇṭhe vā bāhumūlake |sandhārayedgarbharakṣā bālarakṣā ca jāyate || 42||

सर्वे रोगा विनश्यन्ति सर्वा बाधा प्रशाम्यति ।कुदृष्टिजं भयं नश्येत्तथा प्रेतादिजं भयम् ॥ ४३॥

sarve rogā vinaśyanti sarvā bādhā praśāmyati |kudṛṣṭijaṃ bhayaṃ naśyettathā pretādijaṃ bhayam || 43||

मया कथितमेतत्तेऽमृतसञ्जीवनं परम् ।अल्पमृत्युहरं स्तोत्रं मृतवत्सत्त्वनाशनम् ॥ ४४॥

mayā kathitametatte'mṛtasañjīvanaṃ param |alpamṛtyuharaṃ stotraṃ mṛtavatsattvanāśanam || 44||

इति श्रीसुदर्शनसंहितान्तर्गतं अमृतसञ्जीवनस्तोत्रं सम्पूर्णम् ।

iti śrīsudarśanasaṃhitāntargataṃ amṛtasañjīvanastotraṃ sampūrṇam |