शतरुद्रीयमाहात्म्यम् २ Skandaproktam Shatarudriyamahatmyam 2

(शिवरहस्यान्तर्गते ईश्वराख्ये)जैगीषव्यस्कन्दसंवादेस्कन्द उवाचशतरुद्रीयमाहात्म्यं पुनर्वक्ष्ये मुनीश्वर ।शृण्ष्व श्रद्धया युक्तो यदीच्छसि भवक्षयम् ॥ १॥

(śivarahasyāntargate īśvarākhye)jaigīṣavyaskandasaṃvādeskanda uvācaśatarudrīyamāhātmyaṃ punarvakṣye munīśvara |śṛṇṣva śraddhayā yukto yadīcchasi bhavakṣayam || 1||

शान्त्यर्थं शञ्च मे सूक्तं जप्त्वादौ मुनिपुङ्गव ।प्रजपञ्छतरुद्रीयं समग्रं नमकं तथा ॥ २॥

śāntyarthaṃ śañca me sūktaṃ japtvādau munipuṅgava |prajapañchatarudrīyaṃ samagraṃ namakaṃ tathā || 2||

शम्भोरुपासना पञ्चविधा प्रोक्ता महर्षिभिः ।अस्मिन् समग्रनमके नामानि त्रिशतं द्विज ॥ ३॥

śambhorupāsanā pañcavidhā proktā maharṣibhiḥ |asmin samagranamake nāmāni triśataṃ dvija || 3||

तिष्ठन्ति श्रुतिसाराणि भुक्तिमुक्तिकराणि हि ।एतैर्यो नामभिर्लिङ्गे स्थावरे जङ्गमेऽपि वा ॥ ४॥

tiṣṭhanti śrutisārāṇi bhuktimuktikarāṇi hi |etairyo nāmabhirliṅge sthāvare jaṅgame'pi vā || 4||

पूजयेत्सा महापूजा तया प्रीणाति शङ्करः ।मयोक्तैः शतसङ्ख्याकैर्मन्त्रैः शङ्करदैवतैः ॥ ५॥

pūjayetsā mahāpūjā tayā prīṇāti śaṅkaraḥ |mayoktaiḥ śatasaṅkhyākairmantraiḥ śaṅkaradaivataiḥ || 5||

छन्दर्ष्यादिकमुक्त्वादौ ज्वलिते जातवेदसिस्वाहान्तैर्जुहुयाद्रुद्रायेदन्नमम कथ्यते (?) ॥ ६॥

chandarṣyādikamuktvādau jvalite jātavedasisvāhāntairjuhuyādrudrāyedannamama kathyate (?) || 6||

एवं होमेन गौरीशः प्रीणाति फलदायकः ।तर्पयेच्छतरुद्रीयमध्यगैः शतमन्त्रकैः ॥ ७॥

evaṃ homena gaurīśaḥ prīṇāti phaladāyakaḥ |tarpayecchatarudrīyamadhyagaiḥ śatamantrakaiḥ || 7||

श्रीरुद्रं तर्पयामीति प्रोच्चरन् सुसमाहितः ।उपासनेयमितिस्याद्यासा सर्वफलदायिनी ॥ ८॥

śrīrudraṃ tarpayāmīti proccaran susamāhitaḥ |upāsaneyamitisyādyāsā sarvaphaladāyinī || 8||

न्यासः स्यान्मन्त्रसन्नाहो न्यासहीनो न सिद्धिदः ।बोधायनकृतं स्तोत्रं शतरुद्रीयदीपनम् ॥ ९॥

nyāsaḥ syānmantrasannāho nyāsahīno na siddhidaḥ |bodhāyanakṛtaṃ stotraṃ śatarudrīyadīpanam || 9||

बोधायनोक्तमार्गेण न्यासं कृत्वा विचक्षणः ।प्रजप्य शञ्चमे सूक्तमादौ विघ्ननिवृत्तये ॥ १०॥

bodhāyanoktamārgeṇa nyāsaṃ kṛtvā vicakṣaṇaḥ |prajapya śañcame sūktamādau vighnanivṛttaye || 10||

समग्रनमकस्यास्य वेदसारस्य ब्राह्मणाः ।सवामदेवो योऽघोर ऋषिरित्युच्यते बधैः ॥ ११॥

samagranamakasyāsya vedasārasya brāhmaṇāḥ |savāmadevo yo'ghora ṛṣirityucyate badhaiḥ || 11||

छन्दांसि चास्य गायत्री पङ्क्त्यनुष्टुभ एव च ।जगती बृहती चेति देवता कथ्यते ततः ॥ १२॥

chandāṃsi cāsya gāyatrī paṅktyanuṣṭubha eva ca |jagatī bṛhatī ceti devatā kathyate tataḥ || 12||

जपाकुसुमसाहस्रसन्निभे सूर्यमण्डले ।मध्यरूपी विराड्रूपी विधिविष्णुशिवात्मकः ॥ १३॥

japākusumasāhasrasannibhe sūryamaṇḍale |madhyarūpī virāḍrūpī vidhiviṣṇuśivātmakaḥ || 13||

योऽसावादित्यपुरुषः श्रीरुद्राख्यः परः शिवः ।परमेश्वरः (शः) स विज्ञेय शिवः सत्यं चिदात्मकम् ॥ १४॥

yo'sāvādityapuruṣaḥ śrīrudrākhyaḥ paraḥ śivaḥ |parameśvaraḥ (śaḥ) sa vijñeya śivaḥ satyaṃ cidātmakam || 14||

समग्रनमकस्यास्य कथितं दैवतं द्विजाः ।प्रीत्यर्थं परमेशस्य विनियोग उदाहृतः ॥ १५॥

samagranamakasyāsya kathitaṃ daivataṃ dvijāḥ |prītyarthaṃ parameśasya viniyoga udāhṛtaḥ || 15||

ऋषिच्छन्दोदैवतानि विहितानि समाहितः ।ध्यायेन्निरामयं वस्तु सर्गस्थितिलयाधिकम् ॥ १६॥

ṛṣicchandodaivatāni vihitāni samāhitaḥ |dhyāyennirāmayaṃ vastu sargasthitilayādhikam || 16||

यदेव व्यवहाराणामाधारं प्रकृतेः परम् ।निर्गुणं निष्कलं नित्यं मनोवाचामगोचरम् ॥ १७॥

yadeva vyavahārāṇāmādhāraṃ prakṛteḥ param |nirguṇaṃ niṣkalaṃ nityaṃ manovācāmagocaram || 17||

परं तेजोऽहमस्मीति ध्यात्वैवं मुनिपुङ्गवाः ।सगुणं हृदये ध्यायेद्ब्रह्मरन्ध्रेऽथवा प्रभुम् ॥ १८॥

paraṃ tejo'hamasmīti dhyātvaivaṃ munipuṅgavāḥ |saguṇaṃ hṛdaye dhyāyedbrahmarandhre'thavā prabhum || 18||

(सगुण ध्यानम्)शुद्धस्फटिकसङ्काशं मध्याह्नादित्यसन्निभम् ।स्वसंवेद्यमनाद्यन्तं श्वेतपद्मायुतप्रभम् ॥ १९॥

(saguṇa dhyānam)śuddhasphaṭikasaṅkāśaṃ madhyāhnādityasannibham |svasaṃvedyamanādyantaṃ śvetapadmāyutaprabham || 19||

गङ्गाधरं शशिधरं जटामकुटभूषितम् ।श्वेतभूतित्रिपुण्ड्रेण विराजितललाटकम् ॥ २०॥

gaṅgādharaṃ śaśidharaṃ jaṭāmakuṭabhūṣitam |śvetabhūtitripuṇḍreṇa virājitalalāṭakam || 20||

लोचनत्रयसम्पन्नं स्वर्णकुण्डलशोभितम् ।बिम्बाधरं चतुर्बाहुं मुक्ताहारोपशोभितम् ॥ २१॥

locanatrayasampannaṃ svarṇakuṇḍalaśobhitam |bimbādharaṃ caturbāhuṃ muktāhāropaśobhitam || 21||

अक्षमालांसुधाकुम्भं चिन्मयीं मुद्रिकामपि ।पुस्तकं च भुजैर्दिव्यैर्दधानं पार्वतीपतिम् ॥ २२॥

akṣamālāṃsudhākumbhaṃ cinmayīṃ mudrikāmapi |pustakaṃ ca bhujairdivyairdadhānaṃ pārvatīpatim || 22||

शुक्लयज्ञोपवीतेन श्वेतवस्त्रेण शोभितम् ।श्वेताम्बरधरं श्वेतं रत्नसिह्मासने स्थितम् ॥ २३॥

śuklayajñopavītena śvetavastreṇa śobhitam |śvetāmbaradharaṃ śvetaṃ ratnasihmāsane sthitam || 23||

वीरासने समासीनं विराड्रूपिणमीश्वरम् ।सन्तप्तहेमरुचिरस्वङ्गुलीयकभूषितम् ॥ २४॥

vīrāsane samāsīnaṃ virāḍrūpiṇamīśvaram |santaptahemarucirasvaṅgulīyakabhūṣitam || 24||

मुक्तामाणिक्य सौवर्णकाञ्चीदामविराजितम् ।योगिभिः सनकाद्यैश्च स्तूयमानमहर्निशम् ॥ २५॥

muktāmāṇikya sauvarṇakāñcīdāmavirājitam |yogibhiḥ sanakādyaiśca stūyamānamaharniśam || 25||

दातारं सर्वविद्यानां सकलैश्वर्यदायकम् ।सर्वाभीष्टप्रदाचारं वटमूलनिवासिनम् ॥ २६॥

dātāraṃ sarvavidyānāṃ sakalaiśvaryadāyakam |sarvābhīṣṭapradācāraṃ vaṭamūlanivāsinam || 26||

सत्यानन्दचिदात्मानं शङ्करं परमेश्वरम् ।वामाङ्के संस्थितां गौरीं बालार्कायुतसन्निभाम् ॥ २७॥

satyānandacidātmānaṃ śaṅkaraṃ parameśvaram |vāmāṅke saṃsthitāṃ gaurīṃ bālārkāyutasannibhām || 27||

जपाकुसुमसाहस्रसमानश्रियमीश्वरीम् ।सुवर्णरत्नखचितमकुटेन विराजिताम् ॥ २८॥

japākusumasāhasrasamānaśriyamīśvarīm |suvarṇaratnakhacitamakuṭena virājitām || 28||

ललाटपटट्सम्राजत्संलग्नतिलकाङ्किताम् ।भ्रमद्भ्रमरनीलाभधम्मिल्लालकशोभिताम् ॥ २९॥

lalāṭapaṭaṭsamrājatsaṃlagnatilakāṅkitām |bhramadbhramaranīlābhadhammillālakaśobhitām || 29||

सौन्दर्यभ्राजत्कामेश कोदण्डभ्रूयुगान्विताम् ।राजीवायतनेत्रां तां नीलोत्पलदलेक्षणाम् ॥ ३०॥

saundaryabhrājatkāmeśa kodaṇḍabhrūyugānvitām |rājīvāyatanetrāṃ tāṃ nīlotpaladalekṣaṇām || 30||

मुक्तामाणिक्यखचित नासिकाभरणान्विताम् ।पक्वबिम्बफलाभास्वदधर द्वयराजिताम् ॥ ३१॥

muktāmāṇikyakhacita nāsikābharaṇānvitām |pakvabimbaphalābhāsvadadhara dvayarājitām || 31||

दाडिमीबीजसङ्काशद्वात्रिंशद्दन्तशोभिताम् ।सन्तप्तहेमखचित ताटङ्काभरणान्विताम् ॥ ३२॥

dāḍimībījasaṅkāśadvātriṃśaddantaśobhitām |santaptahemakhacita tāṭaṅkābharaṇānvitām || 32||

कुण्डलद्वयसंशोभिकर्णयुग्मविराजिताम् ।ताम्बूलचर्वणरतां नवरत्नविराजिताम् ॥ ३३॥

kuṇḍaladvayasaṃśobhikarṇayugmavirājitām |tāmbūlacarvaṇaratāṃ navaratnavirājitām || 33||

आढ्य(द्य)भूषण सौवर्ण चित्रकाभरणान्विताम् ।पदकाभरणोपेतां मुक्ताहारोपशोभिताम् ॥ ३४॥

āḍhya(dya)bhūṣaṇa sauvarṇa citrakābharaṇānvitām |padakābharaṇopetāṃ muktāhāropaśobhitām || 34||

इक्षुकार्मुकपुष्पेषुचापबाणशरावरैः ।दिव्याङ्गुलीयकयुतैः केयूरयुगलान्वितैः ॥ ३५॥

ikṣukārmukapuṣpeṣucāpabāṇaśarāvaraiḥ |divyāṅgulīyakayutaiḥ keyūrayugalānvitaiḥ || 35||

स्वर्णकङ्कणसंयुक्तैश्चतुर्भिर्बाहुभिर्युताम् ।सुवर्णरत्नखचितकाञ्चीघण्टा(ण्टी)विराजिताम् ॥ ३६॥

svarṇakaṅkaṇasaṃyuktaiścaturbhirbāhubhiryutām |suvarṇaratnakhacitakāñcīghaṇṭā(ṇṭī)virājitām || 36||

सौभाग्यभूषणयुतां सूक्ष्ममध्यविराजिताम् ।रक्तचन्दनसंलिप्तहेमकुम्भोपमस्तनीम् ॥ ३७॥

saubhāgyabhūṣaṇayutāṃ sūkṣmamadhyavirājitām |raktacandanasaṃliptahemakumbhopamastanīm || 37||

रक्तवस्त्रपरीधानां रक्तमाल्यविभूषिताम् ।तनुमध्यां पृथुश्रोणीं शिववामाङ्कसंश्रयाम् ॥ ३८॥

raktavastraparīdhānāṃ raktamālyavibhūṣitām |tanumadhyāṃ pṛthuśroṇīṃ śivavāmāṅkasaṃśrayām || 38||

कदलीललितस्तम्भसन्निभोरुयुगान्विताम् ।सुवर्णपादकटकयुगलेन सुशोभिताम् ॥ ३९॥

kadalīlalitastambhasannibhoruyugānvitām |suvarṇapādakaṭakayugalena suśobhitām || 39||

सन्तप्तहेमपादाङ्गुलीयकैः सुविराजिताम् ।पूर्णचन्द्रमुखीमम्बां सुस्मितास्यविराजिताम् ॥ ४०॥

santaptahemapādāṅgulīyakaiḥ suvirājitām |pūrṇacandramukhīmambāṃ susmitāsyavirājitām || 40||

ब्रह्मविष्णुमहेन्द्रादिशिरोमकुटजातया ।श्रिया विराजितपदां भक्तत्राणपरायणाम् ॥ ४१॥

brahmaviṣṇumahendrādiśiromakuṭajātayā |śriyā virājitapadāṃ bhaktatrāṇaparāyaṇām || 41||

स्वकान्त्या शङकरं देवं पुनरप्यरुणीकृतम् ।सर्वालङ्कारसुभगं युवानमतिसुन्दरम् ॥ ४२॥

svakāntyā śaṅakaraṃ devaṃ punarapyaruṇīkṛtam |sarvālaṅkārasubhagaṃ yuvānamatisundaram || 42||

छत्रेण शोभितं मूर्ध्नि चामराभ्यां विराजितम् ।ब्रह्मविष्णुमहेन्द्रादिवन्द्यमानपदाम्बुजम् ॥ ४३॥

chatreṇa śobhitaṃ mūrdhni cāmarābhyāṃ virājitam |brahmaviṣṇumahendrādivandyamānapadāmbujam || 43||

सृष्टिस्थित्युपसंहारहेतुभूतं सनातनम् ।अन्योन्याश्लिष्टहृद्बाहुं गौरीशङ्करसंज्ञितम् ॥ ४४॥

sṛṣṭisthityupasaṃhārahetubhūtaṃ sanātanam |anyonyāśliṣṭahṛdbāhuṃ gaurīśaṅkarasaṃjñitam || 44||

सनातनं परम्ब्रह्म परमात्मानमव्ययम् ।नमामि जगतामीशं परमात्मनमव्ययम् ॥ ४५॥

sanātanaṃ parambrahma paramātmānamavyayam |namāmi jagatāmīśaṃ paramātmanamavyayam || 45||

एवं ध्यात्वा जपेन्नित्यं शतरुद्रीयमादरात् ।नमकं रुद्रसङ्ख्याकाननुवाकाञ्जपेत्ततः ॥ ४६॥

evaṃ dhyātvā japennityaṃ śatarudrīyamādarāt |namakaṃ rudrasaṅkhyākānanuvākāñjapettataḥ || 46||

एकवारं द्विवारं वा त्रिवारं चमकान्वितम् ।नमकं प्रजपेदेषा जपोपास्तिरितीरिता ॥ ४७॥

ekavāraṃ dvivāraṃ vā trivāraṃ camakānvitam |namakaṃ prajapedeṣā japopāstiritīritā || 47||

शिवप्रीतिकरा श्रेष्ठा श्रीरुद्रैक्यप्रदायिनी ।स्थावरे जङ्गमे लिङ्गे समाहितमनाः शुचिः ॥ ४८॥

śivaprītikarā śreṣṭhā śrīrudraikyapradāyinī |sthāvare jaṅgame liṅge samāhitamanāḥ śuciḥ || 48||

न्यासध्यानादिसहितं शञ्चमे सूक्तपूर्वकम् ।प्रजपञ्छतरुद्रीयमभिषेकं समाचरेत् ॥ ४९॥

nyāsadhyānādisahitaṃ śañcame sūktapūrvakam |prajapañchatarudrīyamabhiṣekaṃ samācaret || 49||

एकवारं द्विवारं वा त्रिवारं चमकान्विता ।उपास्तिः पञ्चमी प्रोक्ता शम्भोः प्रीतिकरी शुभा ॥ ५०॥

ekavāraṃ dvivāraṃ vā trivāraṃ camakānvitā |upāstiḥ pañcamī proktā śambhoḥ prītikarī śubhā || 50||

विशेषमन्त्रान् वक्ष्यामि शृणुध्वं द्विजपुङ्गवाः ।जप्त्वा समग्रनमकं शतरुद्रीयमुत्तमम् ॥ ५१॥

viśeṣamantrān vakṣyāmi śṛṇudhvaṃ dvijapuṅgavāḥ |japtvā samagranamakaṃ śatarudrīyamuttamam || 51||

चमकस्यानुवाकस्य चैकमेकं ततो जपेत् ।रुद्रैकादशिनीमेतां प्रजपञ्छङ्करोपरि ॥ ५२॥

camakasyānuvākasya caikamekaṃ tato japet |rudraikādaśinīmetāṃ prajapañchaṅkaropari || 52||

करोति योऽभिषेकं हि नियमेनैकमण्डलम् ।स महापातकैस्त्यक्तो राजसूयफलं लभेत् ॥ ५३॥

karoti yo'bhiṣekaṃ hi niyamenaikamaṇḍalam |sa mahāpātakaistyakto rājasūyaphalaṃ labhet || 53||

शतमन्त्रैश्चतुर्वारं जुहुयात्पायसं शुभम् ।रुद्रसङ्ख्यानुवाकैश्च जपहोमार्चनं ततः ॥ ५४॥

śatamantraiścaturvāraṃ juhuyātpāyasaṃ śubham |rudrasaṅkhyānuvākaiśca japahomārcanaṃ tataḥ || 54||

मधुत्रितयसंयुक्तं महापापैः प्रयुच्यते ।अभिषेकं केवलं वा मण्डलं यः करोति हि ॥ ५५॥

madhutritayasaṃyuktaṃ mahāpāpaiḥ prayucyate |abhiṣekaṃ kevalaṃ vā maṇḍalaṃ yaḥ karoti hi || 55||

इह भुक्त्वाऽखिलान्भोगान् परेब्रह्मणिलीयते ।पूजयाभ्यधिको होमो होमात्तर्पणमुत्तमम् ॥ ५६॥

iha bhuktvā'khilānbhogān parebrahmaṇilīyate |pūjayābhyadhiko homo homāttarpaṇamuttamam || 56||

तर्पणाच्च जपः क्षेष्ठो ह्यभिषेकः परो जपात् ।रुद्रैकादशनीं जप्त्वा प्रजपेच्छान्तिपञ्चकम् ॥ ५७॥

tarpaṇācca japaḥ kṣeṣṭho hyabhiṣekaḥ paro japāt |rudraikādaśanīṃ japtvā prajapecchāntipañcakam || 57||

अन्यथा तस्य संसिद्धिर्नास्ति नास्ति तपोधनाः ।यदा भक्त्युदयो नॄणां तदोपस्तिं समाचरेत् ॥ ५८॥

anyathā tasya saṃsiddhirnāsti nāsti tapodhanāḥ |yadā bhaktyudayo nṝṇāṃ tadopastiṃ samācaret || 58||

चतुरस्रं वरं कुण्डं होमकाले विधीयते ।गणेशमादौ सम्पूज्य कृत्वा नियममेव च ॥ ५९॥

caturasraṃ varaṃ kuṇḍaṃ homakāle vidhīyate |gaṇeśamādau sampūjya kṛtvā niyamameva ca || 59||

उपासनापञ्चकार्यं कृत्वा नियममादितः ।समग्रं नमकं प्रातः प्रजपेच्चमकान्वितम् ॥ ६०॥

upāsanāpañcakāryaṃ kṛtvā niyamamāditaḥ |samagraṃ namakaṃ prātaḥ prajapeccamakānvitam || 60||

स महापातकैर्मुक्तः शिवसायुज्यमश्नुते ।मध्याह्ने प्रजपेद्यस्तु चमकेन युतं द्विजाः ॥ ६१॥

sa mahāpātakairmuktaḥ śivasāyujyamaśnute |madhyāhne prajapedyastu camakena yutaṃ dvijāḥ || 61||

स सूर्यमण्डलं भित्वा गणानामग्रणीर्भवेत् ।सायङ्काले जपेद्यस्तु नमकं चमकान्वितम् ॥ ६२॥

sa sūryamaṇḍalaṃ bhitvā gaṇānāmagraṇīrbhavet |sāyaṅkāle japedyastu namakaṃ camakānvitam || 62||

अवाप्य सकलान्भोगान् परेब्रह्मणि लीयते ।भूतिभूषितसर्वाङ्गो लिङ्गपूजारतः शुचिः ॥ ६३॥

avāpya sakalānbhogān parebrahmaṇi līyate |bhūtibhūṣitasarvāṅgo liṅgapūjārataḥ śuciḥ || 63||

नमकं चमकं नित्यं प्रजपेत्फलदायकम् ।वेदसाराणि नामानि कथितान्यत्र तानि हि ॥ ६४॥

namakaṃ camakaṃ nityaṃ prajapetphaladāyakam |vedasārāṇi nāmāni kathitānyatra tāni hi || 64||

एतज्जाप्यमृतो भूत्वा ब्रह्मभूयाय कल्पते ।एतेन शतरुद्रीयं न्यासध्यानादिकं शुभम् ॥ ६५॥

etajjāpyamṛto bhūtvā brahmabhūyāya kalpate |etena śatarudrīyaṃ nyāsadhyānādikaṃ śubham || 65||

मयोक्तं ब्राह्मणश्रेष्ठाः किं पुनः श्रोतुमिच्छथ ॥ ६६॥

mayoktaṃ brāhmaṇaśreṣṭhāḥ kiṃ punaḥ śrotumicchatha || 66||

(फलम्)एकावृत्त्याऽघनाशो भवति गिरिसुते तद्द्वये वै गणेन्द्रःकैलासं प्रविशेच्चतत्त्रितयतः श्रीरुद्रजापी नरः ।षड्वारं प्रजपंश्च मुक्तिफलभाग्भूयो भवेच्छाम्भवःश्रीरुद्रार्चनतः सुबिल्वकुसुमैर्लिङ्गे च साक्षाच्छिवः ॥ ६७॥

(phalam)ekāvṛttyā'ghanāśo bhavati girisute taddvaye vai gaṇendraḥkailāsaṃ praviśeccatattritayataḥ śrīrudrajāpī naraḥ |ṣaḍvāraṃ prajapaṃśca muktiphalabhāgbhūyo bhavecchāmbhavaḥśrīrudrārcanataḥ subilvakusumairliṅge ca sākṣācchivaḥ || 67||

छन्दोदैवतसर्षिकं मनुगणं जप्त्वा भवेत्पावनःनैतद्वेद यदि श्रुतीशतगतं जप्ताश्च ते निष्फलाः ।तस्माज्ज्ञानत एव वित्त तदिमं जप्त्वा विमुक्तो भवेत्हुत्वा चाप्यभिषिच्य वा द्विजवरो विन्देत सर्वं फलम् ॥॥ इति शिवरहस्यान्तर्गते स्कन्दप्रोक्तं शतरुद्रीयमाहात्म्यं २ सम्पूर्णम् ॥॥ श्रीशिवरहस्यम् । ईश्वराख्यः दशमांशः । अध्यायः २८ । १६८॥

chandodaivatasarṣikaṃ manugaṇaṃ japtvā bhavetpāvanaḥnaitadveda yadi śrutīśatagataṃ japtāśca te niṣphalāḥ |tasmājjñānata eva vitta tadimaṃ japtvā vimukto bhavethutvā cāpyabhiṣicya vā dvijavaro vindeta sarvaṃ phalam |||| iti śivarahasyāntargate skandaproktaṃ śatarudrīyamāhātmyaṃ 2 sampūrṇam |||| śrīśivarahasyam | īśvarākhyaḥ daśamāṃśaḥ | adhyāyaḥ 28 | 168||

– ॥ श्रीशिवरहस्यम् ।ईश्वराख्यः दशमांशः ।अध्यायः २८ ।१-६८॥

– || śrīśivarahasyam |īśvarākhyaḥ daśamāṃśaḥ |adhyāyaḥ 28 | 1-68||