शिवार्चनं परोधर्मः Shivarchanam Paro Dharmah

॥ शिवार्चनैव सवितुर्गायत्रीकथनम् ॥(व्यासःशृणुध्वं मुनयः सर्वे भूतिधारणपूर्वकम् ।)हृदि ध्यात्वा महादेवं मङ्गलार्धाङ्गमव्ययम् ॥ १॥

|| śivārcanaiva saviturgāyatrīkathanam ||(vyāsaḥśṛṇudhvaṃ munayaḥ sarve bhūtidhāraṇapūrvakam |)hṛdi dhyātvā mahādevaṃ maṅgalārdhāṅgamavyayam || 1||

शिवार्चनं परो धर्मः सर्वधर्मोत्तमोत्तमः ।तद्भिन्नधर्माः सर्वेऽपि तदर्था एव केवलम् ॥ २॥

śivārcanaṃ paro dharmaḥ sarvadharmottamottamaḥ |tadbhinnadharmāḥ sarve'pi tadarthā eva kevalam || 2||

शिवः परं परं ब्रह्म सच्चिदानन्दलक्षणम् ।विज्ञानघन एवेति सानन्दघनमुच्यते ॥ ३॥

śivaḥ paraṃ paraṃ brahma saccidānandalakṣaṇam |vijñānaghana eveti sānandaghanamucyate || 3||

तन्निर्विकारं निर्लिप्तं तदाद्यन्तविवर्जितम् ।ज्योतिःस्वरूपममलं नामरूपविवर्जितम् ॥ ४॥

tannirvikāraṃ nirliptaṃ tadādyantavivarjitam |jyotiḥsvarūpamamalaṃ nāmarūpavivarjitam || 4||

अप्रमेयं निर्गुणं च निरञ्जनमनामयम् ।वाचामगोचरं मन्ये मनसामप्यगोचरम् ॥ ५॥

aprameyaṃ nirguṇaṃ ca nirañjanamanāmayam |vācāmagocaraṃ manye manasāmapyagocaram || 5||

यतो वाचो निवर्तन्ते अप्राप्य मनसा सह ।वेदवेदान्तवचनैरशक्यं तन्निरूपणम् ॥ ६॥

yato vāco nivartante aprāpya manasā saha |vedavedāntavacanairaśakyaṃ tannirūpaṇam || 6||

पुराणानां का कथात्र वाङ्मार्गार्गलमेव तत् ।अनर्गलप्रवाहाणां कथानामपि वा कथा ॥ ७॥

purāṇānāṃ kā kathātra vāṅmārgārgalameva tat |anargalapravāhāṇāṃ kathānāmapi vā kathā || 7||

वागगोचरमप्येतत् कथञ्चित् कृपया प्रभोः ।शम्भोर्विषयतामाप (?) ततस्तद्वचसामपि ॥ ८॥

vāgagocaramapyetat kathañcit kṛpayā prabhoḥ |śambhorviṣayatāmāpa (?) tatastadvacasāmapi || 8||

इदमप्युच्यते तावत् प्रेरितेन कथञ्चन ।शिवेनैव मया विप्राः स बुद्धिप्रेरकः शिवः ॥ ९॥

idamapyucyate tāvat preritena kathañcana |śivenaiva mayā viprāḥ sa buddhiprerakaḥ śivaḥ || 9||

देवस्य सवितुर्बुद्धिं प्रचोदयति शङ्करः ।स एव भगवान् भर्गो धियो यो नः प्रचोदयात् ॥ १०॥

devasya saviturbuddhiṃ pracodayati śaṅkaraḥ |sa eva bhagavān bhargo dhiyo yo naḥ pracodayāt || 10||

देवस्य दीप्यमानस्य सवितुः ज्ञानमुत्तमम् ।प्रचोदयति विश्वात्मा वरेण्यः शिव एव सः ॥ ११॥

devasya dīpyamānasya savituḥ jñānamuttamam |pracodayati viśvātmā vareṇyaḥ śiva eva saḥ || 11||

अस्य भर्गपदस्यैव माहात्म्यं श्रुतिषु श्रुतम् ।संसारभर्जनाद्भर्गः सोयं स्वर्गापवर्गदः ॥ १२॥

asya bhargapadasyaiva māhātmyaṃ śrutiṣu śrutam |saṃsārabharjanādbhargaḥ soyaṃ svargāpavargadaḥ || 12||

॥ इति शिवरहस्यान्तर्गते शिवार्चनैव सवितुर्गायत्रीकथनं सम्पूर्णम् ॥॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः २। १५२७॥

|| iti śivarahasyāntargate śivārcanaiva saviturgāyatrīkathanaṃ sampūrṇam |||| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 2| 1527||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः २। १५-२७॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 2| 15-27||