काशीक्षेत्रमाहात्म्यवर्णनम् शिवप्रोक्तं Shivaproktam Kashikshetramahatmyavarnanam

(शिवरहस्यान्तर्गते उग्राख्ये)(शिवपार्वतीसंवदे)काशीवासोऽभवत्पूर्वं साक्षान्मुक्तिप्रदायकः ।पश्य पाशुपतान्वृद्धान् भस्मरुद्राक्षभूषणान् ॥ ७३१॥

(śivarahasyāntargate ugrākhye)(śivapārvatīsaṃvade)kāśīvāso'bhavatpūrvaṃ sākṣānmuktipradāyakaḥ |paśya pāśupatānvṛddhān bhasmarudrākṣabhūṣaṇān || 731||

एते पाशुपताः शुद्धाः काशीं पाशुपतस्थलीम् ।महापद्यपि घोराढ्यां (घोरायां) न त्यजिष्यन्ति(नैव त्यक्ष्यन्ति) सुव्रताः ॥ ७३२॥

ete pāśupatāḥ śuddhāḥ kāśīṃ pāśupatasthalīm |mahāpadyapi ghorāḍhyāṃ (ghorāyāṃ) na tyajiṣyanti(naiva tyakṣyanti) suvratāḥ || 732||

असङ्ख्येया हि ते सर्वे मल्लिङ्गार्चनतत्पराः ।ममैवाराधनं कृत्वा तिष्ठन्त्यत्र मुमुक्षवः ॥ ७३३॥

asaṅkhyeyā hi te sarve malliṅgārcanatatparāḥ |mamaivārādhanaṃ kṛtvā tiṣṭhantyatra mumukṣavaḥ || 733||

पश्यैतान्भस्मदिग्धाङ्गान् रुद्राक्षाभरणप्रियान् ।अनर्ध्यार्घ्यकरान्धन्यान्मन्नामस्मरणोत्सुकान् ॥ ७३४॥

paśyaitānbhasmadigdhāṅgān rudrākṣābharaṇapriyān |anardhyārghyakarāndhanyānmannāmasmaraṇotsukān || 734||

महादेवेत्ति मामुच्चेर्वदतः प्रीतिपूर्वकम् ।कथमेते समायान्ति पश्य पश्य वरानने ॥ ७३५॥

mahādevetti māmuccervadataḥ prītipūrvakam |kathamete samāyānti paśya paśya varānane || 735||

एतदुच्चरितः श्राव्यो महादेवेत्ययं ध्वनिः ।अमृताम्मृतभूतो यः शिवे रुचिकरो मम ॥ ७३६॥

etaduccaritaḥ śrāvyo mahādevetyayaṃ dhvaniḥ |amṛtāmmṛtabhūto yaḥ śive rucikaro mama || 736||

महादेवेति पीयूषं पिबन्तीव पुनः पुनः ।पश्यं पश्य पुनः प्रीत्या महादेवेति वादिनः ॥ ७३७॥

mahādeveti pīyūṣaṃ pibantīva punaḥ punaḥ |paśyaṃ paśya punaḥ prītyā mahādeveti vādinaḥ || 737||

नानादिग्भ्यः समायान्ति पश्य पाशुपतोत्तमान् ।अर्घ्यहस्तान्महादेवेत्युच्चैरुच्चरतो मुदा ॥ ७३८॥

nānādigbhyaḥ samāyānti paśya pāśupatottamān |arghyahastānmahādevetyuccairuccarato mudā || 738||

कथं भान्ति शुचिर्भूत्वा (पूतात्मानः कथं भान्ति)भस्मभासितविग्रहाः ।सर्वेऽप्येते भस्मफाला मम पारिषदाः शिवे ॥ ७३९॥

kathaṃ bhānti śucirbhūtvā (pūtātmānaḥ kathaṃ bhānti)bhasmabhāsitavigrahāḥ |sarve'pyete bhasmaphālā mama pāriṣadāḥ śive || 739||

मदर्चनं विनैतेषामन्यत्कार्यं न दृश्यते ।एते कालत्रयेऽप्येवमागत्याभ्यर्चयन्ति माम् ॥ ७४०॥

madarcanaṃ vinaiteṣāmanyatkāryaṃ na dṛśyate |ete kālatraye'pyevamāgatyābhyarcayanti mām || 740||

शिवे पश्य महाशैवान् मुक्तिमण्टपसंस्थितान् ।पञ्चाक्षरजपासाक्तान् मल्लिङ्गालोकनोत्सुकान् ॥ ७४१॥

śive paśya mahāśaivān muktimaṇṭapasaṃsthitān |pañcākṣarajapāsāktān malliṅgālokanotsukān || 741||

रुद्राध्यायजपासक्तान्पश्य शैवान् गिरीन्द्रजे ।ध्यायन्ति यामजं नित्यं पश्यैतान् शैवपुङ्गवान् ॥ ७४२॥

rudrādhyāyajapāsaktānpaśya śaivān girīndraje |dhyāyanti yāmajaṃ nityaṃ paśyaitān śaivapuṅgavān || 742||

एते नृत्यन्ति शैवेन्द्रा मामभ्यर्च्य यथाविधि ।साष्टाङ्गं प्रणमन्त्येते शतधा पश्य तान् शिवे ॥ ७४३॥

ete nṛtyanti śaivendrā māmabhyarcya yathāvidhi |sāṣṭāṅgaṃ praṇamantyete śatadhā paśya tān śive || 743||

कर्पूरदीपान्धृत्वैते नामानि शुभदानि मे ।गायन्त्येते गानलोलं विदित्वा मामजं शिवे ॥ ७४४॥

karpūradīpāndhṛtvaite nāmāni śubhadāni me |gāyantyete gānalolaṃ viditvā māmajaṃ śive || 744||

सर्वऽप्येते नित्यतृप्ता नित्यानन्दा निरामयाः ।ध्यायन्ति सच्चिदानन्दं मामेवैते मुदा सदा ॥ ७४५॥

sarva'pyete nityatṛptā nityānandā nirāmayāḥ |dhyāyanti saccidānandaṃ māmevaite mudā sadā || 745||

मत्कथाऽऽकर्णनासक्ता निर्वाणपदवाञ्छया ।तिष्ठन्त्यत्रानिशं देवि मामेव शरणं गताः ॥ ७४६॥

matkathā''karṇanāsaktā nirvāṇapadavāñchayā |tiṣṭhantyatrāniśaṃ devi māmeva śaraṇaṃ gatāḥ || 746||

पश्य पश्य गणान्देवि भैरवादीन्विलोकय ।सेवन्ते मामजं नित्यमनन्तविजयान्विताः ॥ ७४७॥

paśya paśya gaṇāndevi bhairavādīnvilokaya |sevante māmajaṃ nityamanantavijayānvitāḥ || 747||

सर्वान्सुराधिपान्पश्य मदर्चनपरायणान् ।पुरात्र कार्तिके मासि चतुर्दश्यां सुराः शिवे ॥ ७४८॥

sarvānsurādhipānpaśya madarcanaparāyaṇān |purātra kārtike māsi caturdaśyāṃ surāḥ śive || 748||

सायङ्काले समागत्य पूजां कृत्वा स्थिता मुदा ।तदा दधीचिरर्ध्याद्यैर्मामभ्यर्च्य प्रयत्नतः ॥ ७४९॥

sāyaṅkāle samāgatya pūjāṃ kṛtvā sthitā mudā |tadā dadhīcirardhyādyairmāmabhyarcya prayatnataḥ || 749||

सत्वरं गन्तुमुधुक्तः स महार्हमहास्तदा ।तदातु मुनयः सर्वे बहवस्तेन सङ्गताः ॥ ७५०॥

satvaraṃ gantumudhuktaḥ sa mahārhamahāstadā |tadātu munayaḥ sarve bahavastena saṅgatāḥ || 750||

गन्तुं समुद्यता देवि सम्मर्दोऽभूत्तदा बहु ।ततः परमृषिगणाः सर्वे सम्पूज्य मां निशि ॥ ७५१॥

gantuṃ samudyatā devi sammardo'bhūttadā bahu |tataḥ paramṛṣigaṇāḥ sarve sampūjya māṃ niśi || 751||

भक्त्या जागरणं चक्रुः शृण्वन्तो मत्कथां शिवे ।कार्तिकस्य चतुर्दश्यां बिल्वैश्च कनकाह्वयैः ॥ ७५२॥

bhaktyā jāgaraṇaṃ cakruḥ śṛṇvanto matkathāṃ śive |kārtikasya caturdaśyāṃ bilvaiśca kanakāhvayaiḥ || 752||

द्रोणपुष्पैश्च ते पूजां चक्रुर्मम महेश्वरि ।तिलैः ससर्षपैः शुक्लैश्चक्रुः पूजां मयि प्रिये ॥ ७५३॥

droṇapuṣpaiśca te pūjāṃ cakrurmama maheśvari |tilaiḥ sasarṣapaiḥ śuklaiścakruḥ pūjāṃ mayi priye || 753||

कृष्णगोघृतदीपानां मह्यं सार्धं शतत्रयम् ।दत्तं क्षीरान्नमाज्याक्तं दत्तं मह्यं वरानने ॥ ७५४॥

kṛṣṇagoghṛtadīpānāṃ mahyaṃ sārdhaṃ śatatrayam |dattaṃ kṣīrānnamājyāktaṃ dattaṃ mahyaṃ varānane || 754||

धूपदीपौ पुनर्दत्तौ दत्तः पुष्पाञ्जलिस्ततः ।प्रदक्षिणनमस्कारान्कृत्वा च तदनन्तरम् ॥ ७५५॥

dhūpadīpau punardattau dattaḥ puṣpāñjalistataḥ |pradakṣiṇanamaskārānkṛtvā ca tadanantaram || 755||

रात्रिर्नीता प्रयत्नेन मत्कथाश्रवणादिभिः ।ततोऽरुणोदये जाते स्नात्वा तीर्थेऽथ भस्मना ॥ ७५६॥

rātrirnītā prayatnena matkathāśravaṇādibhiḥ |tato'ruṇodaye jāte snātvā tīrthe'tha bhasmanā || 756||

त्रिपुण्ड्रधारणं कृत्वा कृत्वा रुद्राक्षधारणम् ।सन्ध्यां समाप्य विश्वेशं समभ्यर्च्य यथाविधि ॥ ७५७॥

tripuṇḍradhāraṇaṃ kṛtvā kṛtvā rudrākṣadhāraṇam |sandhyāṃ samāpya viśveśaṃ samabhyarcya yathāvidhi || 757||

मद्भतान्भोजयामासुरन्नैर्नानाविधैः शुभैः ।यः शुक्लोर्जचतुर्दश्यामुपोष्य प्रयतः शिवे ॥ ७५८॥

madbhatānbhojayāmāsurannairnānāvidhaiḥ śubhaiḥ |yaḥ śuklorjacaturdaśyāmupoṣya prayataḥ śive || 758||

मामर्चयति विश्वेशं स मुक्तो भवति ध्रुवम् ।मल्लिङ्गपूजनं पुण्यं सर्वदा सर्वकामदम् ॥ ७५९॥

māmarcayati viśveśaṃ sa mukto bhavati dhruvam |malliṅgapūjanaṃ puṇyaṃ sarvadā sarvakāmadam || 759||

ऊर्जशुक्लचतुर्दश्यां अर्चितं बहुपुण्यदम् ।कार्तिकस्य चतुर्दश्यां सितायां मां प्रयत्नतः ॥ ७६०॥

ūrjaśuklacaturdaśyāṃ arcitaṃ bahupuṇyadam |kārtikasya caturdaśyāṃ sitāyāṃ māṃ prayatnataḥ || 760||

यः पूजयति पुण्यात्मा स मुक्तो नात्र संशयः ।इदं विश्वेश्वरं लिङ्गं साक्षान्मद्रूपमुत्तमम् ॥ ७६१॥

yaḥ pūjayati puṇyātmā sa mukto nātra saṃśayaḥ |idaṃ viśveśvaraṃ liṅgaṃ sākṣānmadrūpamuttamam || 761||

को वा नातिप्रयत्नेन समाराधयति प्रिये ।अस्य लिङ्गस्य माहात्म्यं वेदैर्नज्ञायते शिवे ॥ ७६२॥

ko vā nātiprayatnena samārādhayati priye |asya liṅgasya māhātmyaṃ vedairnajñāyate śive || 762||

न विष्णुना ब्रह्मणा वा किं तु तज्ज्ञायते मया ।माहात्म्यं ज्ञातुमेतस्य वेदैस्तप्तं तपः पुरा ॥ ७६३॥

na viṣṇunā brahmaṇā vā kiṃ tu tajjñāyate mayā |māhātmyaṃ jñātumetasya vedaistaptaṃ tapaḥ purā || 763||

विष्णुनापि तपस्तप्तं ब्रह्मणापि वरानने ।एते तप्त्वा महाघोरं बहुकालं प्रयत्नतः ॥ ७६४॥

viṣṇunāpi tapastaptaṃ brahmaṇāpi varānane |ete taptvā mahāghoraṃ bahukālaṃ prayatnataḥ || 764||

ततस्तत्वमविज्ञाय विरतास्तपसः शिवे ।एतादृशमिदं लिङ्गं सर्ववेदान्तसंस्तुतम् ॥ ७६५॥

tatastatvamavijñāya viratāstapasaḥ śive |etādṛśamidaṃ liṅgaṃ sarvavedāntasaṃstutam || 765||

सुरासुरार्चितं लिङ्गं नानामुनिवरार्चितम् ।मम लिङ्गमिदं देवि पूजितं भुक्तिमुक्तिदम् ॥ ७६६॥

surāsurārcitaṃ liṅgaṃ nānāmunivarārcitam |mama liṅgamidaṃ devi pūjitaṃ bhuktimuktidam || 766||

पूजयस्वाद्य यत्नेन नवबिल्वदलादिभिः ।अभिषेचय मल्लिङ्गं क्षीराद्यैर्भक्तिपूर्वकम् ॥ ७६७॥

pūjayasvādya yatnena navabilvadalādibhiḥ |abhiṣecaya malliṅgaṃ kṣīrādyairbhaktipūrvakam || 767||

ततोऽस्य कुरु लिङ्गस्य कपूराधनुलेपनम् ।ततो मन्दारकुसुमैर्बिल्वपत्रैश्च कोटिशः ॥ ७६८॥

tato'sya kuru liṅgasya kapūrādhanulepanam |tato mandārakusumairbilvapatraiśca koṭiśaḥ || 768||

सम्पूज्य कुरु नैवेद्यं सघृतं क्षीरमुत्तमम् ।कृत्वा प्रदक्षिणादीनि लिङ्गध्यानं कुरुष्व मे ॥ ७६९॥

sampūjya kuru naivedyaṃ saghṛtaṃ kṣīramuttamam |kṛtvā pradakṣiṇādīni liṅgadhyānaṃ kuruṣva me || 769||

नित्यमेतस्य लिङ्गस्य भक्ति कुरु मनोरमे ।दृष्ट्वेदं लिङ्गममलं सर्वेऽप्यभ्यर्चयन्त्यतः ॥ ७७०॥

nityametasya liṅgasya bhakti kuru manorame |dṛṣṭvedaṃ liṅgamamalaṃ sarve'pyabhyarcayantyataḥ || 770||

प्रिये त्वमपि यत्नेन कुरु मल्लिङ्गपूजनम् ।ममापि जायते भक्तिर्मल्लिङ्गाभ्यर्चने शिवे ॥ ७७१॥

priye tvamapi yatnena kuru malliṅgapūjanam |mamāpi jāyate bhaktirmalliṅgābhyarcane śive || 771||

दृष्ट्वेदं लिङ्गममलं को वा नाभ्यर्चयिष्यति ।मम प्रियतरं लिङ्गं सर्वदेवस्तुतं प्रिये ॥ ७७२॥

dṛṣṭvedaṃ liṅgamamalaṃ ko vā nābhyarcayiṣyati |mama priyataraṃ liṅgaṃ sarvadevastutaṃ priye || 772||

इदं लिङ्गं स्वप्रकाशमेतद्भासैव केवलं ।विभाति सर्वमेतद्यद्दृश्यते सचराचरम् ॥ ७७३॥

idaṃ liṅgaṃ svaprakāśametadbhāsaiva kevalaṃ |vibhāti sarvametadyaddṛśyate sacarācaram || 773||

नेदं विभासयत्यर्को न भासयति चन्द्रमाः ।न तारका भासयन्ति विद्युतोऽपि कुतोऽनलः ॥ ७७४॥

nedaṃ vibhāsayatyarko na bhāsayati candramāḥ |na tārakā bhāsayanti vidyuto'pi kuto'nalaḥ || 774||

एतादृशमिदं लिङ्ग अविकारं मदात्मकम् ।द्रष्टव्यमर्चनीयं च ध्यातव्यं च प्रयत्नतः ॥ ७७५॥

etādṛśamidaṃ liṅga avikāraṃ madātmakam |draṣṭavyamarcanīyaṃ ca dhyātavyaṃ ca prayatnataḥ || 775||

सर्वोऽपि पुण्यकालोऽत्र काश्यां मल्लिङ्गपूजने ।व्यतीपातादयो योगाः भवन्त्यपि वरानने ॥ ७७६॥

sarvo'pi puṇyakālo'tra kāśyāṃ malliṅgapūjane |vyatīpātādayo yogāḥ bhavantyapi varānane || 776||

सादरं प्रतिगृह्णामि मद्भक्तकृतपूजनम् ॥ ७७७॥

sādaraṃ pratigṛhṇāmi madbhaktakṛtapūjanam || 777||

सूतः (उवाच)इति श्रीविश्वनाथस्य श्रुत्वा वचनमम्बिका ।भक्त्या वैश्वेश्वरं लिङ्गं पूजयामास चेश्वरी ॥ ७७८॥

sūtaḥ (uvāca)iti śrīviśvanāthasya śrutvā vacanamambikā |bhaktyā vaiśveśvaraṃ liṅgaṃ pūjayāmāsa ceśvarī || 778||

ततस्तस्मिन्महालिङ्गे सर्वदेवशिखामणिः ।उमया सह सम्प्रीतश्चकार वसतिं शिवः ॥ ७७९॥

tatastasminmahāliṅge sarvadevaśikhāmaṇiḥ |umayā saha samprītaścakāra vasatiṃ śivaḥ || 779||

तदेव लिङ्गमधुना ब्रह्मविष्ण्वादिभिः सुरैः ।सर्वदा पूज्यते भक्त्या श्रीमहेशगणैरपि ॥ ७८०॥

tadeva liṅgamadhunā brahmaviṣṇvādibhiḥ suraiḥ |sarvadā pūjyate bhaktyā śrīmaheśagaṇairapi || 780||

श्रीमद्विश्वेश्वरं लिङ्गमानन्दघनमद्वयम् ।श्रुतं स्मृतं वा दृष्टं वा भुक्तिमुक्तिप्रदं ध्रुवम् ॥ ७८१॥

śrīmadviśveśvaraṃ liṅgamānandaghanamadvayam |śrutaṃ smṛtaṃ vā dṛṣṭaṃ vā bhuktimuktipradaṃ dhruvam || 781||

श्रीमद्विश्वेश्वरं लिङ्गं प्रसङ्गादपि संश्रुतम् ।चतुर्वर्गप्रदं विप्राः सत्यं सत्यं मयोच्यते ॥ ७८२॥

śrīmadviśveśvaraṃ liṅgaṃ prasaṅgādapi saṃśrutam |caturvargapradaṃ viprāḥ satyaṃ satyaṃ mayocyate || 782||

॥ इति शिवरहस्यान्तर्गते शिवपार्वतीसंवदे शिवप्रोक्तं काशीक्षेत्रमाहात्म्यवर्णनं सम्पूर्णम् ॥॥ श्रीशिवरहस्यम् । उग्राख्यः सप्तमांशः । अध्यायः २९ शिवगौरीसंवादे काशीप्रभावकथनम् । ७३१७८२॥

|| iti śivarahasyāntargate śivapārvatīsaṃvade śivaproktaṃ kāśīkṣetramāhātmyavarṇanaṃ sampūrṇam |||| śrīśivarahasyam | ugrākhyaḥ saptamāṃśaḥ | adhyāyaḥ 29 śivagaurīsaṃvāde kāśīprabhāvakathanam | 731782||

– ॥ श्रीशिवरहस्यम् ।उग्राख्यः सप्तमांशः ।अध्यायः २९ शिवगौरीसंवादे काशीप्रभावकथनम् ।७३१-७८२॥

– || śrīśivarahasyam |ugrākhyaḥ saptamāṃśaḥ |adhyāyaḥ 29 śivagaurīsaṃvāde kāśīprabhāvakathanam | 731-782||