काशीमहिमावर्णनम् शिवप्रोक्तं Shivaproktam Kashimahimavarnanam

(शिवरहस्यान्तर्गते उग्राख्ये)(शिवगौरीसंवादे)शिवः उवाचपृथिव्यां सन्ति तीर्थानि कोटिशः कमलानने ।तानि सर्वाणि तीर्थानि काशीप्राप्तिकराणि च ॥ २॥

(śivarahasyāntargate ugrākhye)(śivagaurīsaṃvāde)śivaḥ uvācapṛthivyāṃ santi tīrthāni koṭiśaḥ kamalānane |tāni sarvāṇi tīrthāni kāśīprāptikarāṇi ca || 2||

श्रीकाशीक्षेत्रभिन्नानि सन्ति तीर्थानि कोटिशः ।तेषु तप्ते हि तपसि काशी सम्प्राप्यते शिवे ॥ ३॥

śrīkāśīkṣetrabhinnāni santi tīrthāni koṭiśaḥ |teṣu tapte hi tapasi kāśī samprāpyate śive || 3||

येन जन्मस्वनन्तेषु कृता धर्माः सहस्रधा ।तेनैव लभ्यते काशी मद्रूपा मुक्तिदायिनी ॥ ४॥

yena janmasvananteṣu kṛtā dharmāḥ sahasradhā |tenaiva labhyate kāśī madrūpā muktidāyinī || 4||

न काश्या अधिकं क्षेत्रं न कुत्रापि वरानने ।सत्यं सत्यं पुनः सत्यमुद्धृत्य भुजमुच्यते ॥ ५॥

na kāśyā adhikaṃ kṣetraṃ na kutrāpi varānane |satyaṃ satyaṃ punaḥ satyamuddhṛtya bhujamucyate || 5||

यदेतद्विमलं लिङ्गं दृश्यतेऽद्य मदात्मकम् ।एतल्लिङ्गसमं लिङ्गं न कुत्रापि वरानने ॥ ६॥

yadetadvimalaṃ liṅgaṃ dṛśyate'dya madātmakam |etalliṅgasamaṃ liṅgaṃ na kutrāpi varānane || 6||

इदमेव परं ज्योतिरिदमेव परात्परम् ।इदमेव मदाकारमनन्तमिदमेव हि ॥ ७॥

idameva paraṃ jyotiridameva parātparam |idameva madākāramanantamidameva hi || 7||

अनन्तवेदवेदान्तसारः सर्वो वरानने ।पिण्डीभूयात्र सततं लिङ्गाकारेण तिष्ठति ॥ ८॥

anantavedavedāntasāraḥ sarvo varānane |piṇḍībhūyātra satataṃ liṅgākāreṇa tiṣṭhati || 8||

निर्विकारं परं ब्रह्मलिङ्गमेतन्मनोरमे ।निष्कलं निर्मलं शान्तमिदमेव न संशयः ॥ ९॥

nirvikāraṃ paraṃ brahmaliṅgametanmanorame |niṣkalaṃ nirmalaṃ śāntamidameva na saṃśayaḥ || 9||

शैवमेतन्महस्साक्षादक्षयं लिङ्गमुत्तमम् ।इदं लिङ्गमनाद्यन्तं सच्चिदानन्दलक्षणम् ॥ १०॥

śaivametanmahassākṣādakṣayaṃ liṅgamuttamam |idaṃ liṅgamanādyantaṃ saccidānandalakṣaṇam || 10||

सर्वपुण्यफलाकारमविकारं निरञ्जनम् ।लिङ्गमेतन्ममोङ्कारं मुक्तिप्रदमनुत्तमम् ॥ ११॥

sarvapuṇyaphalākāramavikāraṃ nirañjanam |liṅgametanmamoṅkāraṃ muktipradamanuttamam || 11||

गिरिजे पश्य पश्येदं लिङ्गं मङ्गलदायकम् ।कथमेतत्प्रभाकूटो दिशि विश्राम्य गच्छति ॥ १२॥

girije paśya paśyedaṃ liṅgaṃ maṅgaladāyakam |kathametatprabhākūṭo diśi viśrāmya gacchati || 12||

वेदाः स्तुवन्ति बहुधा लिङ्गस्यास्य मदाकृतेः ।माहात्म्यं मोक्षदं पुण्यं स्वस्वशक्त्या वरानने ॥ १३॥

vedāḥ stuvanti bahudhā liṅgasyāsya madākṛteḥ |māhātmyaṃ mokṣadaṃ puṇyaṃ svasvaśaktyā varānane || 13||

कृतधर्माः पूतचित्ता ये तपोमूर्तयो जनाः ।तेषामेवास्य लिङ्गस्य दर्शनं भवति प्रिये ॥ १४॥

kṛtadharmāḥ pūtacittā ye tapomūrtayo janāḥ |teṣāmevāsya liṅgasya darśanaṃ bhavati priye || 14||

यदाकदाचिद्येनेदं लिङ्गं दृष्टं मम प्रिये ।तेन गर्भाशयावासदुःखं नो प्राप्यते ध्रुवम् ॥ १५॥

yadākadācidyenedaṃ liṅgaṃ dṛṣṭaṃ mama priye |tena garbhāśayāvāsaduḥkhaṃ no prāpyate dhruvam || 15||

अस्मिल्लिङ्गे मुदा येन दत्तं बिल्वदलादिकम् ।तेन दत्तानि रत्नानि कोटिशो नात्र संशयः ॥ १६॥

asmilliṅge mudā yena dattaṃ bilvadalādikam |tena dattāni ratnāni koṭiśo nātra saṃśayaḥ || 16||

अस्मिल्लिङ्गे मुन्दा दत्तं येनाऽऽकल्पं मम प्रियम् ।ससागरनदीतोये दत्तं तेनाखिलं प्रिये ॥ १७॥

asmilliṅge mundā dattaṃ yenā''kalpaṃ mama priyam |sasāgaranadītoye dattaṃ tenākhilaṃ priye || 17||

येनात्र फलमन्यद्वा दत्तं लिङ्गे मदात्मके ।तेन मेरुसमान्नानि दत्तान्येव न संशयः ॥ १८॥

yenātra phalamanyadvā dattaṃ liṅge madātmake |tena merusamānnāni dattānyeva na saṃśayaḥ || 18||

एकोऽपि दत्तो येनात्र दीपस्तेन तु कोटिशः ।नित्यमत्युज्ज्वला दीपा दत्तास्तेन न संशयः ॥ १९॥

eko'pi datto yenātra dīpastena tu koṭiśaḥ |nityamatyujjvalā dīpā dattāstena na saṃśayaḥ || 19||

एका वापि कृता येन लिङ्गस्यास्य प्रदक्षिणा ।प्रदक्षिणीकृता तेन क्षोणी सर्वा न संशयः ॥ २०॥

ekā vāpi kṛtā yena liṅgasyāsya pradakṣiṇā |pradakṣiṇīkṛtā tena kṣoṇī sarvā na saṃśayaḥ || 20||

प्रणामोऽस्य कृतो येन लिङ्गस्यैकोऽपि भक्तितः ।तेनानन्ताः कृता भक्त्या प्रणामा नात्र संशयः ॥ २१॥

praṇāmo'sya kṛto yena liṅgasyaiko'pi bhaktitaḥ |tenānantāḥ kṛtā bhaktyā praṇāmā nātra saṃśayaḥ || 21||

`लिङ्गमेतत्क्षणार्धं वा येन ध्यातं मदात्मकम् ।तेन ध्यातोऽस्म्यहं साक्षाद्बहुकालं वरानने ॥ २२॥

`liṅgametatkṣaṇārdhaṃ vā yena dhyātaṃ madātmakam |tena dhyāto'smyahaṃ sākṣādbahukālaṃ varānane || 22||

तिलैस्त्रैयम्बकेनाग्नौ येनैकाप्याहुतिर्हुता ।कोटिहोमाः कृतास्तेन श्रौताग्नौ विधिपूर्वकम् ॥ २३॥

tilaistraiyambakenāgnau yenaikāpyāhutirhutā |koṭihomāḥ kṛtāstena śrautāgnau vidhipūrvakam || 23||

येनैकवारं जप्तोऽत्र शैवः पञ्चाक्षरो मनुः ।तेन तप्तं तपो घोरं कल्पकोट्ययुतं शिवे ॥ २४॥

yenaikavāraṃ japto'tra śaivaḥ pañcākṣaro manuḥ |tena taptaṃ tapo ghoraṃ kalpakoṭyayutaṃ śive || 24||

येनैकवारमात्रं वा पठितं रुद्रसूक्तकम् ।वेदपारायणं तेन कल्पकोट्ययुतं कृतम् ॥ २५॥

yenaikavāramātraṃ vā paṭhitaṃ rudrasūktakam |vedapārāyaṇaṃ tena kalpakoṭyayutaṃ kṛtam || 25||

तेन वेदत्रयीपाठः कृतः कल्पावधि प्रिये ।येन काश्यां स्थितं भक्त्या क्षणार्धमपि शोभने ॥ २६॥

tena vedatrayīpāṭhaḥ kṛtaḥ kalpāvadhi priye |yena kāśyāṃ sthitaṃ bhaktyā kṣaṇārdhamapi śobhane || 26||

पञ्चाग्निमध्ये तेनैव स्थितमब्दसहस्रकम् ।येनेदं पूजितं लिङ्गं जलपुष्पफलादिभिः ॥ २७॥

pañcāgnimadhye tenaiva sthitamabdasahasrakam |yenedaṃ pūjitaṃ liṅgaṃ jalapuṣpaphalādibhiḥ || 27||

तेनाहं पूजितः साक्षान्नित्यमब्दसहस्रकम् ।दृष्टं येनेदममलं लिङ्गं विश्वेश्वराभिधम् ॥ २८॥

tenāhaṃ pūjitaḥ sākṣānnityamabdasahasrakam |dṛṣṭaṃ yenedamamalaṃ liṅgaṃ viśveśvarābhidham || 28||

तेन साक्षादहं दृष्टः परमानन्दलक्षणः ।येनेदं प्रणतं लिङ्गं मम विश्वेश्वराभिधम् ॥ २९॥

tena sākṣādahaṃ dṛṣṭaḥ paramānandalakṣaṇaḥ |yenedaṃ praṇataṃ liṅgaṃ mama viśveśvarābhidham || 29||

तेन साक्षादहं भक्त्या प्रणतः सुरवन्दितः ।ज्ञानवाप्यां निमज्ज्यात्र यो मां लिङ्गस्वरूपिणम् ॥ ३०॥

tena sākṣādahaṃ bhaktyā praṇataḥ suravanditaḥ |jñānavāpyāṃ nimajjyātra yo māṃ liṅgasvarūpiṇam || 30||

यः स्मेरत् स हि मामेति स्ववंश्यैरखिलैः सह ।येन स्तुतमिदं लिङ्गं मम विश्वेश्वराभिधम् ॥ ३१॥

yaḥ smerat sa hi māmeti svavaṃśyairakhilaiḥ saha |yena stutamidaṃ liṅgaṃ mama viśveśvarābhidham || 31||

तेन साक्षादहं देवि स्तुत एव न संशयः ।येन स्पृष्टमिदं लिङ्गं मम विश्वेश्वराभिधम् ॥ ३२॥

tena sākṣādahaṃ devi stuta eva na saṃśayaḥ |yena spṛṣṭamidaṃ liṅgaṃ mama viśveśvarābhidham || 32||

तेन साक्षादहं देवि स्पृष्ट एव न संशयः ।पूजितोऽहं महादेवो दृष्टः स्पृष्टः स्तुतो नतः ॥ ३३॥

tena sākṣādahaṃ devi spṛṣṭa eva na saṃśayaḥ |pūjito'haṃ mahādevo dṛṣṭaḥ spṛṣṭaḥ stuto nataḥ || 33||

दास्याम्यैश्वर्यमतुलं भक्तिं च परमां शिवे ।उपसर्ग सहस्राणि सोढ्वा काश्यां वसन्ति ये ॥ ३४॥

dāsyāmyaiśvaryamatulaṃ bhaktiṃ ca paramāṃ śive |upasarga sahasrāṇi soḍhvā kāśyāṃ vasanti ye || 34||

तानन्तकाले संसारात्तारयिष्यामि शङ्करि । ३५\।१॥ इति शिवरहस्यान्तर्गते शिवप्रोक्तं काशीमहिमावर्णनं सम्पूर्णम् ॥॥ श्रीशिवरहस्यम् । उग्राख्यः सप्तमांशः । अध्यायः २९ शिवगौरीसंवादे काशीप्रभावकथनम् । २३५\।१॥– ॥ श्रीशिवरहस्यम् । उग्राख्यः सप्तमांशः । अध्यायः २९ शिवगौरीसंवादे काशीप्रभावकथनम् । २-३५।१॥

tānantakāle saṃsārāttārayiṣyāmi śaṅkari | 35\|1|| iti śivarahasyāntargate śivaproktaṃ kāśīmahimāvarṇanaṃ sampūrṇam |||| śrīśivarahasyam | ugrākhyaḥ saptamāṃśaḥ | adhyāyaḥ 29 śivagaurīsaṃvāde kāśīprabhāvakathanam | 235\|1||– || śrīśivarahasyam | ugrākhyaḥ saptamāṃśaḥ | adhyāyaḥ 29 śivagaurīsaṃvāde kāśīprabhāvakathanam | 2-35|1||