शान्तिस्तोत्रम् Shanti Stotram

नश्यन्तु प्रेतकूष्माण्डा नश्यन्तु दूषका नराः ।साधकानां शिवाः सन्तु स्वाम्नायपरिपालनम् ॥ १॥

naśyantu pretakūṣmāṇḍā naśyantu dūṣakā narāḥ |sādhakānāṃ śivāḥ santu svāmnāyaparipālanam || 1||

नन्दन्तु मातरः सर्वा जयन्तु योगिनीगणाः ।जयन्तु सिद्धा डाकिन्यो जयन्तु गुरूशक्तयः ॥ २॥

nandantu mātaraḥ sarvā jayantu yoginīgaṇāḥ |jayantu siddhā ḍākinyo jayantu gurūśaktayaḥ || 2||

नन्दन्तु ह्यणिमाद्याश्च नन्दन्तु गुह्यकादयः ।नन्दन्तु भैरवाः सर्वे सिद्धविद्याधरादयः ॥ ३॥

nandantu hyaṇimādyāśca nandantu guhyakādayaḥ |nandantu bhairavāḥ sarve siddhavidyādharādayaḥ || 3||

ये चाम्नायविशुद्धाश्च मन्त्रिणः शुद्धबुद्धयः ।सर्वदा नन्दयानन्दं नन्दन्तु कुलपालकाः ॥ ४॥

ye cāmnāyaviśuddhāśca mantriṇaḥ śuddhabuddhayaḥ |sarvadā nandayānandaṃ nandantu kulapālakāḥ || 4||

इन्द्राद्यास्तर्पिताः सन्तु तृप्यन्तु वास्तुदेवताः ।चन्द्रसूर्यादयो देवास्तृप्यन्तु गुरूभक्तितः ॥ ५॥

indrādyāstarpitāḥ santu tṛpyantu vāstudevatāḥ |candrasūryādayo devāstṛpyantu gurūbhaktitaḥ || 5||

नक्षत्राणि ग्रहा योगाः करणाद्यास्तथापरे ।ते सर्वे सुखिनो यान्तु मासाश्च तिथयस्तथा ॥ ६॥

nakṣatrāṇi grahā yogāḥ karaṇādyāstathāpare |te sarve sukhino yāntu māsāśca tithayastathā || 6||

तृप्यन्तु पितरः सर्वे ऋतवो संवत्सरादयः ।खेचरा भूचराश्चैव तृप्यन्तु मम भक्तितः ॥ ७॥

tṛpyantu pitaraḥ sarve ṛtavo saṃvatsarādayaḥ |khecarā bhūcarāścaiva tṛpyantu mama bhaktitaḥ || 7||

अन्तरिक्षचरा घोरा ये चान्ये देवयोनयः ।सर्वे तु सुखिनो यान्तु सर्वा नद्यश्च पक्षिणः ॥ ८॥

antarikṣacarā ghorā ye cānye devayonayaḥ |sarve tu sukhino yāntu sarvā nadyaśca pakṣiṇaḥ || 8||

पर्वताः सुखिनः सन्तु तथा तत्कन्दरा गुहाः ।ऋषयो ब्राह्मणाः सर्वे शान्तिं कुर्वन्तु मे सदा ॥ ९॥

parvatāḥ sukhinaḥ santu tathā tatkandarā guhāḥ |ṛṣayo brāhmaṇāḥ sarve śāntiṃ kurvantu me sadā || 9||

तीर्थानि पशवो गावो याश्चान्याः पुण्यभूमयः ।वृद्धाः पतिव्रता नार्यः शिवं कुर्वन्तु मे सदा ॥ १०॥

tīrthāni paśavo gāvo yāścānyāḥ puṇyabhūmayaḥ |vṛddhāḥ pativratā nāryaḥ śivaṃ kurvantu me sadā || 10||

शिवं सर्वत्र मे चास्तु पुत्रदारधनादिषु ।राजानः सुखिनः सन्तु क्षेममार्गे तु मे सदा ॥ ११॥

śivaṃ sarvatra me cāstu putradāradhanādiṣu |rājānaḥ sukhinaḥ santu kṣemamārge tu me sadā || 11||

शुभा मे दिवसा यान्तु शिवास्तिष्ठन्तु मे शिवाः ।द्वेष्टारः साधकानां च सदैवाम्नायदूषकाः ॥ १२॥

śubhā me divasā yāntu śivāstiṣṭhantu me śivāḥ |dveṣṭāraḥ sādhakānāṃ ca sadaivāmnāyadūṣakāḥ || 12||

डाकिनीनां मुखे यान्तु तृप्तातृप्ताश्च तेषु ताः ।शत्रवो नाशमायान्तु मम निन्दाकराः सदा ॥ १३॥

ḍākinīnāṃ mukhe yāntu tṛptātṛptāśca teṣu tāḥ |śatravo nāśamāyāntu mama nindākarāḥ sadā || 13||

ये निन्दका ते विपदं प्रयान्तु ये साधकास्ते प्रभवन्तु सिद्धाः ।ये सर्ववीराः करुणावलोकात्पुनः पुरात्मन्मम सन्निधत्स्व ॥ १४॥

ye nindakā te vipadaṃ prayāntu ye sādhakāste prabhavantu siddhāḥ |ye sarvavīrāḥ karuṇāvalokātpunaḥ purātmanmama sannidhatsva || 14||

इति श्रीरुद्रयामले शान्तिस्तोत्रं सम्पूर्णम् ।

iti śrīrudrayāmale śāntistotraṃ sampūrṇam |