सोमनाथस्तोत्रम् Kuberakritam Somanatha Stotram

कुबेर इति धर्मात्मा श्रुतशीलसमन्वितः ।लिङ्गं प्रतिष्ठयामास न्यङ्कुमत्याश्च पूर्वतः ॥ २१॥

kubera iti dharmātmā śrutaśīlasamanvitaḥ |liṅgaṃ pratiṣṭhayāmāsa nyaṅkumatyāśca pūrvataḥ || 21||

कौबेरात्पश्चिमे भागे सोमनाथेति विश्रुतम् ।सम्पूज्य च यथेशानं न्यङ्कुमत्यास्तटे शुभे ।स्तोत्रेणानेन चास्तौषीद्भक्त्या तं सर्वकामदम् ॥ २२॥

kauberātpaścime bhāge somanātheti viśrutam |sampūjya ca yatheśānaṃ nyaṅkumatyāstaṭe śubhe |stotreṇānena cāstauṣīdbhaktyā taṃ sarvakāmadam || 22||

मूर्तिः क्वापि महेश्वरस्य महती यज्ञस्य मूलोदयातुम्बी तुङ्गफलावती च शतशो ब्रह्माण्डकोटिस्तथा ।यन्मानं न पितामहो न च हरिर्ब्रह्माण्डमध्यस्थितोजानात्यन्यसुरेषु का च गणना सा सन्ततं वोऽवतात् ॥ २३॥

mūrtiḥ kvāpi maheśvarasya mahatī yajñasya mūlodayātumbī tuṅgaphalāvatī ca śataśo brahmāṇḍakoṭistathā |yanmānaṃ na pitāmaho na ca harirbrahmāṇḍamadhyasthitojānātyanyasureṣu kā ca gaṇanā sā santataṃ vo'vatāt || 23||

नमाम्यहं देवमजं पुराणमुपेन्द्रमिन्द्रावरराजजुष्टम् ।शशाङ्कसूर्याग्निसमाननेत्रं वृषेन्द्रचिह्नं प्रलयादिहेतुम् ॥ २४॥

namāmyahaṃ devamajaṃ purāṇamupendramindrāvararājajuṣṭam |śaśāṅkasūryāgnisamānanetraṃ vṛṣendracihnaṃ pralayādihetum || 24||

सर्वेश्वरैकत्रिबलैकबन्धुं योगाधिगम्यं जगतोऽधिवासम् ।तं विस्मयाधारमनन्तशक्तिं ज्ञानोद्भवं धैर्यगुणाधिकं च ॥ २५॥

sarveśvaraikatribalaikabandhuṃ yogādhigamyaṃ jagato'dhivāsam |taṃ vismayādhāramanantaśaktiṃ jñānodbhavaṃ dhairyaguṇādhikaṃ ca || 25||

पिनाकपाशाङ्कुशशूलहस्तं कपर्दिनं मेघसमानघोषम् ।सकालकण्ठं स्फटिकावभासं नमामि शम्भुं भुवनैकनाथम् ॥ २६॥

pinākapāśāṅkuśaśūlahastaṃ kapardinaṃ meghasamānaghoṣam |sakālakaṇṭhaṃ sphaṭikāvabhāsaṃ namāmi śambhuṃ bhuvanaikanātham || 26||

कपालिनं मालिनमादिदेवं जटाधरं भीमभुजङ्गहारम् ।प्रभासितारं च सहस्रमूर्तिं सहस्रशीर्षं पुरुषं विशिष्टम् ॥ २७॥

kapālinaṃ mālinamādidevaṃ jaṭādharaṃ bhīmabhujaṅgahāram |prabhāsitāraṃ ca sahasramūrtiṃ sahasraśīrṣaṃ puruṣaṃ viśiṣṭam || 27||

यदक्षरं निर्गुणमप्रमेयं सज्योतिरेकं प्रवदन्ति सन्तः ।दूरङ्गमं वेद्यमनिन्द्यवन्द्यं सर्वेषु हृत्स्थं परमं पवित्रम् ॥ २८॥

yadakṣaraṃ nirguṇamaprameyaṃ sajyotirekaṃ pravadanti santaḥ |dūraṅgamaṃ vedyamanindyavandyaṃ sarveṣu hṛtsthaṃ paramaṃ pavitram || 28||

तेजोनिभं बालमृगाङ्कमौलिं नमामि रुद्रं स्फुरदुग्रवक्त्रम् ।कालेन्धनं कामदमस्तसङ्गं धर्मासनस्थं प्रकृतिद्वयस्थम् ॥ २९॥

tejonibhaṃ bālamṛgāṅkamauliṃ namāmi rudraṃ sphuradugravaktram |kālendhanaṃ kāmadamastasaṅgaṃ dharmāsanasthaṃ prakṛtidvayastham || 29||

अतीन्द्रियं विश्वभुजं जितारिं गुणत्रयातीतमजं निरीहम् ।तमोमयं वेदमयं चिदंशं प्रजापतीशं पुरुहूतमिन्द्रम् ।अनागतैकध्वनिरूपमाद्यं ध्यायन्ति यं योगविदो यतीन्द्राः ॥ १\।२९०\।३०॥संसारपाशच्छिदुरं विमुक्तः पुनः पुनस्त्वां प्रणमामि देवम् ॥ ३१॥

atīndriyaṃ viśvabhujaṃ jitāriṃ guṇatrayātītamajaṃ nirīham |tamomayaṃ vedamayaṃ cidaṃśaṃ prajāpatīśaṃ puruhūtamindram |anāgataikadhvanirūpamādyaṃ dhyāyanti yaṃ yogavido yatīndrāḥ || 1\|290\|30||saṃsārapāśacchiduraṃ vimuktaḥ punaḥ punastvāṃ praṇamāmi devam || 31||

निरूपमास्यं च बलप्रभावं न च स्वभावं परमस्य पुंसः ।विज्ञायते विष्णुपितामहाद्यैस्तं वामदेवं प्रणमाम्यचिन्त्यम् ॥ ३२॥

nirūpamāsyaṃ ca balaprabhāvaṃ na ca svabhāvaṃ paramasya puṃsaḥ |vijñāyate viṣṇupitāmahādyaistaṃ vāmadevaṃ praṇamāmyacintyam || 32||

शिवं समाराध्य तमुग्रमूर्त्तिं पपौ समुद्रं भगवानगस्त्यः ।लेभे दिलीपोऽप्यखिलांश्च कामांस्तं विश्वयोनिं शरणं प्रपद्ये ॥ ३३॥

śivaṃ samārādhya tamugramūrttiṃ papau samudraṃ bhagavānagastyaḥ |lebhe dilīpo'pyakhilāṃśca kāmāṃstaṃ viśvayoniṃ śaraṇaṃ prapadye || 33||

देवेन्द्रवन्द्योद्धर मामनाथं शम्भो कृपाकारुणिकः किल त्वम् ।दुःखाऽर्णवे मग्नमुमेश दीनं समुद्धर त्वं भव शङ्करोऽसि ॥ ३४॥

devendravandyoddhara māmanāthaṃ śambho kṛpākāruṇikaḥ kila tvam |duḥkhā'rṇave magnamumeśa dīnaṃ samuddhara tvaṃ bhava śaṅkaro'si || 34||

सम्पूजयन्तो दिवि देवसङ्घा ब्रह्मेन्द्ररुद्रा विहरन्ति कामम् ।तं स्तौमि नौमीह जपामि शर्वं वन्देऽभिवन्द्यं शरणं प्रपन्नः ॥ ३५॥

sampūjayanto divi devasaṅghā brahmendrarudrā viharanti kāmam |taṃ staumi naumīha japāmi śarvaṃ vande'bhivandyaṃ śaraṇaṃ prapannaḥ || 35||

स्तुत्वैवमीशं विरराम यावत्तावत्स रुद्रोऽर्कसहस्रतेजाः ।ददौ च तस्मै वरदोऽन्धकारिर्वरत्रयं वैश्रवणाय देवः ।सख्यं च दिक्पालपदं चतुर्थं धनाधिपत्यं च दिवौकसां च ॥ ३६॥

stutvaivamīśaṃ virarāma yāvattāvatsa rudro'rkasahasratejāḥ |dadau ca tasmai varado'ndhakārirvaratrayaṃ vaiśravaṇāya devaḥ |sakhyaṃ ca dikpālapadaṃ caturthaṃ dhanādhipatyaṃ ca divaukasāṃ ca || 36||

इति श्रीस्कन्दपुराणे प्रभासखण्डे प्रभासक्षेत्रमाहात्म्येनवत्यधिकद्विशततमाध्यायान्तर्गतं कहबेरकृतंसोमनाथस्तोत्रं समाप्तम् ।स्कन्दपुराण । प्रभासखण्ड । अध्याय २९०/२३३५॥स्कन्दपुराण । प्रभासखण्ड । अध्याय २९०/२३-३५॥

iti śrīskandapurāṇe prabhāsakhaṇḍe prabhāsakṣetramāhātmyenavatyadhikadviśatatamādhyāyāntargataṃ kahaberakṛtaṃsomanāthastotraṃ samāptam |skandapurāṇa | prabhāsakhaṇḍa | adhyāya 290/2335||skandapurāṇa | prabhāsakhaṇḍa | adhyāya 290/23-35||