जयन्तस्य श्वित्ररोगनिवारणवर्णनम् Jayantasya Shvitraroganivarana Varnanam

(शिवगौरीसंवादे)ईश्वरःपुरा जयन्तः शक्रस्य तनयो मोहमास्थितः ।ऐरावतसुतं नागं समारुह्य जवात्तदा ॥ ३८॥

(śivagaurīsaṃvāde)īśvaraḥpurā jayantaḥ śakrasya tanayo mohamāsthitaḥ |airāvatasutaṃ nāgaṃ samāruhya javāttadā || 38||

समागतो देवगणैर्मध्येमार्ग द्विजस्य हि ।गोवत्सो मर्दितः पादैस्तेनोन्मत्तेन हस्तिना ॥ ३९॥

samāgato devagaṇairmadhyemārga dvijasya hi |govatso marditaḥ pādaistenonmattena hastinā || 39||

शतर्चनः शशापैनं जयन्तं पाकशासनिम् ।श्वित्री भवेति च तदा शापाच्छ्वित्र्यभवत्तदा ॥ ४०॥

śatarcanaḥ śaśāpainaṃ jayantaṃ pākaśāsanim |śvitrī bhaveti ca tadā śāpācchvitryabhavattadā || 40||

इन्द्रमिन्द्रगुरुः गत्वा तत्सर्वं शापकारितम् ।जयन्तः प्राह दुःखेन प्रणम्य पितरं गुरुम् ॥ ४१॥

indramindraguruḥ gatvā tatsarvaṃ śāpakāritam |jayantaḥ prāha duḥkhena praṇamya pitaraṃ gurum || 41||

जयन्तःअज्ञानाद्यौवनोन्मादाद्धस्तिपादावमर्दितः ।तर्णकस्तस्य विप्रस्य क्रुद्वो मयि शतर्चनः ॥ ४२॥

jayantaḥajñānādyauvanonmādāddhastipādāvamarditaḥ |tarṇakastasya viprasya krudvo mayi śatarcanaḥ || 42||

तस्याद्य निष्कृतिं ब्रूतं युवां यद्ब्रूत तद्व्रतम् ।करिष्यामि न सन्देहः सुखोपायं वदाधुना ॥ ४३॥

tasyādya niṣkṛtiṃ brūtaṃ yuvāṃ yadbrūta tadvratam |kariṣyāmi na sandehaḥ sukhopāyaṃ vadādhunā || 43||

ईश्वरःजयन्तवाक्यं तच्छ्रुत्वा शक्रस्यानुमते पुनः ।बृहस्पतिस्तदा प्राह प्रभासं क्षेत्रमुत्तमम् ॥ ४४॥

īśvaraḥjayantavākyaṃ tacchrutvā śakrasyānumate punaḥ |bṛhaspatistadā prāha prabhāsaṃ kṣetramuttamam || 44||

सिद्धेश्वरं प्रणम्याथ स्नात्वा वेणानदीजले ।संवत्सरं वस प्रीत्या जप रुद्रं महेश्वरम् ॥ ४५॥

siddheśvaraṃ praṇamyātha snātvā veṇānadījale |saṃvatsaraṃ vasa prītyā japa rudraṃ maheśvaram || 45||

बिल्वपत्रैः समभ्यर्च्य मुक्तो भवसि नान्यथा ।तदा गुरुवचः श्रुत्वा जयन्तस्तौ प्रणम्य च ॥ ४६॥

bilvapatraiḥ samabhyarcya mukto bhavasi nānyathā |tadā guruvacaḥ śrutvā jayantastau praṇamya ca || 46||

इन्द्रेण चाभ्यनुज्ञातः प्रभासे मां समागतः ।स्नात्वा वेणानदीतोये तपोऽतप्यत दुष्करम् ॥ ४७॥

indreṇa cābhyanujñātaḥ prabhāse māṃ samāgataḥ |snātvā veṇānadītoye tapo'tapyata duṣkaram || 47||

भस्मत्रिपुण्ड्ररुद्राक्षमालालङ्कृतविग्रहः ।नमस्कारैर्महादेवं रुद्राध्यायेन शङ्करम् ॥ ४८॥

bhasmatripuṇḍrarudrākṣamālālaṅkṛtavigrahaḥ |namaskārairmahādevaṃ rudrādhyāyena śaṅkaram || 48||

शक्रात्मजस्तदा गौरि सिद्धेशाख्यं तदा मुदा ।बिल्वपत्रैः समभ्यर्च्य प्रदक्षिणपुरःसरम् ॥ ४९॥

śakrātmajastadā gauri siddheśākhyaṃ tadā mudā |bilvapatraiḥ samabhyarcya pradakṣiṇapuraḥsaram || 49||

स्तुवन् जपन् सदा ध्यायन् मां निरीक्षंश्च भक्तितः ।तुष्टावाथ जयन्तो मां प्रणिपत्य कृताञ्जलिः ॥ ५०॥

stuvan japan sadā dhyāyan māṃ nirīkṣaṃśca bhaktitaḥ |tuṣṭāvātha jayanto māṃ praṇipatya kṛtāñjaliḥ || 50||

जयन्तःसिद्धीनां निलयस्त्वमीश दयया आगस्कृतं पाहि मांविश्वाधीश्वर विश्वनाथ भगवन् श्रीचन्द्रचूड प्रभो ।त्वं शक्रादिसुरासुरार्चितपदो निर्द्वन्द्वनित्यो विभुःगुप्तो मूढधियां सुसूक्ष्मकधिया पश्यन्ति यं योगिनः ॥ ५१॥

jayantaḥsiddhīnāṃ nilayastvamīśa dayayā āgaskṛtaṃ pāhi māṃviśvādhīśvara viśvanātha bhagavan śrīcandracūḍa prabho |tvaṃ śakrādisurāsurārcitapado nirdvandvanityo vibhuḥgupto mūḍhadhiyāṃ susūkṣmakadhiyā paśyanti yaṃ yoginaḥ || 51||

सान्द्रानन्दमयं दयामयतनुं प्राप्तोऽस्मि पादं तव ।मां सद्यः सुखयाशु पाहि दयया सिद्धेश भद्रं कुरु ॥ ५२॥

sāndrānandamayaṃ dayāmayatanuṃ prāpto'smi pādaṃ tava |māṃ sadyaḥ sukhayāśu pāhi dayayā siddheśa bhadraṃ kuru || 52||

ईश्वरःइति सम्प्रार्थितस्तेन जयन्तेन मनोरमे ।तस्माच्छ्वित्राद्विनिर्मुक्तो नत्वा शक्रं मुदा गतः ॥ ५३॥

īśvaraḥiti samprārthitastena jayantena manorame |tasmācchvitrādvinirmukto natvā śakraṃ mudā gataḥ || 53||

इत्थं प्रभासक्षेत्रस्य महिमायं तवोदितः ।सिद्धिप्रदमिदं क्षेत्रं सिद्धेशस्यास्य दर्शनात् ॥ ५४॥

itthaṃ prabhāsakṣetrasya mahimāyaṃ tavoditaḥ |siddhipradamidaṃ kṣetraṃ siddheśasyāsya darśanāt || 54||

सूतःशिवप्रणतिसम्भवं फलमपारपुण्याधिकंन तत् क्रतुशतार्जितैः फलगणैः समानं भवेत् ।अनन्तमहिमास्पदं विविधपातकोच्छेदकंशिवद्रुहि जने सदा न खलु वाच्यमेतद् द्विजैः ॥ ५५॥

sūtaḥśivapraṇatisambhavaṃ phalamapārapuṇyādhikaṃna tat kratuśatārjitaiḥ phalagaṇaiḥ samānaṃ bhavet |anantamahimāspadaṃ vividhapātakocchedakaṃśivadruhi jane sadā na khalu vācyametad dvijaiḥ || 55||

॥ इति शिवरहस्यान्तर्गते प्रभासक्षेत्रमाहात्म्ये जयन्तस्य श्वित्ररोगनिवारणवर्णनं सम्पूर्णम् ॥॥ श्रीशिवरहस्यम् । भर्गाख्यः पञ्चमांशः । अध्यायः ३४॥ ३८५५॥

|| iti śivarahasyāntargate prabhāsakṣetramāhātmye jayantasya śvitraroganivāraṇavarṇanaṃ sampūrṇam |||| śrīśivarahasyam | bhargākhyaḥ pañcamāṃśaḥ | adhyāyaḥ 34|| 3855||

– ॥ श्रीशिवरहस्यम् ।भर्गाख्यः पन्चमांशः ।अध्यायः ३४॥ ३८-५५॥

– || śrīśivarahasyam |bhargākhyaḥ pancamāṃśaḥ |adhyāyaḥ 34|| 38-55||