लिङ्गोत्पत्तिकथनम् ईश्वरप्रोक्तं Ishvaraproktam Lingotpattikathanam

(शिवरहस्यान्तर्गते महादेवाख्ये)शिवगौरीसंवादेईश्वर उवाच ।विवादः सुमहानासीत् ब्रह्मविष्ण्वोः परस्परम् ।अहं कर्ता ह्यहं कर्ता न मत्तोऽन्यो जगत्पिता ॥ ३॥

(śivarahasyāntargate mahādevākhye)śivagaurīsaṃvādeīśvara uvāca |vivādaḥ sumahānāsīt brahmaviṣṇvoḥ parasparam |ahaṃ kartā hyahaṃ kartā na matto'nyo jagatpitā || 3||

एवमाह हरिं ब्रह्मा ब्रह्माणं च हरिस्तदा ।तयोर्दर्पापहाराय प्रबोधार्थं च देवयोः ॥ ४॥

evamāha hariṃ brahmā brahmāṇaṃ ca haristadā |tayordarpāpahārāya prabodhārthaṃ ca devayoḥ || 4||

मध्ये समभवल्लिङ्गम्मैश्वरं तैजसं परम् ।ज्वालामालावृतं दिव्यमप्रमेयमनूपमम् ॥ ५॥

madhye samabhavalliṅgammaiśvaraṃ taijasaṃ param |jvālāmālāvṛtaṃ divyamaprameyamanūpamam || 5||

योजनायुतविस्तीर्णं स्थितं तत्राऽमलाम्भसि ।ज्वालाभिर्मोहितौ तस्य लिङ्गस्यासुरसत्तमे ॥ ६॥

yojanāyutavistīrṇaṃ sthitaṃ tatrā'malāmbhasi |jvālābhirmohitau tasya liṅgasyāsurasattame || 6||

तदा विस्मयमापन्नौ अद्राष्टाममराधिपौ ।गतावूर्ध्वमधस्तस्य सम्प्रधार्य परस्परम् ।अधो द्रष्टुं गतो विष्णुरगादूर्ध्वं पितामहः ॥ ७॥

tadā vismayamāpannau adrāṣṭāmamarādhipau |gatāvūrdhvamadhastasya sampradhārya parasparam |adho draṣṭuṃ gato viṣṇuragādūrdhvaṃ pitāmahaḥ || 7||

अदृष्ट्वा तमधश्चोर्ध्वं तौ समेत्य परस्पम् ।कृताञ्जलिपुटौ भूत्वा लिङ्ग तत् तुष्टुवतुस्तदा ॥ ८॥

adṛṣṭvā tamadhaścordhvaṃ tau sametya paraspam |kṛtāñjalipuṭau bhūtvā liṅga tat tuṣṭuvatustadā || 8||

ब्रह्मविष्णू समापन्नौ भक्त्या परमया युतौ ।लिङ्गमध्ये परंलिङ्गं स्थितं प्रादेशसम्मितम् ॥ २२॥

brahmaviṣṇū samāpannau bhaktyā paramayā yutau |liṅgamadhye paraṃliṅgaṃ sthitaṃ prādeśasammitam || 22||

समाधिस्तोत्रसम्पन्नौ दृष्टवन्तौ शिवात्मकम् ।नैव तत्काञ्चनं रौप्यं नाभूत् स्फाटिकमौक्तिकम् ॥ २३॥

samādhistotrasampannau dṛṣṭavantau śivātmakam |naiva tatkāñcanaṃ raupyaṃ nābhūt sphāṭikamauktikam || 23||

लक्षमात्रं स्थितं शान्तं केवलं तच्छिवात्मकम् ।तयोस्तुष्टो महादेवः प्रदाय वरमुत्तमम् ॥ २४॥

lakṣamātraṃ sthitaṃ śāntaṃ kevalaṃ tacchivātmakam |tayostuṣṭo mahādevaḥ pradāya varamuttamam || 24||

कारणत्वमनुज्ञाय तत्रैवान्तरधीयत ।तदा प्रभृति ब्रह्माद्या प्रतिष्ठाप्य सुरासुराः ॥ २५॥

kāraṇatvamanujñāya tatraivāntaradhīyata |tadā prabhṛti brahmādyā pratiṣṭhāpya surāsurāḥ || 25||

तल्लिङ्गानुकृतं लिङ्गं पूजयेयुस्तपोधनाः ।परं शुद्धशरीरं च लिङ्गक्षेत्रमनादिमत् ॥ २६॥

talliṅgānukṛtaṃ liṅgaṃ pūjayeyustapodhanāḥ |paraṃ śuddhaśarīraṃ ca liṅgakṣetramanādimat || 26||

यदेतदैश्वरं तेजस्तल्लिङ्गं पञ्चसंज्ञितम् ।कल्पान्ते तस्य लिङ्ग्ङ्गस्य लीयन्ते सर्वदेवताः ॥ २७॥

yadetadaiśvaraṃ tejastalliṅgaṃ pañcasaṃjñitam |kalpānte tasya liṅgṅgasya līyante sarvadevatāḥ || 27||

दक्षिणे लीयते ब्रह्मा वामतस्तु जनार्दनः ।हृदये चैव गायत्री सर्ववेदोत्तमोत्तमा ॥ २८॥

dakṣiṇe līyate brahmā vāmatastu janārdanaḥ |hṛdaye caiva gāyatrī sarvavedottamottamā || 28||

लीयन्ते मूर्ध्नि वै वेदाः सषडङ्गपदक्रमाः ।जठरे लीयते सर्वं जगत्स्थावर जङ्गमम् ॥ २९॥

līyante mūrdhni vai vedāḥ saṣaḍaṅgapadakramāḥ |jaṭhare līyate sarvaṃ jagatsthāvara jaṅgamam || 29||

उत्पद्यते पुनस्तस्मात् ब्रह्मादि सचराचरम् ।आकाशं लिङ्गमित्याहुः पृथिवी तस्य पीठिका ॥ ३०॥

utpadyate punastasmāt brahmādi sacarācaram |ākāśaṃ liṅgamityāhuḥ pṛthivī tasya pīṭhikā || 30||

आलयः सर्वभूतानां लयनाल्लिङ्गमुच्यते ।तस्माल्लिङ्गं प्रतिष्ठाप्य सर्वदेवभवोद्भवम् ॥ ३१॥

ālayaḥ sarvabhūtānāṃ layanālliṅgamucyate |tasmālliṅgaṃ pratiṣṭhāpya sarvadevabhavodbhavam || 31||

स्थापितं तेन सर्वं स्यात्पूजितं च न संशयः ।कृताञ्जलिपुटो विष्णुर्ब्रह्मा चापि विशेषतः ॥ ३२॥

sthāpitaṃ tena sarvaṃ syātpūjitaṃ ca na saṃśayaḥ |kṛtāñjalipuṭo viṣṇurbrahmā cāpi viśeṣataḥ || 32||

लिङ्गोत्पत्तिस्तवमिममुमे यः शृणोतीह भक्त्यातस्यापारमहाघसङ्घनिचयः सद्यो विनाशं व्रजेत् ।लिङ्गस्थापनपुण्यमप्यतितरां सम्प्राप्य गाणत्वमप्यन्ते याति ममाद्रिराजशिखरे सत्यं वदाम्यद्रिजे ॥ ७१॥

liṅgotpattistavamimamume yaḥ śṛṇotīha bhaktyātasyāpāramahāghasaṅghanicayaḥ sadyo vināśaṃ vrajet |liṅgasthāpanapuṇyamapyatitarāṃ samprāpya gāṇatvamapyante yāti mamādrirājaśikhare satyaṃ vadāmyadrije || 71||

॥ इति शिवरहस्यान्तर्गते ईश्वरप्रोक्तं लिङ्गोत्पत्तिकथनं सम्पूर्णम् ॥॥ श्रीशिवरहस्यम् । महादेवाख्यः एकादशमांशः । अध्यायः ४ लिङ्गोत्पत्तिस्तवः । वावृत्तश्लोकाः ॥– ॥ श्रीशिवरहस्यम् । महादेवाख्यः एकादशमांशः । अध्यायः ४ लिन्गोत्पत्तिस्तवः । वावृत्तश्लोकाः ॥

|| iti śivarahasyāntargate īśvaraproktaṃ liṅgotpattikathanaṃ sampūrṇam |||| śrīśivarahasyam | mahādevākhyaḥ ekādaśamāṃśaḥ | adhyāyaḥ 4 liṅgotpattistavaḥ | vāvṛttaślokāḥ ||– || śrīśivarahasyam | mahādevākhyaḥ ekādaśamāṃśaḥ | adhyāyaḥ 4 lingotpattistavaḥ | vāvṛttaślokāḥ ||