शिवार्चनोपदेशम् ईश्वरप्रोक्तं २ Ishvaraproktam 2 Shivarchanopadesham

(शिवरहस्यान्तर्गते महादेवाख्ये)शिवपार्वतीसंवादेईश्वर उवाच ।सर्ववेदेषु सत्प्रोक्तं सर्वयज्ञेषु यत्फलम् ।तत्फलं कोटिगुणितं लभते नात्र संशयः ॥ १॥

(śivarahasyāntargate mahādevākhye)śivapārvatīsaṃvādeīśvara uvāca |sarvavedeṣu satproktaṃ sarvayajñeṣu yatphalam |tatphalaṃ koṭiguṇitaṃ labhate nātra saṃśayaḥ || 1||

यः शिवं पूजयेन्नित्यमन्त्यजोऽपि जितेन्द्रियः ।भावेन तु समायुक्तः स गच्छेत्परमां गतिम् ॥ २॥

yaḥ śivaṃ pūjayennityamantyajo'pi jitendriyaḥ |bhāvena tu samāyuktaḥ sa gacchetparamāṃ gatim || 2||

नोपनीतसहस्रेभ्यो ब्रह्मचारी विशिष्यते ।ब्रह्मचारिसहस्रेभ्यो वेदाध्यायी विशिष्यते ॥ ३॥

nopanītasahasrebhyo brahmacārī viśiṣyate |brahmacārisahasrebhyo vedādhyāyī viśiṣyate || 3||

वेदाध्यायिसहस्रेभ्यो ह्यग्निहोत्री विशिष्यते ।अग्निहोत्रसहस्रेभ्यो यज्ञयाजी विशिष्यते ॥ ४॥

vedādhyāyisahasrebhyo hyagnihotrī viśiṣyate |agnihotrasahasrebhyo yajñayājī viśiṣyate || 4||

यज्ञयाजि सहस्रेभ्यः सर्वविद्यार्थपारगः ।सर्वविद्यार्थवित्कोट्याः शिवभक्तो विशिष्यते ॥ ५॥

yajñayāji sahasrebhyaḥ sarvavidyārthapāragaḥ |sarvavidyārthavitkoṭyāḥ śivabhakto viśiṣyate || 5||

तस्मादेव शिवं भक्त्या पूजयेच्छान्तमानसः ।शिवभक्तो जितक्रोधः शिवभक्तिपरायणः ॥ ६॥

tasmādeva śivaṃ bhaktyā pūjayecchāntamānasaḥ |śivabhakto jitakrodhaḥ śivabhaktiparāyaṇaḥ || 6||

मैत्रीकारुणिकोजस्त्रं प्राप्नोति सततं शिवम् ।क्षणार्धेनापि यत्पुण्यं कुर्यान्मित्रेषु भावितः ॥ ७॥

maitrīkāruṇikojastraṃ prāpnoti satataṃ śivam |kṣaṇārdhenāpi yatpuṇyaṃ kuryānmitreṣu bhāvitaḥ || 7||

न तद्वर्षशतेनापि तपोयज्ञशतैरपि ।सर्वप्राणिषु कारुण्याद्दीनाऽनायेषु भावयेत् ॥ ८॥

na tadvarṣaśatenāpi tapoyajñaśatairapi |sarvaprāṇiṣu kāruṇyāddīnā'nāyeṣu bhāvayet || 8||

सर्वप्राणिषु मैत्रीस्यान्मुदिता पुण्यशालिषु ।अपुण्यवत्सु चोपेक्षात्सर्वेषां च वदेच्छिवम् ॥ ९॥

sarvaprāṇiṣu maitrīsyānmuditā puṇyaśāliṣu |apuṇyavatsu copekṣātsarveṣāṃ ca vadecchivam || 9||

इत्येवं पञ्चधा चित्तं भावयिता यजेच्छिवम् ।सम्पूज्य पशुभर्तारं प्रहृष्टेनान्तरात्मना ॥ १०॥

ityevaṃ pañcadhā cittaṃ bhāvayitā yajecchivam |sampūjya paśubhartāraṃ prahṛṣṭenāntarātmanā || 10||

॥ इति शिवरहस्यान्तर्गते ईश्वरप्रोक्तं २ शिवार्चनोपदेशं सम्पूर्णम् ॥॥ श्रीशिवरहस्यम् । महादेवाख्यः एकादशमांशः । अध्यायः ४३ । ११०॥

|| iti śivarahasyāntargate īśvaraproktaṃ 2 śivārcanopadeśaṃ sampūrṇam |||| śrīśivarahasyam | mahādevākhyaḥ ekādaśamāṃśaḥ | adhyāyaḥ 43 | 110||

– ॥ श्रीशिवरहस्यम् ।महादेवाख्यः एकादशमांशः ।अध्यायः ४३ ।१-१०॥

– || śrīśivarahasyam |mahādevākhyaḥ ekādaśamāṃśaḥ |adhyāyaḥ 43 | 1-10||