शिवलिङ्गार्चनमहिमा २ ईश्वरप्रोक्ता Ishvaraprokta Shivalingarchanamahima 2

(शिवरहस्यान्तर्गते महादेवाख्ये)शिवगौरीसंवादेआलयः सर्वभूतानां लयनाल्लिङ्गमुच्यते ।तस्माल्लिङ्गं प्रतिष्ठाप्य सर्वदेवभवोद्भवम् ॥ ३१॥

(śivarahasyāntargate mahādevākhye)śivagaurīsaṃvādeālayaḥ sarvabhūtānāṃ layanālliṅgamucyate |tasmālliṅgaṃ pratiṣṭhāpya sarvadevabhavodbhavam || 31||

स्थापितं तेन सर्वं स्यात्पूजितं च न संशयः ।कृताञ्जलिपुटो विष्णुर्ब्रह्मा चापि विशेषतः ॥ ३२॥

sthāpitaṃ tena sarvaṃ syātpūjitaṃ ca na saṃśayaḥ |kṛtāñjalipuṭo viṣṇurbrahmā cāpi viśeṣataḥ || 32||

पूर्वं लिङ्गं समभ्यर्च्य पश्चात्कर्माणि चक्रतुः ।ब्रह्मा ब्रह्माक्षरैर्दिव्यैर्लिङ्गं पूजयते सदा ॥ ३३॥

pūrvaṃ liṅgaṃ samabhyarcya paścātkarmāṇi cakratuḥ |brahmā brahmākṣarairdivyairliṅgaṃ pūjayate sadā || 33||

गन्धपुष्पादिभिर्नित्यं विष्णुः पूजयते शिवम् ।ब्रह्मा शैलमयं भक्त्या लिङ्गं पूजयते सदा ॥ ३४॥

gandhapuṣpādibhirnityaṃ viṣṇuḥ pūjayate śivam |brahmā śailamayaṃ bhaktyā liṅgaṃ pūjayate sadā || 34||

तस्य सम्पूजनादेव प्राप्तं ब्रह्मत्वमुत्तमम् ।इन्द्रनीलमयं लिङ्गं विष्णुरर्चयते सदा ॥ ३५॥

tasya sampūjanādeva prāptaṃ brahmatvamuttamam |indranīlamayaṃ liṅgaṃ viṣṇurarcayate sadā || 35||

विष्णुत्वं प्राप्तवांस्तेन विश्वव्याप्तं सनातनम् ।शक्रोऽपि देवदेवस्य लिङ्गं मणिमयं शुभम् ॥ ३६॥

viṣṇutvaṃ prāptavāṃstena viśvavyāptaṃ sanātanam |śakro'pi devadevasya liṅgaṃ maṇimayaṃ śubham || 36||

नित्यमर्चयते भक्त्या तेन शक्रत्वमाप्तवान् ।लिङ्गं हेममयं कान्तं धनदोऽर्चयते सदा ॥ ३७॥

nityamarcayate bhaktyā tena śakratvamāptavān |liṅgaṃ hemamayaṃ kāntaṃ dhanado'rcayate sadā || 37||

तेनासौ धनदो देवो धनदत्वमवाप्तवान् ।विश्वेदेवा महात्मानो रौप्यलिङ्गमयं हरम् ॥ ३८॥

tenāsau dhanado devo dhanadatvamavāptavān |viśvedevā mahātmāno raupyaliṅgamayaṃ haram || 38||

अर्चन्ति विधिवत्तेन विश्वेदेवक्त्वमाप्नुवन् ।वायुः पूजयते नित्यं लिङ्गं पैत्तलसम्भवम् ॥ ३९॥

arcanti vidhivattena viśvedevaktvamāpnuvan |vāyuḥ pūjayate nityaṃ liṅgaṃ paittalasambhavam || 39||

वायुत्वं तेन सम्प्राप्तं सर्वप्राणिशरीराम् ।वसवः कांस्यकं लिङ्गं पूजयन्ति विधानतः ॥ ४०॥

vāyutvaṃ tena samprāptaṃ sarvaprāṇiśarīrām |vasavaḥ kāṃsyakaṃ liṅgaṃ pūjayanti vidhānataḥ || 40||

प्राप्तास्तेन महात्मानो वसुत्वं सुमहोदयम् ।अश्विनौ पार्थिवं लिङ्गं वरुणोऽर्चयते सदा ॥ ४१॥

prāptāstena mahātmāno vasutvaṃ sumahodayam |aśvinau pārthivaṃ liṅgaṃ varuṇo'rcayate sadā || 41||

तेनेव वरुणत्वं हि प्राप्तवानप्पतित्वताम् ।लिङ्गमन्नमयं देवि हव्यवाड् यजति स्वयम् ॥ ४३॥

teneva varuṇatvaṃ hi prāptavānappatitvatām |liṅgamannamayaṃ devi havyavāḍ yajati svayam || 43||

अग्नित्वं प्राप्तवांस्तेन तेजोरूपगुणान्वितम् ।ताम्रलिङ्गं सदाकालं भक्त्या देवो दिवाकरः ॥ ४३॥

agnitvaṃ prāptavāṃstena tejorūpaguṇānvitam |tāmraliṅgaṃ sadākālaṃ bhaktyā devo divākaraḥ || 43||

त्रिकालं यजते तेन प्राप्तं सूर्यत्वमुत्तमम् ।मुक्ताफलमयं लिङ्गं सोमः पूजयते सदा ॥ ४४॥

trikālaṃ yajate tena prāptaṃ sūryatvamuttamam |muktāphalamayaṃ liṅgaṃ somaḥ pūjayate sadā || 44||

तेन सोमत्वमापन्नः सर्वकान्तशरीरभृत् ।प्रवालकमयं लिङ्गं नागाः सम्पूजयन्त्यपि ॥ ४५॥

tena somatvamāpannaḥ sarvakāntaśarīrabhṛt |pravālakamayaṃ liṅgaṃ nāgāḥ sampūjayantyapi || 45||

तेन नागाःसुभोगाढ्याः पाताले नित्यमास्थिताः ।कृष्णायसमयं लिङ्गं पूजयन्त्यसुरोत्तमाः ॥ ४६॥

tena nāgāḥsubhogāḍhyāḥ pātāle nityamāsthitāḥ |kṛṣṇāyasamayaṃ liṅgaṃ pūjayantyasurottamāḥ || 46||

राक्षसा दैत्यनाथाश्च तेन तेऽमितविक्रमाः ।त्रपुसीसमयं लिङ्गं पिशाचाः पूजयन्ति हि ॥ ४७॥

rākṣasā daityanāthāśca tena te'mitavikramāḥ |trapusīsamayaṃ liṅgaṃ piśācāḥ pūjayanti hi || 47||

गन्धर्वाप्सरसो यक्षा यातुधाना महेश्वरि ।वज्रवैडूर्यगोमेदै(द)पुष्परागोद्भवानि च ॥ ४८॥

gandharvāpsaraso yakṣā yātudhānā maheśvari |vajravaiḍūryagomedai(da)puṣparāgodbhavāni ca || 48||

लिङ्गानि पूजयन्त्येव भक्त्या सर्वेश्वरस्य हि ।तेन ऋद्धिबलोपेताः प्राप्तास्ते परमं पदम् ॥ ४९॥

liṅgāni pūjayantyeva bhaktyā sarveśvarasya hi |tena ṛddhibalopetāḥ prāptāste paramaṃ padam || 49||

त्रैलोहिकं महालिङ्गं यजन्ते गुह्यकाः सदा ।तेन भोगबलोपेताः प्रयान्ति परमं पदम् ॥ ५०॥

trailohikaṃ mahāliṅgaṃ yajante guhyakāḥ sadā |tena bhogabalopetāḥ prayānti paramaṃ padam || 50||

वन्यदारुभवं लिङ्गं यजन्ते मातरः सदा ।मातृत्वं प्रप्य ताः सर्वाः प्रयान्त्येव महेश्वरम् ॥ ५१॥

vanyadārubhavaṃ liṅgaṃ yajante mātaraḥ sadā |mātṛtvaṃ prapya tāḥ sarvāḥ prayāntyeva maheśvaram || 51||

मुनयो मनवो यक्षा रक्षोरगमरुद्गणाः ।देवदैत्याः सगन्धर्वा विद्याधरमहोरगाः ॥ ५२॥

munayo manavo yakṣā rakṣoragamarudgaṇāḥ |devadaityāḥ sagandharvā vidyādharamahoragāḥ || 52||

पूजयन्ति शिवे लिङ्गे मामीशं देवनायकम् ।सर्वो लिङ्गमयो लोकः सर्वो लिङ्गे प्रतिष्ठिचः ॥ ५३॥

pūjayanti śive liṅge māmīśaṃ devanāyakam |sarvo liṅgamayo lokaḥ sarvo liṅge pratiṣṭhicaḥ || 53||

तस्मात्सम्पूजयेल्लिङ्गं यदीच्छेत्सिद्धिमात्मनः ।लिङ्गे त्वयाहं देवेशि सर्वदा संस्थितो ह्यहम् ॥ ५४॥

tasmātsampūjayelliṅgaṃ yadīcchetsiddhimātmanaḥ |liṅge tvayāhaṃ deveśi sarvadā saṃsthito hyaham || 54||

अनुग्रहाय लोकानां तथा लिङ्गे प्रपूजयेत् ।(अनुग्रहाय लोकानां तस्माल्लिङ्गं प्रपूजयेत्) ।यो न पूजयते लिङ्गे मामीशं भुवनेश्वरि ॥ ५५॥

anugrahāya lokānāṃ tathā liṅge prapūjayet |(anugrahāya lokānāṃ tasmālliṅgaṃ prapūjayet) |yo na pūjayate liṅge māmīśaṃ bhuvaneśvari || 55||

नासौ स्वर्गस्य मोक्षस्य नैव राज्यस्य भाजनम् ।तस्मादेकमना देवि यावज्जीवं प्रतिज्ञया ॥ ५६॥

nāsau svargasya mokṣasya naiva rājyasya bhājanam |tasmādekamanā devi yāvajjīvaṃ pratijñayā || 56||

अर्चयीत सदा लिङ्गे मामीशं भुवनेश्वरि ।वरं जीवपरित्यागः स्वशिरश्छेदनं वरम् ॥ ५७॥

arcayīta sadā liṅge māmīśaṃ bhuvaneśvari |varaṃ jīvaparityāgaḥ svaśiraśchedanaṃ varam || 57||

नत्वनभ्यर्च्य भुञ्जीयात् (भुञ्जीत)भगवन्तं महेश्वरम् ।देवि लिङ्गार्चनात्पुण्यमधिकं नास्ति किञ्चन ॥ ५८॥

natvanabhyarcya bhuñjīyāt (bhuñjīta)bhagavantaṃ maheśvaram |devi liṅgārcanātpuṇyamadhikaṃ nāsti kiñcana || 58||

इति विज्ञाय यत्नेन पूजनीयः सदाशिवः ।नास्ति लिङ्गार्चनसमं तपो वा गिरिकन्यके ॥ ५९॥

iti vijñāya yatnena pūjanīyaḥ sadāśivaḥ |nāsti liṅgārcanasamaṃ tapo vā girikanyake || 59||

तपोऽन्यत्क्षरते सर्वममुत्रफलभोगतः ।तल्लिङ्गार्चनपुण्यस्य क्षयो नास्ति गिरीन्द्रजे ॥ ६०॥

tapo'nyatkṣarate sarvamamutraphalabhogataḥ |talliṅgārcanapuṇyasya kṣayo nāsti girīndraje || 60||

वर्धते भक्तिभावेन अल्पमप्यन्ततः कृतम् ।यो वा लिङ्गार्चनं द्वेष्टि धिक् धिक् तस्य कुमानसम् ॥ ६१॥

vardhate bhaktibhāvena alpamapyantataḥ kṛtam |yo vā liṅgārcanaṃ dveṣṭi dhik dhik tasya kumānasam || 61||

स खरोत्पन्न एव स्याद्ब्राह्मणोऽपि स चान्त्यजः ।तादृशं तु सकृत् दृष्ट्वा सवासा जलमाविशेत् ॥ ६२॥

sa kharotpanna eva syādbrāhmaṇo'pi sa cāntyajaḥ |tādṛśaṃ tu sakṛt dṛṣṭvā savāsā jalamāviśet || 62||

नरो नरकगामीस्यात्तस्य सम्भाषाणादपि ।महेश्वरं महादेवं ये द्विषन्ति महीतले ॥ ६३॥

naro narakagāmīsyāttasya sambhāṣāṇādapi |maheśvaraṃ mahādevaṃ ye dviṣanti mahītale || 63||

ते कृतघ्ना भवन्तीह ये न भक्ता महेश्वरे ।रुद्रपिण्डसमुद्भूता ब्राह्मणा रुद्रदेवताः ॥ ६४॥

te kṛtaghnā bhavantīha ye na bhaktā maheśvare |rudrapiṇḍasamudbhūtā brāhmaṇā rudradevatāḥ || 64||

तस्माद्रुद्रार्चनं श्रेष्ठं ब्राह्मणानां महेश्वरि ।तस्माल्लिङ्गार्चनं सर्वैः कार्य वर्णाश्रमैरपि (वर्णाश्रमादरैः) ॥ ६५॥

tasmādrudrārcanaṃ śreṣṭhaṃ brāhmaṇānāṃ maheśvari |tasmālliṅgārcanaṃ sarvaiḥ kārya varṇāśramairapi (varṇāśramādaraiḥ) || 65||

तस्मात्सर्वेषु भूतेषु गतिर्देवो महेश्वरः ।तस्मात्सर्वप्रयत्नेन (पूज्यो)पतिर्देवो महेश्वरि ॥ ६६॥

tasmātsarveṣu bhūteṣu gatirdevo maheśvaraḥ |tasmātsarvaprayatnena (pūjyo)patirdevo maheśvari || 66||

सागराणां क्षयोऽस्त्येव क्षीयते हिमवानपि ।रुद्रार्चनजपुण्यस्य क्षयो नास्त्येव शङ्करि ॥ ६७॥

sāgarāṇāṃ kṣayo'styeva kṣīyate himavānapi |rudrārcanajapuṇyasya kṣayo nāstyeva śaṅkari || 67||

एष्टव्या बहवः पुत्राः शिवलिङ्गार्चकाः सदा ।यद्येको मम लिङ्गार्चां करिष्यति धरातले ॥ ६८॥

eṣṭavyā bahavaḥ putrāḥ śivaliṅgārcakāḥ sadā |yadyeko mama liṅgārcāṃ kariṣyati dharātale || 68||

समुद्धरन्ति ते गोत्रं रञ्जुः कूपाद्घटं यथा ।समुद्धृत्य तथा यत्नात्कुलानामेकविंशतिम् ॥ ६९॥

samuddharanti te gotraṃ rañjuḥ kūpādghaṭaṃ yathā |samuddhṛtya tathā yatnātkulānāmekaviṃśatim || 69||

शिवत्वं यान्ति ते क्षिप्रं धर्माधर्मविवर्जिताः ॥ ७०॥

śivatvaṃ yānti te kṣipraṃ dharmādharmavivarjitāḥ || 70||

॥ इति शिवरहस्यान्तर्गते ईश्वरप्रोक्ता शिवलिङ्गार्चनमहिमा २ सम्पूर्णा ॥॥ श्रीशिवरहस्यम् । महादेवाख्यः एकादशमांशः । अध्यायः ४ लिङ्गोत्पत्तिस्तवः । वावृत्तश्लोकाः ॥– ॥ श्रीशिवरहस्यम् । महादेवाख्यः एकादशमांशः । अध्यायः ४ लिन्गोत्पत्तिस्तवः । वावृत्तश्लोकाः ॥

|| iti śivarahasyāntargate īśvaraproktā śivaliṅgārcanamahimā 2 sampūrṇā |||| śrīśivarahasyam | mahādevākhyaḥ ekādaśamāṃśaḥ | adhyāyaḥ 4 liṅgotpattistavaḥ | vāvṛttaślokāḥ ||– || śrīśivarahasyam | mahādevākhyaḥ ekādaśamāṃśaḥ | adhyāyaḥ 4 lingotpattistavaḥ | vāvṛttaślokāḥ ||