आत्मनाथवेदपादस्तुतिः Atmanathavedapada Stuti Brahmakrita

नित्याय निर्विकल्पाय निर्मलाय महौजसे ।निराकाराय गुरवे जगतां गुरवे नमः ॥ १॥

nityāya nirvikalpāya nirmalāya mahaujase |nirākārāya gurave jagatāṃ gurave namaḥ || 1||

नादाय बिन्दुरूपाय कलाकाराय तेजसे ।सहस्रभुजपादाय सहस्राक्षाय ते नमः ॥ २॥

nādāya bindurūpāya kalākārāya tejase |sahasrabhujapādāya sahasrākṣāya te namaḥ || 2||

चिदानन्दाय शुद्धाय महानन्दस्वरूपिणे ।महादेवादिदेवाय पशूनां पतये नमः ॥ ३॥

cidānandāya śuddhāya mahānandasvarūpiṇe |mahādevādidevāya paśūnāṃ pataye namaḥ || 3||

अणोरणीयसे तुभ्यं महतश्च महीयसे ।परात्पराय पुण्याय क्षेत्राणां पतये नमः ॥ ४॥

aṇoraṇīyase tubhyaṃ mahataśca mahīyase |parātparāya puṇyāya kṣetrāṇāṃ pataye namaḥ || 4||

वेदागमविचिन्त्याय वेधसेऽजिनवाससे ।बहिर्मुखैरदृश्याय दिशाञ्च पतये नमः ॥ ५॥

vedāgamavicintyāya vedhase'jinavāsase |bahirmukhairadṛśyāya diśāñca pataye namaḥ || 5||

स्वेच्छासृष्टाखिलाण्डाय कारणत्रयहेतवे ।भक्तचित्तनिवासाय सेनानां पतये नमः ॥ ६॥

svecchāsṛṣṭākhilāṇḍāya kāraṇatrayahetave |bhaktacittanivāsāya senānāṃ pataye namaḥ || 6||

चन्द्रखण्डावतंसाय चराचरमयाय ते ।शाश्वतायादिदेवाय वृक्षाणां पतये नमः ॥ ७॥

candrakhaṇḍāvataṃsāya carācaramayāya te |śāśvatāyādidevāya vṛkṣāṇāṃ pataye namaḥ || 7||

त्वदाधारमिदं सर्वं त्वदन्तस्समुपस्थितम् ।त्वमात्मनाथस्सर्वेषां पुष्टानां पतये नमः ॥ ८॥

tvadādhāramidaṃ sarvaṃ tvadantassamupasthitam |tvamātmanāthassarveṣāṃ puṣṭānāṃ pataye namaḥ || 8||

जगन्मात्रे जगद्धात्रे जगद्धर्त्रे सुतेजसे ।मत्पित्रे जगतां भर्त्रे ह्यन्नानां पतये नमः ॥ ९॥

jaganmātre jagaddhātre jagaddhartre sutejase |matpitre jagatāṃ bhartre hyannānāṃ pataye namaḥ || 9||

शरणं भव सर्वेश त्वमेव शरणं मम ।पाहि मां पाहि मां नित्यं पाहि मामात्मनायक ! ॥ १०॥

śaraṇaṃ bhava sarveśa tvameva śaraṇaṃ mama |pāhi māṃ pāhi māṃ nityaṃ pāhi māmātmanāyaka ! || 10||

इति आत्मनाथवेदपादस्तुतिः समाप्ता ।

iti ātmanāthavedapādastutiḥ samāptā |