शारदास्तोत्रम् ३ Shri Sharada Stotram 3

निदानमनुकम्पायाः पदाधःकृतपङ्कजाम् ।सदा नम्रालिसुखदां कदा द्रक्ष्यामि शारदाम् ॥ १॥

nidānamanukampāyāḥ padādhaḥkṛtapaṅkajām |sadā namrālisukhadāṃ kadā drakṣyāmi śāradām || 1||

विदामग्रसरो भूयाद्यदालोकनमात्रतः ।रदालिजितकुन्दां तां कदा द्रक्ष्यामि शारदाम् ॥ २॥

vidāmagrasaro bhūyādyadālokanamātrataḥ |radālijitakundāṃ tāṃ kadā drakṣyāmi śāradām || 2||

अम्भोदनीलचिकुरां कुम्भोद्भवनिषेविताम् ।दम्भोलिधारिसंसेव्यां कदा द्रक्ष्यामि शारदाम् ॥ ३॥

ambhodanīlacikurāṃ kumbhodbhavaniṣevitām |dambholidhārisaṃsevyāṃ kadā drakṣyāmi śāradām || 3||

रम्भानिभोरुयुगलां कुम्भाभस्तनराजिताम् ।शुम्भादिदैन्यशमनीं कदा द्रक्ष्यामि शारदाम् ॥ ४॥

rambhānibhoruyugalāṃ kumbhābhastanarājitām |śumbhādidainyaśamanīṃ kadā drakṣyāmi śāradām || 4||

अव्याजकरुणामूर्तिं सुव्याहारप्रदायिनीम् ।रव्यादिमण्डलान्तःस्थां कदा द्रक्ष्यामि शारदाम् ॥ ५॥

avyājakaruṇāmūrtiṃ suvyāhārapradāyinīm |ravyādimaṇḍalāntaḥsthāṃ kadā drakṣyāmi śāradām || 5||

मह्यम्ब्वादिजगद्रूपां मह्यं लोकेषु ये जनाः ।द्रुह्यन्ति तेषां भयदां कदा द्रक्ष्यामि शारदाम् ॥ ६॥

mahyambvādijagadrūpāṃ mahyaṃ lokeṣu ye janāḥ |druhyanti teṣāṃ bhayadāṃ kadā drakṣyāmi śāradām || 6||

शल्यापहारचतुरां वल्याशासितमार्दवाम् ।कल्याणदाननिरतां कदा द्रक्ष्यामि शारदाम् ॥ ७॥

śalyāpahāracaturāṃ valyāśāsitamārdavām |kalyāṇadānaniratāṃ kadā drakṣyāmi śāradām || 7||

अस्मानवाप्तकामांस्ते यस्मात्प्रकुरुते कृपा ।तस्मात्कृतोपकारां त्वां कदा द्रक्ष्यामि शारदाम् ॥ ८॥

asmānavāptakāmāṃste yasmātprakurute kṛpā |tasmātkṛtopakārāṃ tvāṃ kadā drakṣyāmi śāradām || 8||

कुन्देन्दुदुग्धधवलां मन्देतरधनं जवात् ॥विन्देद्यदङ्घ्रिनम्रस्तां कदा द्रक्ष्यामि शारदाम् ॥ ९॥

kundendudugdhadhavalāṃ mandetaradhanaṃ javāt ||vindedyadaṅghrinamrastāṃ kadā drakṣyāmi śāradām || 9||

वन्दारुजनवृन्दानां मन्दारव्रतधारिणीम् ।वृन्दारकेन्द्रविनुतां कदा द्रक्ष्यामि शारदाम् ॥ १०॥

vandārujanavṛndānāṃ mandāravratadhāriṇīm |vṛndārakendravinutāṃ kadā drakṣyāmi śāradām || 10||

क्षमानिर्धूतवसुधां शमादिगुणदायिनीम् ।रमासंस्तुतचारित्रां कदा द्रक्ष्यामि शारदाम् ॥ ११॥

kṣamānirdhūtavasudhāṃ śamādiguṇadāyinīm |ramāsaṃstutacāritrāṃ kadā drakṣyāmi śāradām || 11||

समाराधयतां नैव यमाद्भीर्यत्पदाम्बुजे ।समाधिमात्रगम्यां तां कदा द्रक्ष्यामि शारदाम् ॥ १२॥

samārādhayatāṃ naiva yamādbhīryatpadāmbuje |samādhimātragamyāṃ tāṃ kadā drakṣyāmi śāradām || 12||

सुमालिविलसद्ग्रीवां समानाधिकवर्जिताम् ।कुमारगणनाथेड्यां कदा द्रक्ष्यमि शारदाम् ॥ १३॥

sumālivilasadgrīvāṃ samānādhikavarjitām |kumāragaṇanātheḍyāṃ kadā drakṣyami śāradām || 13||

सामादिवेदविनुतां भूमानन्दप्रदायिनीम् ।सीमातिलङ्घिकरुणां कदा द्रक्ष्यामि शारदाम् ॥ १४॥

sāmādivedavinutāṃ bhūmānandapradāyinīm |sīmātilaṅghikaruṇāṃ kadā drakṣyāmi śāradām || 14||

गण्डाग्रराजत्कस्तूरी खण्डान्यसुखदायिनीम् ।शुण्डालास्याग्निभूसेव्यां कदा द्रक्ष्यामि शाग्वाम् ॥ १५॥

gaṇḍāgrarājatkastūrī khaṇḍānyasukhadāyinīm |śuṇḍālāsyāgnibhūsevyāṃ kadā drakṣyāmi śāgvām || 15||

तुण्डाधरीकृतविधुं चण्डाज्ञाननिवारिणीम् ।भण्डादिदैत्यदर्पघ्नीं कदा द्रक्ष्यामि शारदाम् ॥ १६॥

tuṇḍādharīkṛtavidhuṃ caṇḍājñānanivāriṇīm |bhaṇḍādidaityadarpaghnīṃ kadā drakṣyāmi śāradām || 16||

जुष्ट्वा वेदशिरोवाग्भिरिष्ट्वा च विविधैर्मखैः ।दृष्ट्वा हृष्यन्ति लोके यां कदा द्रक्ष्यामि शारदाम् ॥ १७॥

juṣṭvā vedaśirovāgbhiriṣṭvā ca vividhairmakhaiḥ |dṛṣṭvā hṛṣyanti loke yāṃ kadā drakṣyāmi śāradām || 17||

तेजोविजितगाङ्गेयां रजोगुणनिवारिणीम् ।भुजोद्धृतबिसाहन्तां कदा द्रक्ष्यामि शारदाम् ॥ १८॥

tejovijitagāṅgeyāṃ rajoguṇanivāriṇīm |bhujoddhṛtabisāhantāṃ kadā drakṣyāmi śāradām || 18||

दिवाकरेन्दुताटङ्कां प्रवाहकविताप्रदाम् ।सवादिकर्मभिस्तुष्टां कदा द्रक्ष्यामि शारदाम् ॥ १९॥

divākarendutāṭaṅkāṃ pravāhakavitāpradām |savādikarmabhistuṣṭāṃ kadā drakṣyāmi śāradām || 19||

लवाद्यस्याः कटाक्षस्य सवाजिरथकुञ्जराम् ।अवाप्नुयाच्छ्रियं लोकः कदा द्रक्ष्यामि शारदाम् ॥ २०॥

lavādyasyāḥ kaṭākṣasya savājirathakuñjarām |avāpnuyācchriyaṃ lokaḥ kadā drakṣyāmi śāradām || 20||

दुर्लभां दुष्टमनसां सुलभां शुद्धचेतसाम् ।वलन्मुक्तासरां कण्ठे कदा द्रक्ष्यामि शारदाम् ॥ २१॥

durlabhāṃ duṣṭamanasāṃ sulabhāṃ śuddhacetasām |valanmuktāsarāṃ kaṇṭhe kadā drakṣyāmi śāradām || 21||

द्राक्षासदृक्षवाग्दात्रीं वीक्षापालितविष्टपाम् ।लाक्षारञ्जितपादाब्जां कदा द्रक्ष्यामि शारदाम् ॥ २२॥

drākṣāsadṛkṣavāgdātrīṃ vīkṣāpālitaviṣṭapām |lākṣārañjitapādābjāṃ kadā drakṣyāmi śāradām || 22||

धृत्वा लक्ष्यं भ्रुवोर्मध्ये कृत्वा कुम्भकमादरात् ।ध्यात्वा हृष्यन्ति यां लोकाः कदा द्रक्ष्यामि शारदाम् ॥ २३॥

dhṛtvā lakṣyaṃ bhruvormadhye kṛtvā kumbhakamādarāt |dhyātvā hṛṣyanti yāṃ lokāḥ kadā drakṣyāmi śāradām || 23||

निष्पापाराध्यचरणां दुष्प्रापामकृतात्मभिः ।पुष्पालिगर्भितकचां कदा द्रक्ष्यामि शारदाम् ॥ २४॥

niṣpāpārādhyacaraṇāṃ duṣprāpāmakṛtātmabhiḥ |puṣpāligarbhitakacāṃ kadā drakṣyāmi śāradām || 24||

नीलाम्बुजतुल्यनयनां बालाब्जविलसत्कचाम् ।कैलासनाथविनुतां कदा द्रक्ष्यामि शारदाम् ॥ २५॥

nīlāmbujatulyanayanāṃ bālābjavilasatkacām |kailāsanāthavinutāṃ kadā drakṣyāmi śāradām || 25||

लीलानिर्मितलोकालिं लोलामम्बुजसम्भवे ।कालाटवीदवशिखां कदा द्रक्ष्यामि शारदाम् ॥ २६॥

līlānirmitalokāliṃ lolāmambujasambhave |kālāṭavīdavaśikhāṃ kadā drakṣyāmi śāradām || 26||

पुराणागमसंवेद्यां विरागिजनसेविताम् ।कराग्रविलसन्मालां कदा द्रक्ष्यामि शारदाम् ॥ २७॥

purāṇāgamasaṃvedyāṃ virāgijanasevitām |karāgravilasanmālāṃ kadā drakṣyāmi śāradām || 27||

मुरारिमुखसंसेव्यां सुरारिमदमर्दिनीम् ।स्वरादिभुवनाधीशां कदा द्रक्ष्यामि शारदाम् ॥ २८॥

murārimukhasaṃsevyāṃ surārimadamardinīm |svarādibhuvanādhīśāṃ kadā drakṣyāmi śāradām || 28||

सुराचार्यसदृक्षः स्याद्गिरा यत्पदपूजकः ।चराचरजगत्कर्त्रीं कदा द्रक्ष्यामि शारदाम् ॥ २९॥

surācāryasadṛkṣaḥ syādgirā yatpadapūjakaḥ |carācarajagatkartrīṃ kadā drakṣyāmi śāradām || 29||

वीराराध्यपदाम्भोजां क्रूरामयविनाशिनीम् ।घोरापस्मारशमनीं कदा द्रक्ष्यामि शारदाम् ॥ ३०॥

vīrārādhyapadāmbhojāṃ krūrāmayavināśinīm |ghorāpasmāraśamanīṃ kadā drakṣyāmi śāradām || 30||

शरणं सर्वलोकानां शरदभ्रनिभाम्बराम् ।करराजद्बोधमुद्रां कदा द्रक्ष्यामि शारदाम् ॥ ३१॥

śaraṇaṃ sarvalokānāṃ śaradabhranibhāmbarām |kararājadbodhamudrāṃ kadā drakṣyāmi śāradām || 31||

स्मरणात्सर्वपापघ्नीं चरणाम्बुजयोः सकृत् ।वरदां पदनम्रेभ्यः कदा द्रक्ष्यामि शारदाम् ॥ ३२॥

smaraṇātsarvapāpaghnīṃ caraṇāmbujayoḥ sakṛt |varadāṃ padanamrebhyaḥ kadā drakṣyāmi śāradām || 32||

पर्णाहारैः सेव्यमानां कर्णाग्रलसदुत्पलाम् ।स्वर्णाभरणसंयुक्तां कदा द्रक्ष्यामि शारदाम् ॥ ३३॥

parṇāhāraiḥ sevyamānāṃ karṇāgralasadutpalām |svarṇābharaṇasaṃyuktāṃ kadā drakṣyāmi śāradām || 33||

पूर्णचन्द्रसमानास्यां तूर्णमिष्टप्रदायिनीम् ।चूर्णयन्तीं पापवृन्दं कदा द्रक्ष्यामि शारदाम् ॥ ३४॥

pūrṇacandrasamānāsyāṃ tūrṇamiṣṭapradāyinīm |cūrṇayantīṃ pāpavṛndaṃ kadā drakṣyāmi śāradām || 34||

प्रभाजिततटित्कोटिं सभासु प्रतिभाप्रदाम् ।विभावरीशतुल्यास्यां कदा द्रक्ष्यामि शारदाम् ॥ ३५॥

prabhājitataṭitkoṭiṃ sabhāsu pratibhāpradām |vibhāvarīśatulyāsyāṃ kadā drakṣyāmi śāradām || 35||

मत्तमातङ्गगमनां चित्तपद्मगतां सताम् ।वित्तनाथार्चितपदां कदा द्रक्ष्यामि शारदाम् ॥ ३६॥

mattamātaṅgagamanāṃ cittapadmagatāṃ satām |vittanāthārcitapadāṃ kadā drakṣyāmi śāradām || 36||

यतिनाथसमाराध्यां मतिदानधुरन्धराम् ।पतितायापि वरदां कदा द्रक्ष्यामि शारदाम् ॥ ३७॥

yatināthasamārādhyāṃ matidānadhurandharām |patitāyāpi varadāṃ kadā drakṣyāmi śāradām || 37||

यथा दुष्टा लिपिर्वैधी वृथा स्यान्नम्रफालगा ।तथा करोति यद्।ह्ध्यानं कदा द्रक्ष्यामि शारदाम् ॥ ३८॥

yathā duṣṭā lipirvaidhī vṛthā syānnamraphālagā |tathā karoti yad|hdhyānaṃ kadā drakṣyāmi śāradām || 38||

रोगालिवारणचणां भोगानां पूगदायिनीम् ।योगाभ्यासरतध्येयां कदा द्रक्ष्यामि शारदाम् ॥ ३९॥

rogālivāraṇacaṇāṃ bhogānāṃ pūgadāyinīm |yogābhyāsaratadhyeyāṃ kadā drakṣyāmi śāradām || 39||

विधातुममरान्नम्रान्सुधाकलशधारिणीम् ।क्रुधारहितहृल्लभ्यां कदा द्रक्ष्यामि शारदाम् ॥ ४०॥

vidhātumamarānnamrānsudhākalaśadhāriṇīm |krudhārahitahṛllabhyāṃ kadā drakṣyāmi śāradām || 40||

वीतां निर्जरनारीभिर्गीतां गन्धर्वगायकैः ।पीताम्बरादिविनुतां कदा द्रक्ष्यामि शारदाम् ॥ ४१॥

vītāṃ nirjaranārībhirgītāṃ gandharvagāyakaiḥ |pītāmbarādivinutāṃ kadā drakṣyāmi śāradām || 41||

शिक्षिताखिलदैतेयां कुक्षिस्थितजगत्त्रयीम् ।रक्षितामरसन्दोहां कदा द्रक्ष्यामि शारदाम् ॥ ४२॥

śikṣitākhiladaiteyāṃ kukṣisthitajagattrayīm |rakṣitāmarasandohāṃ kadā drakṣyāmi śāradām || 42||

शिखाभिर्गीतमाहात्म्यां सुखाराध्यपदां श्रुतेः ।नखांशुजितचन्द्राभां कदा द्रक्ष्यामि शारदाम् ॥ ४३॥

śikhābhirgītamāhātmyāṃ sukhārādhyapadāṃ śruteḥ |nakhāṃśujitacandrābhāṃ kadā drakṣyāmi śāradām || 43||

शोकापहारचतुरां राकाचन्द्रसमाननाम् ।केकासदृशवाग्भङ्गीं कदा द्रक्ष्यामि शारदाम् ॥ ४४॥

śokāpahāracaturāṃ rākācandrasamānanām |kekāsadṛśavāgbhaṅgīṃ kadā drakṣyāmi śāradām || 44||

शृङ्गाद्रिवासनिरतां गङ्गाधरसहोदरीम् ।तुङ्गातटचरीं भूयः कदा द्रक्ष्यामि शारदाम् ॥ ४५॥

śṛṅgādrivāsaniratāṃ gaṅgādharasahodarīm |tuṅgātaṭacarīṃ bhūyaḥ kadā drakṣyāmi śāradām || 45||

शृङ्गारजन्मधरणिं गङ्गां तापनिवारणे ।तुङ्गां पयोधरयुगे कदा द्रक्ष्यामि शारदाम् ॥ ४६॥

śṛṅgārajanmadharaṇiṃ gaṅgāṃ tāpanivāraṇe |tuṅgāṃ payodharayuge kadā drakṣyāmi śāradām || 46||

सुयशोदाननिरतां शयनिर्जितपल्लवाम् ।इयत्तातीतसौन्दर्यां कदा द्रक्ष्यामि शारदाम् ॥ ४७॥

suyaśodānaniratāṃ śayanirjitapallavām |iyattātītasaundaryāṃ kadā drakṣyāmi śāradām || 47||

स्वर्गापवर्गसुखदां दुर्गापद्विनिवारिणीम् ।दुर्गाशाकम्भरीरूपां कदा द्रक्ष्यामि शारदाम् ॥ ४८॥

svargāpavargasukhadāṃ durgāpadvinivāriṇīm |durgāśākambharīrūpāṃ kadā drakṣyāmi śāradām || 48||

कदा शृङ्गगिरिं द्रक्ष्ये कदा तुङ्गां पिबाम्यहम् ।कदा स्तोष्येऽग्रतो देव्याः कदा द्रक्ष्यामि शारदाम् ॥ ४९॥

kadā śṛṅgagiriṃ drakṣye kadā tuṅgāṃ pibāmyaham |kadā stoṣye'grato devyāḥ kadā drakṣyāmi śāradām || 49||

कदा पापक्षयो भूयात्कदा पुण्यसमागमः ।कदा पदे नमस्यामि कदा द्रक्ष्यामि शारदाम् ॥ ५०॥

kadā pāpakṣayo bhūyātkadā puṇyasamāgamaḥ |kadā pade namasyāmi kadā drakṣyāmi śāradām || 50||

सुहृदः शत्रवो वा मे ये सन्ति भुवि शारदे ।अविशेषेण सर्वांस्तान्पाहि दत्त्वा शुभां धियम् ॥ ५१॥

suhṛdaḥ śatravo vā me ye santi bhuvi śārade |aviśeṣeṇa sarvāṃstānpāhi dattvā śubhāṃ dhiyam || 51||

शारदे त्वत्पदाम्भोजलोलम्बायितमानसः ।अकार्षं स्तोत्रमेतच्छ्रीसच्चिदानन्दनामकः ॥ ५२॥

śārade tvatpadāmbhojalolambāyitamānasaḥ |akārṣaṃ stotrametacchrīsaccidānandanāmakaḥ || 52||

य इदं प्रपठेद्भक्त्या शारदास्तोत्रमण्डलम् ।प्राप्नोति सततं लोके मङ्गलानां स मण्डलम् ॥ ५३॥

ya idaṃ prapaṭhedbhaktyā śāradāstotramaṇḍalam |prāpnoti satataṃ loke maṅgalānāṃ sa maṇḍalam || 53||

इति शृङ्गेरि श्रीजगद्गुरु श्रीसच्चिदानन्दशिवाभिनवनृसिंहभारतीस्वामिभिः विरचितं शारदास्तोत्रं (३) सम्पूर्णम् ।

iti śṛṅgeri śrījagadguru śrīsaccidānandaśivābhinavanṛsiṃhabhāratīsvāmibhiḥ viracitaṃ śāradāstotraṃ (3) sampūrṇam |