भक्तित्रयनिरूपणम् Shri Yoganandacharyavirachitam Bhaktitrayanirupanam

रामं सर्वेश्वरं चाथानन्दभाष्यविधायकम् ।गुरुं नत्त्वा च कुर्वेऽहं भक्तित्रयनिरूपणम् ॥ १॥

rāmaṃ sarveśvaraṃ cāthānandabhāṣyavidhāyakam |guruṃ nattvā ca kurve'haṃ bhaktitrayanirūpaṇam || 1||

भक्तिःभक्तिः स राघवे स्नेहः सर्वेभ्यश्चाधिको हि यः ।तयैव प्राप्यते मोक्षो नान्यथेति सुनिश्चितम् ॥ २॥

bhaktiḥbhaktiḥ sa rāghave snehaḥ sarvebhyaścādhiko hi yaḥ |tayaiva prāpyate mokṣo nānyatheti suniścitam || 2||

मानसी कायिकी चाथ वाचिकीति त्रिधा हि सा ।१ मानसी भक्तिःतत्रादिमा च रामस्य स्मरणं यन्निरन्तरम् ॥ ३॥

mānasī kāyikī cātha vācikīti tridhā hi sā | 1 mānasī bhaktiḥtatrādimā ca rāmasya smaraṇaṃ yannirantaram || 3||

पोषणादौ स्वदेहस्यौदासीन्यं समुपागतः ।आत्मदेहादिकं सर्वं श्रीरामाय समर्पयेत् ॥ ४॥

poṣaṇādau svadehasyaudāsīnyaṃ samupāgataḥ |ātmadehādikaṃ sarvaṃ śrīrāmāya samarpayet || 4||

मनसा राघवे सख्यं कुर्याच्च श्रद्धया खलु ।अपहाय तथा सर्वं राममेव समाश्रयेत् ॥ ५॥

manasā rāghave sakhyaṃ kuryācca śraddhayā khalu |apahāya tathā sarvaṃ rāmameva samāśrayet || 5||

२ कायिकी भक्तिःद्वितीया शृणुयान्नित्यं श्रोत्राभ्यां रामसत्कथाम् ।श्रीराममन्दिरे कुर्यात् कायेन मार्जनादिकम् ॥ ६॥

2 kāyikī bhaktiḥdvitīyā śṛṇuyānnityaṃ śrotrābhyāṃ rāmasatkathām |śrīrāmamandire kuryāt kāyena mārjanādikam || 6||

अमोघं पूजनं कुर्याद् रामस्य दर्शनं तथा ।संसेव्य रामपादौ च साष्टाङ्गं प्रणमेत् सदा ॥ ७॥

amoghaṃ pūjanaṃ kuryād rāmasya darśanaṃ tathā |saṃsevya rāmapādau ca sāṣṭāṅgaṃ praṇamet sadā || 7||

३ वाचिकी भक्तिःअहं दासोऽस्मि ते राम ममागतेर्गतिर्भव ।दयासिन्धो दयां कुर्यादनार्ये मयि पामरे ॥ ८॥

3 vācikī bhaktiḥahaṃ dāso'smi te rāma mamāgatergatirbhava |dayāsindho dayāṃ kuryādanārye mayi pāmare || 8||

एवं स्तुतिर्गुणानां च वाचां नाम्नश्च कीर्त्तनम् ।अमोघस्तवरामस्य तृतीया भक्तिरुच्यते ॥ ९॥

evaṃ stutirguṇānāṃ ca vācāṃ nāmnaśca kīrttanam |amoghastavarāmasya tṛtīyā bhaktirucyate || 9||

श्रीरामानन्दशिष्यश्रीयोगानन्दविनिर्मितम् ।श्रीरामभक्तिदं भूयाद् भक्तित्रयनिरूपणम् ॥ १०॥

śrīrāmānandaśiṣyaśrīyogānandavinirmitam |śrīrāmabhaktidaṃ bhūyād bhaktitrayanirūpaṇam || 10||

इति श्रीयोगानन्दाचार्यविरचितं भक्तित्रयनिरूपणं सम्पूर्णम् ।

iti śrīyogānandācāryaviracitaṃ bhaktitrayanirūpaṇaṃ sampūrṇam |