ब्रह्मपदशक्तिवादः Shri Saketanivasacharyavirachitah Brahmapadashaktivadah

(श्रीटीलाचार्य)रामं गुणार्णवं वन्दे सर्वश्रुतिसमन्वितम् ।जगज्जन्मादिहेतुं च परब्रह्मपदेरितम् ॥ १॥

(śrīṭīlācārya)rāmaṃ guṇārṇavaṃ vande sarvaśrutisamanvitam |jagajjanmādihetuṃ ca parabrahmapaderitam || 1||

ब्रह्मसूत्रकृतं वन्दे महर्षि बादरायणम् ।तथा बोधायनं श्रीमद्वृत्तिकृत् पुरुषोत्तमम् ॥ २॥

brahmasūtrakṛtaṃ vande maharṣi bādarāyaṇam |tathā bodhāyanaṃ śrīmadvṛttikṛt puruṣottamam || 2||

आनन्दभाष्यकृद्रामानन्दाचार्यं यतीश्वरम् ।आचार्यवासवं नत्वा गुरुदेवं नमाम्यहम् ॥ ३॥

ānandabhāṣyakṛdrāmānandācāryaṃ yatīśvaram |ācāryavāsavaṃ natvā gurudevaṃ namāmyaham || 3||

वादिवादसुविभ्रान्तजनानां भ्रान्तिनाशकम् ।शक्तिवादमिमं कुर्वे ब्रह्मशब्दार्थबोधकम् ॥ ४॥

vādivādasuvibhrāntajanānāṃ bhrāntināśakam |śaktivādamimaṃ kurve brahmaśabdārthabodhakam || 4||

शक्तिश्च ब्रह्मशब्दस्याद्वैतिनां च मते यतः ।सिध्यति न क्वचित् तस्मात् तद्वरं नहि, तद्यथा ॥ ५॥

śaktiśca brahmaśabdasyādvaitināṃ ca mate yataḥ |sidhyati na kvacit tasmāt tadvaraṃ nahi, tadyathā || 5||

अथातो ब्रह्मजिज्ञासे ति सूत्रघटकस्य हि ।ब्रह्मशब्दस्य शक्तिश्च क्वचिदस्ति न वा मता ॥ ६॥

athāto brahmajijñāse ti sūtraghaṭakasya hi |brahmaśabdasya śaktiśca kvacidasti na vā matā || 6||

विचाराविषये चाद्येऽथेतरस्मिन् नु सा मता ।शुद्धे चोपहिते चाद्ये, नाद्यः, कस्मात् तदुच्यते ॥ ७॥

vicārāviṣaye cādye'thetarasmin nu sā matā |śuddhe copahite cādye, nādyaḥ, kasmāt taducyate || 7||

श्रुत्युक्तं च बृहत्वादि निमित्तं नास्ति तत्र यत् ।सर्वंविवर्त्तमूलत्वादस्ति तदिति चेन्न हि ॥ ८॥

śrutyuktaṃ ca bṛhatvādi nimittaṃ nāsti tatra yat |sarvaṃvivarttamūlatvādasti taditi cenna hi || 8||

मुक्तावपि च तद्योगान्मुक्त्यभावो भवेत् तथा ।उपलक्षयितुं ब्रह्म निरुक्तिर्ननु तादृशी ॥ ९॥

muktāvapi ca tadyogānmuktyabhāvo bhavet tathā |upalakṣayituṃ brahma niruktirnanu tādṛśī || 9||

विशेषणत्वेऽपि यस्माद् बाधो न दृश्यते ।प्रवृत्तिनिमित्तत्वेन बृहत्वादि श्रुतौ स्मृतौ ॥ १०॥

viśeṣaṇatve'pi yasmād bādho na dṛśyate |pravṛttinimittatvena bṛhatvādi śrutau smṛtau || 10||

परं ब्रह्म परं धाम पवित्रं परमं भवान् ।उपपन्ना स्तुतिश्चेयं निर्विशेषे भवेन्न हि ॥ ११॥

paraṃ brahma paraṃ dhāma pavitraṃ paramaṃ bhavān |upapannā stutiśceyaṃ nirviśeṣe bhavenna hi || 11||

ब्रह्मणि निर्विशेषे तच्छक्तिर्मन्तुं न शक्यते ।प्रमाणाभावतस्तत्र पक्षश्चान्त्यो न सम्मतः ॥ १२॥

brahmaṇi nirviśeṣe tacchaktirmantuṃ na śakyate |pramāṇābhāvatastatra pakṣaścāntyo na sammataḥ || 12||

अन्यस्मिन् स्वीकृता सैवं त्वभिधातुं न शक्यते ।निर्निमित्ते भवेत् सा चेदसाधुत्वं भवेत् तदा ॥ १३॥

anyasmin svīkṛtā saivaṃ tvabhidhātuṃ na śakyate |nirnimitte bhavet sā cedasādhutvaṃ bhavet tadā || 13||

सनिमित्ते भवेच्चेत् साऽतिप्रसङ्गो दुरुद्धरः ।तस्माच्च ब्रह्मशब्दस्य नान्यस्मिन्नभिधा मता ॥ १४॥

sanimitte bhaveccet sā'tiprasaṅgo duruddharaḥ |tasmācca brahmaśabdasya nānyasminnabhidhā matā || 14||

अथ चेद् ब्रह्मशब्दस्य कुत्रचिन्नाभिधा मता ।हन्तैवं ब्रह्मशब्दस्यासाधुत्वमापतेद् ध्रुवम् ॥ १५॥

atha ced brahmaśabdasya kutracinnābhidhā matā |hantaivaṃ brahmaśabdasyāsādhutvamāpated dhruvam || 15||

साधुत्वं च मृषा तस्मादिष्टापत्तिर्मते मम ।मैवं सकलशब्दानामसाधुत्वं यतस्तथा ॥ १६॥

sādhutvaṃ ca mṛṣā tasmādiṣṭāpattirmate mama |maivaṃ sakalaśabdānāmasādhutvaṃ yatastathā || 16||

ब्रह्मणि लक्षणा चापि ब्रह्मशब्दस्य नो मता ।शक्यसम्बन्धरूपा यल्लक्षणा सर्वसम्मता ॥ १७॥

brahmaṇi lakṣaṇā cāpi brahmaśabdasya no matā |śakyasambandharūpā yallakṣaṇā sarvasammatā || 17||

ततश्च ब्रह्मशब्दस्य शक्तिदोषविवर्जिते ।दिव्यदेहे गुणाब्धौ च रामे ब्रह्मणि सम्मता ॥ १८॥

tataśca brahmaśabdasya śaktidoṣavivarjite |divyadehe guṇābdhau ca rāme brahmaṇi sammatā || 18||

श्रीजानकीपतेरेव वेदने सकलेशितुः ।वाक्ये तमेव चेत्यादौ श्रुता मुक्तेरुपायता ॥ १९॥

śrījānakīpatereva vedane sakaleśituḥ |vākye tameva cetyādau śrutā mukterupāyatā || 19||

सदाचार्यसुरेन्द्रश्रीटीलाचार्यविनिर्मितः ।भवताच्छक्तिवादोऽयं भ्रान्तानां भ्रान्तिनाशकः ॥ २०॥

sadācāryasurendraśrīṭīlācāryavinirmitaḥ |bhavatācchaktivādo'yaṃ bhrāntānāṃ bhrāntināśakaḥ || 20||

इति श्रीसाकेतनिवासाचार्यविरचितः ब्रह्मपदशक्तिवादः सम्पूर्णः ।

iti śrīsāketanivāsācāryaviracitaḥ brahmapadaśaktivādaḥ sampūrṇaḥ |