राधागुणवर्णनम् Shri Radhagunavarnanam

श्वेतचम्पकवर्णाभामतुलां सुमनोहराम् ।मोहिनीं मानसानां च मुनीनामूर्ध्वरेतसाम् ॥ ७७॥

śvetacampakavarṇābhāmatulāṃ sumanoharām |mohinīṃ mānasānāṃ ca munīnāmūrdhvaretasām || 77||

सुकेशीं सुन्दरीं श्यामां न्यग्रोधपरिमण्डलाम् ।नितम्बकठिनश्रोणीं स्तनयुग्मोन्नताननाम् ॥ ७८॥

sukeśīṃ sundarīṃ śyāmāṃ nyagrodhaparimaṇḍalām |nitambakaṭhinaśroṇīṃ stanayugmonnatānanām || 78||

कोटीन्दुनिन्दितास्यां तां सस्मितां सुदतीं सतीम् ।कज्जलोज्ज्वलरूपां च शरत्कमललोचनाम् ॥ ७९॥

koṭīnduninditāsyāṃ tāṃ sasmitāṃ sudatīṃ satīm |kajjalojjvalarūpāṃ ca śaratkamalalocanām || 79||

महालक्ष्मीं बीजरूपां परामाद्यां सनातीम् ।परमात्मस्वरूपस्य प्राणाधिष्ठातृदेवताम् ॥ ८०॥

mahālakṣmīṃ bījarūpāṃ parāmādyāṃ sanātīm |paramātmasvarūpasya prāṇādhiṣṭhātṛdevatām || 80||

स्तुतां च पूजितां चैव परां च परमात्मने ।ब्रह्मस्वरूपां निर्लिप्तां नित्यरूपां च निर्गुणाम् ॥ ८१॥

stutāṃ ca pūjitāṃ caiva parāṃ ca paramātmane |brahmasvarūpāṃ nirliptāṃ nityarūpāṃ ca nirguṇām || 81||

विश्वानुरोधात्प्रकृतिं भक्तानुग्रहविग्रहाम् ।मर्त्यस्वरूपां शुद्धां च पूतां पतितपावनीम् ॥ ८२॥

viśvānurodhātprakṛtiṃ bhaktānugrahavigrahām |martyasvarūpāṃ śuddhāṃ ca pūtāṃ patitapāvanīm || 82||

सुतीर्थपूतां सत्कीर्तिं विधात्रीं वेदसामपि ।महत्प्रियां च महतीं महाविष्णोश्च मातरम् ॥ ८३॥

sutīrthapūtāṃ satkīrtiṃ vidhātrīṃ vedasāmapi |mahatpriyāṃ ca mahatīṃ mahāviṣṇośca mātaram || 83||

रासेश्वरेश्वरीं रम्यां रसिकां रसिकेश्वरीम् ।वह्निशुद्धांशुकाधामां स्वेच्छारूपां शुभालयाम् ॥ ८४॥

rāseśvareśvarīṃ ramyāṃ rasikāṃ rasikeśvarīm |vahniśuddhāṃśukādhāmāṃ svecchārūpāṃ śubhālayām || 84||

गोपीभिः सप्तभिः शश्वत्सेवितां श्वेतचामरैः ।चतसृभिः प्रियालीभिः पादपद्मोपसेविताम् ॥ ८५॥

gopībhiḥ saptabhiḥ śaśvatsevitāṃ śvetacāmaraiḥ |catasṛbhiḥ priyālībhiḥ pādapadmopasevitām || 85||

अमूल्यरत्ननिर्माणभूषणोच्चैर्विभूषिताम् ।चारुकुण्डलयुग्मेन श्रुतिगण्डस्थलोज्ज्वलाम् ॥ ८६॥

amūlyaratnanirmāṇabhūṣaṇoccairvibhūṣitām |cārukuṇḍalayugmena śrutigaṇḍasthalojjvalām || 86||

सुनासां गजमुक्तार्हां खगेन्द्रचञ्चुनिन्दिताम् ।कुङ्कुमालक्तकस्तूरीस्निग्धचन्दनचर्चिताम् ॥ ८७॥

sunāsāṃ gajamuktārhāṃ khagendracañcuninditām |kuṅkumālaktakastūrīsnigdhacandanacarcitām || 87||

दधानां सुकपोलं च कोमलाङ्गीं सुकामुकीम् ।गजेन्द्रगामिनीं रामां कामनीयां सुकामिनीम् ॥ ८८॥

dadhānāṃ sukapolaṃ ca komalāṅgīṃ sukāmukīm |gajendragāminīṃ rāmāṃ kāmanīyāṃ sukāminīm || 88||

कामास्त्रजयरूपां च कामकाम्यालयां वराम् ।क्रीडाकमलमम्लानं पारिजातप्रसूनकम् ॥ ८९॥

kāmāstrajayarūpāṃ ca kāmakāmyālayāṃ varām |krīḍākamalamamlānaṃ pārijātaprasūnakam || 89||

अमूल्यरत्ननिर्माणं दधानां दर्पणोज्ज्वलम् ।नानारत्नविचित्राढ्यरत्नसिंहासनस्थिताम् ॥ ९०॥

amūlyaratnanirmāṇaṃ dadhānāṃ darpaṇojjvalam |nānāratnavicitrāḍhyaratnasiṃhāsanasthitām || 90||

पद्मैः पद्मार्चितं पादपद्मं च मङ्गलालयम् ।हृत्पद्मे ध्यायमानं च कृणस्य परमात्मनः ॥ ९१॥

padmaiḥ padmārcitaṃ pādapadmaṃ ca maṅgalālayam |hṛtpadme dhyāyamānaṃ ca kṛṇasya paramātmanaḥ || 91||

कर्मणा मनसा वाचा स्वप्ने जागरणेऽपि च ।तत्प्रीतिं प्रेम सौभाग्यं स्मरन्तीं नित्यनूतनम् ॥ ९२॥

karmaṇā manasā vācā svapne jāgaraṇe'pi ca |tatprītiṃ prema saubhāgyaṃ smarantīṃ nityanūtanam || 92||

भावानुरक्तसंसक्तां शुद्धभक्तां पतिव्रताम् ।धन्यां मान्यां गौरवर्णां शश्वद्वक्षःस्थलस्थिताम् ॥ ९३॥

bhāvānuraktasaṃsaktāṃ śuddhabhaktāṃ pativratām |dhanyāṃ mānyāṃ gauravarṇāṃ śaśvadvakṣaḥsthalasthitām || 93||

प्रियासु प्रियभक्तेषु सुप्रियां प्रियवादिनीम् ।कृष्णवामाङ्गसम्भूतामभेदां गुणरूपयोः ॥ ९४॥

priyāsu priyabhakteṣu supriyāṃ priyavādinīm |kṛṣṇavāmāṅgasambhūtāmabhedāṃ guṇarūpayoḥ || 94||

गोलोकवासिनीं देवदेवीं सर्वोपरिस्थिताम् ।वृषभानुसुताख्यां तां पुण्यक्षेत्रे च भारते ॥ ९५॥

golokavāsinīṃ devadevīṃ sarvoparisthitām |vṛṣabhānusutākhyāṃ tāṃ puṇyakṣetre ca bhārate || 95||

गोपीश्वरीं गुप्तरूपां सिद्धिदां सिद्धिरूपिणीम् ।ध्यानासाध्यां दुराराध्यां वन्दे सद्भक्तवन्दिताम् ॥ ९६॥

gopīśvarīṃ guptarūpāṃ siddhidāṃ siddhirūpiṇīm |dhyānāsādhyāṃ durārādhyāṃ vande sadbhaktavanditām || 96||

इति ब्रह्मवैवर्तपुराणे श्रीकृष्णजन्मखण्डे पूर्वभागेचतुर्विंशाधिकशाधिकशततमाध्यायान्तर्गतं श्रीराधागुणवर्णनं समाप्तम् ।ब्रह्मवैवर्तपुराण । श्रीकृष्णजन्म, उत्तरभाग । अध्याय १२४/८०९६॥ब्रह्मवैवर्तपुराण । श्रीकृष्णजन्म, उत्तरभाग । अध्याय १२४/८०-९६॥

iti brahmavaivartapurāṇe śrīkṛṣṇajanmakhaṇḍe pūrvabhāgecaturviṃśādhikaśādhikaśatatamādhyāyāntargataṃ śrīrādhāguṇavarṇanaṃ samāptam |brahmavaivartapurāṇa | śrīkṛṣṇajanma, uttarabhāga | adhyāya 124/8096||brahmavaivartapurāṇa | śrīkṛṣṇajanma, uttarabhāga | adhyāya 124/80-96||