रमास्तोत्रम् Ramastotram

जय कोल्हापुरनिलये भजदिष्टेतरविलये ।तव पादौ हृदि कलये रत्नरचितवलये ॥ १॥

jaya kolhāpuranilaye bhajadiṣṭetaravilaye |tava pādau hṛdi kalaye ratnaracitavalaye || 1||

जय जय सागरजाते कुरु करुणां मयि भीते ।जगदम्बाभिधया ते जीवति तव पोते ॥ २॥

jaya jaya sāgarajāte kuru karuṇāṃ mayi bhīte |jagadambābhidhayā te jīvati tava pote || 2||

जय जय सागरसदना जय कान्त्या जितमदना ।जय दुष्टान्तककदना कुन्दमुकुलरदना ॥ ३॥

jaya jaya sāgarasadanā jaya kāntyā jitamadanā |jaya duṣṭāntakakadanā kundamukularadanā || 3||

सुररमणीनुतचरणे सुमनःसङ्कटहरणे ।सुस्वररञ्जितवीणे सुन्दरनिजकिरणे ॥ ४॥

suraramaṇīnutacaraṇe sumanaḥsaṅkaṭaharaṇe |susvararañjitavīṇe sundaranijakiraṇe || 4||

भजदिन्दीवरसोमा भवमुख्यामरकामा ।भयमूलाळिविरामा भञ्जितमुनिभीमा ॥ ५॥

bhajadindīvarasomā bhavamukhyāmarakāmā |bhayamūlāḷivirāmā bhañjitamunibhīmā || 5||

कुङ्कुमरञ्जितफाले कुञ्जरबान्धवलोले ।कलधौतामलचैले कृन्तकुजनजाले ॥ ६॥

kuṅkumarañjitaphāle kuñjarabāndhavalole |kaladhautāmalacaile kṛntakujanajāle || 6||

धृतकरुणारसपूरे धनदानोत्सवधीरे ।ध्वनिलवनिन्दितकीरे धीरदनुजदारे ॥ ७॥

dhṛtakaruṇārasapūre dhanadānotsavadhīre |dhvanilavaninditakīre dhīradanujadāre || 7||

सुरहृत्पञ्जरकीरा सुमरोहार्पितहारा ।सुन्दरकुञ्जविहारा सुरवरपरिवारा ॥ ८॥

surahṛtpañjarakīrā sumarohārpitahārā |sundarakuñjavihārā suravaraparivārā || 8||

वरकबरीधृतकुसुमे वरकनकाधिकसुषमे ।वननिलयादयभीमे वदनविजितसोमे ॥ ९॥

varakabarīdhṛtakusume varakanakādhikasuṣame |vananilayādayabhīme vadanavijitasome || 9||

मदकलभालसगमने मधुमथनालसनयने ।मृदुलोलालकरचने मधुरसरसगाने ॥ १०॥

madakalabhālasagamane madhumathanālasanayane |mṛdulolālakaracane madhurasarasagāne || 10||

व्याघ्रपुरीवरनिलये व्यासपदार्पितहृदये ।कुरु करुणां मयि सदये विविधनिगमगेये ॥ ११॥

vyāghrapurīvaranilaye vyāsapadārpitahṛdaye |kuru karuṇāṃ mayi sadaye vividhanigamageye || 11||

इति श्रीहुलगीश्रियःपत्याचार्यविरचितं श्रीरमास्तोत्रं सम्पूर्णम् ।

iti śrīhulagīśriyaḥpatyācāryaviracitaṃ śrīramāstotraṃ sampūrṇam |