गौर्यष्टोत्तरशतनामस्तोत्रम् १ Gauri Ashtottarashatanama Stotram

दत्तात्रेयेण गौर्यष्टोत्तरशतनामस्तोत्रोपदेशवर्णनम् ।अथ गौर्यष्टोत्तरशतनामस्तोत्रम् ।इति श्रुत्वा कथां पुण्यां गौरीवीर्यविचित्रिताम् ।अपृच्छद्भार्गवो भूयो दत्तात्रेयं महामुनिम् ॥ १॥

dattātreyeṇa gauryaṣṭottaraśatanāmastotropadeśavarṇanam |atha gauryaṣṭottaraśatanāmastotram |iti śrutvā kathāṃ puṇyāṃ gaurīvīryavicitritām |apṛcchadbhārgavo bhūyo dattātreyaṃ mahāmunim || 1||

भगवन्नद्भुततमं गौर्या वीर्यमुदाहृतम् ।शृण्वतो न हि मे तृप्तिः कथां ते मुखनिःसृताम् ॥ २॥

bhagavannadbhutatamaṃ gauryā vīryamudāhṛtam |śṛṇvato na hi me tṛptiḥ kathāṃ te mukhaniḥsṛtām || 2||

गौर्या नामाष्टशतकं यच्छच्यै धिषणो जगौ ।तन्मे कथय यच्छ्रोतुं मनो मेऽत्यन्तमुत्सुकम् ॥ ३॥

gauryā nāmāṣṭaśatakaṃ yacchacyai dhiṣaṇo jagau |tanme kathaya yacchrotuṃ mano me'tyantamutsukam || 3||

भार्गवेणेत्थमापृष्टो योगिराडत्रिनन्दनः ।अष्टोत्तरशतं नाम्नां प्राह गौर्या दयानिधिः ॥ ४॥

bhārgaveṇetthamāpṛṣṭo yogirāḍatrinandanaḥ |aṣṭottaraśataṃ nāmnāṃ prāha gauryā dayānidhiḥ || 4||

जामदग्न्य शृणु स्तोत्रं गौरीनामभिरङ्कितम् ।मनोहरं वाञ्छितदं महाऽऽपद्विनिवारणम् ॥ ५॥

jāmadagnya śṛṇu stotraṃ gaurīnāmabhiraṅkitam |manoharaṃ vāñchitadaṃ mahā''padvinivāraṇam || 5||

स्तोत्रस्याऽस्य ऋषिः प्रोक्त अङ्गिराश्छन्द ईरितः ।अनुष्टुप् देवता गौरी आपन्नाशाय यो जपेत् ॥ ६॥

stotrasyā'sya ṛṣiḥ prokta aṅgirāśchanda īritaḥ |anuṣṭup devatā gaurī āpannāśāya yo japet || 6||

ह्रां ह्रीं इत्यादि विन्यस्य ध्यात्वा स्तोत्रमुदीरयेत् ॥॥ ध्यानम् ॥सिंहसंस्थां मेचकाभां कौसुम्भांशुकशोभिताम् ॥ ७॥

hrāṃ hrīṃ ityādi vinyasya dhyātvā stotramudīrayet |||| dhyānam ||siṃhasaṃsthāṃ mecakābhāṃ kausumbhāṃśukaśobhitām || 7||

खड्गं खेटं त्रिशूलञ्च मुद्गरं बिभ्रतीं करैः ।चन्द्रचूडां त्रिनयनां ध्यायेत्गौरीमभीष्टदाम् ॥ ८॥

khaḍgaṃ kheṭaṃ triśūlañca mudgaraṃ bibhratīṃ karaiḥ |candracūḍāṃ trinayanāṃ dhyāyetgaurīmabhīṣṭadām || 8||

॥ स्तोत्रम् ॥ॐ गौरी गोजननी विद्या शिवा देवी महेश्वरी ।नारायणाऽनुजा नम्रभूषणा नुतवैभवा ॥ ९॥

|| stotram ||oṃ gaurī gojananī vidyā śivā devī maheśvarī |nārāyaṇā'nujā namrabhūṣaṇā nutavaibhavā || 9||

त्रिनेत्रा त्रिशिखा शम्भुसंश्रया शशिभूषणा ।शूलहस्ता श्रुतधरा शुभदा शुभरूपिणी ॥ १०॥

trinetrā triśikhā śambhusaṃśrayā śaśibhūṣaṇā |śūlahastā śrutadharā śubhadā śubharūpiṇī || 10||

उमा भगवती रात्रिः सोमसूर्याऽग्निलोचना ।सोमसूर्यात्मताटङ्का सोमसूर्यकुचद्वयी ॥ ११॥

umā bhagavatī rātriḥ somasūryā'gnilocanā |somasūryātmatāṭaṅkā somasūryakucadvayī || 11||

अम्बा अम्बिका अम्बुजधरा अम्बुरूपाऽऽप्यायिनी स्थिरा ।शिवप्रिया शिवाङ्कस्था शोभना शुम्भनाशिनी ॥ १२॥

ambā ambikā ambujadharā amburūpā''pyāyinī sthirā |śivapriyā śivāṅkasthā śobhanā śumbhanāśinī || 12||

खड्गहस्ता खगा खेटधरा खाऽच्छनिभाकृतिः ।कौसुम्भचेला कौसुम्भप्रिया कुन्दनिभद्विजा ॥ १३॥

khaḍgahastā khagā kheṭadharā khā'cchanibhākṛtiḥ |kausumbhacelā kausumbhapriyā kundanibhadvijā || 13||

काली कपालिनी क्रूरा करवालकरा क्रिया ।काम्या कुमारी कुटिला कुमाराम्बा कुलेश्वरी ॥ १४॥

kālī kapālinī krūrā karavālakarā kriyā |kāmyā kumārī kuṭilā kumārāmbā kuleśvarī || 14||

मृडानी मृगशावाक्षी मृदुदेहा मृगप्रिया ।मृकण्डुपूजिता माध्वीप्रिया मातृगणेडिता ॥ १५॥

mṛḍānī mṛgaśāvākṣī mṛdudehā mṛgapriyā |mṛkaṇḍupūjitā mādhvīpriyā mātṛgaṇeḍitā || 15||

मातृका माधवी माद्यन्मानसा मदिरेक्षणा ।मोदरूपा मोदकरी मुनिध्येया मनोन्मनी ॥ १६॥

mātṛkā mādhavī mādyanmānasā madirekṣaṇā |modarūpā modakarī munidhyeyā manonmanī || 16||

पर्वतस्था पर्वपूज्या परमा परमार्थदा ।परात्परा परामर्शमयी परिणताखिला ॥ १७॥

parvatasthā parvapūjyā paramā paramārthadā |parātparā parāmarśamayī pariṇatākhilā || 17||

पाशिसेव्या पशुपतिप्रिया पशुवृषस्तुता ।पश्यन्ती परचिद्रूपा परीवादहरा परा ॥ १८॥

pāśisevyā paśupatipriyā paśuvṛṣastutā |paśyantī paracidrūpā parīvādaharā parā || 18||

सर्वज्ञा सर्वरूपा सा सम्पत्तिः सम्पदुन्नता ।आपन्निवारिणी भक्तसुलभा करुणामयी ॥ १९॥

sarvajñā sarvarūpā sā sampattiḥ sampadunnatā |āpannivāriṇī bhaktasulabhā karuṇāmayī || 19||

कलावती कलामूला कलाकलितविग्रहा ।गणसेव्या गणेशाना गतिर्गमनवर्जिता ॥ २०॥

kalāvatī kalāmūlā kalākalitavigrahā |gaṇasevyā gaṇeśānā gatirgamanavarjitā || 20||

ईश्वरीशानदयिता शक्तिः शमितपातका ।पीठगा पीठिकारूपा पृषत्पूज्या प्रभामयी ॥ २१॥

īśvarīśānadayitā śaktiḥ śamitapātakā |pīṭhagā pīṭhikārūpā pṛṣatpūjyā prabhāmayī || 21||

महमाया मतङ्गेष्टा लोकालोका शिवाङ्गना ॥॥ फलश्रुतिः ॥एतत्तेऽभिहितं राम ! स्तोत्रमत्यन्तदुर्लभम् ॥ २२॥

mahamāyā mataṅgeṣṭā lokālokā śivāṅganā |||| phalaśrutiḥ ||etatte'bhihitaṃ rāma ! stotramatyantadurlabham || 22||

गौर्यष्टोत्तरशतनामभिः सुमनोहरम् ।आपदम्भोधितरणे सुदृढप्लवरूपकम् ॥ २३॥

gauryaṣṭottaraśatanāmabhiḥ sumanoharam |āpadambhodhitaraṇe sudṛḍhaplavarūpakam || 23||

एतत् प्रपठतां नित्यमापदो यान्ति दूरतः ।गौरीप्रसादजननमात्मज्ञानप्रदं नृणाम् ॥ २४॥

etat prapaṭhatāṃ nityamāpado yānti dūrataḥ |gaurīprasādajananamātmajñānapradaṃ nṛṇām || 24||

भक्त्या प्रपठतां पुंसां सिध्यत्यखिलमीहितम् ।अन्ते कैवल्यमाप्नोति सत्यं ते भार्गवेरितम् ॥ २५॥

bhaktyā prapaṭhatāṃ puṃsāṃ sidhyatyakhilamīhitam |ante kaivalyamāpnoti satyaṃ te bhārgaveritam || 25||