गिरिजास्तोत्रम् Himavata Kritam Girija Stotram

हिमवानुवाचअद्य मे सफलं जन्म अद्य मे सफलं तपः ॥ १॥

himavānuvācaadya me saphalaṃ janma adya me saphalaṃ tapaḥ || 1||

यन्मे साक्षात्त्वमव्यक्ता प्रसन्ना दृष्टिगोचरा ।त्वया सृष्टं जगत्सर्वं प्रधानाद्यं त्वयि स्थितम् ॥ २॥

yanme sākṣāttvamavyaktā prasannā dṛṣṭigocarā |tvayā sṛṣṭaṃ jagatsarvaṃ pradhānādyaṃ tvayi sthitam || 2||

त्वय्येव लीयते देवि त्वमेव च परा गतिः ।वदन्ति केचित्त्वामेव प्रकृतिं प्रकृतेः पराम् ॥ ३॥

tvayyeva līyate devi tvameva ca parā gatiḥ |vadanti kecittvāmeva prakṛtiṃ prakṛteḥ parām || 3||

अपरे परमार्थज्ञाः शिवेति शिवसंश्रयात् ।त्वयि प्रधानं पुरुषो महान् ब्रह्मा तथेश्वरः ॥ ४॥

apare paramārthajñāḥ śiveti śivasaṃśrayāt |tvayi pradhānaṃ puruṣo mahān brahmā tatheśvaraḥ || 4||

अविद्या नियतिर्माया कलाद्याः शतशोऽभवन् ।त्वं हि सा परमा शक्तिरनन्ता परमेष्ठिनी ॥ ५॥

avidyā niyatirmāyā kalādyāḥ śataśo'bhavan |tvaṃ hi sā paramā śaktiranantā parameṣṭhinī || 5||

सर्वभेदविनिर्मुक्ता सर्वेभेदाश्रयाश्रया ।त्वामधिष्ठाय योगेशि महादेवो महेश्वरः ॥ ६॥

sarvabhedavinirmuktā sarvebhedāśrayāśrayā |tvāmadhiṣṭhāya yogeśi mahādevo maheśvaraḥ || 6||

प्रधानाद्यं जगत्कृत्स्नं करोति विकरोति च ।त्वयैव सङ्गतो देवः स्वमानन्दं समश्नुते ॥ ७॥

pradhānādyaṃ jagatkṛtsnaṃ karoti vikaroti ca |tvayaiva saṅgato devaḥ svamānandaṃ samaśnute || 7||

त्वमेव परमानन्दस्त्वमेवानन्ददायिनी ।त्वमक्षरं परं व्योम महज्ज्योतिर्निरञ्जनम् ॥ ८॥

tvameva paramānandastvamevānandadāyinī |tvamakṣaraṃ paraṃ vyoma mahajjyotirnirañjanam || 8||

शिवं सर्वगतं सूक्ष्मं परं ब्रह्म सनातनम् ।त्वं शक्रः सर्वदेवानां ब्रह्मा ब्रह्मविदामसि ॥ ९॥

śivaṃ sarvagataṃ sūkṣmaṃ paraṃ brahma sanātanam |tvaṃ śakraḥ sarvadevānāṃ brahmā brahmavidāmasi || 9||

वायुर्बलवतां देवि योगिनां त्वं कुमारकः ।ऋषीणां च वसिष्ठस्त्वं व्यासो वेदविदामसि ॥ १०॥

vāyurbalavatāṃ devi yogināṃ tvaṃ kumārakaḥ |ṛṣīṇāṃ ca vasiṣṭhastvaṃ vyāso vedavidāmasi || 10||

साङ्ख्यानां कपिलो देवो रुद्राणामसि शङ्करः ।आदित्यानामुपेन्द्रस्त्वं वसूनां चैव पावकः ॥ ११॥

sāṅkhyānāṃ kapilo devo rudrāṇāmasi śaṅkaraḥ |ādityānāmupendrastvaṃ vasūnāṃ caiva pāvakaḥ || 11||

वेदानां सामवेदस्त्वं गायत्री छन्दसामसि ।अध्यात्मविद्या विद्यानां गतीनां परमा गतिः ॥ १२॥

vedānāṃ sāmavedastvaṃ gāyatrī chandasāmasi |adhyātmavidyā vidyānāṃ gatīnāṃ paramā gatiḥ || 12||

माया त्वं सर्वशक्तीनां कालः कलयतामसि ।ओङ्कारः सर्वगुह्यानां वर्णानां च द्विजोत्तमः ॥ १३॥

māyā tvaṃ sarvaśaktīnāṃ kālaḥ kalayatāmasi |oṅkāraḥ sarvaguhyānāṃ varṇānāṃ ca dvijottamaḥ || 13||

आश्रमाणां च गार्हस्थ्यमीश्वराणां महेश्वरः ।पुंसां त्वमेकः पुरुषः सर्वभूतहृदि स्थितः ॥ १४॥

āśramāṇāṃ ca gārhasthyamīśvarāṇāṃ maheśvaraḥ |puṃsāṃ tvamekaḥ puruṣaḥ sarvabhūtahṛdi sthitaḥ || 14||

सर्वोपनिषदां देवि गुह्योपनिषदुच्यते ।ईशानश्चासि कल्पानां युगानां कृतमेव च ॥ १५॥

sarvopaniṣadāṃ devi guhyopaniṣaducyate |īśānaścāsi kalpānāṃ yugānāṃ kṛtameva ca || 15||

आदित्यः सर्वमार्गाणां वाचां देवि सरस्वती ।त्वं लक्ष्मीश्चारुरूपाणां विष्णुर्मायाविनामसि ॥ १६॥

ādityaḥ sarvamārgāṇāṃ vācāṃ devi sarasvatī |tvaṃ lakṣmīścārurūpāṇāṃ viṣṇurmāyāvināmasi || 16||

अरुन्धती सतीनां त्वं सुपर्णः पततामसि ।सूक्तानां पौरुषं सूक्तं साम ज्येष्ठं च सामसु ॥ १७॥

arundhatī satīnāṃ tvaṃ suparṇaḥ patatāmasi |sūktānāṃ pauruṣaṃ sūktaṃ sāma jyeṣṭhaṃ ca sāmasu || 17||

सावित्री चासि जाप्यानां यजुषां शतरुद्रियम् ।पर्वतानां महामेरुरनन्तो भोगिनामसि ॥ १८॥

sāvitrī cāsi jāpyānāṃ yajuṣāṃ śatarudriyam |parvatānāṃ mahāmerurananto bhogināmasi || 18||

सर्वेषां त्वं परं ब्रह्म त्वन्मयं सर्वमेव हि ॥ १९॥

sarveṣāṃ tvaṃ paraṃ brahma tvanmayaṃ sarvameva hi || 19||

रूपं तवाशेषकलाविहीनमगोचरं निर्मलमेकरूपम् ।अनादिमध्यान्तमनन्तामाद्यं नमामि सत्यं तमसः परस्तात् ॥ २०॥

rūpaṃ tavāśeṣakalāvihīnamagocaraṃ nirmalamekarūpam |anādimadhyāntamanantāmādyaṃ namāmi satyaṃ tamasaḥ parastāt || 20||

यदेव पश्यन्ति जगत्प्रसूतिं वेदान्तविज्ञानविनिश्चितार्थाः ।आनन्दमात्रं प्रणवाभिधानं तदेव रूपं शरणं प्रपद्ये ॥ २१॥

yadeva paśyanti jagatprasūtiṃ vedāntavijñānaviniścitārthāḥ |ānandamātraṃ praṇavābhidhānaṃ tadeva rūpaṃ śaraṇaṃ prapadye || 21||

अशेषभूतान्तरसन्निविष्टं प्रधानपुंयोगवियोगहेतुम् ।तेजोमयं जन्मविनाशहीनं प्राणाभिधानं प्रणतोऽस्मि रूपम् ॥ २२॥

aśeṣabhūtāntarasanniviṣṭaṃ pradhānapuṃyogaviyogahetum |tejomayaṃ janmavināśahīnaṃ prāṇābhidhānaṃ praṇato'smi rūpam || 22||

आद्यन्तहीनं जगदात्मभूतं विभिन्नसंस्थं प्रकृतेः परस्तात् ।कूटस्थमव्यक्तवपुस्तथैव नमामि रूपं पुरुषाभिधानम् ॥ २३॥

ādyantahīnaṃ jagadātmabhūtaṃ vibhinnasaṃsthaṃ prakṛteḥ parastāt |kūṭasthamavyaktavapustathaiva namāmi rūpaṃ puruṣābhidhānam || 23||

सर्वाश्रयं सर्वजगद्विधानं सर्वत्रगं जन्मविनाशहीनम् ।सूक्ष्मं विचित्रं त्रिगुणं प्रधानं नतोऽस्मि ते रूपमरूपभेदम् ॥ २४॥

sarvāśrayaṃ sarvajagadvidhānaṃ sarvatragaṃ janmavināśahīnam |sūkṣmaṃ vicitraṃ triguṇaṃ pradhānaṃ nato'smi te rūpamarūpabhedam || 24||

आद्यं महान्तं पुरुषात्मरूपं प्रकृत्यवस्थं त्रिगुणात्मबीजम् ।ऐश्वर्यविज्ञानविरागधर्मैः समन्वितं देवि नतोऽस्मि रूपम् ॥ २५॥

ādyaṃ mahāntaṃ puruṣātmarūpaṃ prakṛtyavasthaṃ triguṇātmabījam |aiśvaryavijñānavirāgadharmaiḥ samanvitaṃ devi nato'smi rūpam || 25||

द्विसप्तलोकात्मकमम्बुसंस्थं विचित्रभेदं पुरुषैकनाथम् ।अनन्तभूतैरधिवासितं ते नतोऽस्मि रूपं जगदण्डसञ्ज्ञम् ॥ २६॥

dvisaptalokātmakamambusaṃsthaṃ vicitrabhedaṃ puruṣaikanātham |anantabhūtairadhivāsitaṃ te nato'smi rūpaṃ jagadaṇḍasañjñam || 26||

अशेषवेदात्मकमेकमाद्यं स्वतेजसा पूरितलोकभेदम् ।त्रिकालहेतुं परमेष्ठिसञ्ज्ञं नमामि रूपं रविमण्डलस्थम् ॥ २७॥

aśeṣavedātmakamekamādyaṃ svatejasā pūritalokabhedam |trikālahetuṃ parameṣṭhisañjñaṃ namāmi rūpaṃ ravimaṇḍalastham || 27||

सहस्रमूर्धानमनन्तशक्तिं सहस्रबाहुं पुरुषं पुराणम् ।शयानमन्तः सलिले तथैव नारायणाख्यं प्रणतोऽस्मि रूपम् ॥ २८॥

sahasramūrdhānamanantaśaktiṃ sahasrabāhuṃ puruṣaṃ purāṇam |śayānamantaḥ salile tathaiva nārāyaṇākhyaṃ praṇato'smi rūpam || 28||

दंष्ट्राकरालं त्रिदशाभिवन्द्यं युगान्तकालानलकल्परूपम् ।अशेषभूताण्डविनाशहेतुं नमामि रूपं तव कालसञ्ज्ञम् ॥ २९॥

daṃṣṭrākarālaṃ tridaśābhivandyaṃ yugāntakālānalakalparūpam |aśeṣabhūtāṇḍavināśahetuṃ namāmi rūpaṃ tava kālasañjñam || 29||

फणासहस्रेण विराजमानं भोगीन्द्रमुख्यैरभिपूज्यमानम् ।जनार्दनारूढतनुं प्रसुप्तं नतोऽस्मि रूपं तव शेषसञ्ज्ञम् ॥ ३०॥

phaṇāsahasreṇa virājamānaṃ bhogīndramukhyairabhipūjyamānam |janārdanārūḍhatanuṃ prasuptaṃ nato'smi rūpaṃ tava śeṣasañjñam || 30||

अव्याहतैश्वर्यमयुग्मनेत्रं ब्रह्मामृतानन्दरसज्ञमेकम् ।युगान्तशेषं दिवि नृत्यमानं नतोऽस्मि रूपं तव रुद्रसञ्ज्ञम् ॥ ३१॥

avyāhataiśvaryamayugmanetraṃ brahmāmṛtānandarasajñamekam |yugāntaśeṣaṃ divi nṛtyamānaṃ nato'smi rūpaṃ tava rudrasañjñam || 31||

प्रहीणशोकं विमलं पवित्रं सुरासुरैरर्चितापादपद्मम् ।सुकोमलं देवि विभासि शुभ्रं नमामि ते रूपमिदं भवानि ॥ ३२॥

prahīṇaśokaṃ vimalaṃ pavitraṃ surāsurairarcitāpādapadmam |sukomalaṃ devi vibhāsi śubhraṃ namāmi te rūpamidaṃ bhavāni || 32||

ॐ नमस्तेऽस्तु महादेवि नमस्ते परमेश्वरि ।नमो भगवतीशानि शिवायै ते नमो नमः ॥ ३३॥

oṃ namaste'stu mahādevi namaste parameśvari |namo bhagavatīśāni śivāyai te namo namaḥ || 33||

त्वन्मयोऽहं त्वदाधारस्त्वमेव च गतिर्मम ।त्वामेव शरणं यास्ये प्रसीद परमेश्वरि ॥ ३४॥

tvanmayo'haṃ tvadādhārastvameva ca gatirmama |tvāmeva śaraṇaṃ yāsye prasīda parameśvari || 34||

मया नास्ति समो लोके देवो वा दानवोऽपि वा ।जगन्मातैव मत्पुत्री सम्भूता तपसा यतः ॥ ३५॥

mayā nāsti samo loke devo vā dānavo'pi vā |jaganmātaiva matputrī sambhūtā tapasā yataḥ || 35||

एषा तवाम्बिका देवि किलाभूत्पितृकन्यका ।मेनाऽशेषजगन्मातुरहो पुण्यस्य गौरवम् ॥ ३६॥

eṣā tavāmbikā devi kilābhūtpitṛkanyakā |menā'śeṣajaganmāturaho puṇyasya gauravam || 36||

पाहि माममरेशानि मेनया सह सर्वदा ।नमामि तव पादाब्जं व्रजामि शरणं शिवाम् ॥ ३७॥

pāhi māmamareśāni menayā saha sarvadā |namāmi tava pādābjaṃ vrajāmi śaraṇaṃ śivām || 37||

अहो मे सुमहद्भाग्यं महादेवीसमागमात् ।आज्ञापय महादेवि किं करिष्यामि शङ्करि ॥ ३८॥

aho me sumahadbhāgyaṃ mahādevīsamāgamāt |ājñāpaya mahādevi kiṃ kariṣyāmi śaṅkari || 38||

एतावदुक्त्वा वचनं तदा हिमगिरीश्वरः ।सम्प्रेक्षणमाणो गिरिजां प्राञ्जलिः पार्श्वतोऽभवत् ॥ ३९॥

etāvaduktvā vacanaṃ tadā himagirīśvaraḥ |samprekṣaṇamāṇo girijāṃ prāñjaliḥ pārśvato'bhavat || 39||

इति कूर्मपुराणे पूर्वभागे द्वादशाध्यायान्तर्गतंहिमवता कृतं गिरिजास्तोत्रं समाप्तम् ।कूर्मपुराणे पूर्वभागे १२/२०७२४४

iti kūrmapurāṇe pūrvabhāge dvādaśādhyāyāntargataṃhimavatā kṛtaṃ girijāstotraṃ samāptam |kūrmapurāṇe pūrvabhāge 12/207244