कार्तवीर्यार्जुनमन्त्रः १ Khartavirya Arjuna Mantrah 1

श्री गुरुगणपतये नमः ॥ श्रीदत्तात्रेयाय नमः ॥अथ ध्यानं प्रवक्ष्यामि शृणुध्वं मुनिपुङ्गवाः ।यं निजध्यानमात्रेण शत्रवो यान्ति सङ्क्षयम् ॥ १॥

śrī gurugaṇapataye namaḥ || śrīdattātreyāya namaḥ ||atha dhyānaṃ pravakṣyāmi śṛṇudhvaṃ munipuṅgavāḥ |yaṃ nijadhyānamātreṇa śatravo yānti saṅkṣayam || 1||

रणाजिरे जयोदग्रं रणत्किङ्किणिजालकम् ।जगद्धिताय संरन्धं नदज्जलदनिस्वनम् ॥ २॥

raṇājire jayodagraṃ raṇatkiṅkiṇijālakam |jagaddhitāya saṃrandhaṃ nadajjaladanisvanam || 2||

मदभ्रमरझङ्कारपतद्भ्रमरमस्तकम् ।क्वणाकनकघसृणारुझणत्कृतिचमत्कृतिम् ॥ ३॥

madabhramarajhaṅkārapatadbhramaramastakam |kvaṇākanakaghasṛṇārujhaṇatkṛticamatkṛtim || 3||

परिश्रमणवैचित्त्र्यजितत्रिदशसिन्धुरम् ।उदग्रमणिमालाक्षिरुदञ्चिमुखमण्डलम् ॥ ४॥

pariśramaṇavaicittryajitatridaśasindhuram |udagramaṇimālākṣirudañcimukhamaṇḍalam || 4||

अतिप्रबलशुण्डाग्रविलग्नमुसलायुधम् ।करिप्रवरमारुह्य गिरिप्रतिनिभाकृतिम् ॥ ५॥

atiprabalaśuṇḍāgravilagnamusalāyudham |karipravaramāruhya giripratinibhākṛtim || 5||

अधिष्टितमहासत्वप्रतिष्टितजगत्त्रयम् ।अधिध्यदृढसन्धानं धनुश्शतमखानुगम् ॥ ६॥

adhiṣṭitamahāsatvapratiṣṭitajagattrayam |adhidhyadṛḍhasandhānaṃ dhanuśśatamakhānugam || 6||

मुसलादि कुठारादि पाशचर्मधरावृतम् ।प्रत्यस्रं दधतं देवं सहस्रवरबाहुभिः ॥ ७॥

musalādi kuṭhārādi pāśacarmadharāvṛtam |pratyasraṃ dadhataṃ devaṃ sahasravarabāhubhiḥ || 7||

निबद्धकवचं देवं पिनद्धीवरबन्धनम् ।प्रबुद्धसचिवानीतं प्रसिद्धबलपौरुषम् ॥ ८॥

nibaddhakavacaṃ devaṃ pinaddhīvarabandhanam |prabuddhasacivānītaṃ prasiddhabalapauruṣam || 8||

प्रबोधितजगच्चक्रं प्रवर्धितधनागमम् ।नीलनीरद सङ्काशं नित्यराम्बुनिभाननम् ॥ १०॥

prabodhitajagaccakraṃ pravardhitadhanāgamam |nīlanīrada saṅkāśaṃ nityarāmbunibhānanam || 10||

विराजासक्तनयनं नीलकुञ्चितमूर्धजम् ।महनीयमहानीलमणिकुण्डलमण्डितम् ॥ ११॥

virājāsaktanayanaṃ nīlakuñcitamūrdhajam |mahanīyamahānīlamaṇikuṇḍalamaṇḍitam || 11||

रमणीयतरं वीरं विविधैरपि भूषणैः ।भुजगाधिपभोगाभभुजमण्डलमण्डितम् ॥ १२॥

ramaṇīyataraṃ vīraṃ vividhairapi bhūṣaṇaiḥ |bhujagādhipabhogābhabhujamaṇḍalamaṇḍitam || 12||

दृढपीवरपञ्चास्यपृथुकन्दुरमन्दरम् ।कमनीयमणिप्रोततपनीयनवस्रजम् ॥ १३॥

dṛḍhapīvarapañcāsyapṛthukanduramandaram |kamanīyamaṇiprotatapanīyanavasrajam || 13||

तरसा महितं देवं महसामधिपं जनम् ।नदन्तमिव कल्पान्ते भवन्तमतिभीषणम् ॥ १४॥

tarasā mahitaṃ devaṃ mahasāmadhipaṃ janam |nadantamiva kalpānte bhavantamatibhīṣaṇam || 14||

वमन्तमिव कालाग्निं दहन्तमिव पावकम् ।किरन्तमिषुवेषेण स्फुरन्तमिव भास्करम् ॥ १५॥

vamantamiva kālāgniṃ dahantamiva pāvakam |kirantamiṣuveṣeṇa sphurantamiva bhāskaram || 15||

कृतान्तमिव निर्यातं युगान्तरविपर्यये ।मृगेन्द्रमिव गर्जन्तं तर्जन्तमरिमण्डलम् ॥ १६॥

kṛtāntamiva niryātaṃ yugāntaraviparyaye |mṛgendramiva garjantaṃ tarjantamarimaṇḍalam || 16||

ग्रसन्तमिव लोकाङ्घ्रिं नुदन्तमतिभीषणम् ।द्विषन्तमतिवेगेन निहन्तं कृतनिश्चयम् ॥ १७॥

grasantamiva lokāṅghriṃ nudantamatibhīṣaṇam |dviṣantamativegena nihantaṃ kṛtaniścayam || 17||

प्रचण्डतरकोदण्डप्रभिन्नपरसैनिकम् ।प्रतपन्तमिवादित्यं प्रचरन्तमितस्ततः ॥ १८॥

pracaṇḍatarakodaṇḍaprabhinnaparasainikam |pratapantamivādityaṃ pracarantamitastataḥ || 18||

प्रदहन्तमरीनन्तः प्रविशन्तमरिन्दमम् ।क्वचित्प्रचण्डकोदण्डचण्डभैरवनिस्वनम् ॥ १९॥

pradahantamarīnantaḥ praviśantamarindamam |kvacitpracaṇḍakodaṇḍacaṇḍabhairavanisvanam || 19||

क्वचिन्मनोजवोत्तुङ्गतुरङ्गममधिष्ठितम् ।क्वचिद्रक्ताम्भुरोचिष्णुरथोपरिविनिष्टितम् ॥ २०॥

kvacinmanojavottuṅgaturaṅgamamadhiṣṭhitam |kvacidraktāmbhurociṣṇurathopariviniṣṭitam || 20||

क्वचिच्चक्रसहस्रेण कृन्तयन्तं क्रुधा रिपून् ।कचिच्छङ्खसहस्राणां मोहयन्तं महारवैः ॥ २१॥

kvaciccakrasahasreṇa kṛntayantaṃ krudhā ripūn |kacicchaṅkhasahasrāṇāṃ mohayantaṃ mahāravaiḥ || 21||

क्वचिच्चर्मासिसाहस्रविदारितविरोधिनम् ।क्वचित्कठोरसाहस्रकुठारादिविमर्दनम् ॥ २२॥

kvaciccarmāsisāhasravidāritavirodhinam |kvacitkaṭhorasāhasrakuṭhārādivimardanam || 22||

क्वचित्पाशाङ्कुशधरं क्वचिन्मुसलधारिणम् ।क्वचिदादत्तपरिघं मर्दयन्तं रिपून्क्रमात् ॥ २३॥

kvacitpāśāṅkuśadharaṃ kvacinmusaladhāriṇam |kvacidādattaparighaṃ mardayantaṃ ripūnkramāt || 23||

रथनागतुरङ्गदि पतिभिः सहसासितैः ।चोरमारिविपक्षाद्यैर्दशभिः परितोवृतम् ॥ २४॥

rathanāgaturaṅgadi patibhiḥ sahasāsitaiḥ |coramārivipakṣādyairdaśabhiḥ paritovṛtam || 24||

अङ्गैरपि समायान्तं निषङ्गेषु शरासनैः ।आसेवितमनाधृष्यं अमलैरात्तकञ्चुकैः ॥ २५॥

aṅgairapi samāyāntaṃ niṣaṅgeṣu śarāsanaiḥ |āsevitamanādhṛṣyaṃ amalairāttakañcukaiḥ || 25||

पुरन्दरपरेतेशपाशायुधधनाधिपैः ।समीरणसहायाग्रनिरृत्यनिलशूलिभिः ॥ २६॥

purandarapareteśapāśāyudhadhanādhipaiḥ |samīraṇasahāyāgranirṛtyanilaśūlibhiḥ || 26||

स्वकाष्टादिगतैः स्वस्ववाहनायुधभूषणैः ।भीषणैः परितो वीतं परसैन्यविदारणैः ॥ २७॥

svakāṣṭādigataiḥ svasvavāhanāyudhabhūṣaṇaiḥ |bhīṣaṇaiḥ parito vītaṃ parasainyavidāraṇaiḥ || 27||

अतिप्रमाणाकारेण सङ्क्रान्ताशान्तमर्जुनम् ।पदत्रितयसङ्क्रान्तलोकत्रयमिवाच्युतम् ॥ २८॥

atipramāṇākāreṇa saṅkrāntāśāntamarjunam |padatritayasaṅkrāntalokatrayamivācyutam || 28||

आचिन्त्य विभवं देवं विचिन्त्यैवं विभोः पदम् ।आमन्त्र्य निजहृद्वाच्यां स्वमन्त्रजपमारभेत् ॥ २९॥

ācintya vibhavaṃ devaṃ vicintyaivaṃ vibhoḥ padam |āmantrya nijahṛdvācyāṃ svamantrajapamārabhet || 29||

अनुष्टुभाणां मन्त्राणां ऋषिरस्य स्वरस्य च ।दत्तात्रेयोऽपि भगवान् छन्दोऽनुष्टुप् उदाहृतम् ॥ ३०॥

anuṣṭubhāṇāṃ mantrāṇāṃ ṛṣirasya svarasya ca |dattātreyo'pi bhagavān chando'nuṣṭup udāhṛtam || 30||

कार्तवीर्यार्जुनो विष्णुः देवता परिकीर्तितः ।रक्षायै वाञ्छिताप्त्यै च विनियोगोऽरिनिग्रहे ॥ ३१॥

kārtavīryārjuno viṣṇuḥ devatā parikīrtitaḥ |rakṣāyai vāñchitāptyai ca viniyogo'rinigrahe || 31||

रं क्षं यम् । कृतान्त इव कल्पानां गर्जन्जृम्भितोऽर्जुनः ।अस्मद्विरोधिनामायुर्हरत्वतिभयङ्करः ॥ रं क्षं यम् ॥ ३२॥

raṃ kṣaṃ yam | kṛtānta iva kalpānāṃ garjanjṛmbhito'rjunaḥ |asmadvirodhināmāyurharatvatibhayaṅkaraḥ || raṃ kṣaṃ yam || 32||

(मूलमन्त्रः )ठं क्रोम् ॥ आबध्नामि दृढपाशैरलमस्मद्विरोधिनम् ।स्वादिरे ध्मे महत्यग्नौ क्षिपत्वक्षरपविक्रमः ॥ ठं क्रोम् ॥ ३३॥

(mūlamantraḥ )ṭhaṃ krom || ābadhnāmi dṛḍhapāśairalamasmadvirodhinam |svādire dhme mahatyagnau kṣipatvakṣarapavikramaḥ || ṭhaṃ krom || 33||

रें रिम् ॥ युगान्तघननिर्घातनिर्झरैरतिभीषणैः ॥अस्मद्रिपोर्हरत्वायुरर्जुनः शङ्खनिस्वनैः ॥ रें रिम् ॥ ३४॥

reṃ rim || yugāntaghananirghātanirjharairatibhīṣaṇaiḥ ||asmadriporharatvāyurarjunaḥ śaṅkhanisvanaiḥ || reṃ rim || 34||

धं नुम् ॥ धनुः पञ्चशतध्वाननिर्गतप्राणमारुतम् ।कल्पान्तरुद्रकल्पोऽसौ कुर्यान्मे रातिभञ्जनम् ॥ धं नुम् ॥ ३५॥

dhaṃ num || dhanuḥ pañcaśatadhvānanirgataprāṇamārutam |kalpāntarudrakalpo'sau kuryānme rātibhañjanam || dhaṃ num || 35||

स्वां लम् ॥ मल्लैरुल्लसितफलैरुज्वलद्भिः विचेतसम् ।कुर्यादनार्यमार्यस्मदरातिं कृतवीर्यजः ॥ स्वां लम् ॥ ३६॥

svāṃ lam || mallairullasitaphalairujvaladbhiḥ vicetasam |kuryādanāryamāryasmadarātiṃ kṛtavīryajaḥ || svāṃ lam || 36||

प्रों हुम् । स्वबाहुनिर्गतैः पञ्चशतसङ्ख्यैस्सिताशुगैः ।शिरः कृन्ततु मच्छत्रोर्जितशत्रुगणोर्जुनः ॥ प्रो हुम् ॥ ३७॥

proṃ hum | svabāhunirgataiḥ pañcaśatasaṅkhyaissitāśugaiḥ |śiraḥ kṛntatu macchatrorjitaśatrugaṇorjunaḥ || pro hum || 37||

क्लीं ह्रीम् ॥ अतितीक्ष्णकरैरुग्रैररिनिग्रहविग्रहे ।करवालैः कराळाग्रैश्छिन्द्यात् मदरिमर्जुनः ॥ क्लीं ह्रीम् ॥ ३८॥

klīṃ hrīm || atitīkṣṇakarairugrairarinigrahavigrahe |karavālaiḥ karāḷāgraiśchindyāt madarimarjunaḥ || klīṃ hrīm || 38||

गं आम् ॥ गदाभिरतिभीमाभिरायसाभिररिन्दम ।संहारकालसम्बन्धभीमनिर्घातभीषणैः ॥ गं आम् ॥ ३९॥

gaṃ ām || gadābhiratibhīmābhirāyasābhirarindama |saṃhārakālasambandhabhīmanirghātabhīṣaṇaiḥ || gaṃ ām || 39||

सर सर ॥ मुसलैःखलसङ्गेऽरिं निदर्यं मर्दयार्जुन ।आयताभिरनायासं हन हेहय भूपते ॥ सर सर ॥ ४०॥

sara sara || musalaiḥkhalasaṅge'riṃ nidaryaṃ mardayārjuna |āyatābhiranāyāsaṃ hana hehaya bhūpate || sara sara || 40||

युं अम् ॥ युगान्तो गम्भीरमहानिर्घोषनिष्ठुरम् ।अट्टहासैररातिं मे हन हेहय भूपते ॥ युं अम् ॥ ४१॥

yuṃ am || yugānto gambhīramahānirghoṣaniṣṭhuram |aṭṭahāsairarātiṃ me hana hehaya bhūpate || yuṃ am || 41||

नं सम् ॥ सहस्रकरसाहस्र दुस्सहोदग्रतेजसे ।नमस्तुभ्यं सहस्रारे हन हेहय मद्रिपून् ॥ नं सम् ॥ ४२॥

naṃ sam || sahasrakarasāhasra dussahodagratejase |namastubhyaṃ sahasrāre hana hehaya madripūn || naṃ sam || 42||

करुकालि ॥ कालकण्ठगलाकारकरालाकृतिमर्जुन ।कालिभ्योऽलिबलिं दद्यादस्मद्रिपुकलेबरम् ॥ ४३॥

karukāli || kālakaṇṭhagalākārakarālākṛtimarjuna |kālibhyo'libaliṃ dadyādasmadripukalebaram || 43||

घण घण ॥ अतिनीलगजारुढो निरूढामितविक्रमः ।आघट्टतु ममारातिमर्जुनो निशितांशुकैः ॥ घण घण ॥ ४४॥

ghaṇa ghaṇa || atinīlagajāruḍho nirūḍhāmitavikramaḥ |āghaṭṭatu mamārātimarjuno niśitāṃśukaiḥ || ghaṇa ghaṇa || 44||

युं दम् ॥ युगान्तकर्बुरोदग्ररोचिषा चक्षुषा त्वचि ।दह देव ममारातिं दह भूयो हरार्जुन । युं दम् ॥ ४५॥

yuṃ dam || yugāntakarburodagrarociṣā cakṣuṣā tvaci |daha deva mamārātiṃ daha bhūyo harārjuna | yuṃ dam || 45||

ठं सुम् । गाढं गृहीत्वा केशेषु भ्रामयित्वाऽतिवेगतः ।प्रक्षिप्योच्चैव्यसुं भूमौ पातयारिं ममार्जुन ॥ ठं सुम् ॥ ४६॥

ṭhaṃ sum | gāḍhaṃ gṛhītvā keśeṣu bhrāmayitvā'tivegataḥ |prakṣipyoccaivyasuṃ bhūmau pātayāriṃ mamārjuna || ṭhaṃ sum || 46||

सं हाम् ॥ त्वयि गर्जितसङ्ग्रामे संरम्भो जृम्बतेऽर्जुन ।ब्रह्माण्डमपि भिन्नाण्डं भवेत्किमरिमण्डलम् ॥ सं हाम् ॥ ४७॥

saṃ hām || tvayi garjitasaṅgrāme saṃrambho jṛmbate'rjuna |brahmāṇḍamapi bhinnāṇḍaṃ bhavetkimarimaṇḍalam || saṃ hām || 47||

नं रों मम् ॥ मध्यन्दिनदिनाधीशामन्निरीक्ष्याति भीषणः ।क्षणेनैव ममारातिं कुर्यान्निर्जीवमर्जुनः ॥ नं रों मम् ॥ ४८॥

naṃ roṃ mam || madhyandinadinādhīśāmannirīkṣyāti bhīṣaṇaḥ |kṣaṇenaiva mamārātiṃ kuryānnirjīvamarjunaḥ || naṃ roṃ mam || 48||

खं डम् ॥ अतिभीषणानिर्घोषो युधि निर्जितशात्रवः ।अलमस्मदरिं कुर्यादचिरायुषमर्जुनः ॥ खं डम् ॥ ४९॥

khaṃ ḍam || atibhīṣaṇānirghoṣo yudhi nirjitaśātravaḥ |alamasmadariṃ kuryādacirāyuṣamarjunaḥ || khaṃ ḍam || 49||

नर नर ॥ अविचारमनाचारमचिरादचिरायुषम् ।रचयेदचिरापातैरिषुभिर्मेऽरिमर्जुनः ॥ नर नर ॥ ५०॥

nara nara || avicāramanācāramacirādacirāyuṣam |racayedacirāpātairiṣubhirme'rimarjunaḥ || nara nara || 50||

हं साम् । परचक्रविनिर्भिन्नरथचक्रविमर्दनम् ।मम शत्रुमिमं हन्याज्जितशत्रुगणोर्जुनः ॥ हं साम् ॥ ५१॥

haṃ sām | paracakravinirbhinnarathacakravimardanam |mama śatrumimaṃ hanyājjitaśatrugaṇorjunaḥ || haṃ sām || 51||

नां षम् ॥ कालमेघनिभं कालं कालकण्ठातिभीषणः ।कालायसधनुः कालवशं नयतु मे रिपुम् ॥ नां षम् ॥ ५२॥

nāṃ ṣam || kālameghanibhaṃ kālaṃ kālakaṇṭhātibhīṣaṇaḥ |kālāyasadhanuḥ kālavaśaṃ nayatu me ripum || nāṃ ṣam || 52||

धं फम् ॥ अधिवारणमारुढो मदवारणाविक्रमः ।विदधारुणोऽक्षोस्मदरिमारणमर्जुनः ॥ धं फम् ॥ ५३॥

dhaṃ pham || adhivāraṇamāruḍho madavāraṇāvikramaḥ |vidadhāruṇo'kṣosmadarimāraṇamarjunaḥ || dhaṃ pham || 53||

मं दम् ॥ परायुहरणो घोरधुरीणमदवारणम् ।नियोधय ममारातिं हरणे हेहयेश्वर । मं दम् ॥ ५४॥

maṃ dam || parāyuharaṇo ghoradhurīṇamadavāraṇam |niyodhaya mamārātiṃ haraṇe hehayeśvara | maṃ dam || 54||

जं ञम् ॥ खरकोटिखुरापातक्षितिरेणुसमुत्थितैः ।हयसादिभिरद्यैव हन मे रिपुमर्जुन ॥ जं ञम् ॥ ५५॥

jaṃ ñam || kharakoṭikhurāpātakṣitireṇusamutthitaiḥ |hayasādibhiradyaiva hana me ripumarjuna || jaṃ ñam || 55||

विं शम् ॥ प्रलयेश समादिष्टः प्रमथैरिव सद्भटैः ।परिकृन्तय मच्छत्रून् शरणं भव मेऽर्जुन । विं शम् ॥ ५६॥

viṃ śam || pralayeśa samādiṣṭaḥ pramathairiva sadbhaṭaiḥ |parikṛntaya macchatrūn śaraṇaṃ bhava me'rjuna | viṃ śam || 56||

ख्रों लिम् ॥ प्राचीमाश्रित्य हरितं यातमस्मद्विरोधनम् ।निहन्यान्निशितैश्शस्त्रैश्चोरमारीविभञ्जनः ॥ ख्रों लिम् ॥ ५७॥

khroṃ lim || prācīmāśritya haritaṃ yātamasmadvirodhanam |nihanyānniśitaiśśastraiścoramārīvibhañjanaḥ || khroṃ lim || 57||

जं रिम् ॥ दिशा दक्षिणया यादं निगृह्यास्मद्रिपुन् बलात् ।निहन्याद्धृतचापेषुमहामारीविभज्जनः ॥ जं रिम् ॥ ५८॥

jaṃ rim || diśā dakṣiṇayā yādaṃ nigṛhyāsmadripun balāt |nihanyāddhṛtacāpeṣumahāmārīvibhajjanaḥ || jaṃ rim || 58||

क्रां क्रीम् । पश्चिमया दिशा यातपरेतप्रग्रहातिथिम् ।तनोत्वस्मद्रिपुं भल्लैर्निगृह्येदरिभञ्जनः ॥ क्रां क्रीम् ॥ ५९॥

krāṃ krīm | paścimayā diśā yātaparetapragrahātithim |tanotvasmadripuṃ bhallairnigṛhyedaribhañjanaḥ || krāṃ krīm || 59||

सं फिम् ॥ सौम्याशया समाक्रान्तं समाक्रान्तं सुरेश्वर ।समापयतु सर्वायुः मदरेः सौम्यदिक्स्थितः ॥ सं फिम् ॥ ६०॥

saṃ phim || saumyāśayā samākrāntaṃ samākrāntaṃ sureśvara |samāpayatu sarvāyuḥ madareḥ saumyadiksthitaḥ || saṃ phim || 60||

रां लाम् ॥ गृहीतचापबाणोसौ बली दुष्टनिबर्हणः ।निबर्हयतु मच्छत्रुं मखच्छकहरिस्थितः ॥ रां लाम् ॥ ६१॥

rāṃ lām || gṛhītacāpabāṇosau balī duṣṭanibarhaṇaḥ |nibarhayatu macchatruṃ makhacchakaharisthitaḥ || rāṃ lām || 61||

डं फुम् । द्विषन्तं मम देवेश विशन्तं मारुताशयात् ।विशन्तं विशिखैरेनं निहन्यादुरितापहः ॥ डं फुम् ॥ ६२॥

ḍaṃ phum | dviṣantaṃ mama deveśa viśantaṃ mārutāśayāt |viśantaṃ viśikhairenaṃ nihanyāduritāpahaḥ || ḍaṃ phum || 62||

शिवाशया विवृद्धस्य शिताङ्कुरशिलीमुखैः ।शिरश्छेदय मच्छत्रोर्महामायाविभञ्जन ।ॐ अः ॥ ऊर्ध्वाशयोत्पतिष्यन्तं मद्विषन्तं महाबल ।महाचक्रेण विच्छिद्यान्महामृत्युविभञ्जन ॥ ॐ अः ॥ ६३॥

śivāśayā vivṛddhasya śitāṅkuraśilīmukhaiḥ |śiraśchedaya macchatrormahāmāyāvibhañjana |oṃ aḥ || ūrdhvāśayotpatiṣyantaṃ madviṣantaṃ mahābala |mahācakreṇa vicchidyānmahāmṛtyuvibhañjana || oṃ aḥ || 63||

औं डम् । रसारन्ध्रामप्यस्मत्सपत्नमधराशया ।शङ्खध्वानेन विध्वस्ते स हन्याद् दुःखभञ्जनः ॥ औं डम् ॥ ६४॥

auṃ ḍam | rasārandhrāmapyasmatsapatnamadharāśayā |śaṅkhadhvānena vidhvaste sa hanyād duḥkhabhañjanaḥ || auṃ ḍam || 64||

श्री दत्तात्रेयो जयतु ॥इति कार्तवीर्यार्जुनमन्त्रः १ सम्पूर्णः ।

śrī dattātreyo jayatu ||iti kārtavīryārjunamantraḥ 1 sampūrṇaḥ |