विष्णुस्तवः द्वादशाक्षरमन्त्रात्मकः Vishnustava with 12 Syllable Mantra

ॐ नमो भगवते वासुदेवाय ।देव्युवाच ।ॐकाररूपजगतामाद्य ब्रह्मस्वरूपक ।अनन्तजगदाधार गदाधर नमोऽस्तु ते ॥ १॥

oṃ namo bhagavate vāsudevāya |devyuvāca |oṃkārarūpajagatāmādya brahmasvarūpaka |anantajagadādhāra gadādhara namo'stu te || 1||

न क्षीणस्त्वं न क्षरसि नारायण नरोत्तम ।नवनीरधरश्याम नमस्ते नलिनेक्षण ॥ २॥

na kṣīṇastvaṃ na kṣarasi nārāyaṇa narottama |navanīradharaśyāma namaste nalinekṣaṇa || 2||

मोक्षसेवितपादाब्ज मोहव्यूहविमोहन ।मोदेनात्मस्वरूपेण मोदिताय नमोऽस्तु ते ॥ ३॥

mokṣasevitapādābja mohavyūhavimohana |modenātmasvarūpeṇa moditāya namo'stu te || 3||

भजतां भवनाशाय भव्योदधिशयाय च ।भवाय भवभक्ताय नमस्ते भवलक्षणः ॥ ४॥

bhajatāṃ bhavanāśāya bhavyodadhiśayāya ca |bhavāya bhavabhaktāya namaste bhavalakṣaṇaḥ || 4||

गगनालक्षरूपाय गगनव्याप्तिकारिणे ।गरिष्ठाय गरीशाय गहनाय नमोऽस्तु ते ॥ ५॥

gaganālakṣarūpāya gaganavyāptikāriṇe |gariṣṭhāya garīśāya gahanāya namo'stu te || 5||

वरिम्ने वरणार्थाय वन्दनीयप्रदाय च ।वरबीजप्रबीजाय वरहन्त्रे नमोऽस्तु ते ॥ ६॥

varimne varaṇārthāya vandanīyapradāya ca |varabījaprabījāya varahantre namo'stu te || 6||

तेजःप्रसादरूपाय तेजोरूपाय तेजसे ।तेजः प्रदीप्तलोकाय नमस्ते तेजसात्मने ॥ ७॥

tejaḥprasādarūpāya tejorūpāya tejase |tejaḥ pradīptalokāya namaste tejasātmane || 7||

वाणीनाथाय बालाय वायुरूपाय वाहिने ।बान्धवाय बलद्बाहुबलयुक्ताय ते नमः ॥ ८॥

vāṇīnāthāya bālāya vāyurūpāya vāhine |bāndhavāya baladbāhubalayuktāya te namaḥ || 8||

सुखाय सुखगम्याय सुदक्षाय सुखात्मने ।सुन्दरत्वसमुद्रैकदेशलेशाय ते नमः ॥ ९॥

sukhāya sukhagamyāya sudakṣāya sukhātmane |sundaratvasamudraikadeśaleśāya te namaḥ || 9||

देश्यदेशकरूपाय देश्याय देशकाय च ।देवत्रिकोटिदेहाय देवदेहाय ते नमः ॥ १०॥

deśyadeśakarūpāya deśyāya deśakāya ca |devatrikoṭidehāya devadehāya te namaḥ || 10||

वामदेवस्वरूपाय वामनाय नमो नमः ।वाराहतनवे बालवपुषे ते नमो नमः ॥ ११॥

vāmadevasvarūpāya vāmanāya namo namaḥ |vārāhatanave bālavapuṣe te namo namaḥ || 11||

यज्ञयज्ञाय यज्ञाय यजमानाय ते नमः ।यजुरादिविदे यज्ञयष्टव्याय नमो नमः ॥ १२॥

yajñayajñāya yajñāya yajamānāya te namaḥ |yajurādivide yajñayaṣṭavyāya namo namaḥ || 12||

फलश्रुतिः ।द्वादश स्तव एकोऽसौ जप्तव्यो गेय उच्यते ।सर्ववेदार्थसारोऽयं ब्रह्मलोकेऽपि गीयते ॥ १३॥

phalaśrutiḥ |dvādaśa stava eko'sau japtavyo geya ucyate |sarvavedārthasāro'yaṃ brahmaloke'pi gīyate || 13||

भगवन्तं वासुदेवं स्तवेनानेन चान्वहम् ।स्तुत्वा नत्वा फाल्गुनस्य द्वादश्यान्तु विशेषतः ।स मुक्तः सर्वपापेभ्यो वैष्ण्वीमाप्नुते गतिम् ॥ १४॥

bhagavantaṃ vāsudevaṃ stavenānena cānvaham |stutvā natvā phālgunasya dvādaśyāntu viśeṣataḥ |sa muktaḥ sarvapāpebhyo vaiṣṇvīmāpnute gatim || 14||

॥ इति बृहद्धर्मपुराणन्तर्गतः द्वादशाक्षरमन्त्रात्मकःविष्णुस्तवः सम्पूर्णः ॥॥ बृहद्धर्मपुराणम् । पूर्वखण्डः । अध्यायः २२। ६६८० ॥

|| iti bṛhaddharmapurāṇantargataḥ dvādaśākṣaramantrātmakaḥviṣṇustavaḥ sampūrṇaḥ |||| bṛhaddharmapurāṇam | pūrvakhaṇḍaḥ | adhyāyaḥ 22| 6680 ||