शरवनभवमन्त्राक्षरषट्कम् Shrisharavanabhavamantraksharashatkam

ॐ श्रीगणेशाय नमः ।शक्तिस्वरूपाय शरोद्भवाय शक्रार्चितायाथ शचीस्तुताय ।शमाय शम्भुप्रणवार्थदाय शकाररूपाय नमो गुहाय ॥ १॥

oṃ śrīgaṇeśāya namaḥ |śaktisvarūpāya śarodbhavāya śakrārcitāyātha śacīstutāya |śamāya śambhupraṇavārthadāya śakārarūpāya namo guhāya || 1||

रणन्मणिप्रोज्ज्वलमेखलाय रमासनाथप्रणवार्थदाय ।रतीशपूज्याय रविप्रभाय रकाररूपाय नमो गुहाय ॥ २॥

raṇanmaṇiprojjvalamekhalāya ramāsanāthapraṇavārthadāya |ratīśapūjyāya raviprabhāya rakārarūpāya namo guhāya || 2||

वराय वर्णाश्रमरक्षकाय वरत्रिशूलाभयमण्डिताय ।वलारिकन्यासुकृतालयाय वकाररूपाय नमो गुहाय ॥ ३॥

varāya varṇāśramarakṣakāya varatriśūlābhayamaṇḍitāya |valārikanyāsukṛtālayāya vakārarūpāya namo guhāya || 3||

नगेन्द्रकन्येश्वरतत्त्वदाय नगाधिरूढाय नगार्चिताय ।नगासुरघ्नाय नगालयाय नकाररूपाय नमो गुहाय ॥ ४॥

nagendrakanyeśvaratattvadāya nagādhirūḍhāya nagārcitāya |nagāsuraghnāya nagālayāya nakārarūpāya namo guhāya || 4||

भवाय भर्गाय भवात्मजाय भस्मायमानाद्भुतविग्रहाय ।भक्तेष्टकामप्रदकल्पकाय भकाररूपाय नमो गुहाय ॥ ५॥

bhavāya bhargāya bhavātmajāya bhasmāyamānādbhutavigrahāya |bhakteṣṭakāmapradakalpakāya bhakārarūpāya namo guhāya || 5||

वल्लीवलारातिसुतार्चिताय वराङ्गरागाञ्चितविग्रहाय ।वल्लीकराम्भोरुहमर्दिताय वकाररूपाय नमो गुहाय ॥ ६॥

vallīvalārātisutārcitāya varāṅgarāgāñcitavigrahāya |vallīkarāmbhoruhamarditāya vakārarūpāya namo guhāya || 6||

इति श्रीशरवनभवमन्त्राक्षरषट्कं सम्पूर्णम् ॥इति शिवम् ॥

iti śrīśaravanabhavamantrākṣaraṣaṭkaṃ sampūrṇam ||iti śivam ||