अभिषेकमन्त्राः Abhishekamantrah

पुष्कर उवाच ।राजदेवाद्यभिषेकमन्त्रान्वक्ष्येऽघमर्दनान् ।कुम्भात्कुशोदकैः सिञ्चेत्तेन सर्वं हि सिद्।ह्ध्यति ॥ १॥

puṣkara uvāca |rājadevādyabhiṣekamantrānvakṣye'ghamardanān |kumbhātkuśodakaiḥ siñcettena sarvaṃ hi sid|hdhyati || 1||

सुरास्त्वामभिषिञ्चन्तु ब्रह्मविष्णुमहेश्वराः ।वासुदेवः सङ्कर्षणः प्रद्युम्नश्चानिरुद्धकः ॥ २॥

surāstvāmabhiṣiñcantu brahmaviṣṇumaheśvarāḥ |vāsudevaḥ saṅkarṣaṇaḥ pradyumnaścāniruddhakaḥ || 2||

भवन्तु विजयायैते इन्द्राद्या दशदिग्गताः ।रुद्रो धर्मो मनुर्दक्षो रुचिः श्रद्धा च सर्वदा ॥ ३॥

bhavantu vijayāyaite indrādyā daśadiggatāḥ |rudro dharmo manurdakṣo ruciḥ śraddhā ca sarvadā || 3||

भृगुरत्रिर्वसिष्ठश्च सनकश्च सनन्दनः ।सनत्कुमारोऽङ्गिराश्च पुलस्त्यः पुलहः क्रतुः ॥ ४॥

bhṛguratrirvasiṣṭhaśca sanakaśca sanandanaḥ |sanatkumāro'ṅgirāśca pulastyaḥ pulahaḥ kratuḥ || 4||

मरीचिः कश्यपः पातु प्रजेशं पृथिवीपतिम् ।प्रभासुरा वहिर्षद अग्निष्वात्ताश्च पान्तु ते ॥ ५॥

marīciḥ kaśyapaḥ pātu prajeśaṃ pṛthivīpatim |prabhāsurā vahirṣada agniṣvāttāśca pāntu te || 5||

क्रव्यादाश्चोपहूताश्च आज्यपाश्च सुकालिनः ।अग्निभिश्चाभिषिञ्चन्तु लक्ष्म्याद्या धर्मवल्लभाः ॥ ६॥

kravyādāścopahūtāśca ājyapāśca sukālinaḥ |agnibhiścābhiṣiñcantu lakṣmyādyā dharmavallabhāḥ || 6||

आदित्याद्याः कश्यपस्य बहुपुत्रस्य(१)वल्लभाः ।कृशाश्वस्याग्निपुत्रस्य भार्याश्चारिष्ठनेमिनः ॥ ७॥

ādityādyāḥ kaśyapasya bahuputrasya(1)vallabhāḥ |kṛśāśvasyāgniputrasya bhāryāścāriṣṭhaneminaḥ || 7||

अश्विन्याद्याश्च चन्द्रस्य पुलहस्य(२)तथा प्रियाः ।भूता च कपिशा दंष्ट्री सुरसा सरमा दनुः ॥ ८॥

aśvinyādyāśca candrasya pulahasya(2)tathā priyāḥ |bhūtā ca kapiśā daṃṣṭrī surasā saramā danuḥ || 8||

श्येनी भासी तथा क्रौञ्ची धृतराष्ट्री शुकी तथा ।एतास्त्वामभिषिञ्चन्तु अरुणश्चार्कसारथिः ॥ ९॥

śyenī bhāsī tathā krauñcī dhṛtarāṣṭrī śukī tathā |etāstvāmabhiṣiñcantu aruṇaścārkasārathiḥ || 9||

आयतिर्नियती रात्रिर्निद्रा लोकस्थितौ स्थिताः ।उमा मेना शची पान्तु धूमोर्णा निरृतिर्जया ॥ १०॥

āyatirniyatī rātrirnidrā lokasthitau sthitāḥ |umā menā śacī pāntu dhūmorṇā nirṛtirjayā || 10||

गौरी शिवा च ऋद्धिश्च वेला या चैव नड्वला ।असिक्नी च(३)तथा ज्योत्स्ना देवपत्न्यो वनस्पतिः ॥ ११॥

gaurī śivā ca ṛddhiśca velā yā caiva naḍvalā |asiknī ca(3)tathā jyotsnā devapatnyo vanaspatiḥ || 11||

महाकल्पश्च कल्पश्च मन्वन्तरयुगानि च ।संवत्सराणि वर्षाणि पान्तु त्वामयनद्वयम् ॥ १२॥

mahākalpaśca kalpaśca manvantarayugāni ca |saṃvatsarāṇi varṣāṇi pāntu tvāmayanadvayam || 12||

ऋतवश्च तथा मासाः पक्षा रात्र्यहनी तथा ।सन्ध्यातिथिमुहूर्ताश्च कालस्यावयवाश्च ये ॥ १३॥

ṛtavaśca tathā māsāḥ pakṣā rātryahanī tathā |sandhyātithimuhūrtāśca kālasyāvayavāśca ye || 13||

सूर्याद्याश्च ग्रहाः पान्तु मनुः स्वायम्भुवादिकः ।स्वायम्भुवः स्वारोचिष उत्तमस्तामसो मनुः ॥ १४॥

sūryādyāśca grahāḥ pāntu manuḥ svāyambhuvādikaḥ |svāyambhuvaḥ svārociṣa uttamastāmaso manuḥ || 14||

रैवतश्चाक्षुषः षष्ठो वैवस्वत इहेरितः ।सावर्णिर्ब्रह्मपुत्रश्च धर्मपुत्रश्च रुद्रजः ॥ १५॥

raivataścākṣuṣaḥ ṣaṣṭho vaivasvata iheritaḥ |sāvarṇirbrahmaputraśca dharmaputraśca rudrajaḥ || 15||

दक्षजो रौच्यभौत्यौ च मनवस्तु चतुर्दश ।विश्वभुक्च विपश्चिच्च सुचित्तिश्च शिखी विभुः ॥ १६॥

dakṣajo raucyabhautyau ca manavastu caturdaśa |viśvabhukca vipaścicca sucittiśca śikhī vibhuḥ || 16||

मनोजवस्तथौजस्वी बलिरद्भुतशान्तयः ।वृषश्च ऋतधामा च दिवस्पृक्कविरिन्द्रकः ॥ १७॥

manojavastathaujasvī baliradbhutaśāntayaḥ |vṛṣaśca ṛtadhāmā ca divaspṛkkavirindrakaḥ || 17||

रैवन्तश्च कुमारश्च तथा वत्सविनायकः ।वीरभद्रश्च नन्दी च विश्वकर्मा पुरोजवः ॥ १८॥

raivantaśca kumāraśca tathā vatsavināyakaḥ |vīrabhadraśca nandī ca viśvakarmā purojavaḥ || 18||

एते त्वामभिषिञ्चन्तु सुरमुख्याः समागताः ।नासत्यौ देवभिषजौ ध्रुवाद्या वसवोऽष्ट च ॥ १९॥

ete tvāmabhiṣiñcantu suramukhyāḥ samāgatāḥ |nāsatyau devabhiṣajau dhruvādyā vasavo'ṣṭa ca || 19||

दश चाङ्गिरसो वेदास्त्वाभिषिञ्चन्तु सिद्धये ।आत्मा ह्यायुर्मनो दक्षो मदः प्राणस्तथैव च ॥ २०॥

daśa cāṅgiraso vedāstvābhiṣiñcantu siddhaye |ātmā hyāyurmano dakṣo madaḥ prāṇastathaiva ca || 20||

हविष्मांश्च गरिष्ठश्च ऋतः सत्यश्च पान्तु वः ।क्रतुर्दक्षो वसुः सत्यः कालकामो धुरिर्जये ॥ २१॥

haviṣmāṃśca gariṣṭhaśca ṛtaḥ satyaśca pāntu vaḥ |kraturdakṣo vasuḥ satyaḥ kālakāmo dhurirjaye || 21||

पुरूरवा आद्रवाश्च विश्वेदेवाश्च रोचनः ।अङ्गारकाद्याः सूर्यस्त्वां निरृतिश्च तथा यमः ॥ २२॥

purūravā ādravāśca viśvedevāśca rocanaḥ |aṅgārakādyāḥ sūryastvāṃ nirṛtiśca tathā yamaḥ || 22||

अजैकपादहिर्बुध्न्यो धूमकेतुश्च रुद्रजाः(१)।भरतश्च तथा मृत्युः कापालिरथ किङ्किणिः ॥ २३॥

ajaikapādahirbudhnyo dhūmaketuśca rudrajāḥ(1)|bharataśca tathā mṛtyuḥ kāpāliratha kiṅkiṇiḥ || 23||

भवनो भावनः पान्तु स्वजन्यः स्वजनस्तथा(१)।क्रतुश्रवाश्च मूर्धा च याजनोऽभ्युशनास्तथा ॥ २४॥

bhavano bhāvanaḥ pāntu svajanyaḥ svajanastathā(1)|kratuśravāśca mūrdhā ca yājano'bhyuśanāstathā || 24||

प्रसवश्चाव्ययश्चैव दक्षश्च भृगवः सुराः ।मनोऽनुमन्ता प्राणश्च नवोऽपानश्च वीर्यवान् ॥ २५॥

prasavaścāvyayaścaiva dakṣaśca bhṛgavaḥ surāḥ |mano'numantā prāṇaśca navo'pānaśca vīryavān || 25||

वीतिहोत्रो नयः साध्यो हंसो नारायणोऽवतु ।विभुश्चैव प्रभुश्चैव देवश्रेष्ठा जगद्धिताः ॥ २६॥

vītihotro nayaḥ sādhyo haṃso nārāyaṇo'vatu |vibhuścaiva prabhuścaiva devaśreṣṭhā jagaddhitāḥ || 26||

धाता मित्रोऽर्यमा पूषा शक्रोऽथ वरुणो भगः ।त्वष्टा विवस्वान् सविता विष्णुर्द्वादश भास्कराः ॥ २७॥

dhātā mitro'ryamā pūṣā śakro'tha varuṇo bhagaḥ |tvaṣṭā vivasvān savitā viṣṇurdvādaśa bhāskarāḥ || 27||

एकज्योतिश्च द्विज्योतिस्त्रिश्चतुर्ज्योतिरेव च ।एकशक्रो द्विशक्रश्च त्रिशक्रश्च महाबलः ॥ २८॥

ekajyotiśca dvijyotistriścaturjyotireva ca |ekaśakro dviśakraśca triśakraśca mahābalaḥ || 28||

इन्द्रश्च मेत्यादिशतु ततः प्रतिमकृत्तथा ।मितश्च सम्मितश्चैव अमितश्च महाबलः ॥ २९॥

indraśca metyādiśatu tataḥ pratimakṛttathā |mitaśca sammitaścaiva amitaśca mahābalaḥ || 29||

ऋतजित्सत्यजिच्चैव सुषेणः सेनजित्तथा ।अतिमित्रोऽनुमित्रश्च पुरुमित्रोऽपराजितः ॥ ३०॥

ṛtajitsatyajiccaiva suṣeṇaḥ senajittathā |atimitro'numitraśca purumitro'parājitaḥ || 30||

ऋतश्च ऋतवाग्धाता विधाता(२)धारणो ध्रुवः ।विधारणो महातेजा वासवस्य परः सखा ॥ ३१॥

ṛtaśca ṛtavāgdhātā vidhātā(2)dhāraṇo dhruvaḥ |vidhāraṇo mahātejā vāsavasya paraḥ sakhā || 31||

ईदृक्षश्चाप्यदृक्षश्च(३)एतादृगमिताशनः ।क्रीडितश्च सदृक्षश्च सरभश्च महातपाः ॥ ३२॥

īdṛkṣaścāpyadṛkṣaśca(3)etādṛgamitāśanaḥ |krīḍitaśca sadṛkṣaśca sarabhaśca mahātapāḥ || 32||

धर्ता धुर्यो धुरिर्भीम अभिमुक्तोऽक्षपात्सहः (१)।धृतिर्वसुरनाधृष्यो(२)रामः कामो जयो विराट् ॥ ३३॥

dhartā dhuryo dhurirbhīma abhimukto'kṣapātsahaḥ (1)|dhṛtirvasuranādhṛṣyo(2)rāmaḥ kāmo jayo virāṭ || 33||

देवा एकोनपञ्चाशन्मरुतस्त्वामवन्तु ते ।चित्राङ्गदश्चित्ररथः चित्रसेनश्च वै कलिः ॥ ३४॥

devā ekonapañcāśanmarutastvāmavantu te |citrāṅgadaścitrarathaḥ citrasenaśca vai kaliḥ || 34||

ऊर्णायुरुग्रसेनश्च धृतराष्ट्रश्च नन्दकः ।हाहा हूहूर्नारदश्च विश्वावसुश्च तुम्बुरुः ॥ ३५॥

ūrṇāyurugrasenaśca dhṛtarāṣṭraśca nandakaḥ |hāhā hūhūrnāradaśca viśvāvasuśca tumburuḥ || 35||

एते त्वामभिषिञ्चन्तु गन्धर्वा विजयाय ते ।पान्तु ते कुरुपा मुख्या दिव्याश्चाप्सरसाङ्गणाः ॥ ३६॥

ete tvāmabhiṣiñcantu gandharvā vijayāya te |pāntu te kurupā mukhyā divyāścāpsarasāṅgaṇāḥ || 36||

अनवद्या सुकेशी च मेनका सह जन्यया(३)।क्रतुस्थला घृताची च विश्वाची पुञ्जिकस्थला ॥ ३७॥

anavadyā sukeśī ca menakā saha janyayā(3)|kratusthalā ghṛtācī ca viśvācī puñjikasthalā || 37||

प्रम्लोचा चोर्वशी रम्भा पञ्चचूडा तिलोत्तमा ।चित्रलेखा लक्ष्मणा च पुण्डरीका च वारुणी ॥ ३८॥

pramlocā corvaśī rambhā pañcacūḍā tilottamā |citralekhā lakṣmaṇā ca puṇḍarīkā ca vāruṇī || 38||

प्रह्लादो विरोचनोऽथ बलिर्वाणोऽथ तत्सुताः ।एते चान्येऽभिषिञ्चन्तु दानवा राक्षसास्तथा ॥ ३९॥

prahlādo virocano'tha balirvāṇo'tha tatsutāḥ |ete cānye'bhiṣiñcantu dānavā rākṣasāstathā || 39||

हेतिश्चैव प्रहेतिश्च विद्युत्स्फूर्जथुरग्रकाः ।यक्षः सिद्धात्मकः पातु माणिभद्रश्च नन्दनः ॥ ४०॥

hetiścaiva prahetiśca vidyutsphūrjathuragrakāḥ |yakṣaḥ siddhātmakaḥ pātu māṇibhadraśca nandanaḥ || 40||

पिङ्गाक्षो द्युतिमांश्चैव पुष्पवन्तो जयावहः ।शङ्खः पद्मश्च मकरः कच्छपश्च निधिर्जये ॥ ४१॥

piṅgākṣo dyutimāṃścaiva puṣpavanto jayāvahaḥ |śaṅkhaḥ padmaśca makaraḥ kacchapaśca nidhirjaye || 41||

पिशाचा ऊर्ध्वकेशाद्या भूता भूम्यादिवासिनः ।महाकालं पुरस्कृत्य नरसिंहञ्च मातरः ॥ ४२॥

piśācā ūrdhvakeśādyā bhūtā bhūmyādivāsinaḥ |mahākālaṃ puraskṛtya narasiṃhañca mātaraḥ || 42||

गुहः स्कन्दो विशाखस्त्वान्नैगमेयोऽभिषिञ्चतु ।डाकिन्यो याश्च योगिन्यः खेचरा भूचराश्च याः ॥ ४३॥

guhaḥ skando viśākhastvānnaigameyo'bhiṣiñcatu |ḍākinyo yāśca yoginyaḥ khecarā bhūcarāśca yāḥ || 43||

गरुडश्चारुणः पान्तु सम्पातिप्रमुखाः खगाः ।अनन्ताद्या महानागाः शेषवासुकितक्षकाः ॥ ४४॥

garuḍaścāruṇaḥ pāntu sampātipramukhāḥ khagāḥ |anantādyā mahānāgāḥ śeṣavāsukitakṣakāḥ || 44||

ऐरावतो महापद्मः कम्बलाश्वतरावुभौ ।शङ्खः कर्कोटकश्चैव धृतराष्ट्रो धनञ्जयः ॥ ४५॥

airāvato mahāpadmaḥ kambalāśvatarāvubhau |śaṅkhaḥ karkoṭakaścaiva dhṛtarāṣṭro dhanañjayaḥ || 45||

कुमुदैरावणौ पद्मः पुष्पदन्तोऽथ वामनः ।सुप्रतीकोऽञ्जनो नागाः पान्तु त्वां सर्वतः सदा ॥ ४६॥

kumudairāvaṇau padmaḥ puṣpadanto'tha vāmanaḥ |supratīko'ñjano nāgāḥ pāntu tvāṃ sarvataḥ sadā || 46||

पैतामहस्तथा हंसो वृषभः शङ्करस्य च ।दुर्गासिंहश्च पान्तु त्वां यमस्य महिषस्तथा ॥ ४७॥

paitāmahastathā haṃso vṛṣabhaḥ śaṅkarasya ca |durgāsiṃhaśca pāntu tvāṃ yamasya mahiṣastathā || 47||

उच्चैःश्रवाश्चाश्वपतिस्तथा धन्वन्तरिः सदा ।कौस्तुभः शङ्खराजश्च वज्रं शूलञ्च चक्रकम् ॥ ४८॥

uccaiḥśravāścāśvapatistathā dhanvantariḥ sadā |kaustubhaḥ śaṅkharājaśca vajraṃ śūlañca cakrakam || 48||

नन्दकोऽस्त्राणि रक्षन्तु धर्मश्च व्यवसायकः ।चित्रगुप्तश्च दण्डश्च पिङ्गलो मृत्युकालकौ ॥ ४९॥

nandako'strāṇi rakṣantu dharmaśca vyavasāyakaḥ |citraguptaśca daṇḍaśca piṅgalo mṛtyukālakau || 49||

बालखिल्यादिमुनयो व्यासवाल्मीकिमुख्यकाः ।पृथुर्दिलीपो भरतो दुष्यन्तः शक्रजिद्वली(१)॥ ५०॥

bālakhilyādimunayo vyāsavālmīkimukhyakāḥ |pṛthurdilīpo bharato duṣyantaḥ śakrajidvalī(1)|| 50||

मनुः ककुत्स्थश्चानेना युवनाश्वो जयद्रथः ।मान्धाता मुचुकुन्दश्च पान्तु त्वाञ्च पुरूरवाः ॥ ५१॥

manuḥ kakutsthaścānenā yuvanāśvo jayadrathaḥ |māndhātā mucukundaśca pāntu tvāñca purūravāḥ || 51||

वास्तुदेवाः पञ्चविंशत्तत्त्वानि विजयाय ते ।रुक्मभौमः शिलाभौमः पतालो नीलमूर्तिकः(२)॥ ५२॥

vāstudevāḥ pañcaviṃśattattvāni vijayāya te |rukmabhaumaḥ śilābhaumaḥ patālo nīlamūrtikaḥ(2)|| 52||

पीतरक्तः क्षितिश्चैव श्वेतभौमो रसातलम् ।भूर्लोकोऽथ भुवर्मुख्या जम्वूद्वीपादयः श्रिये ॥ ५३॥

pītaraktaḥ kṣitiścaiva śvetabhaumo rasātalam |bhūrloko'tha bhuvarmukhyā jamvūdvīpādayaḥ śriye || 53||

उत्तराः कुरवः पान्तु रम्यो हिरण्यकस्तथा(१)।भद्राश्वः केतुमालश्च वर्षश्चैव वलाहकः ॥ ५४॥

uttarāḥ kuravaḥ pāntu ramyo hiraṇyakastathā(1)|bhadrāśvaḥ ketumālaśca varṣaścaiva valāhakaḥ || 54||

हरिवर्षः किम्पुरुष इन्द्रद्वीपः कशेरुमान् ।ताम्रवर्णो गभस्तिमान्नागद्वीपश्च सौम्यकः ॥ ५५॥

harivarṣaḥ kimpuruṣa indradvīpaḥ kaśerumān |tāmravarṇo gabhastimānnāgadvīpaśca saumyakaḥ || 55||

गान्धर्वो वरुणो यश्च नवमः पान्तु राज्यदाः ।हिमवान् हेमकूटश्च निषधो नील एव च ॥ ५६॥

gāndharvo varuṇo yaśca navamaḥ pāntu rājyadāḥ |himavān hemakūṭaśca niṣadho nīla eva ca || 56||

श्वेतश्च शृङ्गवान्मेरुर्माल्यवान् गन्धमादनः ।महेन्द्रो मलयः सह्यः शक्तिमानृक्षवान् गिरिः ॥ ५७॥

śvetaśca śṛṅgavānmerurmālyavān gandhamādanaḥ |mahendro malayaḥ sahyaḥ śaktimānṛkṣavān giriḥ || 57||

विन्ध्यश्च पारिपात्रश्च गिरयः शान्तिदास्तु ते ।ऋग्वेदाद्याः षडङ्गानि इतिहासपुराणकम् ॥ ५८॥

vindhyaśca pāripātraśca girayaḥ śāntidāstu te |ṛgvedādyāḥ ṣaḍaṅgāni itihāsapurāṇakam || 58||

आयुर्वेदश्च गन्धर्वधनुर्वेदोपवेदकाः ।शिक्षा कल्पो व्याकरणं निरुक्तं ज्योतिषाङ्गतिः ॥ ५९॥

āyurvedaśca gandharvadhanurvedopavedakāḥ |śikṣā kalpo vyākaraṇaṃ niruktaṃ jyotiṣāṅgatiḥ || 59||

छन्दोऽङ्गानि च वेदाश्च मीमांसा न्यायविस्तरः ।धर्मशास्त्रं पुराणञ्च विद्या ह्येताश्चतुर्दश ॥ ६०॥

chando'ṅgāni ca vedāśca mīmāṃsā nyāyavistaraḥ |dharmaśāstraṃ purāṇañca vidyā hyetāścaturdaśa || 60||

साङ्ख्यं योगः पाशुपतं वेदा वै पञ्चरात्रकम् ।कृतान्तपञ्चकं ह्येतद्गायत्री च शिवा तथा ॥ ६१॥

sāṅkhyaṃ yogaḥ pāśupataṃ vedā vai pañcarātrakam |kṛtāntapañcakaṃ hyetadgāyatrī ca śivā tathā || 61||

दुर्गा विद्या च गान्धारी पान्तु त्वां शान्तिदाश्च ते ।लवणेक्षुसुरासर्पिदधिदुग्धजलाब्धयः ॥ ६२॥

durgā vidyā ca gāndhārī pāntu tvāṃ śāntidāśca te |lavaṇekṣusurāsarpidadhidugdhajalābdhayaḥ || 62||

चत्वारः सागराः पान्तु तीर्थानि विविधानि च ।पुष्करश्च प्रयागश्च प्रभासो नैमिषः परः ॥ ६३॥

catvāraḥ sāgarāḥ pāntu tīrthāni vividhāni ca |puṣkaraśca prayāgaśca prabhāso naimiṣaḥ paraḥ || 63||

गयाशीर्षो ब्रह्मशिरस्तीर्थमुत्तरमानसम् ।कालोदको नन्दिकुण्डस्तीर्थं पञ्चनदस्तथा ॥ ६४॥

gayāśīrṣo brahmaśirastīrthamuttaramānasam |kālodako nandikuṇḍastīrthaṃ pañcanadastathā || 64||

भृगुतीर्थं प्रभासञ्च तथा चामरकण्टकम् ।जम्बूमार्गश्च विमलः कपिलस्य तथाऽऽश्रमः ॥ ६५॥

bhṛgutīrthaṃ prabhāsañca tathā cāmarakaṇṭakam |jambūmārgaśca vimalaḥ kapilasya tathā''śramaḥ || 65||

गङ्गाद्वारकुशावर्तौ विन्ध्यको नीलपर्वतः ।वराहपर्वतश्चैव तीर्थङ्कणखलं तथा ॥ ६६॥

gaṅgādvārakuśāvartau vindhyako nīlaparvataḥ |varāhaparvataścaiva tīrthaṅkaṇakhalaṃ tathā || 66||

कालञ्जरश्च केदारो रुद्रकोटिस्तथैव च ।वाराणसी महातीर्थं बदर्याश्रम एव च ॥ ६७॥

kālañjaraśca kedāro rudrakoṭistathaiva ca |vārāṇasī mahātīrthaṃ badaryāśrama eva ca || 67||

द्वारका श्रीगिरिस्तीर्थं तीर्थञ्च पुरुषोत्तमः ।शालग्रामोऽथ वाराहः सिन्धुसागरसङ्गमः ॥ ६८॥

dvārakā śrīgiristīrthaṃ tīrthañca puruṣottamaḥ |śālagrāmo'tha vārāhaḥ sindhusāgarasaṅgamaḥ || 68||

फल्गुतीर्थं बिन्दुसरः करवीराश्रमस्तथा ।नद्यो गङ्गासरस्वत्यः शतद्रुर्गण्डकी तथा ॥ ६९॥

phalgutīrthaṃ bindusaraḥ karavīrāśramastathā |nadyo gaṅgāsarasvatyaḥ śatadrurgaṇḍakī tathā || 69||

अच्छोदा च विपाशा च वितस्ता देविका नदी ।कावेरी वरुणा चैव निश्चरा गोमती नदी ॥ ७०॥

acchodā ca vipāśā ca vitastā devikā nadī |kāverī varuṇā caiva niścarā gomatī nadī || 70||

पारा चर्मण्वती रूपा मन्दाकिनी महानदी ।तापी पयोष्णी वेणा च गौरी वैतरणी तथा ॥ ७१॥

pārā carmaṇvatī rūpā mandākinī mahānadī |tāpī payoṣṇī veṇā ca gaurī vaitaraṇī tathā || 71||

गोदावरी भीमरथी तुङ्गभद्राऽरणी तथा ।चन्द्रभागा शिवा गौरी अभिषिञ्चन्तु पान्तु वः(१)॥ ७२॥

godāvarī bhīmarathī tuṅgabhadrā'raṇī tathā |candrabhāgā śivā gaurī abhiṣiñcantu pāntu vaḥ(1)|| 72||

इत्याग्नेये महापुराणे अभिषेकमन्त्रानामोनविंशत्यधिकद्विशततमोऽध्यायः सम्पूर्णः ।अग्निपुराण । अध्याय २१९/२७२॥अग्निपुराण । अध्याय २१९/२-७२॥

ityāgneye mahāpurāṇe abhiṣekamantrānāmonaviṃśatyadhikadviśatatamo'dhyāyaḥ sampūrṇaḥ |agnipurāṇa | adhyāya 219/272||agnipurāṇa | adhyāya 219/2-72||