सूर्यस्तवनम् Vishvakarmakritam Suryastavanam

मार्कण्डेय उवाच ।लिख्यमाने ततो भानौ विश्वकर्मा प्रजापतिः ।उद्भूतपुलकः स्तोत्रमिदं चक्रे विवस्वतः ॥ १॥

mārkaṇḍeya uvāca |likhyamāne tato bhānau viśvakarmā prajāpatiḥ |udbhūtapulakaḥ stotramidaṃ cakre vivasvataḥ || 1||

विश्वकर्मा उवाच ।विवस्वते प्रणतहितानुकम्पिने महात्मने समजवसप्तसप्तये ।सुतेजसे कमलकुलावबोधिने नमस्तमः पटलपटावपाटिने ॥ २॥

viśvakarmā uvāca |vivasvate praṇatahitānukampine mahātmane samajavasaptasaptaye |sutejase kamalakulāvabodhine namastamaḥ paṭalapaṭāvapāṭine || 2||

पावनातिशयपुण्यकर्मणे नैककामविषयप्रदायिने ।भास्वरानलमयूखशायिने सर्वलोकहितकारिणे नमः ॥ ३॥

pāvanātiśayapuṇyakarmaṇe naikakāmaviṣayapradāyine |bhāsvarānalamayūkhaśāyine sarvalokahitakāriṇe namaḥ || 3||

अजाय लोकत्रयकारणाय भूतात्मने गोपतये वृषाय ।नमो महाकारुणिकोत्तमाय सूर्याय चक्षुःप्रभवालयाय ॥ ४॥

ajāya lokatrayakāraṇāya bhūtātmane gopataye vṛṣāya |namo mahākāruṇikottamāya sūryāya cakṣuḥprabhavālayāya || 4||

विवस्वते ज्ञानमृतेऽन्तरात्मने जगत्प्रतिष्ठाय जगद्धितैषिणे ।स्वयम्भुवे लोकसमस्तचक्षुषे सुरोत्तमायामिततेजसे नमः ॥ ५॥

vivasvate jñānamṛte'ntarātmane jagatpratiṣṭhāya jagaddhitaiṣiṇe |svayambhuve lokasamastacakṣuṣe surottamāyāmitatejase namaḥ || 5||

क्षणमुदयाचलमौलिमणिः सुरगणमहितहितो जगतः ।त्वमु मयूखसहस्रवपुर्जगति विभासि तमांसि नुदन् ॥ ६॥

kṣaṇamudayācalamaulimaṇiḥ suragaṇamahitahito jagataḥ |tvamu mayūkhasahasravapurjagati vibhāsi tamāṃsi nudan || 6||

भवतिमिरासवपानमदाद्भवति विलोहितविग्रहता ।मिहिर विभासि यतः सुतरां त्रिभुवनभावनभानिकरैः ॥ ७॥

bhavatimirāsavapānamadādbhavati vilohitavigrahatā |mihira vibhāsi yataḥ sutarāṃ tribhuvanabhāvanabhānikaraiḥ || 7||

रथमधिरुह्य समावयवं चारुविकम्पितमुरुरुचिरम् ।सततमखिन्नहयैर्भगवंश्चरसि जगद्धिताय विततम् ॥ ८॥

rathamadhiruhya samāvayavaṃ cāruvikampitamururuciram |satatamakhinnahayairbhagavaṃścarasi jagaddhitāya vitatam || 8||

अमृतमयेन रसेन समं विबुधपितॄनपि तर्पयसे ।अरिगणसूदन तेन तव प्रणतिमुपेत्य लिखामि वपुः ॥ ९॥

amṛtamayena rasena samaṃ vibudhapitṝnapi tarpayase |arigaṇasūdana tena tava praṇatimupetya likhāmi vapuḥ || 9||

शुकसमवर्णह्यप्रथितं तव पदपांसुपवित्रतमम् ।नतजनवत्सल मां प्रणतं त्रिभुवनपावन पाहि रवे ॥ १०॥

śukasamavarṇahyaprathitaṃ tava padapāṃsupavitratamam |natajanavatsala māṃ praṇataṃ tribhuvanapāvana pāhi rave || 10||

इति सकलजगप्रसूतिभूतं त्रिभुवनभावनधामहेतुमेकम् ।रविमखिलजगत्प्रदीपभूतं त्रिदशवर प्रणतोऽस्मि सर्वदा त्वाम् ॥ ११॥

iti sakalajagaprasūtibhūtaṃ tribhuvanabhāvanadhāmahetumekam |ravimakhilajagatpradīpabhūtaṃ tridaśavara praṇato'smi sarvadā tvām || 11||

इति श्रीमार्कण्डेयपुराणे चतुरधिकशततमाध्यायान्तर्गतंविश्वकर्मकृतं सूर्यस्तवनं समाप्तम् ।मार्कण्डेयपुराण । अध्याय १०४/२११॥मार्कण्डेयपुराण । अध्याय १०४/२-११॥

iti śrīmārkaṇḍeyapurāṇe caturadhikaśatatamādhyāyāntargataṃviśvakarmakṛtaṃ sūryastavanaṃ samāptam |mārkaṇḍeyapurāṇa | adhyāya 104/211||mārkaṇḍeyapurāṇa | adhyāya 104/2-11||