श्रीस्तवः १ Shrishristavah

पञ्चस्तव्यां ५ श्रीस्तवःश्रीगणेशाय नमः ।स्वस्ति श्रीर्दिशतादशेषजगतां स्वर्गापवर्गस्थितीःस्वर्गं दुर्गतिमापवर्गिकपदं सर्वं च कुर्वन्हरिः ।यस्या वीक्ष्य मुखं तदिङ्गितपराधीनो विधत्तेऽखिलंक्रीडेयं खलु नान्यथाऽस्य रसदा स्यादैकरस्यात्तया ॥ १॥

pañcastavyāṃ 5 śrīstavaḥśrīgaṇeśāya namaḥ |svasti śrīrdiśatādaśeṣajagatāṃ svargāpavargasthitīḥsvargaṃ durgatimāpavargikapadaṃ sarvaṃ ca kurvanhariḥ |yasyā vīkṣya mukhaṃ tadiṅgitaparādhīno vidhatte'khilaṃkrīḍeyaṃ khalu nānyathā'sya rasadā syādaikarasyāttayā || 1||

हे श्रीर्देवि समस्तलोकजननि त्वां स्तोतुमीहामहेयुक्तां भावय भारतीं प्रगुणय प्रेमप्रधानां धियम् ।भक्तिं बन्धय नन्दयाश्रितमिमं दासं जनं तावकंलक्ष्यं लक्ष्मि कटाक्षवीचिविसृतेस्ते स्याम चामी वयम् ॥ २॥

he śrīrdevi samastalokajanani tvāṃ stotumīhāmaheyuktāṃ bhāvaya bhāratīṃ praguṇaya premapradhānāṃ dhiyam |bhaktiṃ bandhaya nandayāśritamimaṃ dāsaṃ janaṃ tāvakaṃlakṣyaṃ lakṣmi kaṭākṣavīcivisṛteste syāma cāmī vayam || 2||

स्तोत्रं नाम किमामनन्ति कवयो यद्यन्यदीयान्गुणानन्यत्रत्वसतोऽधिरोप्य भणितिः सा तर्हि वन्ध्या त्वयि ।सम्यक्सत्यगुणाभिवर्णनमथो ब्रूयुः कथं तादृशीवाग्वाचस्पतिनाप्यशक्यरचना त्वत्सद्गुणार्णोनिधौ ॥ ३॥

stotraṃ nāma kimāmananti kavayo yadyanyadīyānguṇānanyatratvasato'dhiropya bhaṇitiḥ sā tarhi vandhyā tvayi |samyaksatyaguṇābhivarṇanamatho brūyuḥ kathaṃ tādṛśīvāgvācaspatināpyaśakyaracanā tvatsadguṇārṇonidhau || 3||

ये वाचां मनसां च दुर्ग्रहतया ख्याता गुणास्तावकास्तानेवप्रति साम्बुजिह्वमुदिता यन्मामिका भारती ।हास्यं तत्तु न मन्महे न हि चकोर्येकाऽखिलां चन्द्रिकांनालं पातुमिति प्रगृह्य रसनामासीत सत्यां तृषि ॥ ४॥

ye vācāṃ manasāṃ ca durgrahatayā khyātā guṇāstāvakāstānevaprati sāmbujihvamuditā yanmāmikā bhāratī |hāsyaṃ tattu na manmahe na hi cakoryekā'khilāṃ candrikāṃnālaṃ pātumiti pragṛhya rasanāmāsīta satyāṃ tṛṣi || 4||

क्षोदीयानपि दुष्टबुद्धिरपि निःस्नेहोऽप्यनीहोऽपिते कीर्तिं देवि लिहन्नहं न च बिभेम्यज्ञो न जिह्रेमि च ।दुष्येत्सा तु न तावता न हि शुना लीढाऽपि भागीरथीदुष्येच्चापि न लज्जते न च बिभेत्यार्तिस्तु शाम्येच्छुनः ॥ ५॥

kṣodīyānapi duṣṭabuddhirapi niḥsneho'pyanīho'pite kīrtiṃ devi lihannahaṃ na ca bibhemyajño na jihremi ca |duṣyetsā tu na tāvatā na hi śunā līḍhā'pi bhāgīrathīduṣyeccāpi na lajjate na ca bibhetyārtistu śāmyecchunaḥ || 5||

ऐश्वर्यं महदेव वाऽल्पमथवा दृश्येत पुंसां हियत्तलक्ष्म्याः समुदीक्षणात्तव यतः सार्वत्रिकं वर्तते ।तेनैतेन न विस्मयेमहि जगन्नाथोऽपि नारायणो धन्यंमन्यत ईक्षणात्तव यतः स्वात्मानमात्मेश्वरः ॥ ६॥

aiśvaryaṃ mahadeva vā'lpamathavā dṛśyeta puṃsāṃ hiyattalakṣmyāḥ samudīkṣaṇāttava yataḥ sārvatrikaṃ vartate |tenaitena na vismayemahi jagannātho'pi nārāyaṇo dhanyaṃmanyata īkṣaṇāttava yataḥ svātmānamātmeśvaraḥ || 6||

ऐश्वर्यं यदशेषपुंसि यदिदं सौन्दर्यलावण्ययोरूपं यच्च हि मङ्गलं किमपि यल्लोके सदित्युच्यते ।तत्सर्वं त्वदधीनमेव यदतः श्रीरित्यभेदेन वा यद्वाश्रीमदितीदृशेन वचसा देवि प्रथामश्नुते ॥ ७॥

aiśvaryaṃ yadaśeṣapuṃsi yadidaṃ saundaryalāvaṇyayorūpaṃ yacca hi maṅgalaṃ kimapi yalloke sadityucyate |tatsarvaṃ tvadadhīnameva yadataḥ śrīrityabhedena vā yadvāśrīmaditīdṛśena vacasā devi prathāmaśnute || 7||

देवि त्वन्महिमावधिर्न हरिणा नापि त्वया ज्ञायतेयद्यप्येवमथापि नैव युवयोः सर्वज्ञता हीयते ।यन्नास्त्येव तदज्ञतामनुगुणां सर्वज्ञतायाविदुर्व्योमाम्भोजमिदन्तया खलु विदन् भ्रान्तोऽयमित्युच्यते ॥ ८॥

devi tvanmahimāvadhirna hariṇā nāpi tvayā jñāyateyadyapyevamathāpi naiva yuvayoḥ sarvajñatā hīyate |yannāstyeva tadajñatāmanuguṇāṃ sarvajñatāyāvidurvyomāmbhojamidantayā khalu vidan bhrānto'yamityucyate || 8||

लोके वनस्पतिबृहस्पतितारतम्यंयस्याः कटाक्षपरिणाममुदाहरन्ति ।सा भारती भगवती तु यदीयदासीतां देवदेवमहिषीं श्रियमाश्रयामः ॥ ९॥

loke vanaspatibṛhaspatitāratamyaṃyasyāḥ kaṭākṣapariṇāmamudāharanti |sā bhāratī bhagavatī tu yadīyadāsītāṃ devadevamahiṣīṃ śriyamāśrayāmaḥ || 9||

यस्याः कटाक्षमृदुवीक्षणदीक्षितेनसद्यः समुल्लसितपल्लवमुल्ललास ।विश्वं विपर्ययसमुत्थविपर्ययं त्वांतां देवदेवमहिषीं श्रियमाश्रयामः ॥ १०॥

yasyāḥ kaṭākṣamṛduvīkṣaṇadīkṣitenasadyaḥ samullasitapallavamullalāsa |viśvaṃ viparyayasamutthaviparyayaṃ tvāṃtāṃ devadevamahiṣīṃ śriyamāśrayāmaḥ || 10||

॥ इति श्री कुरेश श्रीवत्सांकमिश्राचार्य एवंश्री कुरनाथ श्रीवत्सचिन्हमिश्र श्रीस्तवः सम्पूर्णः ॥

|| iti śrī kureśa śrīvatsāṃkamiśrācārya evaṃśrī kuranātha śrīvatsacinhamiśra śrīstavaḥ sampūrṇaḥ ||