लक्ष्मीहयग्रीवमङ्गलम् Shri Lakshmihayagrivamangalam

अशेषवेदरूपाय यथार्थज्ञानदायिने ।विद्यालक्ष्मीसमेताय वाजिवक्त्राय मङ्गलम् ॥ १॥

aśeṣavedarūpāya yathārthajñānadāyine |vidyālakṣmīsametāya vājivaktrāya maṅgalam || 1||

पालने ज्ञानदाने च प्रवणादनिरुद्धतः ।आविर्भूताय वेधोऽर्थमश्वग्रीवाय मङ्गलम् ॥ २॥

pālane jñānadāne ca pravaṇādaniruddhataḥ |āvirbhūtāya vedho'rthamaśvagrīvāya maṅgalam || 2||

स्वनाभिपद्मजायादौ स्वोपदिष्टाः श्रुतीः समाः ।स्थिरं पुनरदाद्योऽस्मै तुरङ्गास्याय मङ्गलम् ॥ ३॥

svanābhipadmajāyādau svopadiṣṭāḥ śrutīḥ samāḥ |sthiraṃ punaradādyo'smai turaṅgāsyāya maṅgalam || 3||

मध्वाभान्मधुमब्बिन्दोः कैटभं कठिनादपि ।कृत्वाऽरी शिक्षिताजाय गन्धर्वास्याय मङ्गलम् ॥ ४॥

madhvābhānmadhumabbindoḥ kaiṭabhaṃ kaṭhinādapi |kṛtvā'rī śikṣitājāya gandharvāsyāya maṅgalam || 4||

पादव्यवस्था यत्रार्थवशेनैव मृगात्मने ।यजुषे यज्ञरूपाय हयग्रीवाय मङ्गलम् ॥ ५॥

pādavyavasthā yatrārthavaśenaiva mṛgātmane |yajuṣe yajñarūpāya hayagrīvāya maṅgalam || 5||

यदुद्गीथस्वरत्रस्तौ दैत्यौ वेदापहारिणौ ।प्रणवोद्गीथरूपाय पुण्यह्रेषाय मङ्गलम् ॥ ६॥

yadudgīthasvaratrastau daityau vedāpahāriṇau |praṇavodgītharūpāya puṇyahreṣāya maṅgalam || 6||

वामपुस्तकहस्तस्वभुजाश्लिष्टरमात्मने ।व्याख्यामुद्रान्यहस्ताय वाजिवक्त्राय मङ्गलम् ॥ ७॥

vāmapustakahastasvabhujāśliṣṭaramātmane |vyākhyāmudrānyahastāya vājivaktrāya maṅgalam || 7||

शरद्घनस्थचन्द्राय पुण्डरीकस्थमूर्तये ।शङ्खचक्रधरायास्तु सैन्धवास्याय मङ्गलम् ॥ ८॥

śaradghanasthacandrāya puṇḍarīkasthamūrtaye |śaṅkhacakradharāyāstu saindhavāsyāya maṅgalam || 8||

ज्ञानामृतघटीयन्त्रसाक्षचिन्मुद्रपाणये ।मुमुक्षाहेतुवीक्षाय मधुहन्त्रेऽस्तु मङ्गलम् ॥ ९॥

jñānāmṛtaghaṭīyantrasākṣacinmudrapāṇaye |mumukṣāhetuvīkṣāya madhuhantre'stu maṅgalam || 9||

यस्याक्षरसमाम्नायो ह्यकारादिर्हलन्त्यवाक् ।मध्ये हयवरश्लिष्टो हयास्यस्यास्य मङ्गलम् ॥ १०॥

yasyākṣarasamāmnāyo hyakārādirhalantyavāk |madhye hayavaraśliṣṭo hayāsyasyāsya maṅgalam || 10||

अश्विदध्यङ्याज्ञवल्क्यकश्यपादिश्रिताङ्घ्रये ।वैष्णवक्रतुनेष्टाय वाजिवक्त्राय मङ्गलम् ॥ ११॥

aśvidadhyaṅyājñavalkyakaśyapādiśritāṅghraye |vaiṣṇavakratuneṣṭāya vājivaktrāya maṅgalam || 11||

रजोमूर्तेर्वधूं वाणीं कुर्वते सत्त्वहेतवे ।तमोमूर्तिञ्च सर्वज्ञं तुरगास्याय मङ्गलम् ॥ १२॥

rajomūrtervadhūṃ vāṇīṃ kurvate sattvahetave |tamomūrtiñca sarvajñaṃ turagāsyāya maṅgalam || 12||

रामदेशितमार्गेण पाञ्चालेनार्चिताङ्घ्रये ।व्यासादिजप्यमन्त्राय वाजिकण्ठाय मङ्गलम् ॥ १३॥

rāmadeśitamārgeṇa pāñcālenārcitāṅghraye |vyāsādijapyamantrāya vājikaṇṭhāya maṅgalam || 13||

सर्वसूक्ष्मार्थविज्ञानं साधुव्याहारधोरणी ।यन्मन्त्रजपतस्तस्मै हयग्रीवाय मङ्गलम् ॥ १४॥

sarvasūkṣmārthavijñānaṃ sādhuvyāhāradhoraṇī |yanmantrajapatastasmai hayagrīvāya maṅgalam || 14||

दशावतारा यस्य स्युः पाश्चात्याः वेधसां गुरोः ।हव्यकव्यभुजे तस्मै हयग्रीवाय मङ्गलम् ॥ १५॥

daśāvatārā yasya syuḥ pāścātyāḥ vedhasāṃ guroḥ |havyakavyabhuje tasmai hayagrīvāya maṅgalam || 15||

श्रवणोदग्रकर्णाय श्रवणर्क्षोद्भवाय च ।श्रवणग्राह्यवाग्दात्रे श्रीहयास्याय मङ्गलम् ॥ १६॥

śravaṇodagrakarṇāya śravaṇarkṣodbhavāya ca |śravaṇagrāhyavāgdātre śrīhayāsyāya maṅgalam || 16||

यत्कटाक्षकलालेशकलनात्सकलाः कलाः ।स्वयमाविर्भवन्त्यस्मै शीर्षण्यश्वाय मङ्गलम् ॥ १७॥

yatkaṭākṣakalāleśakalanātsakalāḥ kalāḥ |svayamāvirbhavantyasmai śīrṣaṇyaśvāya maṅgalam || 17||

धर्माविरुद्धयोरर्थकामयोरमृतस्य च ।हेतुं वाचं ददानाय हयग्रीवाय मङ्गलम् ॥ १८॥

dharmāviruddhayorarthakāmayoramṛtasya ca |hetuṃ vācaṃ dadānāya hayagrīvāya maṅgalam || 18||

सर्वविद्याप्रतिष्ठानब्रह्मविद्याप्रदायिने ।वागीश्वरेश्वरायास्तु वाजिवक्त्राय मङ्गलम् ॥ १९॥

sarvavidyāpratiṣṭhānabrahmavidyāpradāyine |vāgīśvareśvarāyāstu vājivaktrāya maṅgalam || 19||

ज्ञानाय ज्ञानरूपाय ज्ञानिने ज्ञानदायिने ।सर्वोत्तमाय श्रीशाय हयग्रीवाय मङ्गलम् ॥ २०॥

jñānāya jñānarūpāya jñānine jñānadāyine |sarvottamāya śrīśāya hayagrīvāya maṅgalam || 20||

य इदं श्रीहयग्रीवमङ्गलं नियतं पठेत् ।विद्यावाग्धनवंशायुर्वृद्धिसौख्यानि सोऽश्नुते ॥ २१॥

ya idaṃ śrīhayagrīvamaṅgalaṃ niyataṃ paṭhet |vidyāvāgdhanavaṃśāyurvṛddhisaukhyāni so'śnute || 21||

इति श्रीलक्ष्मीहयग्रीवमङ्गलं सम्पूर्णम् ।

iti śrīlakṣmīhayagrīvamaṅgalaṃ sampūrṇam |