लक्ष्मीहयग्रीवपञ्चरत्नम् Shri Lakshmihayagriva Pancharatnam

ज्ञानानन्दामलात्मा कलिकलुषमहातूलवातूलनामासीमातीतात्मभूमा मम हयवदना देवता धावितारिः ।याता श्वेताब्जमध्यं प्रविमलकमलस्रग्धरादुग्धराशिःस्मेरा सा राजराजप्रभृतिनुतिपदं सम्पदं संविधत्ताम् ॥ १॥

jñānānandāmalātmā kalikaluṣamahātūlavātūlanāmāsīmātītātmabhūmā mama hayavadanā devatā dhāvitāriḥ |yātā śvetābjamadhyaṃ pravimalakamalasragdharādugdharāśiḥsmerā sā rājarājaprabhṛtinutipadaṃ sampadaṃ saṃvidhattām || 1||

ताराताराधिनाथस्फटिकमणिसुधाहीरहाराभिरामारामा रत्नाब्धिकन्याकुचलिकुचपरीरम्भसंरम्भधन्या ।मान्याऽनन्यार्हदास्यप्रणतततिपरित्राणसत्नात्तदीक्षादक्षा साक्षात्कृतैषा सपदि हयमुखी देवता साऽवतान्नः ॥ २॥

tārātārādhināthasphaṭikamaṇisudhāhīrahārābhirāmārāmā ratnābdhikanyākucalikucaparīrambhasaṃrambhadhanyā |mānyā'nanyārhadāsyapraṇatatatiparitrāṇasatnāttadīkṣādakṣā sākṣātkṛtaiṣā sapadi hayamukhī devatā sā'vatānnaḥ || 2||

अन्तर्ध्वान्तस्य कल्यं निगमहृदसुरध्वंसनैकान्तकल्यंकल्याणानां गुणानां जलधिमभिनमद्बान्धवं सैन्धवास्यम् ।शुभ्रांशु भ्राजमानं दधतमरिदरौ पुस्तकं हस्तकञ्जैःभद्रां व्याख्यानमुद्रामपि हृदि शरणं याम्युदारं सदारम् ॥ ३॥

antardhvāntasya kalyaṃ nigamahṛdasuradhvaṃsanaikāntakalyaṃkalyāṇānāṃ guṇānāṃ jaladhimabhinamadbāndhavaṃ saindhavāsyam |śubhrāṃśu bhrājamānaṃ dadhatamaridarau pustakaṃ hastakañjaiḥbhadrāṃ vyākhyānamudrāmapi hṛdi śaraṇaṃ yāmyudāraṃ sadāram || 3||

वन्दे तं देवमाद्यं नमदमरमहारत्नकोटीरकोटीवाटीनियत्ननिर्यद्घृणिगणमसृणीभूतपादांशुजातम्।श्रीमद्रामानुजार्यश्रुतिशिखरगुरुब्रह्मतन्त्रस्वतन्त्रैःपूज्यं प्राज्यं सभाज्यं कलिरिपुगुरुभिश्शश्वदश्वोत्तमाङ्गम् ॥ ४॥

vande taṃ devamādyaṃ namadamaramahāratnakoṭīrakoṭīvāṭīniyatnaniryadghṛṇigaṇamasṛṇībhūtapādāṃśujātam|śrīmadrāmānujāryaśrutiśikharagurubrahmatantrasvatantraiḥpūjyaṃ prājyaṃ sabhājyaṃ kaliripugurubhiśśaśvadaśvottamāṅgam || 4||

विद्या हृद्याऽनवद्या यदनघकरुणासारसारप्रसारात्धीराधाराधरायामजनि जनिमतां तापनिर्वापयित्री ।श्रीकृष्ण ब्रह्मतन्त्रादिमपदकलिजित्संयमीन्द्रार्चितं तत्श्रीमद्धामातिभूम प्रथयतु कुशलं श्रीहयग्रीवनाम ॥ ५॥

vidyā hṛdyā'navadyā yadanaghakaruṇāsārasāraprasārātdhīrādhārādharāyāmajani janimatāṃ tāpanirvāpayitrī |śrīkṛṣṇa brahmatantrādimapadakalijitsaṃyamīndrārcitaṃ tatśrīmaddhāmātibhūma prathayatu kuśalaṃ śrīhayagrīvanāma || 5||

इति श्रीकृष्णब्रह्मतन्त्रपरकालमहादेशिककृतिषुश्रीलक्ष्मीहयग्रीवपञ्चरत्नं नाम स्तोत्रं समाप्तम् ॥

iti śrīkṛṣṇabrahmatantraparakālamahādeśikakṛtiṣuśrīlakṣmīhayagrīvapañcaratnaṃ nāma stotraṃ samāptam ||