नवनीतप्रियाष्टकम् Shrinavanitapriyashtakam

अलकावृतलसदलिके विरचितकस्तूरिकातिलके ।चपलयशोदाबाले शोभितभाले मतिर्मेऽस्तु ॥ १॥

alakāvṛtalasadalike viracitakastūrikātilake |capalayaśodābāle śobhitabhāle matirme'stu || 1||

मुखरितनूपुरचरणे कटिबद्धक्षुद्रघण्टिकावरणे ।द्वीपिकरजकृतभूषणभूषितहृदये मतिर्मेऽस्तु ॥ २॥

mukharitanūpuracaraṇe kaṭibaddhakṣudraghaṇṭikāvaraṇe |dvīpikarajakṛtabhūṣaṇabhūṣitahṛdaye matirme'stu || 2||

करधृतनवनवनीते हितकृतजननीविभीषिकाभिते ।रतिमुद्वहताच्चेतो गोपीभिर्वश्यतां नीते ॥ ३॥

karadhṛtanavanavanīte hitakṛtajananīvibhīṣikābhite |ratimudvahatācceto gopībhirvaśyatāṃ nīte || 3||

बालदशामतिमुग्धे चोरितदुग्धे व्रजाङ्गनाभवनात् ।तदुपालम्भवचोभयविभ्रमनयने मतिर्मेऽस्तु ॥ ४॥

bāladaśāmatimugdhe coritadugdhe vrajāṅganābhavanāt |tadupālambhavacobhayavibhramanayane matirme'stu || 4||

व्रजकर्दमलिप्ताङ्गे स्वरूपसुषमाजितानङ्गे ।कृतनन्दाङ्गणरिङ्गण विविधविहारे मतिर्मेऽस्तु ॥ ५॥

vrajakardamaliptāṅge svarūpasuṣamājitānaṅge |kṛtanandāṅgaṇariṅgaṇa vividhavihāre matirme'stu || 5||

करवरधृतलघुलकुटे विचित्रमायूरचन्द्रिकामुकुटे ।नासागतमुक्तामणिजटितविभूषे मतिर्मेऽस्तु ॥ ६॥

karavaradhṛtalaghulakuṭe vicitramāyūracandrikāmukuṭe |nāsāgatamuktāmaṇijaṭitavibhūṣe matirme'stu || 6||

अभिनन्दनकृतनृत्ये विरचितनिजगोपिकाकृत्ये ।आनन्दितनिजभृत्ये प्रहसनमुदिते मतिर्मेऽस्तु ॥ ७॥

abhinandanakṛtanṛtye viracitanijagopikākṛtye |ānanditanijabhṛtye prahasanamudite matirme'stu || 7||

कामादपि कमनीये नमनीये ब्रह्मरुद्राद्यैः ।निःसाधवभजनीये भावतनौ मे मतिर्भूयात् ॥ ८॥

kāmādapi kamanīye namanīye brahmarudrādyaiḥ |niḥsādhavabhajanīye bhāvatanau me matirbhūyāt || 8||

इति श्रीहरिदासविरचितं श्रीनवनीतप्रियाष्टकं सम्पूर्णम् ॥

iti śrīharidāsaviracitaṃ śrīnavanītapriyāṣṭakaṃ sampūrṇam ||