व्रजनवीनयुवद्वन्द्वाष्टकम् Shri Vrajanavinayuvadvandvashtakam

श्रीराधाकृष्णौ जयतः ।अदुर्विधविदग्धतास्पदविमुग्धवेशश्रियोरमन्दशिखिकन्धराकनकनिन्दिवासस्त्विषोः ।स्फुरत्पुरटकेतकीकुसुमविभ्रमाभ्रप्रभानिभाङ्गमहसोर्भजे व्रजनवीनयूनोर्युगम् ॥ १॥

śrīrādhākṛṣṇau jayataḥ |adurvidhavidagdhatāspadavimugdhaveśaśriyoramandaśikhikandharākanakanindivāsastviṣoḥ |sphuratpuraṭaketakīkusumavibhramābhraprabhānibhāṅgamahasorbhaje vrajanavīnayūnoryugam || 1||

समृद्धविधुमाधुरीविधुरताविधानोद्धुरैर्नवाम्बुरुहरम्यतामदविडम्बनारम्भिभिः ।विलिम्पदिव कर्णकावलिसहोदरैर्दिक्तटीमुखद्युतिभरैर्भजे व्रजनवीनयूनोर्युगम् ॥ २॥

samṛddhavidhumādhurīvidhuratāvidhānoddhurairnavāmburuharamyatāmadaviḍambanārambhibhiḥ |vilimpadiva karṇakāvalisahodarairdiktaṭīmukhadyutibharairbhaje vrajanavīnayūnoryugam || 2||

विलासकलहोद्धतिस्खलदमन्दसिन्दूरभागखर्वमदनाङ्कुशप्रकरविब्र्हमैरङ्कितम् ।मदोद्धुरमिवोभयोर्मिथुनमुल्लसद्वल्लरीगृहोत्सवरतं भजे व्रजनवीनयूनोर्युगम् ॥ ३॥

vilāsakalahoddhatiskhaladamandasindūrabhāgakharvamadanāṅkuśaprakaravibrhamairaṅkitam |madoddhuramivobhayormithunamullasadvallarīgṛhotsavarataṃ bhaje vrajanavīnayūnoryugam || 3||

घनप्रणयनिर्झरप्रसरलब्धपूर्तेर्मनोह्रदस्य परिवाहितामनुसरद्भिरस्रैः प्लुतम् ।स्फुरत्तनुरुहाङ्कुरैर्नवकदम्बजृम्भश्रियंव्रजत्तदनिशं भजे व्रजनवीनयूनोर्युगम् ॥ ४॥

ghanapraṇayanirjharaprasaralabdhapūrtermanohradasya parivāhitāmanusaradbhirasraiḥ plutam |sphurattanuruhāṅkurairnavakadambajṛmbhaśriyaṃvrajattadaniśaṃ bhaje vrajanavīnayūnoryugam || 4||

अनङ्गरणविभ्रमे किमपि विभ्रदाचार्यकंमिथश्चलदृगञ्चलद्युतिशलाकया कीलितम् ।जगत्यतुलधर्मभिर्मधुरनर्मभिस्तन्वतोर्मिथो विजयितां भजे व्रजनवीनयूनोर्युगम् ॥ ५॥

anaṅgaraṇavibhrame kimapi vibhradācāryakaṃmithaścaladṛgañcaladyutiśalākayā kīlitam |jagatyatuladharmabhirmadhuranarmabhistanvatormitho vijayitāṃ bhaje vrajanavīnayūnoryugam || 5||

अदृष्टचरचातुरीचलचरित्रचित्रायितैःसह प्रणयिभिर्जनैर्विहरमानयोः कानने ।परस्परमनोमृगं श्रवणचारुणा चर्चरीचयेन रजयद् भजे व्रजनवीनयूनोर्युगम् ॥ ६॥

adṛṣṭacaracāturīcalacaritracitrāyitaiḥsaha praṇayibhirjanairviharamānayoḥ kānane |parasparamanomṛgaṃ śravaṇacāruṇā carcarīcayena rajayad bhaje vrajanavīnayūnoryugam || 6||

मरन्दभरमन्दिरप्रतिनवारविन्दावलिसुगन्धिनि विहारयोर्जलविहारविस्फूर्जितैः ।तपे सरसि वल्लभे सलिलवाद्यविद्याविधौविदग्धभुजयोर्भजे व्रजनवीनयूनोर्युगम् ॥ ७॥

marandabharamandirapratinavāravindāvalisugandhini vihārayorjalavihāravisphūrjitaiḥ |tape sarasi vallabhe salilavādyavidyāvidhauvidagdhabhujayorbhaje vrajanavīnayūnoryugam || 7||

मृषाविजयकाशिभिः प्रथितच्तुरीराशीभिर्ग्लहस्य हरणं हठात् प्रकटयद्भिरुच्चैर्गिरा ।तदक्षकलिदक्षयोः कलितपक्षयोः साक्षिभिःकुलैः स्वसुहृदां भजे व्रजनवीनयूनोर्युगम् ॥ ८॥

mṛṣāvijayakāśibhiḥ prathitacturīrāśībhirglahasya haraṇaṃ haṭhāt prakaṭayadbhiruccairgirā |tadakṣakalidakṣayoḥ kalitapakṣayoḥ sākṣibhiḥkulaiḥ svasuhṛdāṃ bhaje vrajanavīnayūnoryugam || 8||

इदं वलिततुष्टयः परिपठन्ति पद्याष्टकंद्वयोर्गुणविकाशि ये व्रजनवीनयूनोर्जनाः ।मुहुर्नवनवोदयां प्रणयमाधुरीमेतयोरवाप्य निवसन्ति ते पदसरोजयुग्मान्तिके ॥ ९॥

idaṃ valitatuṣṭayaḥ paripaṭhanti padyāṣṭakaṃdvayorguṇavikāśi ye vrajanavīnayūnorjanāḥ |muhurnavanavodayāṃ praṇayamādhurīmetayoravāpya nivasanti te padasarojayugmāntike || 9||

इति श्रीरूपगोस्वामिविरचितस्तवमालायांश्रीव्रजनवीनयुवद्वन्द्वाष्टकं सम्पूर्णम् ।

iti śrīrūpagosvāmiviracitastavamālāyāṃśrīvrajanavīnayuvadvandvāṣṭakaṃ sampūrṇam |