बालकृष्णस्तोत्रम् (निकामदेवाख्यद्विजकृतं लक्ष्मीनारायणीयसंहितान्तर्गतम्) Nikamadevakhyadvijakritam Balakrishna Stotram

एवंविधं तु मां ध्यायन् पूज्य सन्मान्य मानद ।अवाप्स्यसि ध्रुवं तात शाश्वतं मेऽक्षरं पदम् ॥ ४८॥

evaṃvidhaṃ tu māṃ dhyāyan pūjya sanmānya mānada |avāpsyasi dhruvaṃ tāta śāśvataṃ me'kṣaraṃ padam || 48||

इत्येवं बोधितो विप्रो निकामदेव आदृतः ।महाहर्षं समापन्नः सामोवाच तु निर्भयम् ॥ ४९॥

ityevaṃ bodhito vipro nikāmadeva ādṛtaḥ |mahāharṣaṃ samāpannaḥ sāmovāca tu nirbhayam || 49||

नृत्यन् गायन् हसन् देहं कूर्दयन् चेष्टयन् मुहुः ।उवाचाऽऽवेशयोगेन निर्भयं साम गायनम् ॥ ५०॥

nṛtyan gāyan hasan dehaṃ kūrdayan ceṣṭayan muhuḥ |uvācā''veśayogena nirbhayaṃ sāma gāyanam || 50||

बालकृष्णं प्रपन्नोऽस्मि किं मे कालः करिष्यति ।अक्षरेशं परमेशं ब्रह्मेशं पुरुषोत्तमम् ॥ ५१॥

bālakṛṣṇaṃ prapanno'smi kiṃ me kālaḥ kariṣyati |akṣareśaṃ parameśaṃ brahmeśaṃ puruṣottamam || 51||

शङ्खचक्रगदापद्मधारिणं परमेश्वरम् ।अधोक्षजं प्रपन्नोऽस्मि किं मे मृत्युः करिष्यति ॥ ५२॥

śaṅkhacakragadāpadmadhāriṇaṃ parameśvaram |adhokṣajaṃ prapanno'smi kiṃ me mṛtyuḥ kariṣyati || 52||

अनादिश्रीकृष्णनारायणं श्रीपतिमच्युतम् ।गोपालजं प्रपन्नोऽस्मि किं मे माया करिष्यति ॥ ५३॥

anādiśrīkṛṣṇanārāyaṇaṃ śrīpatimacyutam |gopālajaṃ prapanno'smi kiṃ me māyā kariṣyati || 53||

सर्वावतारिणं सर्वशक्तिसेवितमाधवम् ।काम्भरेयं प्रपन्नोऽस्मि किं मे पापं करिष्यति ॥ ५४॥

sarvāvatāriṇaṃ sarvaśaktisevitamādhavam |kāmbhareyaṃ prapanno'smi kiṃ me pāpaṃ kariṣyati || 54||

कुङ्कुमवापिकातीर्थं लोमशस्य शुभाश्रमम् ।अश्वसरः प्रपन्नोऽस्मि किं मे कर्म करिष्यति ॥ ५५॥

kuṅkumavāpikātīrthaṃ lomaśasya śubhāśramam |aśvasaraḥ prapanno'smi kiṃ me karma kariṣyati || 55||

भगवन्तं सर्वधाम्नां नारायणनरायणम् ।राधाकान्तं प्रपन्नोऽस्मि किं मे तृष्णा करिष्यति ॥ ५६॥

bhagavantaṃ sarvadhāmnāṃ nārāyaṇanarāyaṇam |rādhākāntaṃ prapanno'smi kiṃ me tṛṣṇā kariṣyati || 56||

मायातारं कृष्णनारायणं श्रीमाधवीपतिम् ।माणिकीशं प्रपन्नोऽस्मि किं मे कामः करिष्यति ॥ ५७॥

māyātāraṃ kṛṣṇanārāyaṇaṃ śrīmādhavīpatim |māṇikīśaṃ prapanno'smi kiṃ me kāmaḥ kariṣyati || 57||

सर्वान्तर्यामिणं साक्षाद्बालयोगिनीस्वामिनम् ।परमेशं प्रपन्नोऽस्मि किं मे भ्रान्तिः करिष्यति ॥ ५८॥

sarvāntaryāmiṇaṃ sākṣādbālayoginīsvāminam |parameśaṃ prapanno'smi kiṃ me bhrāntiḥ kariṣyati || 58||

अक्षरेशं च मुक्तेशं मुक्तानिकापतिं हरिम् ।ब्रह्मप्रियेशं प्राप्तोऽस्मि किं मे सम्पत् करिष्यति ॥ ५९॥

akṣareśaṃ ca mukteśaṃ muktānikāpatiṃ harim |brahmapriyeśaṃ prāpto'smi kiṃ me sampat kariṣyati || 59||

ईश्वरेशं चेश्वराणीपतिं हरिप्रियापतिम् ।प्रभुम्पतिं प्रपन्नोऽस्मि कि मे तमः करिष्यति ॥ ६०॥

īśvareśaṃ ceśvarāṇīpatiṃ haripriyāpatim |prabhumpatiṃ prapanno'smi ki me tamaḥ kariṣyati || 60||

पद्मावतीस्वामिनं च जडचेतनवर्तिनम् ।लक्ष्मीनाथं प्रपन्नोऽस्मि किं वासना करिष्यति ॥ ६१॥

padmāvatīsvāminaṃ ca jaḍacetanavartinam |lakṣmīnāthaṃ prapanno'smi kiṃ vāsanā kariṣyati || 61||

एकरूपं बहुरूपं विश्वरूपं तु बालकम् ।सतां पतिं प्रपन्नोऽस्मि किं मे बन्धः करिष्यति ॥ ६६॥

ekarūpaṃ bahurūpaṃ viśvarūpaṃ tu bālakam |satāṃ patiṃ prapanno'smi kiṃ me bandhaḥ kariṣyati || 66||

ॐ नमः श्रीकृष्णनारायणाय पतये स्वाहा ।नमोऽक्षरनिवासाय नमो गोलोकवासिने ॥ ६३॥

oṃ namaḥ śrīkṛṣṇanārāyaṇāya pataye svāhā |namo'kṣaranivāsāya namo golokavāsine || 63||

नमो वैकुण्ठनाथाय नमः श्रीपुरवासिने ।नमो ललिताकान्ताय सर्वकान्ताय ते नमः ॥ ६४॥

namo vaikuṇṭhanāthāya namaḥ śrīpuravāsine |namo lalitākāntāya sarvakāntāya te namaḥ || 64||

बालयोगिनीकान्ताय बद्रीकान्ताय ते नमः ।निकामदेवनाथाय वासुदेवाय ते नमः ॥ ६५॥

bālayoginīkāntāya badrīkāntāya te namaḥ |nikāmadevanāthāya vāsudevāya te namaḥ || 65||

नमोऽमृतनिवासाय नमोऽव्याकृतवासिने ।नमः कैलासवासाय हिरण्यगर्भवासिने ॥ ६६॥

namo'mṛtanivāsāya namo'vyākṛtavāsine |namaḥ kailāsavāsāya hiraṇyagarbhavāsine || 66||

नमः सिद्धाधिवासाय नमः सुरादिवासिने ।नमः पितृनिवासाय नमो मानवरूपिणे ॥ ६७॥

namaḥ siddhādhivāsāya namaḥ surādivāsine |namaḥ pitṛnivāsāya namo mānavarūpiṇe || 67||

नमः सर्वनिवासाय नमो मदात्मवासिने ।सुरेश्वरीहृदिस्थाय नमोऽनन्तस्वरूपिणे ॥ ६८॥

namaḥ sarvanivāsāya namo madātmavāsine |sureśvarīhṛdisthāya namo'nantasvarūpiṇe || 68||

नमो देहेन्द्रियप्राणान्तरात्मवासिने सदा ।नमस्ते परमानन्द नमस्ते ज्ञानसम्भृत ॥ ६९॥

namo dehendriyaprāṇāntarātmavāsine sadā |namaste paramānanda namaste jñānasambhṛta || 69||

नमस्ते ज्ञानविज्ञानप्रद श्रीपुरुषोत्तम ।नमस्ते विश्वकृद्विष्णो नमस्ते सर्वकारण ॥ ७०॥

namaste jñānavijñānaprada śrīpuruṣottama |namaste viśvakṛdviṣṇo namaste sarvakāraṇa || 70||

नमस्ते गोपगोपीश नमः सर्वार्थसाधक ।नमस्तेऽनुग्रहदातर्नमस्ते मोक्षद प्रभो ॥ ७१॥

namaste gopagopīśa namaḥ sarvārthasādhaka |namaste'nugrahadātarnamaste mokṣada prabho || 71||

जय कृष्ण जय विष्णो ममाऽभयद माधव ।जय शान्त चिदानन्द सच्चिदानन्द केशव ॥ ७२॥

jaya kṛṣṇa jaya viṣṇo mamā'bhayada mādhava |jaya śānta cidānanda saccidānanda keśava || 72||

जय जीव जयद त्वं जय साक्षाज्जनार्दन ।जय शास्त्रादिसन्न्यस्तबीजगर्भाद्युपासन ॥ ७३॥

jaya jīva jayada tvaṃ jaya sākṣājjanārdana |jaya śāstrādisannyastabījagarbhādyupāsana || 73||

त्वं गुरुस्त्वं पिता भ्राता सुहृद्बन्धुः प्रसूर्मम ।त्वं मोक्षस्त्वं परानन्दस्त्वं मे सर्वस्वमच्युत ॥ ७४॥

tvaṃ gurustvaṃ pitā bhrātā suhṛdbandhuḥ prasūrmama |tvaṃ mokṣastvaṃ parānandastvaṃ me sarvasvamacyuta || 74||

त्वमुद्धर्ता च पाता च नेता त्वं विरतिर्भवान् ।जगत् सर्वं तव रूपरूपितं सम्प्रकाशते ॥ ७५॥

tvamuddhartā ca pātā ca netā tvaṃ viratirbhavān |jagat sarvaṃ tava rūparūpitaṃ samprakāśate || 75||

त्वं परब्रह्म भगवन् देवाद्यैस्तु दुरासदः ।मया त्वासादितश्चाऽत्र बालयोगिनीवैभवात् ॥ ७६॥

tvaṃ parabrahma bhagavan devādyaistu durāsadaḥ |mayā tvāsāditaścā'tra bālayoginīvaibhavāt || 76||

कस्त्वां जानाति चात्मेश मुक्तगम्यं परात्परम् ।सनातनपुमांसं तं पुराणपुरुषोत्तमम् ॥ ७७॥

kastvāṃ jānāti cātmeśa muktagamyaṃ parātparam |sanātanapumāṃsaṃ taṃ purāṇapuruṣottamam || 77||

परं रूपमजान्तो दिवौकसो महर्षयः ।अवतारमयीमूर्तीस्ते भजन्ति सुगोचराः ॥ ७८॥

paraṃ rūpamajānto divaukaso maharṣayaḥ |avatāramayīmūrtīste bhajanti sugocarāḥ || 78||

अवतारा भजन्ते त्वां पुमांसमवतारिणम् ।नारायणा असङ्ख्यास्त्वां भजन्ते परमायणम् ॥ ७९॥

avatārā bhajante tvāṃ pumāṃsamavatāriṇam |nārāyaṇā asaṅkhyāstvāṃ bhajante paramāyaṇam || 79||

नारायण्यश्च मुक्तान्यस्त्वां भजन्ते परं पतिम् ।सन्तो मुक्तास्त्वां भजन्ते सर्वावस्थासु सत्पतिम् ॥ ८०॥

nārāyaṇyaśca muktānyastvāṃ bhajante paraṃ patim |santo muktāstvāṃ bhajante sarvāvasthāsu satpatim || 80||

तवाऽज्ञानेन भगवन् मानुषादिनिसर्गतः ।क्षन्तुमर्हसि सर्वं मे यत्कृतं न कृतं तव ॥ ८१॥

tavā'jñānena bhagavan mānuṣādinisargataḥ |kṣantumarhasi sarvaṃ me yatkṛtaṃ na kṛtaṃ tava || 81||

सर्वावस्थासु सर्वत्र सर्वकालेषु सर्वथा ।अचला तु हरे भक्तिस्तेंऽघ्रियुगेऽस्तु मे प्रभो ॥ ८२॥

sarvāvasthāsu sarvatra sarvakāleṣu sarvathā |acalā tu hare bhaktisteṃ'ghriyuge'stu me prabho || 82||

प्रीतिस्त्वय्येव सततं भवत्वात्यन्तिकी मम ।सर्वकामफलदातस्त्वयि भक्तिर्दृढास्तु मे ॥ ८३॥

prītistvayyeva satataṃ bhavatvātyantikī mama |sarvakāmaphaladātastvayi bhaktirdṛḍhāstu me || 83||

स्तोत्रं कर्तुमनन्तस्य कः शक्नोति तु मानवः ।तथापि व्यापृतं वाक्यं क्षमस्व नाथ ते नमः ॥ ८४॥

stotraṃ kartumanantasya kaḥ śaknoti tu mānavaḥ |tathāpi vyāpṛtaṃ vākyaṃ kṣamasva nātha te namaḥ || 84||

पुरुषोत्तमयोगेन निर्भयत्वं प्रजायते ।तव योगेन पुरुषः पुरुषोत्तमतां व्रजेत् ॥ ८५॥

puruṣottamayogena nirbhayatvaṃ prajāyate |tava yogena puruṣaḥ puruṣottamatāṃ vrajet || 85||

अधन्यो जायते धन्यस्त्वसाधुः साधुतां व्रजेत् ।अभाग्यो भाग्यवान् स्याच्च ते स्तवात् पुरुषोत्तम ॥ ८६॥

adhanyo jāyate dhanyastvasādhuḥ sādhutāṃ vrajet |abhāgyo bhāgyavān syācca te stavāt puruṣottama || 86||

अपि लोकबहिष्कार्या यदि ते शरणं गताः ।साधुशीला हि ते सर्वे जायन्ते पङ्क्तिपावनाः ॥ ८७॥

api lokabahiṣkāryā yadi te śaraṇaṃ gatāḥ |sādhuśīlā hi te sarve jāyante paṅktipāvanāḥ || 87||

येषां सर्वाधिपे कृष्णे भक्तिरव्यभिचारिणी ।अपि चाण्डालकर्माणस्तेऽपि विप्रोत्तमोत्तमाः ॥ ८८॥

yeṣāṃ sarvādhipe kṛṣṇe bhaktiravyabhicāriṇī |api cāṇḍālakarmāṇaste'pi viprottamottamāḥ || 88||

अपि शौचसमाचाराः कृष्णे ते सङ्गवर्जिताः ।श्मशानवासास्ते सर्वे सर्वकिल्बिषसम्भृताः ॥ ८९॥

api śaucasamācārāḥ kṛṣṇe te saṅgavarjitāḥ |śmaśānavāsāste sarve sarvakilbiṣasambhṛtāḥ || 89||

तव ध्यानपरा ये च तव पूजापरायणाः ।तव प्रसादभोक्तारस्ते सदा विघसाशिनः ॥ ९०॥

tava dhyānaparā ye ca tava pūjāparāyaṇāḥ |tava prasādabhoktāraste sadā vighasāśinaḥ || 90||

आराध्य सततं त्वां श्रीहरिं सर्वसुखप्रदम् ।प्राप्य त्वां परमात्मानमेष्टव्यं नावशिष्यते ॥ ९१॥

ārādhya satataṃ tvāṃ śrīhariṃ sarvasukhapradam |prāpya tvāṃ paramātmānameṣṭavyaṃ nāvaśiṣyate || 91||

साधुभिश्चिन्त्यते यश्च साध्वीभिः काम्यते तु यः ।पीयते योगमापन्नैर्यः स कृष्णोऽस्तु मे हृदि ॥ ९२॥

sādhubhiścintyate yaśca sādhvībhiḥ kāmyate tu yaḥ |pīyate yogamāpannairyaḥ sa kṛṣṇo'stu me hṛdi || 92||

भावपुष्पैः पूजयामि श्रद्धाञ्जलिप्रदोऽस्मि च ।आत्मानं दक्षिणां कृत्वाऽर्पयामि ते परेश्वर ॥ ९३॥

bhāvapuṣpaiḥ pūjayāmi śraddhāñjaliprado'smi ca |ātmānaṃ dakṣiṇāṃ kṛtvā'rpayāmi te pareśvara || 93||

यथा सर्पिः शरीरस्थं गवां न कुरुते बलम् ।निर्गतं कर्मसंयुक्तं दत्तं तासां बलप्रदम् ॥ ९४॥

yathā sarpiḥ śarīrasthaṃ gavāṃ na kurute balam |nirgataṃ karmasaṃyuktaṃ dattaṃ tāsāṃ balapradam || 94||

तथा त्वं हृदयस्थोऽपि मानवानां बलाय न ।त्वमेव निर्गतः साक्षाद्भूतो बलाय विद्यसे ॥ ९५॥

tathā tvaṃ hṛdayastho'pi mānavānāṃ balāya na |tvameva nirgataḥ sākṣādbhūto balāya vidyase || 95||

विनाऽऽराधनया कृष्ण त्वं कृपावशगो मम ।प्रत्यक्षं मानवं रूपं दृष्टं नारायणाच्युत ॥ ९६॥

vinā''rādhanayā kṛṣṇa tvaṃ kṛpāvaśago mama |pratyakṣaṃ mānavaṃ rūpaṃ dṛṣṭaṃ nārāyaṇācyuta || 96||

सदैव सेवितं चापि दिव्यं रूपं प्रदर्शय ।यद्यहं पात्रमस्म्यत्र कृपापात्रं भवामि चेत् ॥ ९७॥

sadaiva sevitaṃ cāpi divyaṃ rūpaṃ pradarśaya |yadyahaṃ pātramasmyatra kṛpāpātraṃ bhavāmi cet || 97||

विप्रत्वं मे गतं चापि त्वय्येव तत्समर्पितम् ।मुक्तत्वं वर्तते मे चेत् सर्वांशे तव भक्तिमान् ॥ ९८॥

vipratvaṃ me gataṃ cāpi tvayyeva tatsamarpitam |muktatvaṃ vartate me cet sarvāṃśe tava bhaktimān || 98||

एवं श्रीबदरीदेवि प्रार्थितः परमेश्वरः ।कृपयैव भूसुराय दिव्यं रूपमदर्शयत् ॥ ९९॥

evaṃ śrībadarīdevi prārthitaḥ parameśvaraḥ |kṛpayaiva bhūsurāya divyaṃ rūpamadarśayat || 99||

अक्षरस्थं चाऽवतारैरसङ्ख्यैराप्रपूरितम् ।मुक्तैर्मुक्तानिकाभिश्च सेवितं कमलादिभिः ॥ १००॥

akṣarasthaṃ cā'vatārairasaṅkhyairāprapūritam |muktairmuktānikābhiśca sevitaṃ kamalādibhiḥ || 100||

इति श्रीलक्ष्मीनारायणीयसंहितायाः तिष्यसन्तानात्मकस्य चतुर्थखण्डे२६अध्यायान्तर्गतं निकामदेवाख्यद्विजकृतं बालकृष्णस्तोत्रं सम्पूर्णम् ।लक्ष्मीनारायणीयसंहिता । खण्ड ४। अध्याय २६/४८१००॥लक्ष्मीनारायणीयसंहिता । खण्ड ४। अध्याय २६/४८-१००॥

iti śrīlakṣmīnārāyaṇīyasaṃhitāyāḥ tiṣyasantānātmakasya caturthakhaṇḍe26adhyāyāntargataṃ nikāmadevākhyadvijakṛtaṃ bālakṛṣṇastotraṃ sampūrṇam |lakṣmīnārāyaṇīyasaṃhitā | khaṇḍa 4| adhyāya 26/48100||lakṣmīnārāyaṇīyasaṃhitā | khaṇḍa 4| adhyāya 26/48-100||