नवरत्नस्तोत्रम् Navaratnastotram

चिन्ता कापि न कार्या निवेदितात्मभिः कदापीति ।भगवानपि पुष्टिस्थो न करिष्यति लौकिकीं च गतिम् ॥ १॥

cintā kāpi na kāryā niveditātmabhiḥ kadāpīti |bhagavānapi puṣṭistho na kariṣyati laukikīṃ ca gatim || 1||

निवेदनं तु स्मर्तव्यं सर्वथा तादृशैर्जनैः ।सर्वेश्वरश्च सर्वात्मा निजेच्छातः करिष्यति ॥ २॥

nivedanaṃ tu smartavyaṃ sarvathā tādṛśairjanaiḥ |sarveśvaraśca sarvātmā nijecchātaḥ kariṣyati || 2||

सर्वेषां प्रभुसम्बन्धो न प्रत्येकमिति स्थितिः ।अतोऽन्यविनियोगेऽपि चिन्ता का स्वस्य सोऽपि चेत् ॥ ३॥

sarveṣāṃ prabhusambandho na pratyekamiti sthitiḥ |ato'nyaviniyoge'pi cintā kā svasya so'pi cet || 3||

अज्ञानादथ वा ज्ञानात् कृतमात्मनिवेदनम् ।यैः कृष्णसात्कृतप्राणैस्तेषां का परिवेदना ॥ ४॥

ajñānādatha vā jñānāt kṛtamātmanivedanam |yaiḥ kṛṣṇasātkṛtaprāṇaisteṣāṃ kā parivedanā || 4||

तथा निवेदने चिन्ता त्याज्या श्रीपुरुषोत्तमे ।विनियोगेऽपि सा त्याज्या समर्थो हि हरिः स्वतः ॥ ५॥

tathā nivedane cintā tyājyā śrīpuruṣottame |viniyoge'pi sā tyājyā samartho hi hariḥ svataḥ || 5||

लोके स्वास्थ्यं तथा वेदे हरिस्तु न करिष्यति ।पुष्टिमार्गस्थितो यस्मात्साक्षिणो भवताऽखिलाः ॥ ६॥

loke svāsthyaṃ tathā vede haristu na kariṣyati |puṣṭimārgasthito yasmātsākṣiṇo bhavatā'khilāḥ || 6||

सेवाकृतिर्गुरोराज्ञाबाधनं वा हरीच्छया ।अतः सेवापरं चित्तं विधाय स्थीयतां सुखम् ॥ ७॥

sevākṛtirgurorājñābādhanaṃ vā harīcchayā |ataḥ sevāparaṃ cittaṃ vidhāya sthīyatāṃ sukham || 7||

चित्तोद्वेगं विधायापि हरिर्यद्यत्करिष्यति ।तथैव तस्य लीलेति मत्वा चिन्तां द्रुतं त्यजेत् ॥ ८॥

cittodvegaṃ vidhāyāpi hariryadyatkariṣyati |tathaiva tasya līleti matvā cintāṃ drutaṃ tyajet || 8||

तस्मात्सर्वात्मना नित्यं श्रीकृष्णः शरणं मम ।वदद्भिरेवं सततं स्थेयमित्येव मे मतिः ॥ ९॥

tasmātsarvātmanā nityaṃ śrīkṛṣṇaḥ śaraṇaṃ mama |vadadbhirevaṃ satataṃ stheyamityeva me matiḥ || 9||

इति श्रीवल्लभाचार्यविरचितं नवरत्नस्तोत्रं समाप्तम् ।

iti śrīvallabhācāryaviracitaṃ navaratnastotraṃ samāptam |