कृष्णनारायणस्तोत्रम् (नन्दिभिल्लकृतं लक्ष्मीनारायणीयसंहितान्तर्गतम्) Nandibhillakritam Krishnanarayana Stotram

नन्दिभिल्ल उवाच ।नमो नमस्ते निजरक्षकाय नमो नमस्तेऽन्यविनाशकाय ।नमो नमस्ते शिवसङ्ग्रहाय कलाधिनाथाय नमो नमस्ते ॥ ४७॥

nandibhilla uvāca |namo namaste nijarakṣakāya namo namaste'nyavināśakāya |namo namaste śivasaṅgrahāya kalādhināthāya namo namaste || 47||

नमो नमस्ते बहुमोहनाय नमोऽतिगर्विष्ठसुशासकाय ।नमो हृदिस्थाय परेश्वराय चाऽनादिनारायण ते नमोऽस्तु ॥ ४८॥

namo namaste bahumohanāya namo'tigarviṣṭhasuśāsakāya |namo hṛdisthāya pareśvarāya cā'nādinārāyaṇa te namo'stu || 48||

नमोऽक्षरेशाय परावराय नमो नमस्तेऽखिलकारणाय ।नमः समस्ताङ्गजतत्त्वगर्भप्रपूरकायाच्युत ते नमोऽस्तु ॥ ४९॥

namo'kṣareśāya parāvarāya namo namaste'khilakāraṇāya |namaḥ samastāṅgajatattvagarbhaprapūrakāyācyuta te namo'stu || 49||

नमोऽवतारिन्नवतारधर्त्रे ह्यनन्तमुक्ताऽभिनिषेविताय ।अनादिकृष्णाय परेश्वराय नारायणायेति नमोऽस्तु तुभ्यम् ॥ ५०॥

namo'vatārinnavatāradhartre hyanantamuktā'bhiniṣevitāya |anādikṛṣṇāya pareśvarāya nārāyaṇāyeti namo'stu tubhyam || 50||

श्रीकान्तरूपाय रमेश्वराय राधाधिनाथाय नमो नमस्ते ।नमोऽस्तु ते श्रीपुरपालकाय भूमन्नमस्ते ललितेश्वराय ॥ ५१॥

śrīkāntarūpāya rameśvarāya rādhādhināthāya namo namaste |namo'stu te śrīpurapālakāya bhūmannamaste laliteśvarāya || 51||

सर्वेश्वरीशाय समस्तसर्वेश्वरेश्वरेशाय नमोऽस्तु तुभ्यम् ।वैराजनाथाय जगन्नियन्त्रे मायेश्वरायाऽच्युत ते नमोऽस्तु ॥ ५२॥

sarveśvarīśāya samastasarveśvareśvareśāya namo'stu tubhyam |vairājanāthāya jaganniyantre māyeśvarāyā'cyuta te namo'stu || 52||

पितृर्षिदेवर्षिशरीरकाय चराचरान्तःस्थ च ते नमोऽस्तु ।श्रीमाणिकीपाशवतीश्चराय प्रशाधिनाथाय नमोऽस्तु तुभ्यम ॥ ५३॥

pitṛrṣidevarṣiśarīrakāya carācarāntaḥstha ca te namo'stu |śrīmāṇikīpāśavatīścarāya praśādhināthāya namo'stu tubhyama || 53||

ब्रह्मप्रियावामनिवासकाय हरिप्रियाद्याभिरभिष्टुताय ।कृतस्थली कुङ्कुमवापिकाय गोपालबालाय नमो नमस्ते ॥ ५४॥

brahmapriyāvāmanivāsakāya haripriyādyābhirabhiṣṭutāya |kṛtasthalī kuṅkumavāpikāya gopālabālāya namo namaste || 54||

श्रीकम्भरामातृभवाय कृष्णनारायणश्रीश च ते नमोऽस्तु ।साधुस्वरूपाय मखात्मकाय स्वामिन्नमस्ते रणरञ्जनाय ॥ ५५॥

śrīkambharāmātṛbhavāya kṛṣṇanārāyaṇaśrīśa ca te namo'stu |sādhusvarūpāya makhātmakāya svāminnamaste raṇarañjanāya || 55||

जन्मस्थितिभ्रंशकराय विष्णो जिष्णो नमस्ते परमेश्वराय ।सद्भक्तलभ्याय कृपावशाय शक्ताय कालाय नमो भवाय ॥ ५६॥

janmasthitibhraṃśakarāya viṣṇo jiṣṇo namaste parameśvarāya |sadbhaktalabhyāya kṛpāvaśāya śaktāya kālāya namo bhavāya || 56||

रुद्राय बाणाय रथाय शास्त्रे यमाय धर्माय नमो द्विजाय ।प्राणाय जीवाय तदात्मने तेऽन्विताय रिक्ताय नमोऽव्ययाय ॥ ५७॥

rudrāya bāṇāya rathāya śāstre yamāya dharmāya namo dvijāya |prāṇāya jīvāya tadātmane te'nvitāya riktāya namo'vyayāya || 57||

नागस्वरूपाय मदन्तकाय हृद्याय निर्वाणकराय धात्रे ।शीघ्रं शरण्यं त्वमभिप्रपद्य नयाक्षरं मोक्षपदं हरे माम् ॥ ५८॥

nāgasvarūpāya madantakāya hṛdyāya nirvāṇakarāya dhātre |śīghraṃ śaraṇyaṃ tvamabhiprapadya nayākṣaraṃ mokṣapadaṃ hare mām || 58||

कृतापराधं बहुगर्वदृब्धं परश्रियं वीक्ष्य सदा ज्वलन्तम् ।रणे स्थितं प्राणगतिं त्यजन्तं क्षमाप्य सर्वं नय मोक्षणं ते ॥ ५९॥

kṛtāparādhaṃ bahugarvadṛbdhaṃ paraśriyaṃ vīkṣya sadā jvalantam |raṇe sthitaṃ prāṇagatiṃ tyajantaṃ kṣamāpya sarvaṃ naya mokṣaṇaṃ te || 59||

सर्वज्ञ सर्वेश समस्तचक्षुः समस्तकर्णाऽत्ममनस्सु संस्थ ।दिव्यं निजं दर्शनमत्र देहि मृतान्समस्ताँश्च समुद्धराऽत्र ॥ ६०॥

sarvajña sarveśa samastacakṣuḥ samastakarṇā'tmamanassu saṃstha |divyaṃ nijaṃ darśanamatra dehi mṛtānsamastām̐śca samuddharā'tra || 60||

हरेऽग्निरातेन विबोधितेन मयापि गर्वादवमानितस्त्वम् ।अतोषदावानलमध्यमाप्तं समुद्धर श्रीश विधेहि दिव्यम् ॥ ६१॥

hare'gnirātena vibodhitena mayāpi garvādavamānitastvam |atoṣadāvānalamadhyamāptaṃ samuddhara śrīśa vidhehi divyam || 61||

स्वर्गं यथा वा नरकं मदर्थं यदस्ति तत्तेऽर्पितमत्र कृष्ण ।प्रपन्नजीवं परलोकयानं नयाऽक्षरं धाम विनाश्य पापम् ॥ ६२॥

svargaṃ yathā vā narakaṃ madarthaṃ yadasti tatte'rpitamatra kṛṣṇa |prapannajīvaṃ paralokayānaṃ nayā'kṣaraṃ dhāma vināśya pāpam || 62||

हरे कृष्ण हरे विष्णो कृष्णनारायण प्रभो ।तवास्मीति तवास्मीति मोक्षं मां नय माधव ॥ ६३॥

hare kṛṣṇa hare viṣṇo kṛṣṇanārāyaṇa prabho |tavāsmīti tavāsmīti mokṣaṃ māṃ naya mādhava || 63||

इत्युक्त्वा मौनमादाय कृताञ्जलिर्हृदन्तरे ।विवेश नन्दिभिल्लो वै स्मरन् ध्यायन् प्रभुं पतिम् ॥ ६४॥

ityuktvā maunamādāya kṛtāñjalirhṛdantare |viveśa nandibhillo vai smaran dhyāyan prabhuṃ patim || 64||

इति श्रीलक्ष्मीनारायणीयसंहितायाः तिष्यसन्तानात्मकस्य चतुर्थखण्डे८५अध्यायान्तर्गतं नन्दिभिल्लकृतं कृष्णनारायणस्तोत्रं सम्पूर्णम् ।लक्ष्मीनारायणीयसंहिता । खण्ड ४। अध्याय ८५/४७६४॥लक्ष्मीनारायणीयसंहिता । खण्ड ४। अध्याय ८५/४७-६४॥

iti śrīlakṣmīnārāyaṇīyasaṃhitāyāḥ tiṣyasantānātmakasya caturthakhaṇḍe85adhyāyāntargataṃ nandibhillakṛtaṃ kṛṣṇanārāyaṇastotraṃ sampūrṇam |lakṣmīnārāyaṇīyasaṃhitā | khaṇḍa 4| adhyāya 85/4764||lakṣmīnārāyaṇīyasaṃhitā | khaṇḍa 4| adhyāya 85/47-64||