नैवेद्यसमर्पणप्रार्थना Naivedyasamarpanaprarthana

यशोदायाः स्तन्ये तदनुनवनीते व्रजगवांविहारे दध्यन्ने व्रजयुवतिदत्ते बहुगुणे ।तथा मित्रात्प्राप्ते पृथुकवरमुष्टौ मुरहरेयया प्रीतिस्तां मे प्रकटय सुनैवेद्यनिचये ॥ १॥

yaśodāyāḥ stanye tadanunavanīte vrajagavāṃvihāre dadhyanne vrajayuvatidatte bahuguṇe |tathā mitrātprāpte pṛthukavaramuṣṭau murahareyayā prītistāṃ me prakaṭaya sunaivedyanicaye || 1||

विदुरस्य गृहे प्रीत्या यथा भुक्तं व्रजेश्वर ।तथैव भुङ्क्ष्व नैवेद्यं मयि नाथ कृपां कुरु ॥ २॥

vidurasya gṛhe prītyā yathā bhuktaṃ vrajeśvara |tathaiva bhuṅkṣva naivedyaṃ mayi nātha kṛpāṃ kuru || 2||

ब्रह्माद्यैर्यः परित उरुभी रूपवेषैः सुवेषोलक्ष्म्या शिञ्जद्वलयकरया सादरं वीज्यमानः ।नर्मक्रीडाप्रहसितमुखो भोजयन् भक्तियुक्तान्भुङ्क्ते पात्रे कनकघटितं षड्रसं श्रीरमेशः ॥ ३॥

brahmādyairyaḥ parita urubhī rūpaveṣaiḥ suveṣolakṣmyā śiñjadvalayakarayā sādaraṃ vījyamānaḥ |narmakrīḍāprahasitamukho bhojayan bhaktiyuktānbhuṅkte pātre kanakaghaṭitaṃ ṣaḍrasaṃ śrīrameśaḥ || 3||

नायिकाष्टकयुक्तोऽत्र भोजनं कुरु माधव ।षड्रसामृतनैवेद्यं स्वर्णपात्रे समर्पितम् ॥ ४॥

nāyikāṣṭakayukto'tra bhojanaṃ kuru mādhava |ṣaḍrasāmṛtanaivedyaṃ svarṇapātre samarpitam || 4||

यथा त्वं गोपिकादीनां निजानन्दं प्रयच्छसि ।तथैव भुक्तान्नशिष्टं भक्तेभ्यो यच्छ पुष्कलम् ॥ ५॥

yathā tvaṃ gopikādīnāṃ nijānandaṃ prayacchasi |tathaiva bhuktānnaśiṣṭaṃ bhaktebhyo yaccha puṣkalam || 5||

ब्रह्माद्याः सनकाद्याश्च नारदाद्या महत्तमम् ।हरिभुक्तावशिष्टान्नं सर्वे गृह्णन्ति वैष्णवाः ॥ ६॥

brahmādyāḥ sanakādyāśca nāradādyā mahattamam |haribhuktāvaśiṣṭānnaṃ sarve gṛhṇanti vaiṣṇavāḥ || 6||

इति श्रीनैवेद्यसमर्पणप्रार्थना समाप्ता ।

iti śrīnaivedyasamarpaṇaprārthanā samāptā |