हनूमच्चतुर्विंशतिः Shri Hanumachchaturvimshatih

यो बाल्येऽपि दिनेशं प्रोद्यन्तं पक्वदिव्यफलबुद्।ह्ध्या ।व्युदपतदाशु हि पुष्करमादातुं नौमि तं समीरसुतम् ॥ १॥

yo bālye'pi dineśaṃ prodyantaṃ pakvadivyaphalabud|hdhyā |vyudapatadāśu hi puṣkaramādātuṃ naumi taṃ samīrasutam || 1||

यस्मै भगवान्ब्रह्मा प्रायच्छद्वायुतृप्तये पूर्वम् ।विविधान्वरान्वरांस्तं वन्दे दुर्ज्ञेयदिव्यमहिमानम् ॥ २॥

yasmai bhagavānbrahmā prāyacchadvāyutṛptaye pūrvam |vividhānvarānvarāṃstaṃ vande durjñeyadivyamahimānam || 2||

सुरसावदनं विपुलं तरसा गत्वा विनिर्गतं दृष्ट्वा ।यं सुरनिकरा विस्मयमाजग्मुर्नौमि तं महाप्राज्ञम् ॥ ३॥

surasāvadanaṃ vipulaṃ tarasā gatvā vinirgataṃ dṛṣṭvā |yaṃ suranikarā vismayamājagmurnaumi taṃ mahāprājñam || 3||

लङ्कापुराधिदैवतगर्वं वेगाच्चपेटिकादानात् ।निर्मूलं यश्चक्रे वन्दे तं वायुसूनुममितबलम् ॥ ४॥

laṅkāpurādhidaivatagarvaṃ vegāccapeṭikādānāt |nirmūlaṃ yaścakre vande taṃ vāyusūnumamitabalam || 4||

गोष्पदवत्सरितांनिधिमुल्लङ्घ्याशोकविपिनगां सीताम् ।अद्राक्षीद्भयरहितो यस्तं प्रणमामि शिंशुपामूले ॥ ५॥

goṣpadavatsaritāṃnidhimullaṅghyāśokavipinagāṃ sītām |adrākṣīdbhayarahito yastaṃ praṇamāmi śiṃśupāmūle || 5||

रामादेशश्रवणानन्दादुद्धूतशोकगन्धां यः ।सीतां चक्रे मतिमांस्तमहं प्रणमामि शोकविच्छित्त्यै ॥ ६॥

rāmādeśaśravaṇānandāduddhūtaśokagandhāṃ yaḥ |sītāṃ cakre matimāṃstamahaṃ praṇamāmi śokavicchittyai || 6||

योऽक्षकुमारप्रमुखान् प्रवरान्दनुजाञ्जघान कुतुकेन ।एकः सहायरहितस्तमहं प्रणमामि गन्धवहसूनुम् ॥ ७॥

yo'kṣakumārapramukhān pravarāndanujāñjaghāna kutukena |ekaḥ sahāyarahitastamahaṃ praṇamāmi gandhavahasūnum || 7||

प्राप्य मणिं सीतायाः काननमसुरस्य सत्वरं भङ्क्त्वा ।दग्ध्वा लङ्कां योऽगाद्रघुवरनिकटं स मामवतु ॥ ८॥

prāpya maṇiṃ sītāyāḥ kānanamasurasya satvaraṃ bhaṅktvā |dagdhvā laṅkāṃ yo'gādraghuvaranikaṭaṃ sa māmavatu || 8||

सीताप्रोदितवचनान्यशेषतो यो निवेद्य रघुवीरम् ।चक्रे चिन्तारहितं वन्दे तं चिन्तितार्थदं नमताम् ॥ ९॥

sītāproditavacanānyaśeṣato yo nivedya raghuvīram |cakre cintārahitaṃ vande taṃ cintitārthadaṃ namatām || 9||

समरे वक्षसि येन प्रहतः संमूर्छितः ससंज्ञोऽथ ।प्रशशंस रावणो यं तमतिबलानन्दवर्धनं नौमि ॥ १०॥

samare vakṣasi yena prahataḥ saṃmūrchitaḥ sasaṃjño'tha |praśaśaṃsa rāvaṇo yaṃ tamatibalānandavardhanaṃ naumi || 10||

ओषधिगिरिमतिवेगाद्गत्वाऽऽनीय प्रवृद्धदिव्यतनुः ।यो लक्ष्मणासुदानं चक्रे तं नौमि गरुडनिभवेगम् ॥ ११॥

oṣadhigirimativegādgatvā''nīya pravṛddhadivyatanuḥ |yo lakṣmaṇāsudānaṃ cakre taṃ naumi garuḍanibhavegam || 11||

रघुपतिमुखारविन्दस्रवदागमशीर्षतत्त्वमकरन्दम् ।आपीयागलमनिशं नन्दन्तं नौमि पवनमूलधनम् ॥ १२॥

raghupatimukhāravindasravadāgamaśīrṣatattvamakarandam |āpīyāgalamaniśaṃ nandantaṃ naumi pavanamūladhanam || 12||

कनकाद्रिसदृशकायं कनकप्रदमाशु नम्रजनपङ्क्तेः ।रक्ताम्बुजास्यमीडे सक्तान्तःकरणमिनकुलोत्तंसे ॥ १३॥

kanakādrisadṛśakāyaṃ kanakapradamāśu namrajanapaṅkteḥ |raktāmbujāsyamīḍe saktāntaḥkaraṇaminakulottaṃse || 13||

कारुण्यजन्मभूमिं काकुत्स्थाङ्घ्र्यब्जपूजनासक्तम् ।कालाहितभयरहितं कामविदूरं नमामि कपिमुख्यम् ॥ १४॥

kāruṇyajanmabhūmiṃ kākutsthāṅghryabjapūjanāsaktam |kālāhitabhayarahitaṃ kāmavidūraṃ namāmi kapimukhyam || 14||

कुण्डलभासिकपोलं मण्डलमङ्घ्रिप्रणम्रजन्तूनाम् ।कुर्वन्तमीप्सितार्थैः सर्वैर्युक्तं भजेऽञ्जनासूनुम् ॥ १५॥

kuṇḍalabhāsikapolaṃ maṇḍalamaṅghripraṇamrajantūnām |kurvantamīpsitārthaiḥ sarvairyuktaṃ bhaje'ñjanāsūnum || 15||

नयनजितहेमगर्वं नयनयपारीणमञ्जनातनयम् ।गतिविजितजनककीर्तिं मतिमतिनिशितां ददानमहमीडे ॥ १६॥

nayanajitahemagarvaṃ nayanayapārīṇamañjanātanayam |gativijitajanakakīrtiṃ matimatiniśitāṃ dadānamahamīḍe || 16||

पुरतो भव करुणाब्धे भरताग्रचरणलग्नचित्ताब्ज ।हर मम निखिलां चिन्तां करजितपाथोज कलितवटुरूप ॥ १७॥

purato bhava karuṇābdhe bharatāgracaraṇalagnacittābja |hara mama nikhilāṃ cintāṃ karajitapāthoja kalitavaṭurūpa || 17||

रविसुतमन्त्रिवरेण्यं पविताडनसहनदक्षदिव्यहनुम् ।कविशिष्यहरणचतुरं सवितृविनेयं नमामि वातसुतम् ॥ १८॥

ravisutamantrivareṇyaṃ pavitāḍanasahanadakṣadivyahanum |kaviśiṣyaharaṇacaturaṃ savitṛvineyaṃ namāmi vātasutam || 18||

वक्षस्ताडितशैलं रक्षःपतिसैन्यमर्दनप्रवणम् ।रक्षाकरं नमस्याम्यक्षाधिपदूतमनिलपुण्यचयम् ॥ १९॥

vakṣastāḍitaśailaṃ rakṣaḥpatisainyamardanapravaṇam |rakṣākaraṃ namasyāmyakṣādhipadūtamanilapuṇyacayam || 19||

सुरदेशिकसदृशगिरं करजैर्हीरस्य कठिनतागर्वम् ।नरशृङ्गतां नयन्तं नरमनिशं नौमि वाद्यमनिलसुतम् ॥ २०॥

suradeśikasadṛśagiraṃ karajairhīrasya kaṭhinatāgarvam |naraśṛṅgatāṃ nayantaṃ naramaniśaṃ naumi vādyamanilasutam || 20||

श्रीपारिजातपादपमूले वासं करोषि किं हनुमन् ।अध्येतुमवनताखिलवाञ्छितदातृत्वमवनिजेड्दूत ॥ २१॥

śrīpārijātapādapamūle vāsaṃ karoṣi kiṃ hanuman |adhyetumavanatākhilavāñchitadātṛtvamavanijeḍdūta || 21||

पुरदग्धारं मनसिजजेतारं भक्तमन्तुसहनचणम् ।त्वामीशानं के वा न ब्रुवते ब्रूहि वायुसूनो मे ॥ २२॥

puradagdhāraṃ manasijajetāraṃ bhaktamantusahanacaṇam |tvāmīśānaṃ ke vā na bruvate brūhi vāyusūno me || 22||

पुरदग्धारं मनसिजजेतारं रामनामरुचिविज्ञम् ।हनुमन्भवन्तमीशं वदति न कः प्रणतसर्वदोषसहम् ॥ २३॥

puradagdhāraṃ manasijajetāraṃ rāmanāmarucivijñam |hanumanbhavantamīśaṃ vadati na kaḥ praṇatasarvadoṣasaham || 23||

सहमानापरमूर्ते सह माननान्मम मन्तून् ।पवमानपुण्यराशे प्लवमानाब्धौ नमामि तव चरणौ ॥ २४॥

sahamānāparamūrte saha mānanānmama mantūn |pavamānapuṇyarāśe plavamānābdhau namāmi tava caraṇau || 24||

इति शृङ्गेरि श्रीजगद्गुरु श्रीसच्चिदानन्दशिवाभिनवनृसिंहभारतीस्वामिभिः विरचिता श्रीहनूमच्चतुर्विशतिः सम्पूर्णा ।

iti śṛṅgeri śrījagadguru śrīsaccidānandaśivābhinavanṛsiṃhabhāratīsvāmibhiḥ viracitā śrīhanūmaccaturviśatiḥ sampūrṇā |