हनुमद्रक्षास्तोत्रम् २ Shri Hanumad Raksha Stotram

प्रणम्य श्रीगणेशं च श्रीरामं मारुतिं तथा ।रक्षामिमां पठेत्प्राज्ञः श्रद्धाभक्ति समन्वितः ॥ १॥

praṇamya śrīgaṇeśaṃ ca śrīrāmaṃ mārutiṃ tathā |rakṣāmimāṃ paṭhetprājñaḥ śraddhābhakti samanvitaḥ || 1||

शिरो मे हनुमान् पातु भालं पवननन्दनः ।आञ्जनेयो दृशौ पातु रामचन्द्रप्रियश्रुती ॥ २॥

śiro me hanumān pātu bhālaṃ pavananandanaḥ |āñjaneyo dṛśau pātu rāmacandrapriyaśrutī || 2||

घ्राणं पातु महावीरो मुखं लक्ष्मणप्राणदः ।जिह्वां मनोजवः पातु कण्ठं पातु जितेन्द्रियः ॥ ३॥

ghrāṇaṃ pātu mahāvīro mukhaṃ lakṣmaṇaprāṇadaḥ |jihvāṃ manojavaḥ pātu kaṇṭhaṃ pātu jitendriyaḥ || 3||

स्कन्धौ महाबली पातु भुजौ सङ्कटमोचनः ।करौ विश्वम्भरः पातु हृदयं सर्वशक्तिमान् ॥ ४॥

skandhau mahābalī pātu bhujau saṅkaṭamocanaḥ |karau viśvambharaḥ pātu hṛdayaṃ sarvaśaktimān || 4||

मध्यं पातु महातेजाः नाभिं सागरलङ्घनः ।रामदूतः कटी पातु सक्थिनी राक्षसेन्द्रजित् ॥ ५॥

madhyaṃ pātu mahātejāḥ nābhiṃ sāgaralaṅghanaḥ |rāmadūtaḥ kaṭī pātu sakthinī rākṣasendrajit || 5||

ऊरू पुच्छबलः पातु भीमगर्वापहारकः ।जानुनी श्रीप्रदः पातु जङ्घे लङ्काप्रदाहकः ॥ ६॥

ūrū pucchabalaḥ pātu bhīmagarvāpahārakaḥ |jānunī śrīpradaḥ pātu jaṅghe laṅkāpradāhakaḥ || 6||

पादौ श्रीरामभक्तश्च सूर्यमण्डलभक्षकः ।हनुमान् पातु मे कायं मकरध्वज जन्मदः ॥ ७॥

pādau śrīrāmabhaktaśca sūryamaṇḍalabhakṣakaḥ |hanumān pātu me kāyaṃ makaradhvaja janmadaḥ || 7||

एतां रुद्रबलोपेतां रक्षां यः सुकृती पठेत् ।सदीर्घायुसुखी पुत्री बलवान् बुद्धिमान् भवेत् ॥ ८॥

etāṃ rudrabalopetāṃ rakṣāṃ yaḥ sukṛtī paṭhet |sadīrghāyusukhī putrī balavān buddhimān bhavet || 8||

इति श्रीरामरक्षास्तोत्रमनुश्रुत्य श्रीसीतारामशर्मणाविरचितं श्रीमद् हनुमद्रक्षास्तोत्रं सम्पूर्णम् ॥

iti śrīrāmarakṣāstotramanuśrutya śrīsītārāmaśarmaṇāviracitaṃ śrīmad hanumadrakṣāstotraṃ sampūrṇam ||