हनुमच्चत्वारिंशिका Shri Hanumachchatvarimshika

श्रीगुरुपदपङ्कजनखज्योतिर्मनसि निधाय ।हनुमच्चत्वारिंशिकां गृणे हरिं प्रणिधाय ॥अथ सीतापतिचरणरतहनुमन्तं प्रणमामि ।देहि रामपदरतिमहं त्वामिह शरणं यामि ॥जय हनुमन्मतिमन्दिरसुन्दर ।जय रिपुकटकपयोनिधिमन्दर ॥ १॥

śrīgurupadapaṅkajanakhajyotirmanasi nidhāya |hanumaccatvāriṃśikāṃ gṛṇe hariṃ praṇidhāya ||atha sītāpaticaraṇaratahanumantaṃ praṇamāmi |dehi rāmapadaratimahaṃ tvāmiha śaraṇaṃ yāmi ||jaya hanumanmatimandirasundara |jaya ripukaṭakapayonidhimandara || 1||

जय धृतराघवमानसधामन् ।भूविश्रुतमारुतसुतनामन् ॥ २॥

jaya dhṛtarāghavamānasadhāman |bhūviśrutamārutasutanāman || 2||

जय मण्डितरणरङ्ग कृपालो ।रामदूत जय दीनदयालो ॥ ३॥

jaya maṇḍitaraṇaraṅga kṛpālo |rāmadūta jaya dīnadayālo || 3||

जयतु कनकगिरिसदृशशरीरः ।वेगिविडम्बितगरुडसमीरः ॥ ४॥

jayatu kanakagirisadṛśaśarīraḥ |vegiviḍambitagaruḍasamīraḥ || 4||

शिवविग्रहपूजितरघुवीरः ।ब्रह्मचर्यरतसंयमधीरः ॥ ५॥

śivavigrahapūjitaraghuvīraḥ |brahmacaryaratasaṃyamadhīraḥ || 5||

वन्दे वन्दिचरणजलजातम् ।आञ्जनेयभवसत्कृतवातम् ॥ ६॥

vande vandicaraṇajalajātam |āñjaneyabhavasatkṛtavātam || 6||

धृतकलकुण्डललसदुपवीतः ।कुञ्चितकुन्तलपरमविनीतः ॥ ७॥

dhṛtakalakuṇḍalalasadupavītaḥ |kuñcitakuntalaparamavinītaḥ || 7||

खलमदहरकर्कशलाङ्गूलम् ।सततं जनयति रिपुहृदि शूलम् ॥ ८॥

khalamadaharakarkaśalāṅgūlam |satataṃ janayati ripuhṛdi śūlam || 8||

चन्द्रवदनबलनिधिभुजदण्डः ।वक्षःस्थलवरपविनखचण्डः ॥ ९॥

candravadanabalanidhibhujadaṇḍaḥ |vakṣaḥsthalavarapavinakhacaṇḍaḥ || 9||

रोमरोमप्रतिलेखितरामः ।वज्रदेहपूरितजनकामः ॥ १०॥

romaromapratilekhitarāmaḥ |vajradehapūritajanakāmaḥ || 10||

प्रबलपराक्रमविषमकरालः ।महाकालमदहरखलकालः ॥ ११॥

prabalaparākramaviṣamakarālaḥ |mahākālamadaharakhalakālaḥ || 11||

केसरिनन्दनजनसुखदायी ।मानसकथासुधारसपायी ॥ १२॥

kesarinandanajanasukhadāyī |mānasakathāsudhārasapāyī || 12||

राघवचरवरमोदविधाता ।सीतान्वेषकवानरत्राता ॥ १३॥

rāghavacaravaramodavidhātā |sītānveṣakavānaratrātā || 13||

सुरसासिंहिकादिमदहर्ता ।कौतुकजलनिधिलङ्घनकर्ता ॥ १४॥

surasāsiṃhikādimadahartā |kautukajalanidhilaṅghanakartā || 14||

दुष्टलङ्किनीकैतवहर्ता ।भक्तविभीषणतोषणकर्ता ॥ १५॥

duṣṭalaṅkinīkaitavahartā |bhaktavibhīṣaṇatoṣaṇakartā || 15||

दृष्टविरहरतकृषतनुसीतः ।दत्तमुद्रिकानाशितचिन्तः ॥ १६॥

dṛṣṭaviraharatakṛṣatanusītaḥ |dattamudrikānāśitacintaḥ || 16||

श्रुत्वा रामकुशलमथ सीता ।त्वामाशिषामोदयदभीता ॥ १७॥

śrutvā rāmakuśalamatha sītā |tvāmāśiṣāmodayadabhītā || 17||

जयत्यशोकविपिनश्रीहर्ता ।अक्षविमर्दनखलसंहर्ता ॥ १८॥

jayatyaśokavipinaśrīhartā |akṣavimardanakhalasaṃhartā || 18||

कृतघननादशक्तिमदनाशः ।अङ्गीकृतरावणसुतपाशः ॥ १९॥

kṛtaghananādaśaktimadanāśaḥ |aṅgīkṛtarāvaṇasutapāśaḥ || 19||

दशमुखबोधकविगताशङ्कः ।पुच्छहुताशनदाहितलङ्कः ॥ २०॥

daśamukhabodhakavigatāśaṅkaḥ |pucchahutāśanadāhitalaṅkaḥ || 20||

सीतातोषणधृतलघुरूपः ।स्वीकृतचूडामणिकपिभूपः ॥ २१॥

sītātoṣaṇadhṛtalaghurūpaḥ |svīkṛtacūḍāmaṇikapibhūpaḥ || 21||

तीर्णवारिनिधिमोदितकीशः ।प्रमुदितविहितकोसलाधीशः ॥ २२॥

tīrṇavārinidhimoditakīśaḥ |pramuditavihitakosalādhīśaḥ || 22||

परिष्वज्य हनुमन्तं रामः ।बहुप्रशंससजलघनश्यामः ॥ २३॥

pariṣvajya hanumantaṃ rāmaḥ |bahupraśaṃsasajalaghanaśyāmaḥ || 23||

जयति सुकण्ठशोकभयनाशी ।जयति विभीषणभाग्यविकाशी ॥ २४॥

jayati sukaṇṭhaśokabhayanāśī |jayati vibhīṣaṇabhāgyavikāśī || 24||

जयति पदाश्रितसेवकपाता ।शाब्दिकमणिसामश्रुतिगाता ॥ २५॥

jayati padāśritasevakapātā |śābdikamaṇisāmaśrutigātā || 25||

कालनेमिमकरीसंहारी ।लक्ष्मणजीवनजनभयहारी ॥ २६॥

kālanemimakarīsaṃhārī |lakṣmaṇajīvanajanabhayahārī || 26||

रामचन्द्रसुखसिन्धुनिशेशः ।विकलभरतजलजातदिनेशः ॥ २७॥

rāmacandrasukhasindhuniśeśaḥ |vikalabharatajalajātadineśaḥ || 27||

जयति पवनसुत घातितवाली ।महावीर बलविक्रमशाली ॥ २८॥

jayati pavanasuta ghātitavālī |mahāvīra balavikramaśālī || 28||

जय नतसुरवर जय वानरचर ।जय रणकर्कश जय राघवचर ॥ २९॥

jaya natasuravara jaya vānaracara |jaya raṇakarkaśa jaya rāghavacara || 29||

जय सीतासुत विशदपराक्रम ।जय हृतभक्तशोकसंशयभ्रम ॥ ३०॥

jaya sītāsuta viśadaparākrama |jaya hṛtabhaktaśokasaṃśayabhrama || 30||

जय रघुवीरपयोधरचातक ।जय कपीश दशमुखकुलघातक ॥ ३१॥

jaya raghuvīrapayodharacātaka |jaya kapīśa daśamukhakulaghātaka || 31||

यातुधानकुलकमलतुषारः ।रामचन्द्रजनजीवनसारः ॥ ३२॥

yātudhānakulakamalatuṣāraḥ |rāmacandrajanajīvanasāraḥ || 32||

सीताशोकपयोधरवायुः ।सकलसिद्धिदाता दीर्घायुः ॥ ३३॥

sītāśokapayodharavāyuḥ |sakalasiddhidātā dīrghāyuḥ || 33||

रामभक्तिनिधिभाण्डागारम् ।नौमि कृताञ्जलिपवनकुमारम् ॥ ३४॥

rāmabhaktinidhibhāṇḍāgāram |naumi kṛtāñjalipavanakumāram || 34||

रामकथारसरसिकमुदारम् ।नौमि विरतिरतिगेहमपारम् ॥ ३५॥

rāmakathārasarasikamudāram |naumi viratiratigehamapāram || 35||

शरणागतवत्सल कपिदेव ।द्रवतु शिशौ मयि कृतप्रभुसेव ॥ ३६॥

śaraṇāgatavatsala kapideva |dravatu śiśau mayi kṛtaprabhuseva || 36||

तारय पापपयोनिधिलीनम् ।कीश पाहि मां शिशुमतिदीनम् ॥ ३७॥

tāraya pāpapayonidhilīnam |kīśa pāhi māṃ śiśumatidīnam || 37||

कुटिलकुभाग्यकुमतिकुसमाजम् ।पाहि कपीश पापिकुलराजम् ॥ ३८॥

kuṭilakubhāgyakumatikusamājam |pāhi kapīśa pāpikularājam || 38||

जय जय जय हनुमन्सुखसिन्धो ।दयां विधेहि प्रणतजनबन्धो ॥ ३९॥

jaya jaya jaya hanumansukhasindho |dayāṃ vidhehi praṇatajanabandho || 39||

गिरिधरमेनमभाग्यमनाथम् ।दृष्ट्वा दर्शय रघुकुलनाथम् ॥ ४०॥

giridharamenamabhāgyamanātham |dṛṣṭvā darśaya raghukulanātham || 40||

रामदूत पवमानसुत दत्तभक्तविश्राम ।सीतारामयुतो विहर गिरिधरहृदि अभिराम ॥हनुमच्चत्वारिंशिकामिमां पठतु यदि कोऽपि ।गिरिधरगीतां रामपदरतिं याति किल सोऽपि ॥इति श्रीहनुमच्चत्वारिंशिका सम्पूर्णा ।प्रणेतारः महाकविमहामहोपाध्यायश्रीचित्रकूटतुलसीपीठाधीश्वरजगद्गुरुरामानन्दाचार्यस्वामिरामभद्राचार्यमहाराजाः ।

rāmadūta pavamānasuta dattabhaktaviśrāma |sītārāmayuto vihara giridharahṛdi abhirāma ||hanumaccatvāriṃśikāmimāṃ paṭhatu yadi ko'pi |giridharagītāṃ rāmapadaratiṃ yāti kila so'pi ||iti śrīhanumaccatvāriṃśikā sampūrṇā |praṇetāraḥ mahākavimahāmahopādhyāyaśrīcitrakūṭatulasīpīṭhādhīśvarajagadgururāmānandācāryasvāmirāmabhadrācāryamahārājāḥ |