उत्तरदिनचर्या Uttaradinacharya

श्रीदेवराजगुरुभिरनुगृहीताश्रीरस्तु ।श्रीमते हयग्रीवाय नमः ।श्रीमते रामानुजाय नमः ॥अथ गोष्ठीं गरिष्ठानामधिष्ठाय सुमेधसाम् ।वाक्यालङ्कृतिवाक्यानां व्याख्यातारं नमामि तम् ॥ १॥

śrīdevarājagurubhiranugṛhītāśrīrastu |śrīmate hayagrīvāya namaḥ |śrīmate rāmānujāya namaḥ ||atha goṣṭhīṃ gariṣṭhānāmadhiṣṭhāya sumedhasām |vākyālaṅkṛtivākyānāṃ vyākhyātāraṃ namāmi tam || 1||

सायन्तनं ततः कृत्वा सम्यगाराधनं हरेः ।स्वैरालापैः शुभैश्श्रोतॄन्नन्दयन्तं नमामि तम् ॥ २॥

sāyantanaṃ tataḥ kṛtvā samyagārādhanaṃ hareḥ |svairālāpaiḥ śubhaiśśrotṝnnandayantaṃ namāmi tam || 2||

ततः कनकपर्यङ्के तरुणद्युमणिद्युतौ ।विशालविमलश्लक्ष्णतुङ्गतूलासनोज्ज्वले ॥ ३॥

tataḥ kanakaparyaṅke taruṇadyumaṇidyutau |viśālavimalaślakṣṇatuṅgatūlāsanojjvale || 3||

समग्रसौरभोद्गारनिरन्तरदिगन्तरे ।सोपधाने सुखासीनं सुकुमारे वरासने ॥ ४॥

samagrasaurabhodgāranirantaradigantare |sopadhāne sukhāsīnaṃ sukumāre varāsane || 4||

उन्मीलत्पद्मगर्भद्युतितलमुपरि क्षीरसङ्घातगौरंराकाचन्द्रप्रकाशप्रचुरनखमणिद्योतविद्योतमानम् ।अङ्गुल्यग्रेषु किञ्चिन्नतमतिमृदुलं रम्यजामातृयोगीदिव्यं तत्पादयुग्मं दिशतु शिरसि मे देशिकेन्द्रो दयालुः ॥ ५॥

unmīlatpadmagarbhadyutitalamupari kṣīrasaṅghātagauraṃrākācandraprakāśapracuranakhamaṇidyotavidyotamānam |aṅgulyagreṣu kiñcinnatamatimṛdulaṃ ramyajāmātṛyogīdivyaṃ tatpādayugmaṃ diśatu śirasi me deśikendro dayāluḥ || 5||

त्वं मे बन्धुस्त्वमसि जनकस्त्वं सखा देशिकस्त्वंविद्या वृत्तं सुकृतमतुलं वित्तमप्युत्तमं त्वम् ।आत्मा शेषी भवसि भगवन्नान्तरश्शासिता त्वंयद्वा सर्वं वरवरमुने ! यद्यदात्मानुरूपम् ॥ ६॥

tvaṃ me bandhustvamasi janakastvaṃ sakhā deśikastvaṃvidyā vṛttaṃ sukṛtamatulaṃ vittamapyuttamaṃ tvam |ātmā śeṣī bhavasi bhagavannāntaraśśāsitā tvaṃyadvā sarvaṃ varavaramune ! yadyadātmānurūpam || 6||

अग्रे पश्चादुपरि परितो भूतलं पार्श्वतो मेमौलौ वक्त्रे वपुषि सकले मानसाम्भोरुहे च ।दर्शंदर्शं वरवरमुने दिव्यमङ्घ्रिद्वयं तेनित्यं मज्जन्नमृतजलधौ निस्तरेयं भवाब्धिम् ॥ ७॥

agre paścādupari parito bhūtalaṃ pārśvato memaulau vaktre vapuṣi sakale mānasāmbhoruhe ca |darśaṃdarśaṃ varavaramune divyamaṅghridvayaṃ tenityaṃ majjannamṛtajaladhau nistareyaṃ bhavābdhim || 7||

कर्माधीने वपुषि कुमतिः कल्पयन्नात्मभावंदुःखे मग्नः किमिति सुचिरं दूयते जन्तुरेषः ।सर्वे त्यक्त्वा वरवरमुने ! संप्रति त्वत्प्रसादाद्दिव्यं प्राप्तुस्तव पदयुगं देहि मे सुप्रभातम् ॥ ८॥

karmādhīne vapuṣi kumatiḥ kalpayannātmabhāvaṃduḥkhe magnaḥ kimiti suciraṃ dūyate jantureṣaḥ |sarve tyaktvā varavaramune ! saṃprati tvatprasādāddivyaṃ prāptustava padayugaṃ dehi me suprabhātam || 8||

या या वृत्तिर्मनसि मम सा जायतां संस्मृतिस्तेयो यो जल्पस्स भवतु! विभो! नामसङ्कीर्तनं ते ।या या चेष्टा वपुषि भगवन् ! सा भवेद्वन्दनं तेसर्वे भूयाद्वरवरमुने ! सम्यगाराधनं ते ॥ ९॥

yā yā vṛttirmanasi mama sā jāyatāṃ saṃsmṛtisteyo yo jalpassa bhavatu! vibho! nāmasaṅkīrtanaṃ te |yā yā ceṣṭā vapuṣi bhagavan ! sā bhavedvandanaṃ tesarve bhūyādvaravaramune ! samyagārādhanaṃ te || 9||

अपगतमदमानैरन्तिमोपायनिष्ठैरधिगतपरमार्थैरर्थकामानपेक्षैः ।निखिलजनसुहृद्भिर्निर्जितक्रोधलोभैर्वरवरमुनिभृत्यैरस्तु मे नित्ययोगः ॥ १०॥

apagatamadamānairantimopāyaniṣṭhairadhigataparamārthairarthakāmānapekṣaiḥ |nikhilajanasuhṛdbhirnirjitakrodhalobhairvaravaramunibhṛtyairastu me nityayogaḥ || 10||

इति स्तुतिनिबन्धेन सूचितस्वमनीषितान् ।भृत्यान् प्रेमार्द्रया दृष्ट्या सिञ्चन्तं सिन्तयामि तम् ॥ ११॥

iti stutinibandhena sūcitasvamanīṣitān |bhṛtyān premārdrayā dṛṣṭyā siñcantaṃ sintayāmi tam || 11||

अथ भृत्याननुज्ञाप्य कृत्वा चेतश्शुभाश्रये ।शयनीयं परिष्कृत्य शयानं संस्मरामि तम् ॥ १२॥

atha bhṛtyānanujñāpya kṛtvā cetaśśubhāśraye |śayanīyaṃ pariṣkṛtya śayānaṃ saṃsmarāmi tam || 12||

दिनचर्यामिमां दिव्यां रम्यजामातृयोगिनः ।भक्त्या नित्यमनुध्यायन् प्राप्नोति परमं पदम् ॥ १३॥

dinacaryāmimāṃ divyāṃ ramyajāmātṛyoginaḥ |bhaktyā nityamanudhyāyan prāpnoti paramaṃ padam || 13||

इति उत्तरदिनचर्या समाप्ता ।

iti uttaradinacaryā samāptā |